2 Crónicas 36

₁Qaq huaña nache so nhuo' le'ecpi maye netaña se'eso 'alhua, ỹaconeua'a so Joacaz, som llalec so Josías, nache ỹaneuo da nta'a da ilo'ogue ye Jerusalén, talec naqa'en da lo'onataxanaxac co'ollaxa so lta'a. ₂Qaq so Joacaz, mashe ivi' soua veintitrés vi'iye da nachaalataxac co'ollaq ỹacoolec da lo'onataxanaxac da nta'a, nache ivi' soua tres ca'agoxoiqa da ilotague' ye Jerusalén, ₃cha'aye so nta'a ye Egipto deuotaxanec da lo'onataxanaxac somaye da ilotague' ye Jerusalén, nache iỹaxanot se'eso shiỹaxauapi yi'iye 'alhua, da isheeten so tres mil trescientos kilos so lcat plata, qataq treinta y tres kilos so oro. ₄Qaq so nta'a ye Egipto, nataqa'en ỹanagui da nta'a, da ilo'ogue ye Judá qataq ye Jerusalén so Eliaquín, som lqaỹa so Joacaz, nache naralaxat da le'enaxat ỹanagui da Joacín, qaq so Joacaz qalaq icoñi' nache ỹauega ye Egipto.

₅Qaq so Joacín mashe ivi' soua veinticinco vi'iye, da nachaalataxac co'ollaq ỹacoolec da lo'onataxanaxac da nta'a, nache ivi' once vi'iye da ilotague' ye Jerusalén. Qalaxaye ỹataqta qauem nam ỹo'otpi maye ỹauaachigui Ñim Nataxala' maye Natamnaxala'. ₆Qaq so Nabucodonosor maye nta'a ye Babilonia, jec da iloquiaxan somaye nache loxonec, nache icoñerai' ỹanagui so ncoñetaxanaxat lcat bronce da yaqto' ỹauega ye Babilonia. ₇Qaq so Nabucodonosor nataqa'en huo'o so ỹache, ira'a ye Babilonia, som logoxoshetpi aso atamnaxaqui maye lalamaqte Ñim Nataxala', nache ỹachaigui aso natamnaxaqui somaye maye naña ye Babilonia. ₈Qaq na laỹepi na'aqtaguecpi so Joacín, qataq nam ỹo'otpi maye qaiqaiga, qataq dam huaigui somaye, nanettalec aso nere maye huetalec nam ỹo'otpi so nta'alpi ye Israel, qataq ye Judá. Qaq da lo'onataxanaxac da nta'a, qalaq talec so llalec Joaquín.

₉Qaq so Joaquín, mashe ivi' soua dieciocho vi'iye da nachaalataxac co'ollaq ỹacoolec da lo'onataxanaxac da nta'a, nache ivi' soua tres ca'agoxoiqa qataq diez na'axa'te da ilotague' ye Jerusalén. Qalaxaye ỹataqta qauem nam ỹo'otpi maye ỹauaachigui Ñim Nataxala'. ₁₀Qaq so nauoxo se'eso vi'i, nache so nta'a Nabucodonosor damaxasoxoolec somaye da qaỹauega ye Babilonia, nache nnaictague' qanqa'en som nogoxoshetpi maye ỹataqta huo'o da lashiichiỹaxac maye lalamaxat aso atamnaxaqui, maye lalamaqte Ñim Nataxala', nache ỹanagui da nta'a ye Judá qataq ye Jerusalén so Sedequías, som lauo' le'ec so Joaquín.

₁₁Qaq so Sedequías mashe ivi' soua veintiún vi'iye da nachaalataxac co'ollaq ỹacoolec da lo'onataxanaxac da nta'a, nache ivi' soua once vi'iye da ilotague' ye Jerusalén. ₁₂Qalaxaye ỹataqta qauem nam ỹo'otpi maye ỹauaachigui Ñim Nataxala' maye Natamnaxala'. Qataq saishet da nmanot co'ollaxa so na'aqtaxanaxanec Jeremías, maye ỹa'axatteguema co'ollaxa naua la'aqtaqa Ñim Nataxala'. ₁₃Qaq nataqa'en dataỹa'aguet so nta'a Nabucodonosor, maye ỹanot co'ollaxa so la'aqtac da ntaune' da lo'onataxanaxac, qataq quegue da saỹalaq nache saishet da ỹe'eguelaxa Ñim Nataxala', Ñim Natamnaxala' so Israel le'ecpi. ₁₄Nataqa'en 'enauac so nataxala'pi ye Judá, qataq so ntaxaỹaxanaxanecpi, qataq so nhuo' le'ecpi nquigaxattec da saỹalaq, nache quegue da ỹo'ottac nam qaiqaiga maye ỹo'ottac som ỹotta'a't shiỹaxauapi, maye ỹaqa'a da la'amqaanataxanaxac, qataq saiyacnapec aso atamnaxaqui maye lalamaqte Ñim Nataxala', maye maiche lca'aguishe Ñimaye, da nache lma' maye naña ye Jerusalén. ₁₅Qaq Ñim Nataxala', maye Natamnaxala' som hua'au lta'alpi, ỹataqta ñe'eguelaxatta'a co'ollaxa da lvitaqtaxanaxac ỹachegoxotchigui som la'aqtaxanaxanecpi, cha'aye huo'o da lchoxonnataxanaxa som lalamaxat nhuo' le'ecpi, qataq som 'alhua maye netalec somayepi. ₁₆Qalaxaye somayepi ỹataqta ỹe'eetac co'ollaxa som la'aqtaxanaxanecpi Ñim Lo'onatac 'Enauacna, qataq saỹaconegueta naua la'aqtaqa, qataq isheueetac som la'aqtaxanaxanecpi, choche ivitta'a da Ñim Nataxala' talec naqa'en da layeloxo som lalamaxat nhuo' le'ecpi, qaq 'era da 'eetec da qaica ca lata' damaye.

₁₇Qaq huaña nache Ñim Nataxala', ỹamaq so lta'a so caldeopi da iloquiaxan somayepi, nache irolec so ỹeelonec so nsoxoppi, huaigui naqa'en aso atamnaxaqui, nache saishet da ichoxoreetac se'eso nsoxoppi, qataq so qa'ampiolec, qataq so ỹa'axaiquipi, qataq som sara'añeeguelo naua lchel, qaq 'enauac somayepi da Ñim Nataxala' ỹaneguet da lhuaqỹaxac somaye. ₁₈Nache 'enauac som nhuenecpi maye lalamaxat aso atamnaxaqui maye lalamaqte Ñim Nataxala', so lta'araicpi qataq so qapio'olecpi, qataq so no'on nogoxoshetpi maye huetaigui aso atamnaxaqui, qataq so no'on logoxoshetpi so nta'a qataq so ltauapi, qaq 'enauac somayepi ỹache som lta'a so caldeopi, ira'a ye Babilonia. ₁₉Qaq nataqa'en ỹavigaxat aso atamnaxaqui maye lalamaqte Ñim Lo'onatac 'Enauacna, qataq iqalagoxotec so lpaqtaxat ye Jerusalén, qataq ỹavigaxat so lma' lta'araic so nta'a, qataq ilaxachigui 'enauac som huo'o da lasheechiỹaxac maye hueta'a yemaye. ₂₀Qaq ime nache ỹauega ye Babilonia som lca'alaxaicpi se'eso nalaataxanaxac, nache ỹauo'o l-latacpi somayepi, qataq som llalaqpi somaye, choche ivitta'a da nachaañi da no'onataxanaxac ye persa, ₂₁da yaqto' ipacchigui som la'aqtac co'ollaxa Ñim Lo'onatac 'Enauacna maye chegoqchigui naqa'en so la'aqtaxanaxanec Jeremías. Qaq 'era da 'eetec da se'eso 'alhua nque'etaxaachigui da nmataxac, cha'aye nmateeguesopa 'enauaque se'esoua vi'iye maye huetaiguilo da qaica ca lyac, choche ivitta'a da inoxoore'c soua setenta vi'iye.

₂₂Qaq so la'auaxanec vi'i da lo'onataxanaxac so Ciro maye nta'a ye Persia, qataq da yaqto' ipacchigui so la'aqtac Ñim Nataxala' maye ỹa'axat co'ollaxa so Jeremías, nache Ñim Nataxala' ỹamaxalec co'ollaxa so Ciro da 'enauac som ilotague'pi da ỹa'axatem, ỹauota'aisalo naua la'aqtaqa, qataq ỹereñi de'era lapaxañi lataxac maye, 'eeta': ₂₃«Ñim Ciro maye nta'a ye Persia, da la'aqtac 'eeta':