1 Samuel 26

₁Som lma' ye Zif, nqo'ona co'ollaxa ye Gabaa maye hueta'a so Saúl nache 'enapega, 'eeta': «'Am nta'a, so David nqañoxottaigui añi qasoxonaxa maye naña ye Jaquilá, yem datatta ye toolec 'alhua.» ₂Nache so Saúl jec, nnaicapegue' so tres mil nalleppi Israel le'ecpi maye ỹataqta ỹaỹaten da l-loquiaxac, nache nqo'ona ye toolec 'alhua ye Zif, da nmitaique so David. ₃Qaq nache hua'a co'ollaxa añi coma' maye naña ye Jaquilá, maye neteua'a na laỹe so nqa'aic maye pa'aỹa'ague da nala' lliguisheguem so toolec 'alhua. Qaq so David maye hueta'a se'eso toolec 'alhua, co'ollaq nanoma da so Saúl nmittaique somaye, ₄nache ỹama'q soua lmeenaxanaxanqa, da yaqto' ỹaỹaten ca hueta'a so Saúl. ₅Ime, nache so David nqo'ona co'ollaxa so lanataqa' so Saúl, nache ỹaỹataxaren so lo'ochaqa' somaye qataq so Abner, som llalec so Ner, maye lataxala' so nalleppi somaye. Qaq so Saúl do'ocheta co'ollaxa hueta'a so lanataqa' qaq so nalleppi nache coleesop somaye. ₆Nache so David inat so Ajimélec som hitiita qataq so Abisay som llalec so Seruyá, maye lqaỹa so Joab, 'eeta':

¿Negue't ca lhuotta da aỹem ca'ategue da ñeqo'onaxa ye lanataqa' so Saúl?

Nache so Abisay 'enapeco': Aỹem 'am seca'ategue.

₇Qaq nacheso se'eso pe da so David qataq so Abisay taỹalo so nanataqa', nache so Saúl do'ocheta co'ollaxa huetaigui so lpe'l, qaq aso lataquiaxai qalaq na'attañi neta'aguet so na'axanaqa'. Qaq so Abner qataq so alleppi nnaatai' qaicoleesop somaye. ₈Nache so Abisay 'enapego' so David, 'eeta':

Ñim Lo'onatac 'Enauacna, 'am ỹanem nagui da 'oxonec ye 'ampa'aguenaxaua. Ñaq aỹem 'aua'axaỹa'a da salauat nagui, sera'a ara maiche lataquiaxai, nache seqotaxana'aguet na 'alhua da sa'arapec yaqto' saiuen da she'eguelaqtalec.

₉Qalaxaye so David, 'enapeco':

'Aua'aqta'a, saishet da 'aualauat, cha'aye saishet da saqca ca nhuaxanaguec ca ỹalauat ca nta'a maye lca'aguishec Ñim Nataxala'. ₁₀Qataq 'enapeco': Cha'aye ỹoqta 'eesa da Ñim Nataxala' nca'altauec, qaq nacheñi qome ñi ique'emaqchet yemaye, qom ivita ca laloqo', huo'otaq qom huaigui ca loquiaxac nache ileu. ₁₁Qaq Ñim Nataxala' choche aỹem ichoxoren qome, souaxat da sauotaique da salauat ye nta'a maye lca'aguishec Ñimaye. Qaq nacherato' da 'auacona ara lataquiaxai maye na'axaata'aguet, qataq añi nỹomaxaqui, nache qolaq qome. ₁₂Ime, nache maicheso so David da ỹacona aso taquiaxai qataq aso ỹomaxaqui maye na'axaata'agueta so Saúl, nache soomaye je'c. Qalaxaye qaica ca ỹauaneguelo qataq ca nanomalo soomaye, cha'aye 'enauac da do'ocheta somayepi, qataq Ñim Nataxala' nache 'ena'aco' da ỹaguec naqa'en na lo'ochaxa somayepi. ₁₃Ime, nache so David taitague da le'ego so ca'amegue, nache tasheguemec ana lmilo aso qasoxonaxa nache qaỹoqta so hueta'a somayepi. ₁₄Huaña, nache so David ỹataqta ncosaxaren da iỹaxaata so Abner qataq so alleppi, 'eeta':

¡Abner, aỹem 'aua'aqtega!

Nache so Abner, 'enapeco':

¡Negue't 'am, da 'auqaqaatalec ye nta'a!

₁₅Nache so David, 'enapega somaye, 'eeta':

¿Saisheto' da nache 'am da 'am 'añaxaic, maye qaica ca qoneta'am na Israel le'ecpi? ¿Ta'ainco' da saishet da 'ampaxaalec da nachaalataxac ye 'arataxala' maye nta'a? 'Am sa'aqtaxanem da huo'o so nqo'oneua'a da huotaique ỹalauat yemaye. ₁₆Qaq de'era 'auo'ot ỹataqta saỹaỹamaxañi. Qaq ỹoqo'oye sanot da ỹa'aqtac Ñim Nataxala' da qami' iuen da qaullivi, cha'aye saqauaỹachiñi da qauloỹeegue ye nta'a maye lca'aguishec Ñim Nataxala'. Qaq ỹoqo'oye qaumichiñi ¿ca hueta'ague aca lataquiaxai qataq aca ỹomaxaqui maye na'axaata'agueta co'ollaxa yemaye?

₁₇Nache so Saúl, co'ollaq ỹauatto'n naua la'aqtaqa so David, nache, 'enapeco':

¡Ỹalcolec David, nache 'am da aỹem 'antaqtegueta!

Nache so David, 'enapeco':

Aja', nachaỹem 'am nta'a. ₁₈Qalaxaye 'am nataxala', ¿ta'ainco' da 'aucaatac ne'ena 'aramaxashec? ¿Negue'to' ca sasouaxat? ¿Negue't cam qauem maye 'am so'otec? ₁₉Qaq ỹoqo'oye 'am ỹataxala', 'am ñachoxonnot da 'ana'axaỹaxana ne'ena 'aramaxashec. Da nacheñi Ñim Nataxala' ñim ỹo'ot da aỹem 'auataỹa'aguet, qaq no'on da Ñimaye ỹaconeguet qome aca ỹachetaqtaxanaqte, qalaxaye da maiche chegoqchigui na ỹalleppi damaye, nache Ñim Nataxala' ỹasaxalec qome ca nhuaxanaguec namayepi. Cha'aye nachena na aỹem ỹo'orauec nagui, da yaqto' saishet da sootalec ne'ena 'alhua maye lalamaxat Ñimaye, qataq 'eco' da aỹem ỹamaqtalec da ñatamnot na laỹepi atamnaxala'pi. ₂₀Qaq da seleu, nache saishet qome da qaỹoqta ne'ena 'alhua maye lalamaxat Ñim Nataxala' ca huaña da huecoldec qanqa'en naua itago'q. Qaq 'am nta'a, ye 'aucaataco' nam pioq lalaxat, 'eeta'am ca icaatac ca dachemi da hualec ca no'onaxa. ₂₁Nache so Saúl, 'enapeco':

¡'Am ỹalcolec David, aỹem saỹaten da huo'o da ỹasouaxashet! ¡Sheeta'am cam qaica cam ỹaỹaana'a qataq huo'o da ñe'enaxac! ¡Qalaxaye 'añe'eguelaq qome, cha'aye aỹem saishet qome da she'eguelaxalec da 'am so'otec ca qauem, cha'aye ỹataqta huo'o da 'enec 'anqa'en da ñachaalataxac! ₂₂Nache so David ỹasateguet somaye, 'eeta':

'Ana ana 'arataquiaxai 'am nta'a, ña 'anamaq ca 'oonolec na 'aramaxashecpi da ñe'eguena'ata, ₂₃qaq Ñim Nataxala' maiche do'onataxana qome da nalochiguiñi lo'onataxanaxac, da isheeten ñi 'oonolec da shenaqta. Cha'aye Ñimaye 'am ỹaneguet da ihuaqỹaxac da huo'o ca 'am so'otec, qalaxaye aỹem saishet da huo'o ca 'am so'otec, cha'aye 'am lca'aguishec Ñimaye. ₂₄Qaq de'era sheetec nagui da saishet da huo'o ca so'otec da 'anachaalataxac. Nache 'onaxaic da nache 'eetec Ñim Nataxala' da ntela'a qome da ñachaalataxac, qataq aỹem ỹeltaxaneguet 'enauac da nhuogoxo.

₂₅Nache so Saúl, 'enapeco':

¡'Am ỹalcolec David! ¡Ỹataqta 'auamachiguiñi qome! ¡Cha'aye ỹataqta lta'araicpi qome nam 'auacoolecpi da 'auo'ot, qataq qaica ca nqanaxattac!

Qaq co'ollaq ime de'era, nache so Saúl ỹe'eguelaxa so lma', qaq so David qalaq nache queto'ot da llecỹaxac.