1Qaq co'ollaq ime 'enauac de'era, nache 'enauac so Israel le'ecpi maye hueta'a yi'iye, taỹa 'enauac so huaqta'a't nỹecpi maye ỹotta'a't naua nañalo ye Judá, nache ilaxachigui so atamnaxala'pi coma'pi, qataq so lqui'ipi aso Aserá, qataq so qaỹoqotcheguemec atamnaqa'pi, nache ivitta'a da nlaxaañi 'enauac som naña ye Judá, Benjamín, Efraín qataq ye Manasés. Ime nache 'enauac so Israel le'ecpi, ỹe'eguelaxalo naua nañalo so huaqta'a't nỹecpi maye ỹotta'a't naua nañalo, nache ỹataqtac nam maiche lma'pi somayepi.
2Qaq co'ollaq ime nache so Ezequías, naloqchiiñi so ntaxaỹaxanaxanecpi qataq so leviitapi, ỹauo'oi naua laloqo'ote da do'onataxan, yaqto' ñi 'oonolec, ỹo'ot da maiche lo'onataxanaxac, qataq da ỹaneuo na nachetaqtaxanaxat maye qaỹavigaxatta, qataq ana nachetaqtaxanaqte qanhuaachigui, qataq da ỹan da 'achecỹaxac, qataq ỹo'oxoren Ñim Nataxala' da huaña ye ñegueuo aso atamnaxaqui. 3Qaq so nta'a nataqa'en maiche chegoqchigui da ỹaneuo so maiche lalamaxat shiguiỹacpi da lachetaqtaxanaxat qaỹavigaxatta, maye qoỹaneuo naxa ye nte'eta qataq ye avit, qataq so nachetaqtaxanaxat qaỹavigaxatta da yaqto' qoỹaneuo so na'a'q mataxaqui so dalaxaic ca'agoxoic, qataq na laỹepi naponaxacpi, cha'aye nache nanettalec aso lqataxac lmalate Ñim Nataxala'. 4Qaq nataqa'en 'enapega so shiỹaxauapi maye hueta'a ye Jerusalén, da ỹanem so ntaxaỹaxanaxanecpi, qataq so leviitapi aso ntaunaqte naqa'en somayepi da yaqto' nalemaqte' da ỹo'ot nam lqataxacpi Ñim Nataxala'. 5Qaq co'ollaq mashe qaỹaỹaten se'eso namaxasoxonaxac, nache so Israel le'ecpi ỹataqta lhuotta da ỹan so no'on la'auaxanec ala so lañiguishec trigo, lataxa, aceite, dapic lli'i, qataq 'enauac so laỹepi maye qaỹachegoxotalec so no'onaxa. Nataqa'en qalota aso irouo ndiezmo maye ỹachegoxotaigui ana ala so lañiguishecpi.
6Qataq nataqa'en so lma' ye Israel, qataq so lma' so huaqta'a't nỹecpi maye ỹotta'a't naua nañalo ye Judá, ndouo aso ndiezmo maye ỹachegoxotaigui aso lalo huacapi, qataq aso qaguetapi, qataq ñi 'oonolec som nogoxoshetpi maye qaiỹotauga da qoỹanot Ñim Nataxala', nache ỹataqta qalapoosheguem somayepi. 7Qaq nache huetoigui so ca'agoxoic tres da qaỹacoolec da qalapootac se'eso nogoxoshetpi, qaq co'ollaq ivita so ca'agoxoic siete nache qaimat. 8Qaq so Ezequías qataq so nataxala'pi maye ltauapi, co'ollaq ivi' nache ilalec so nogoxoshetpi maye qalapootacpi, nache ỹanot da na'achecỹaxac Ñim Nataxala', qataq talec naqa'en da no'on la'aqtac so nhuo' Israel le'ecpi. 9Qaq huaña, nache so Ezequías inat so ntaxaỹaxanaxanecpi qataq so leviitapi, da ỹa'axat ca 'eetec ca lataxac se'eso qalapootac, 10nache so lataxala' so ntaxaỹaxanaxanecpi Azarías, maye chegoxoguet so Sadoc, ỹasateguet somaye 'eeta': «Chegoqchiguiña co'ollaq qaỹacoolec da qandoua'a ana atamnaxaqui maye lalamaqte Ñim Nataxala' ne'ena nachetaqtaxanaxatpi, nache qomi' saishet da seuenaqtaique ca sacheguenaq, qalaxaye ñaqaiyeta qalota na no'onañi, qaq 'enauac ne'ena nachena na no'onañi, cha'aye Ñim Nataxala' talec naqa'en da nqouagaxa nam lalamaxat nhuo' le'ecpi.»
11Nache so Ezequías damaxasoxoolec da qaỹo'ot so naponaxanaxaqui aso atamnaxaqui maye lalamaqte Ñim Nataxala'. Qaq co'ollaq ime, 12nache qaỹachaigui 'enauac som qoỹaneuopi nachetaqtaxanaxatpi, aso diezmopi maye qoỹaneuo co'ollaxa, qataq som maiche lalamaxatpi Ñim Nataxala'. Nache qoỹanem da ilo'ogue 'enauac somayepi som leviita Conanías, qataq so lqaỹa Simey da ltaua somaye. 13Qaq som nhuataxanaxanecpi maye ỹo'ottac da lamaxasoxonaxac so Conanías qataq so lqaỹa Simea, maye nataqa'en ỹaneuo so nta'a Ezequías qataq Azarías, qaq soua la'auaxanaqa da ilotrague' aso atamnaxaqui maye lalamaqte Ñim Nataxala', 'enaua naua le'enaqa'ate: Yejiel, Azazías, Najat, Asael, Jerimot, Jozabad, Eliel, Ismaquías, Majat qataq so Benaías. 14Qaq som ilotague' so lasom maye pa'aỹa'ague da nala' lliguisheguem, som leviita maye chegoxoguet so Coré, som llalec aso Imna, somaye ilotague' aso nachetaqtaxanaqtepi maye maiche chegoqchigui ñi 'oonolec da ỹanot Ñim Lo'onatac 'Enauacna, qataq da imenec aso nachetaqtaxanaqtepi maye qoỹaneua'a Ñim Nataxala', qataq aso maiche lalamaqtepi Ñim Lo'onatac 'Enauacna. 15Qaq soua ltau' so Coré, som huetra'a so huaqta'a't nỹecpi maye lalamaxat so ntaxaỹaxanaxanecpi, 'enaua naua le'enaqa'ate: Edén, Miniamín, Josué, Semaías, Amarías qataq so Secanías, qaq nachesoua soua ltau' da imenec na taỹot ñim 'oonolec som ltauapi. Qaq soomaye ỹo'o't naxa de'era da ivita ye laloqo' da lo'onataxanaxac da ilo'oguet som ỹepi qataq so na'asapi, 16'enauac som nategueua'a aso atamnaxaqui da ỹo'ot nam lo'onatacpi ye na'a'q, ipacchigui ye laloqo' da inoxoneuo qataq da ỹo'ot da maiche lo'onataxanaxac, da yaqto' nanettalec aso lmalate, qataq qaỹalecneuo 'enauac so ñaqpiolec maye ivi' tres vi'iye da nachaalataxac ivira'a so ỹepi. 17Qaq so ntaxaỹaxanaxanecpi ỹataqtac qanqa'en da qoỹereuo so llalaqpi, qaq som leviitapi qalaq qoỹereuo som ivi' veinte vi'iye da nachaalataxac ivira'a so ỹepi, qataq ỹataqtac dam lo'onataxanaxac, qataq ye laloqo' da do'onataxan. 18Qaq asa'aso lmalate qaỹalecneuo 'enauac som ñaqpiolec, nhuapi, ñalaqpi, ñalepi, qaq damaye naigui da 'enauac somayepi cha'aye dam no'onataxanaxac maye qaipataxalec, damaye qoỹanot Ñim Lo'onatac 'Enauacna. 19Qaq 'enauac som huaqta'a't nỹecpi, huo'o so ỹalleppi maye qoỹaneuo da yaqto' imenec nam taỹot ñi 'oonolec ỹale ntaxaỹaxanaxanec maye chegoxoguet so Aarón, qataq 'enauac som leviitapi maye qoỹettauo maye huetauga som nquia'axanataxanaqa'pi maye huauga so pa'auec som huaqta'a't nỹecpi maye lalamaxat som ntaxaỹaxanaxanecpi. 20Qaq 'era da ỹo'ot co'ollaxa so Ezequías 'enauac ye Judá, qaq da lo'onataxanaxac ỹataqta no'on, nalochiguiñi qataq 'eesa da hueto'ot Ñim Nataxala' maye Natamnaxala'. 21Qaq 'enauac nam ỹacoolec da ỹo'ot, da yaqto' huapegue' aso atamnaxaqui maye lalamaqte Ñim Lo'onatac 'Enauacna, huo'otaq na nqataxacpi qataq na namaxasoxonaxacpi, da ỹo'ot qalaq imato'ot da lquiyaqteỹaxac da nmitaique Ñim Lo'onatac 'Enauacna, qaq ỹoqo'oye ỹataqta nquictasheguem.
