So filisteopi ỹe'eguelaxat aso arca maye laỹe' da aỹamaxataxac
1Aso arca maye laỹe' da naỹamaxataxac Ñim Nataxala' ivi' siete soua ca'agoxoiqa da netaña so na'alhua so filisteopi. 2Nache so filisteopi laỹona'to' so ltaxaỹaxanaxanecpi qataq so ilaviigui ca lỹa da yaqto' inat, 'eeta':
¿Ca shenaqtec añim laỹe' da naỹamaxataxac Ñim Nataxala'? Ña qomi' qaua'aqtaxañima ca shenaqtec da she'eguelaxataxa ye maiche lma'.
3Nache somaye 'enapeco' da qavi'iguelaxache añi laỹe' da naỹamaxataxac Ñim Natamnaxala' ye Israel le'ecpi, nache saishet da choche qauamaqai, maye qauauo'oi cam qaỹa'añi nache qauacheetangui ca ishet da nqat da lalemataic Ñim Nataxala'. Huaña nache ishet da qami' no'oite' qome qataq qauaỹaañi da ta'ainco' da qami' saq ỹaxaayiñi Ñimaye da qami' iuaxaataleguete.
4Nache so filisteopi denataxaataco', 'eeta':
¿Qaq negue'to' cam sanaxam Ñimaye da yaqto' nqat dam lalemataic?
Nache so ntaxaỹaxanaxanecpi 'enapeco':
Qomye qaỹa'añiiyeuo caua cinco cauatai' oro maye 'eeta'ama da lataxac ana na'agotaqte, 'oonole qanqa'eñi aca ỹan ñi 'oonolec naua lataxala'ate na filisteopi, qataq cinco cauatai' chegoxonaxal maye nache chegoqraigui na oro, cha'aye qami' qataq naua qarataxala'chilli', nache 'oonolec da nalolaxa maye qami' ique'eteeta'ape. 5Qaq nache, qauo'oche qome ca qare'enaqtaqui, qaue'enaxachiichigui ana na'agotaqtepi qataq ana chegoxonaxapi maye nlaxattapiguiñi na qana'alhuai, qataq huo'o naq 'enec qanqa'eñi Ñim Natamnaxala' ye Israel le'ecpi, shapegueto' qom vi'iiguet naqa'en da qanhuaxanaguiiqui, qataq da nhuaxanaguec nam qanatamnaxala'aipi qataq na qana'alhuai. 6¿Ta'ainco' da qauacoñiỹa da qami' qaramchiguilo, da qoñiita'am da lataxac som egipciopi, qataq so faraón, maye Ñim Natamnaxala' ye Israel le'ecpi irolec co'ollaxa da sansatta lhuaxanaxanaxac, da yaqto' ỹasheetec da jec ye Israel le'ecpi? 7Qauamaxasoxoñiilec qome da qaỹo'ot aca 'oonole naigona dalaxai. Ime, nache qauacoñiiua'alo qome caua dos huaca maye huo'oi caua llalqa, qataq saxanaxa da qaỹauegaaxaleguete, nache qauo'ogoxoñiỹalo qome da ỹaue'c aca naigona. Qalaxaye qano'onaxacheerañi caua llalqa, nache qaỹa'añiitraigui acam laỹe'. 8Ime, nache qauacoñiisop añi laỹe' da naỹamaxataxac Ñim Nataxala', nache qaỹa'añiỹangui aca naigona, huaqta'ai' qanqa'eñi aca laỹe' ca no'onatacpi oro maye qarachetaqtaxanaxache da yaqto' vi'iiguet da lalemataic Ñimaye. Ime, nache qauaqaita'a aca naigona da ndotec da jec. 9Qalaxaye qauloita'ague qome aca'aca naigona mañaxasaco' qom taigue da pa'aỹa'ague ye Bet Semes, ye maiche lalamaxat lma', qache nacheñi Ñim Natamnaxala' ye Israel le'ecpi Ñim chegoqo'ot de'era qauem maye qomi' huetaleguete. Qaq da huo'otaq saishet da 'eetec de'era, nache saỹatenaq qome da saishet da nacheñi Ñimaye Ñim qomi' iuaxa'n, maye chochaq maiche qarque'emaxa damaye.
10Qaq se'eso shiỹaxauapi nache ỹo'ot co'ollaxa de'era. Ỹaconeua'alo' soua dos huaca som mashe huo'oi soua llalqa, qaq co'ollaq ime da ỹapoua'alo soua llalqa da ỹaaraigui aso laỹe', nache icoñilyiñi soomaye ỹanaguilo aso naigona. 11Ime, nache qoỹanangui aso naigona aso arca maye laỹe' da naỹamaxataxac Ñim Nataxala', qataq aso huetrangui soua ne'enaqtaqa maye chegaqaigui na oro chegoxonaxal, qataq soua 'eeta'ama ana na'agotaqte. 12Ime, nache soua huaca je'c, nache quetregue so nqa'aic maye taỹa'a ye Bet Semes, nỹeetegueto qataq nache ỹalemaqtrec dam dataregue, qaica da huo'o ca huaỹoxoregue. Qaq som filisteopi jec nache ca'attraueegue soomaye, nache ivitta'a ye loga't ye Bet Semes. 13Qaq som lma' ye Bet Semes, maye hueta'a yem 'alhua ca'amapega't nqattac na trigo co'ollaq namatasheguem, nache ila'aguet aso laỹe' soua nqataxaco nache ỹataqta huo'o da ntonaxac. 14Qaq aso naigona co'ollaq ivita ye no'onaxa maye lalamaxat so Josué, yem huaña ye Bet Semes, nache hua'a da vi'iiguet. Qaq yemaye nache netaña so ỹataqta lta'araic coma', nache so lma' ye Bet Semes dalonaxana so qo'oipaqpi maye netagui aso naigona, qaq soua huaca, qalaq ỹanoto Ñim Nataxala' da lachetaqtaxanaqtel. 15Qaq so leviitapi mashe nqaayiñi aso laỹe' da aỹamaxataxac qataq asom huaqta'ai' maye huetrangui soua ne'enaqtaqa maye chegoqraigui na oro, nache ỹaatrelec soomaye so coma' maye ỹataqta lta'araic, nache se'eso na'a'q som lma' ye Bet Semes ỹanot Ñim Nataxala' aso lachetaqtaxanaqte qaỹavigaxatta, qataq aso laỹe lachetaqtaxanaqtepi. 16Qaq co'ollaq ime, da imeteetrac de'era, se'esoua cinco lataxala'ate so filisteopi, nache se'eso na'a'q ỹe'eguelaxara ye Ecrón.
17Qaq se'esoua cinco ne'enaqtaqa na'agotaqtel maye chegoqraigui na oro, añi 'oonole soomaye nache lachetaqtaxanaqte ye Asdod, Gaza, Ascalón, Gat qataq ye Ecrón, maye som filisteopi ỹanoto Ñim Nataxala' da lachetaqtaxanaqtel da yaqto' vi'iiguet da lalemataic Ñimaye. 18Qaq ye lcate' soua ne'enaqtal chegoxonaxal maye chegoqraigui na oro, qalaq nache 'eeta'ama ye lcate' ye qalochiguiñi huaqta'a't nỹecpi maye ỹotta'a't naua nañalo maye lma' soua cinco lataxala'ate so filisteopi, nataqa'en so huaqta'a't nỹecpi maye sa nsattec so lpaqtaxat, qataq so lauoreuapi nma'piolec. Qaq so coma' lta'araic maye qaỹachalec co'ollaxa aso laỹe' da naỹamaxataxac Ñim Nataxala', nache ivitta'a nagui da ñaq netalec ye no'onaxa maye lalamaxat so Josué, maye huaña ye Bet Semes.
19Qalaxaye Ñim Nataxala' huo'o co'ollaxa so ileupi naqa'en som lma' ye Bet Semes, souaxat da ỹalloigui na pa'auo aso laỹe' da aỹamaxataxac. Qaq ivi' setenta so ileupi, nache so lma' yemaye, nỹeetagui souaxat so lta'araic nleuaxa maye Ñim Nataxala' ỹo'otec somayepi. 20Nache se'esopi lma' ye Bet Semes, 'enapeco':
«¿Negue'tom ca ishet da nachaateua'a Ñim Nataxala', Ñim Lo'onatac 'Enauacna maye ỹataqta sa qaishetapec? ¿Qataq hua'ago' ca samaxasoxogue añi arca maye laỹe' da aỹamaxataxac?»
21Nache somayepi ỹamaxa da la'aqtac so lma' ye Quiriat Yearin, 'eeta':
«Ye filisteopi qomi' ñe'eguelaxatalo añi laỹe' da naỹamaxataxac Ñim Nataxala', qaq ỹoqo'oye qauanaqui qome, nache qoquiỹot añimaye.»
