1So Saqcha'a Na'añaxac Qui'itta ỹataqta ỹataqtegue da la'aqtaxanaxac da ỹa'axattra'agueta caua pa'atre'c na'axa'te da huo'o qome na ỹaxaañi da lpi'iỹaxac Ñim Lo'onatac 'Enauacna. Cha'aye ỹatenachet na saqcha'a tenataxanaxaicpi, qataq ỹalaxaguet na lapaxaguenataxanaxacpi nam lamaxashecpi so pa'aguenataxanaxaic. 2Qataq na'axaỹaxaatega na saq ỹataxalec qataq tenataxanaxaic maye mashe ỹavic da ntoonaxac, ỹoqo'oye qaica ca lcoxo da ỹo'ot ca sa ỹamaxañi. 3Ne'ena shiỹaxauapi sa ỹashen da naronaxac, qataq huo'o na nallecpi na sa ỹashen da qanallec, maye Ñim Lo'onatac 'Enauacna ỹo'ot co'ollaxa namayepi da yaqto' na 'amqaanataxanaxaicpi qataq na ỹauatton da 'eesa lataxac, ishet da chec qalaq ỹaatac da na'achecỹaxac. 4Cha'aye 'enauac na lo'onatac Ñimaye ỹataqta 'onaxaic. Ỹoqo'oye saishet da ỹaỹamaxañi da semaxasoqtac, nachaqrata da saconaxaguet, qataq sanaqtacot da qana'achec Ñim Lo'onatac 'Enauacna. 5Cha'aye naua la'aqtaqa Ñim Lo'onatac 'Enauacna qataq da qouagaxaunaxac ishet naqa'en da iqui'itaxatta na qanallec.
Da qoỹami' napaxaguenataxanaxac so Timoteo
6Da 'auapaxaguenec de'era 'eesa nam 'amqaanataxanaxaicpi, nache ỹataqta 'am no'on lo'onataxanaxanec So Jesucristo. Cha'aye da qanapaxaguena qataq qaỹalaxaguet dam napaxaguenataguec na quetague' So Cristo 'eeta'am dam 'auo'ottac, nache damaye 'eeta'am da no'on nquia'axac. 7Qataq saishet da 'ana'axaỹaxaatega ca na'aqtaxanaxac maye saq 'en maye choche ỹachegoxotchiiya' nam sa ỹa'amaqten So Cristo. Nachaqrata da 'ana'añaxat, cha'aye 'am no'on lapaxaguenatac So Jesucristo. 8-9Cha'aye 'eesa ca shiỹaxaua da ñe'egueeteguela't da sa desalli naqa'en na lo'oc, damaye cara'acolec da huo'o da naigui. Qalaxaye da qanpa'ataxareelec da na'amqaanataxanaxac Ñim Lo'onatac 'Enauacna, damaye ỹataqta lta'araic da naigui. Cha'aye ỹataqta 'onaxaic da qomi' ỹo'otegueta nagui da ñaq souaqtalec ana 'alhua qataq nataqa'en qom seviraxague da piguem. Qaq de'era ỹataqta 'eesa, qaq ỹoqo'oye 'enauac damaye iuen da sa'amaqtenaq. 10Qaq nachera da huo'omshe ña'añaxataqtac, cha'aye mashe hueto'ot Ñim Lo'onatac 'Enauacna da qanaquitaxac. Ñimaye maye nache 'eetai' da nca'altauec, qataq nacheñi ñi lca'alaxaqui 'enauac nam ỹa'amaqten Ñimaye, qalaxaye nataqa'en 'enauac na laỹepi shiỹaxauapi.
11Qaq 'era da iuen da 'auapaxaguenataxanec da yaqto' 'enauac qaỹalaxalec. 12Qataq saishet da 'anasheneuo da qaica ca 'am qoỹanaigui souaxat da ñaq 'am nsoqolec. Nachaqrato' da 'am laloqnaxanaxat na laỹepi 'amqaanataxanaxaicpi souaxat naua ỹaỹamaqchiyiñi 'artaxaỹaxaco, qataq da no'on 'arataxac, qataq da 'arsoxoyec, qataq da 'arpi'iỹaxac, qataq da qui'itta na'aqtaguec da 'anachaalataxac. 13Qom saxanaxa da 'am sevira, qalaq qoqueto'ot qome da 'autaxaỹaxaata'ape naua ñiyigui'she la'aqtaqa Ñim Lo'onatac 'Enauacna da 'auatataigui na 'amqaanataxanaxaicpi. 'Aua'añaqchet qataq 'auapaxaguen na qarqaỹañicpi. 14Saishet da 'anañaxane' da lo'onataxanaxac ñim 'anachetaxat maye 'am ỹami' Ñim Lo'onatac 'Enauacna so na'a'q co'ollaq ỹachanguit añi 'arquiyaqte, chegoqchiguilo soua lataxala'ate na 'amqaanataxanaxaicpi co'ollaq 'am ỹashel-leguete.
15Ỹataqta 'antela'a qataq qouapegue' de'era sheetega, ỹataqta 'anañaneguet, yaqto' 'enauac qaila'a da 'arañaxataxac. 16Qataq 'am Timoteo, ỹataqta 'antela'a da 'arataxac, qataq 'alotegue da 'arapaxaguenataxanaxac. Ỹataqta qoqueto'ot de'era sheetega, cha'aye da 'auo'ot damaye, nache ỹataqta 'avira'aguet da 'am qanca'alaxatec qataq 'enauac na 'am na'axaỹaxaatega.
