Da 'eetec da qantela'a aca pa'ai qataq ca nataxala' qataq ca nlatac
1Saishet da 'arolec ca 'artaxaỹaxac sa nsatta da 'auqata ca nqueroxonec. Nachaqrata da 'auchettot da qonapega, 'aue'enaxattem ca 'aralamaxat 'arta'a. Qataq da qonapega ca nsoq, qalaq 'aue'enaxattem ca maiche 'arqaỹa. 2Qataq da qonapega aca nataxalate, qalaq 'aue'enaxatchigui aca yo'oqchigui 'arate'e. Qataq da qonapega aca qa'añole, qalaq 'aue'enaxatchigui aca ỹoqta 'aralamaqte 'arqaỹa, yaqto' qaica ca 'ana'aqtaguec sa ỹaỹamaxañi.
3'Autauan aca pa'ai maye ỹataqta qaica ca lauo' le'ecpi da itauan. 4Qalaxaye aca pa'ai da huo'o ca llalec huo'otaq laual, nache caamaye iue'n da hua'auyiñi da itaua'n acamaye na lhuenaxanaxasat, ỹe'eguelaxatteguet dam ltelaxa co'ollaxa qataq da ltaunaxanaxac acamaye. Cha'aye de'era ỹataqta ỹaỹamaxareeta Ñim Lo'onatac 'Enauacna. 5Aca pa'ai maye ỹoqta 'eesa da qaỹalata'a't, acamaye imato'ot da naquitaxac Ñim Lo'onatac 'Enauacna da iỹaxaatacot ca ntaunaguec, ye na'a'q qataq ye pe. 6Qalaxaye aca pa'ai da nañaneguet da sa ntel-la't, nache quegue da lqopitaxanaqtaic, nache acamaye 'eeso'oye da ña nca'altauec, qalaxaye mashe 'eco' da ileu. 7Ỹoqo'oye 'auamaxasoxoolec qome de'era sheetega, yaqto' aca pa'ai saishet da huo'otaq sa ỹaỹamaxañi ca na'aqtaguec. 8Qaq ca shiỹaxaua da saishet da huapegue' na maiche lauo' le'ecpi, camaye sa nateneguet da 'eetega lpi'iỹaxac. Lamaaxa da huo'otaq saishet da huapegue' caua maiche llalqa. Nache camaye ỹoqta napacalec ca saxanaxa da da'amqaanataxan.
9Qaq aca lmalate na le'enaxat ana pa'ai, acamaye qandoqteetelec ana mashe ivi' naua sesenta vi'iye da llaxa, qataq 'oonolec naqa'en ca chegoxoguet lhua. 10Qataq nataqa'en qaỹauattoota souaxat da ỹaỹamaqchiguiñi lo'onataxanaxac. Ỹaỹaten da ilo'ogue na llalaqpi, qataq ỹaỹaten da ilo'oguet ca namaxasoxoic, qataq sa na'amaqten da lataxac da ỹalectaigui na 'amqaanataxanaxaicpi, qataq itauaatac nam huo'o da nque'eenaxac. Qaq 'ena nam ỹo'ot aca nanettaua'a aca naneraxalate anamayepi.
11Qalaxaye saishet da 'ereua'a aca lmalate na ne'enaxat aca pa'ai da saxanaxa da ivi' naua sesenta vi'iye da llaxa. Cha'aye saiuena'a da queueegue da lqopitaxanaqtaic, nache ỹaxaañi da quegue So Cristo, cha'aye nshetaique da qaltaq huaron. 12Nache huo'o da lasouaxashet, cha'aye sa ipaguelec so hua'auchiguiñi la'aqtac da nañanot So Cristo. 13Qataq ishet da taỹa da tateua'alo naua nma'ate, choche ivitta'a da qaica ca ỹo'ot. Qataq huo'o ana nataqa'en taỹa da na'aqtaqa lo'o' qataq camachaqca qataq tategueua'a, qataq sa ilo'oguelo naua la'aqtaqa. 14Ỹoqo'oye ana pa'ai maye saxanaxa da ỹe, 'onaxaic da qaltaq huaron, yaqto' huo'o ca llalec, qataq ishet da ilo'ogue ca lma'. Yaqto' qaica ca llegueuo ca depa'aguenataxaatac da huo'otaq ỹasaxalec ca sa ỹaỹamaxañi la'aqtac. 15Cha'aye mashe huo'o ana pa'ai da ca'ai So Cristo da quegue so pa'aguenataxanaxaic.
16Ca 'amqaanataxanaxaic, huo'otaq aca 'amqaanataxanaxai, da huo'o aca lauo' lashe pa'ai, nache 'onaxaic da itauan qome, yaqto' na laỹepi 'amqaanataxanaxaicpi saishet da ime'eguet da itauaatac acamaye, nachaqrata da nalemaqte' da itauaatac aca pa'ai maye ỹoqta 'eesa da qaica ca pi'iỹa'a.
17Ca nataxala' da ỹataqta ỹaỹaten da ilo'ogue na 'amqaanataxanaxaicpi, camaye ỹataqta qaỹauotec qome qataq qaipagaqchiichigui da lashiichiỹaxac da lo'onataxanaxac. Lamaaxa da ỹataqta nañaneguet da la'aqtaxanaxac qataq da lapaxaguenataxanaxac da ỹa'axattac da no'on na'axaỹaxac. 18Cha'aye nache nanettrañi naua ñiyigui'she la'aqtaqa Ñim Lo'onatac 'Enauacna, 'eeta': «Saishet da 'auo'ot ca lapoxot na alap ca 'arauegaxanaxala' huaca da yaqto' sa deque'e da 'auapiaxanaxaalec na trigo da 'anqattac ana ala.» Nataqa'en 'eeta': «Qaipagaqchiichigui da lashiichiỹaxac ca 'onataxanaxaic da qaisheeten.»
19Da huo'o ca ỹauo'o ca lasouaxashet ca nataxala', nache 'auỹaxanot da ỹauo'oi caua dos huo'otaq tres da la'aqtaxanaxau'. Qaq da saishet da ỹo'ot de'era, nache saishet da 'auqochetega. 20Qalaxaye ca saishet da ỹaxaañi da lle'etaxaloxo, nache 'ana'axannec da qonapega qataq ỹauaachigui 'anqa'en na laỹepi 'amqaanataxanaxaicpi yaqto' namayepi ishet da ñi'i, nache saishet da huo'o ca ỹe'enaxat camaye. 21Da iqataxac maye 'am sami' nagui ỹataqta qomi' ỹauaachiguilo Ñim Lo'onatac 'Enauacna qataq So Qarataxala' Jesucristo, nataqa'en na chegaqasheguem lamaxashecpi maye lca'aguishecpi Ñim Lo'onatac 'Enauacna. Ỹataqta 'aualaxaleco' qome da iqataxac. Saishet da huo'o ca 'amatalec da 'arauotaxat, qataq saishet da 'alca'agui na shiỹaxauapi. 22Saishet da 'aỹalapegue' da huo'o ca 'aneua'a da lo'onataxanaxac Ñim Lo'onatac 'Enauacna, cha'aye saiuena'a da huo'o ca lasouaxashet, nache nataqa'en 'am nshepaxanaqchet. ¡'Antela'agueto' 'enauac na sa ỹaỹamaxañisat!
23Qaq cha'aye 'am nache 'eetai' da huo'o da 'auet na 'arhuel, ỹoqo'oye saishet da ndotec na 'etaxat da 'anỹomtagui, nataqa'en iuen da 'anỹomgui ca lataxa, qalaxaye sa 'amaqtaq 'anqa'en.
24Huo'o da huaña da ñanomaqta ñi shiỹaxaua da huo'o da lasouaxashet da saxanaxa da qanmit. Qataq huo'o na sa ñanomaxa, cheta'ague da ỹoqta qanmit. 25Nache 'eeta'am da 'eetec ca no'on nataxac. Huo'o ca huaña da saq qalaq da qaila'a, qalaxaye ca lỹa saishet da qaila'a. Qalaxaye damaye saishet da queta da saq yo'oq.
