1 Timoteo 1

_1-2'Am ỹauotaxat Timoteo:

'Am samaxa da iquinaxanaxac.

Aỹem Pablo, aỹem lamaxashec So Jesucristo, cha'aye Ñim Lo'onatac 'Enauacna maye Qarca'alaxaqui, qataq So Cristo Jesús maye hueto'ot da qanaquitaxac aỹem ỹamaxalec da sa'axat de'era la'aqtac.

'Am 'ena'am da ỹoqta 'am ỹalamaxat ỹalec. Ỹoqo'oye seỹaxaatacot Ñim Lo'onatac 'Enauacna maye Qarta'a qataq So Jesucristo maye Qarataxala' da ỹataqta 'am ỹauotec qataq 'am itauaatac 'enauac nam 'auo'otpi, qataq 'am ỹami' da 'arlagaxayec.

₃Co'ollaq saigue da 'alhua Macedonia, qaq 'am shenapega da ñaq qoua'a ye nỹecpi ye Éfeso. Qaq nagui qaltaq she'eguelaxalec da 'am shenapega. Cha'aye yemaye huo'o na shiỹaxauapi maye dapaxaguenataxaatapeguec na saq 'en lataxac. Ỹoqo'oye sauotaique da 'am qonapega namayepi da saishet da nache 'eeta'ac de'era. ₄Qataq qonapega da saishet da ima'ape naua na'axa'te da napaxagueetega da na'aqtaxanaxac maye saq 'en, qataq ana naneraxalate som hua'au lta'alpi. Cha'aye nam lauela de'era, nache qaica ca naigui da ncotaxac, qataq damaye saishet da itauan ca shiỹaxaua da huotaique da ỹaỹaten dam ỹoqta 'eetapeguec Ñim Lo'onatac 'Enauacna. Cha'aye dam 'eetapeguec Ñimaye ishet da saỹatenaq da sepi'iỹaqa'a Ñimaye.

₅Dam ỹoqta 'eetapeguec de'era namaxasoxonaxac, damaye iuen da ñi 'oonolec ỹauotec ca lỹa, qaq de'era lauotaxanaqtaic ỹataqta chegoqchiguinguit añi lquiyaqte maye qui'itta, qataq da ỹaỹamaqchiguiñi ntoonaxac qataq da huesota lpi'iỹaxac. ₆Cha'aye mashe huo'o na ỹaxanec de'era nsoxoyec, nache ime'eguet da ncotaxac maye qaica ca naigui. ₇Namayepi nshetaique da paxaguenaxala' da dapaxaguenataxanec na namaxasoxonaxacpi maye chegoqo'ot so Moisés qataq 'eetega ỹataqta 'eesa da huo'o ye la'aqtac qataq dam dapaxaguenataxaatapeguec, qalaxaye namayepi ivira'a nataqa'en da saishet da ỹaỹaten dam ỹa'axattac.

₈Nataqa'en saỹaanaq na namaxasoxonaxacpi maye chegoqo'ot so Moisés da ỹataqta ỹaỹamaqchiguiñi da qaipagaqchiichigui da ỹataqta 'eetapeguec. ₉Ỹoqta 'eesa da na namaxasoxonaxacpi saishet da qaỹo'ot da qanmit ca no'on da lataxac, nachaqcata ca sa ỹalaq, qataq qauemaic, qataq 'etaxaloxoic, qataq ca qaica ca 'enec naqa'en Ñim Lo'onatac 'Enauacna, qataq da na'amqaanataxanaxac. Nataqa'en naamaye talec cam ỹalauat cam 'ena'am shiỹaxaua qataq ca ỹalaua't caua yo'oqchiguilo lta'al. ₁₀Qataq ca ỹale da ncachetague' aca sa lhua, huo'otaq ca maiche lỹa 'eeta'am ỹale, nataqa'en ca decachiỹa ca lỹa da imen, nataqa'en ca tenataxanaxaic, qataq ca ỹa'axat ca 'eetega lataxac, qalaxaye choche datenataxan. Qaq da ỹoqta 'eetapeguec ne'ena namaxasoxonaxacpi nshetaique da ỹaỹamaxaañi nam dataỹa'aguet dam ỹataqta ỹaỹamaqchiguiñi napaxaguenataxanaxac ₁₁dam ỹo'oxoraq la'aqtaxanaxac Ñim Lo'onatac 'Enauacna, maye aỹem ỹamaxalec da sa'axatec.

₁₂Sanot da ña'achecỹaxac So Qarataxala' Jesucristo, cha'aye Somaye huo'o da naquitaxac aỹem qataq aỹem ỹami' da ỹa'añaxac da so'onataxanot Somaye. ₁₃Qaq Somaye aỹem ỹo'otec de'era, na'aictaxa da so lỹa na'a'q ỹataqta sasaxaleguete na itaxaỹaxaco qauema da sa seyacnapec, qataq secaatac, qataq sesheueetac. Qalaxaye Ñim Lo'onatac 'Enauacna ỹataqta aỹem ichoxoren, cha'aye saxanaxa da sa'amaqten So Jesús, qataq ỹataqta sa saỹaten da so'ottac. ₁₄Ỹoqo'oye aỹem ỹanem da ỹataqta lta'araic lqouagaxanaqtaic, nataqa'en da npi'iỹaxac, nataqa'en da nsoxoyec maye 'enauac qomi' ỹanema souaxat da ña'araqtaua'a So Cristo Jesús.

₁₅Qaq de'era ỹataqta 'eesa, qataq saishet da qaiqoleguet da So Cristo Jesús naỹa ana 'alhua da nca'alaxatec na shiỹaxauapi 'etaxaloxoicpi, ivira'a aỹem, maye ỹactec da aỹem 'etaxaloxoic. ₁₆Qalaxaye ñaqaiyeta Ñim Lo'onatac 'Enauacna aỹem ichoxoren, cha'aye Ñimaye nshetaique da aỹem la'auaxanec da do'onataxana naqa'en So Jesucristo da ỹachaxana na shiỹaxauapi da lhualaxavic lta'araic. Cha'aye ỹauotaique da aỹem naloqnaxanaxat, yaqto' ca shiỹaxaua ishet da ỹa'amaqten So Jesús, qataq ỹaconeguet da nca'alaxa maye choche tatec. ₁₇Ỹoqo'oye nagui sanaxam da qayo'oxonnataxanaxa qataq da qaryacnataxanaxac Ñim Lta'a 'enauac nam shiỹaxauapi maye choche tatec, Ñim qaica ca loga't qataq saishet da qaila'a. Ñimaye nacheñi Ñim Lo'onatac 'Enauacna maye qaica ca lỹa 'ena'am, qataq ỹaanaxanaxaic. Aja', nache 'eetec de'era.

₁₈'Am ỹalec Timoteo, 'am sami' da iqataxac, cha'aye ñeshetaique da qoquetalec dam na'aqtac maye 'am qoỹami' so lỹa na'a'q chegoqo'ot Ñim Lo'onatac 'Enauacna. Qaq ỹataqta 'aupacchigui damaye da 'aloclec qoneta'am ca no'on ale maye ỹaỹaten da l-loquiaxac. ₁₉Qataq 'ana'añaxatec da 'arpi'iỹaxac qataq da no'on 'arvilỹaxac. Cha'aye mashe huo'o na ilamaqauec, ca'ai da lpi'iỹaxac, souaxat da sa ỹalaxalec da ỹaỹamaqchiguiñi lavilỹaxac. ₂₀Qaq nache 'eetec da huaiguilo soua Himeneo nataqa'en so Alejandro. Ỹoqo'oye soomaye sanegueta so pa'aguenataxanaxaic, yaqto' saishet da nache 'eetra'ac da quetralec da sa iyacna'ape Ñim Lo'onatac 'Enauacna.