Ñim Nataxala' iỹaxana so Samuel
1Qaq so nsoqolec Samuel, nache queto'ot co'ollaxa da do'onataxaatacot Ñim Nataxala', qaq so Elí ilotague' somaye. Qaq se'esoua vi'iye saishet da ỹa'atta'a't da qaỹa'aqtega ca la'aqtac Ñim Nataxala', qataq qaica ca ỹanem da huo'o ca lauanaqchec. 2Qaq so Elí mashe huotaique da sa nauaañi, nache huo'o so na'a'q, da somaye huetaigui so lma' nmatteguec. 3Qaq so Samuel do'ocheta huetaigui aso atamnaxaqui maye netaigui aso arca maye laỹe' da naỹamaxataxac Ñim Lo'onatac 'Enauacna. Qaq aso lcoỹaraqte aso atamnaxaqui ñaq 'ettaigui. 4Nache Ñim Nataxala' iỹaxana so Samuel, 'eeta':
¡Samuel!
Nache somaye ỹasat, 'eeta':
¡Aja', soota'a ne'ena!
5Nache, somaye nqalgoqtaua'a so hueta'a so Elí, nache 'eeta':
Mashe soota'a ne'ena, ¿negue't ca huo'omshe aỹem 'auỹaxaneua'a?
Nache so Elí 'enapeco':
Aỹem saishet da 'am seỹaxaneua'a. 'avi'eguelaxauo, 'annaañi.
Nache so Samuel ỹe'eguelaxauo, nache nnaañi. 6Qalaxaye Ñim Nataxala' qaltaq ỹe'eguelaxalec da iỹaxana, 'eeta':
¡Samuel!
Nache somaye ñisheguem, nache taua'a so hueta'a so Elí, nache 'enapega, 'eeta':
Mashe soota'a ne'ena, ¿negue't ca huo'omshe aỹem 'auỹaxaneua'a?
Nache so Elí 'enapeco':
Aỹem saishet da 'am seỹaxaneua'a, 'am ỹalcolec. ¡'avi'eguelaxauo, 'annaañi!
7Qaq so Samuel saxanaxa co'ollaxa da ỹauatton Ñim Nataxala', qataq saxanaxa da ỹauatton da lavilỹaxac Ñimaye. 8Qalaxaye Ñim Nataxala' mashe tres da ỹe'eguelaxalec da iỹaxana so Samuel, nache somaye ñisheguem, nache taua'a so hueta'a so Elí, nache 'enapega, 'eeta':
Mashe soota'a ne'ena, ¿negue't ca huo'omshe aỹem 'auỹaxaneua'a?
Huaña, nache so Elí ỹaỹaten da nacheñi Ñim Nataxala' ñi iỹaxaatega se'eso nsoq. 9Nache 'enapego', 'eeta':
'Aue, 'annaañi qome, qaq qom qaltaq qaỹe'eguelaxalec da 'am qaiỹaxana, nache 'auasat qome qoneta': «Ña 'autaqa, 'Am Nataxala', cha'aye na 'aramaxashec 'am hua'aqtega.»
Nache so Samuel ỹe'eguelaxauo, nache nnaalec so lmala'. 10Huaña nache Ñim Nataxala' qaltaq nvita somaye, nache qaltaq iỹaxana, 'eeta':
¡Samuel! ¡Samuel!
Nache so Samuel 'enapeco':
Ña 'autaqa, cha'aye na 'aramaxashec 'am hua'aqtega.
11Nache Ñim Nataxala' 'enapeco':
Aỹem huo'o qome ca so'otec ne'ena Israel, qaq 'enauac nam hua'axaỹa qome damaye, nache ỹataqta iqaqñiguilo naua ltela lauaco. 12Qaq qom ivita que'eca na'a'q, nache ỹataqta sepacchigui qome na ỹa'aqtacpi maye talec ñaqa'en co'ollaxa ñi Elí qataq soua llalqa. 13Mashe sa'aqtaxanem ñimaye da sauo'o qome ca nhuaxanaguec soua llalqa souaxat da lle'etaxaloxo, cha'aye ñimaye mashe ỹaỹateetac da soua llalqa ỹataqta qauem na aỹem ỹasaxarelec la'aqtaqa qalaq saishet da nhuogaxalo. 14Qaq ỹoqo'oye, Aỹem san da ỹa'aqtac maye taaleguete soua llalqa ñimaye, nache qaca qome aca nachetaqtaxanaqte qaỹavigaxat, huo'otaq ca lỹa nachetaqtaxanaxat da ishet da ỹapalaxat na lasouaxashetpi soua llalqa ñi Elí.
15Qaq co'ollaq ime de'era, nache so Samuel ỹe'eguelaxañi da nnaañi, nache ivitta'a so mashe yo'oxoñi nache ñisheguem, nache ỹauatoiguilo soua laso'omi aso atamnaxaqui, qalaxaye saishet da da'aqtaxanem so Elí som lauanaqchec somaye. 16Qalaxaye so Elí iỹaxano' somaye, 'eeta':
¡'Am ỹalcolec, Samuel!
Nache somaye 'enapeco':
Aja' soota'a ne'ena.
17Nache so Elí inato' somaye, 'eeta':
¿Ca 'eetec ca 'am ỹanem la'aqtac Ñim Nataxala'? Aỹem 'am ñachoxoreetot da saishet qome da huo'o ca aỹem 'oxocheesop. ¡Cha'aye Ñim Lo'onatac 'Enauacna ỹataqta sansatta qome naqa'en ca 'anhuaxanaguec qom huo'o ca aỹem 'oxocheesop 'enauac na 'am ỹa'axatem Ñimaye!
18Nache so Samuel ỹataqta ỹa'axatta 'enauac na na'aqtacpi, qaica ca ỹoxooñi, nache so Elí 'enapeco':
¡Ñimaye nacheñi Ñim Nataxala'! ¡Qaq maiche ỹoiqueetac qome da ỹo'ot cam ỹaỹamaxareeta Ñimaye!
19Qaq so Samuel, nache nquictasheguem da llaxa, qaq Ñim Nataxala' nache hueta'aguet somaye, qataq ipacchigui naqa'en 'enauac nam la'aqtacpi maye ỹanem co'ollaxa somaye. 20Ỹoqo'oye 'enauac so Israel le'ecpi, maye netaña ye Dan qataq ivira'a ye Berseba, da ỹaỹateeta da nacheso so Samuel so ỹataqta 'eesa da la'aqtaxanaxanec Ñim Nataxala'. 21Qaq Ñim Nataxala', nache queto'ot da nachaxaatac naxa da huaña ye Silo, cha'aye nacheye ye huaña naxa da ỹanem so Samuel da la'aqtac.
