1 Samuel 4

Qaq se'esoua na'axa'te, so Israel le'ecpi huenoxonec da delogui' so filisteopi, nache hua'a ye saqaỹapeque ye Ebenezer. Qaq so filisteopi, qalaq nache hua'a ye Afec, ₂nache nlagaxaañi somayepi da yaqto' iloquiaxan so Israel le'ecpi, qaq co'ollaq delogoỹa't nache so filisteopi loxonec so Israel le'ecpi, nache ỹalauat so cuatro mil hualec naqa'en ye no'onaxa. ₃Nache so nalleppi so Israel le'ecpi co'ollaq ỹe'eguelaxa so lanataqa', nache so nqueroxonecpi maye lataxala'pi so Israel le'ecpi nnattega't, 'eeta': ¿Chaq ta'ainco' da Ñim Nataxala' ỹasheetem da qomi' loxonqa na filisteopi? ¡Ña she'eguenaqa'a aca arca maye laỹe' da naỹamaxataxac Ñim Nataxala' maye netaña ye Silo, yaqto' Ñimaye qomi' nca'alaxateeguesopa qome na qampa'aguenaxauapi!

₄Huaña nache so Israel le'ecpi huo'oi soua ỹamaxalo ye Silo da yaqto' ndoi' aso arca maye laỹe' da naỹamaxataxac Ñim Nataxala' maye Qaica ca Ỹaqalanapec, maye netanguilo soua dos ne'enaqtaqa maye huo'oi na laua't. Qaq so Jofní qataq so Finés som dos llalqa so Elí, nache pa'atra'agueta da ilotrague' asa'aso arca maye laỹe' da naỹamaxataxac Ñim Lo'onatac 'Enauacna. ₅Qaq co'ollaq nvita so lanataqa' somayepi asa'aso laỹe' da naỹamaxataxac Ñim Nataxala', nache so Israel le'ecpi ỹa'alaqtagui, nache ỹataqta dellimigui naqa'en ana 'alhua.

₆Nache so filisteopi co'ollaq hua'axaỹa de'era na'alaxac, nache denataxaatac, 'eeta': ¿Chaq ta'ainco' da ỹataqta ỹaguec da na'alaxac ye lanataqa' ye hebreopi? Nache co'ollaq ỹaỹaten da so Israel le'ecpi mashe nviraxata ye lanataqa, aso laỹe' da naỹamaxataxac Ñim Nataxala', ₇nache so filisteopi ỹataqta huo'o da lli'iỹaxa, nache 'enapeco': ¡Ñim Lo'onatac 'Enauacna mashe nvireuga ye lanataqa' yemayepi! ¡Choxoraiqolqa qomi', ye ỹataqta sa ỹauano' da nache 'eetec de'era! ₈¡Choxoraiqolqa qomi'! ¿Negue'tom ca ishet da qomi' nca'alaxateeguesopa da lhuaqỹaxac Ñim Lo'onatac 'Enauacna maye ỹataqta 'añaxaic? ¡Ñimaye nacheñi ñi ilaxachigui co'ollaxa so egipciopi co'ollaq hualec ye toolec 'alhua, irolec so ỹotta'a't nalolaxapi. ₉¡Qana'añaxache qome qami' filisteopi, yaqto' saishet da qaviyeeta'a da qami' l-lataqa ye hebreopi, yaqto' saishet da qoñiita'am yemayepi da choche qal-latacpi! ¡Saishet da qayi'iitac, qauacoñiỹa da qami' ỹale't da qauloqui!

₁₀Huaña nache so filisteopi jec da iloquiaxan so Israel le'ecpi nache loxonecpi, ỹoqo'oye datauec somayepi, ỹe'egueneua'alo soua lma'ate. Qaq se'eso na'a'q ỹataqta qalota so qaỹalauatpi, ivi' treinta mil so ileu so nalleppi so Israel le'ecpi. ₁₁Qaq nataqa'en qaiuotaxanec aso arca maye laỹe' da naỹamaxataxac Ñim Lo'onatac 'Enauacna, qataq qaỹalauat so Jofní qataq so Finés, maye llalqa so Elí.

₁₂Qalaxaye se'eso na'a'q huo'o so 'oonolec som chegoxoguetpi so Benjamín, somaye chegoqtoigui so alaataxac da qoỹet, nache ỹataqta naloxo nache choche ivitta'a ye Silo. Qaq somaye ỹataqta colaqta'ape soua alogo, qataq na lqaic nlaqchigui nataqa'en na 'alhua. ₁₃Qaq co'ollaq ivireuo, nache so Elí nso'ootangui aso nso'onaxaqui, nauaatac so nqa'aic, cha'aye ỹataqta lta'araic da lviloxolaxa añi lquiyaqte, souaxat da tatapigui lauel aso arca maye laỹe' da naỹamaxataxac Ñim Lo'onatac 'Enauacna. Qaq se'eso ỹale, co'ollaq ivireua'a se'eso huaqta'a't nỹecpi, nache ỹa'axattac de'era qanayeuaigui, nache 'enauac so netaña yemaye ỹataqta ỹa'alaqtagui. ₁₄Qaq so Elí co'ollaq hua'axaỹa de'era na'alaxac, nache denataxan, 'eeta':

¿Chaq ta'ainco' de'era na'alaxac?

Nache se'eso ỹale iỹalapigui' da da'aqtaxanem de'era so Elí, ₁₅qaq so Elí, mashe ivi' soua noventa y ocho vi'iye da nachaalataxac, ỹoqo'oye mashe sa nauaañi. ₁₆Nache se'eso ỹale da'aqtaxanem somaye, 'eeta':

Aỹem cheta'ague da ñevireuo, sachegoqtauga ye alaataqa', cha'aye aỹem qoỹet.

Nache so Elí inat somaye, 'eeta':

¿Ca 'eetec cam qanayeuaigui 'am ỹalcolec?

₁₇Nache somaye 'enapeco':

Qomye ye Israel le'ecpi nlagaxattac dataueeguesop so filisteopi. Qataq ỹataqta qalota so qaỹalauat, nataqa'en yeua 'aỹa'alqa Jofní qataq ye Finés ileu', qataq aso arca maye laỹe' da naỹamaxataxac Ñim Lo'onatac 'Enauacna nataqa'en deuotaxanec so filisteopi.

₁₈Qaq so Elí, co'ollaq choche hua'axaỹa da qaỹa'axat da 'eetec aso laỹe' da naỹamaxataxac Ñim Lo'onatac 'Enauacna, nache huaña na laỹe so lasom da datatcheguem, nacheesop aso nso'onaxaqui, qaq cha'aye mashe ỹa'axaiqui qataq qapa'atchiguingui co'ollaq naañi, nache vi'ilec na lqosot, nache ileu. Qaq somaye ivi' co'ollaxa soua cuarenta vi'iye da lataxala' so Israel le'ecpi.

₁₉Qaq aso late maye lhua so Finés, ye mashe hualaxai, qataq yaqta'a da deco'o, nache co'ollaq ỹaỹaten da aso arca maye laỹe' da naỹamaxataxac Ñim Lo'onatac 'Enauacna qaiuotaxanec, qataq da so lacho' qataq so lhua mashe ileu', nache daỹalli so llalec, nache deco'o qalaxaye ỹataqta lta'araic da ncogaxac. ₂₀Ỹoqo'oye soua huetrague' asomaye, co'ollaq ilora'a da mashe ileetapigui', nache 'eetrego', 'eeta':

'Ana'añaxat, cha'aye mashe ñiguiñi natai' 'aỹa'alcolec.

Qalaxaye asomaye sa ỹasat qataq saishet da ỹoqocha'alo soomaye, ₂₁souaxato' aso arca maye laỹe' da naỹamaxataxac Ñim Lo'onatac 'Enauacna da qaiuotaxanec, qataq souaxat so lacho' qataq so lhua da ileu', qaq so nogotolec ỹanagui da le'enaxat Icabod, qaq damaye naigui da, qaica so llo'oxoyec na Israel le'ecpi. ₂₂Nache nlamaxaren da 'enapec: Na Israel le'ecpi mashe qaica so llo'oxoyec, cha'aye mashe qaiuotaxanec aso laỹe' da naỹamaxataxac Ñim Lo'onatac 'Enauacna.