So Josías ỹo'oxoren so Lapascua
1Qaq so Josías, huaña naqa'en ye Jerusalén da ỹo'ot so Lapascua, da ỹo'oxoren Ñim Nataxala' so na'a'q catorce som la'auaxanec ca'agoxoic. 2Nache ỹanaña na lo'onataxanaqa'pi so ntaxaỹaxanaxanecpi, nache 'enapega da na'añaxat da ilo'ogue na no'onatacpi aso atamnaxaqui maye lalamaqte Ñim Nataxala'. 3Qaq nataqa'en so leviitapi maye ỹapaxagueetac so Israel le'ecpi, qataq mashe nañan da do'onataxanot Ñim Nataxala' ỹanem somayepi dam lapaxaguenataxanaxac, 'eeta': «Añi arca maye sa qaishetapec, qauachiỹaigui qome añi atamnaxaqui maye lo'onata co'ollaxa so Salomón, som llalec so David, maye nta'a na Israel. Yaqto' nache tachiguiña da qauachiitaleguete naua qarallacolli' da qauachiitac. Nagui nache qanalemaqaite' da qauo'onataxañiỹot Ñim Nataxala' qataq na Israel le'ecpi, nam nhuo' maye lalamaxat Ñim Nataxala'. 4Qanaỹamaxachiiñi, ñi 'oonolec ỹataqtac ca maiche lauo' le'ecpi, qataq cam laloqo' da lo'onataxanaxac, nache qoquiitelec dam ỹereñi co'ollaxa so David, maye nta'a co'ollaxa na Israel qataq so llalec Salomón. 5Qaq huo'o qome ca no'onaña añi atamnaxaqui nam leviitapi, ỹataqtac na maiche nhuo' le'ecpi, da yaqto' ilo'ogue nam lauo' le'ecpi, na laỹepi Israel le'ecpi maye maiche lqaỹañecpi. 6Qauavigaxache qome ca qagueta llalec que'eca Lapascua, qataq qanqui'itaxache qataq qauo'oche cam qaiuen, da yaqto' nam qarqaỹaipi ipaqueelec da damaxasoxoolec co'ollaxa Ñim Nataxala', chegoqchigui naqa'en so Moisés.»
7Qaq huaña nache so Josías ỹachegoxotaigui aso maiche lalopi, da ỹanem 'enauac se'eso shiỹaxauapi maye hueta'a yemaye, som shiguiỹacpi da yaqto' qaỹo'oxoren so Lapascua, nache ỹanec so qagueta llalaqpi, qataq so quetaq llalaqpi, qaq somayepi ivi' treinta mil ye lcata, qataq nataqa'en so tres mil huaca llalaqpi. 8Qaq nataqa'en so ltauapi so nta'a, somayepi maiche chegoqchigui da huo'o so lachetaqtaxanaxat ỹanem so nhuo' le'ecpi, qataq so ntaxaỹaxanaxanecpi, qataq so leviitapi. Qaq so Hilcías, Zacarías qataq so Yejiel maye ilotegueto aso atamnaxaqui maye lalamaqte Ñim Lo'onatac 'Enauacna, ỹanem so ntaxaỹaxanaxanecpi so dos mil seiscientos shiguiỹacpi, qataq so trescientos huaca llalaqpi da yaqto' qaỹo'oxoren so Lapascua. 9Qaq so Conanías qataq soua lqaỹa't, Semaías, Natanael, Josabías, Yeguiel qataq so Josabad maye lataxala'ate so leviitapi, ỹaneuo aso cinco mil qaguetapi, qataq so quinientos huaca llalaqpi da yaqto' qaỹo'oxoren so Lapascua. 10Qaq co'ollaq mashe ime da qaỹaỹamaxatteguiñi se'eso ño'oxonnataxanaxac, nache so ntaxaỹaxanaxanecpi taỹa so lo'onataxanaqa'pi, qataq so leviitapi naỹamaxaañi ỹataqtac ye laloqo' da do'onataxan, nache ipacchigui da lamaxasoxonaxac so nta'a. 11Qaq huaña nache qaỹalauat so shiguiỹacpi maye qoỹaneua'a so Lapascua, qaq so leviitapi naxa da ỹa'arot na lqosot so shiguiỹacpi, nache so ntaxaỹaxanaxanecpi ichegoxolec naxa aso nca'atoxonaxalate som ltago'q so shiguiỹacpi maye so leviitapi ỹanem naxa somayepi. 12Qaq ime, nache qanqatec so lcheta maye iuen naxa da qaỹavigaxat, nache ỹataqtac nam nhuo' le'ecpi nam qoỹanem da yaqto' ỹanot Ñim Nataxala', nache ipacchigui da namaxasoxonaxac maye nanettalec aso lere so Moisés, qaq nache qoỹeetec nataqa'en so huaca llalaqpi. 13Qaq ime, nache qaỹauot so shiguiỹacpi da yaqto' qaỹo'oxoren so Lapascua, ipacchigui qanqa'en som nanettañi, qaq so laỹepi nachetaqtaxanaxatpi maye sa qaishetapec, qalaq qaỹachangui aso taxaquipi qataq aso napaxaỹaqtaxanaxaquipi, qataq so ntonaxanaxaquipi da qoỹaneuaq, nache ỹataqta qaiỹalapegue' da qaimenoigui 'enauac som nhuo' le'ecpi. 14Qaq ime, nache so leviitapi ỹaỹamaxaañi som maiche taỹot somayepi qataq so ntaxaỹaxanaxanecpi, cha'aye so ntaxaỹaxanaxanecpi maye chegoxoguetpi so Aarón, ỹataqta imela't iviraigui so pe da ỹaategueuo so nachetaqtaxanaxatpi maye qaỹavigaxatta qataq so lcheta. Qaq ỹoqo'oye so leviitapi huetague' co'ollaxa da ỹaỹamaxatteguiñi som maiche taỹot somayepi, qataq so ntaxaỹaxanaxanecpi maye chegoxoguet so Aarón. 15Qaq so 'onaxanaxaicpi maye chegoxoguetpi so Asaf, nataqa'en hueta'a so maiche lo'onataxanaqa'pi, qaq ipacchigui na lapaxañipi co'ollaxa so David, Asaf, Hemán qataq so Jedutún so huo'oi naua l-loxoco maye do'onataxaatacot so nta'a. Qaq ñi 'oonolec so lasom lo'opi, qalaq hueta'a so maiche lauanec lasom, qaq ñi 'oonolec somayepi saishet da ca'ai som lo'onataxanaqa'pi, cha'aye so lo'onataxanaxauapi leviitapi maiche ỹaỹamaxatteguiñi co'ollaxa so nachetaqtaxanaxatpi maye taỹot somayepi.
16Qaq 'era da 'eetec da se'eso na'a'q da qaỹaỹamaxaañi so no'onatacpi da qaỹo'onataxanot Ñim Nataxala', da yaqto' qaỹo'oxoren so Lapascua, qataq da qoỹaneuo so nachetaqtaxanaxatpi qaỹavigaxatta da yaqto' qaỹachalec aso nca'atoxonaxalate maye lalamaqte Ñim Nataxala', nache qaipacchigui dam lamaxasoxonaxac so nta'a Josías. 17Qaq so Israel le'ecpi maye ỹalectauo se'eso na'a'q, somayepi ỹo'oxoren se'eso Lapascua, qataq soua siete na'axa'te maye huaiguilo da qanallectac aso nauole maye qaica ca lalegue maye ỹasheeraxachigui. 18Qaq chegoqta'a so na'a'q co'ollaq do'onataxaatac so na'aqtaxanaxanec Samuel, da saỹauano' da qaỹo'oxoren ca 'eeta'am se'eso Lapascua da huaña ye Israel, qataq so nta'alpi ye Israel qaica co'ollaxa ca ỹo'oxoren so Lapascua, da 'eeta'am da llo'oxonnataxanaxac so Josías, da huaxaiguet so ntaxaỹaxanaxanecpi, qataq so leviitapi, qataq so lma' ye Judá qataq ye Israel, qataq nam hueta'a ye Jerusalén. 19Qaq co'ollaq qaỹo'oxoren se'eso Lapascua, qalaq huetoigui so vi'i dieciocho da lo'onataxanaxac da nta'a so Josías.
Da l-leuaxa so Josías
20Qaq co'ollaq qaỹoqtegue de'era, co'ollaq so Josías mashe imat da ỹaỹamaxaañi aso atamnaxaqui, nache so Necao, maye nta'a ye Egipto taỹa so tala Éufrates da yaqto' deloqui, huaña ye Carquemis. Nache so Josías hueqata'aguet somaye, 21qalaxaye so Necao ỹauo'o so lamaxashecpi da 'enapega somaye, 'eeta': «'Am nta'a ye Judá, ñaq aỹem 'aua'aqta'a, cha'aye nagui saishet da ñanac da 'am sataỹa'aguet, maye ñanac da sataỹa'aguet yem laỹepi shiỹaxauapi, maye nache 'eetai' da seloctague'. Ñim Lo'onatac 'Enauacna aỹem namaq da seỹalapigui', qaq ỹoqo'oye saishet qome da 'auataỹa'aguet Ñim Lo'onatac 'Enauacna maye aỹem hueta'aguet, yaqto' Ñimaye saishet da 'am ilaxachigui.»
22Qalaxaye so Josías saishet co'ollaxa da ỹe'eguelaq, nacherata da ipactague' da delogui' somaye, nache saishet da qocha'a da lvitaqtaxanaxac so Necao maye ỹachegoxoto'ot Ñim Lo'onatac 'Enauacna. Qaq ỹoqo'oye taỹa co'ollaxa so ca'amegue ye Meguido da delogui' somaye, 23qaq som checna lo'opi ỹaỹen co'ollaxa so nta'a Josías, nache somaye 'enapegalo soua lataxala'ate so nalleppi, 'eeta': «¡Ñaq aỹem qanqacheeguesop ne'ena, cha'aye ỹataqta lta'araic da ique'emaxa!» 24Nache soua lataxala'ate so alleppi nqateeguesop somaye aso nalaataxaqui laigona, nache nquigaxat da ỹanangui aso lỹa naigona, nache soomaye ira'alo ye Jerusalén, yem huaña co'ollaxa da ileu. Nache soomaye ilayiñi somaye, ỹachaigui aso nhuachiqui so hua'au lta'alpi. Qaq 'enauac so hueta'a ye Judá, qataq ye Jerusalén da nỹeeteguelec co'ollaxa da l-leuaxa so Josías. 25Qaq so Jeremías ỹo'ot co'ollaxa so lo'onec maye ỹa'axat da naquicoxo, souaxat da l-leuaxa so Josías. Qaq nache ivitta'a nagui da 'enauac na 'onaxanaxaicpi, qataq ana 'onaxanaxaipi da ỹo'ootac naxa na daquicota lo'onecpi da tachigui lauel so Josías. Qaq ne'ena no'onecpi ỹo'ot da nache lataxac nagui na Israel le'ecpi, qataq nache nanettalec ana lmalatepi na no'onecpi maye daquicota. 26Qaq na laỹepi na'aqtaguecpi so Josías, qataq nam no'on ỹo'otpi maye ipacchigui nam nanettalec aso nere maye huetalec na lqataxacpi Ñim Nataxala', 27qataq nam ỹo'otpi dam chegoqta'ague, qataq nam pa'atecpi, nache nanettalec aso lmalate nam ỹo'otpi so nta'alpi ye Israel qataq ye Judá.
