So nogoxoshetpi maye lalamaxatpi aso atamnaxaqui
1Qaq so Salomón nataqa'en ỹo'ot aso nca'atoxonaxalate maye chegaqaigui na bronce, qaq asomaye ivi' nueve metros ye lalogaxa qataq nueve metros ye lcategue, qaq ye lshequitcheguema ivi' cuatro metros y medio. 2Qataq nataqa'en ỹo'ot aso ỹataqta late'erai qataq colliichigui 'etaxat laỹe' maye chegaqaigui na bronce. Qaq ye lcachiguiñi na alap asomaye, ivi' cuatro metros y medio. Qaq ye lshequitcheguema, ivi' dos metros y veinticinco centímetros, qaq da ima'a't ye lcachiguiñi da colliichigui nache ivi' trece metros y medio. 3Qaq na pa'aguiñi asomaye nache ỹauo'o so le'enaqtacpi huacapi, nache diez naqa'en so naña ye cuarenta y cinco centímetros, nache ima'aguet naqa'en aso laỹe' na 'etaxat. 4Qaq asomaye nache netalec qanqa'en so doce ne'enaqtac huacapi, maye chegaqaigui na bronce. Qaq tres soua datatra'ague da sheu', qataq tres soua datatra'ague da taguiñi, qataq tres soua datatra'ague da nala' lliguisheguem, qataq tres soua datatra'ague da nala' lliguiñi. Qaq somayepi nache qosheta'a't qanqa'en, qaq aso 'etaxat laỹe' nache huetalec somayepi. 5Qaq ye lcategue naua laỹel asa'aso 'etaxat laỹe' ivi' ocho centímetros, qaq da lataxac na alap asomaye, 'eeta'am ana lauoxo ana lirio. Qaq nam tangui 'etaxat asomaye ivi' sesenta y seis mil litros.
6Qataq nataqa'en ỹo'o't soua diez nỹoxonaxaqui', nache cinco soua ỹaara'ague da aloic qataq cinco soua ỹaara'ague da ne'emaq asa'aso atamnaxaqui, qaq somayepi nache nỹoxoqui 'enauac so nhuenecpi da qoỹaneuo na nachetaqtaxanaxatpi maye qaỹavigaxatta, qaq aso late'erai 'etaxat laỹe' qalaq do'ogoxona da nỹo so ntaxaỹaxanaxanecpi.
7Qataq ỹo'ot aso diez lashe aso ncoỹaraxanaxaquipi chegaqaigui na oro, nache ỹanaigui aso atamnaxaqui, cinco soua ipa'axaara'ague da aloic qataq cinco soua ipa'axaara'ague da ne'emaq. 8Qataq nataqa'en ỹo'o't soua diez nquia'axala'ate, nache ỹanaigui aso atamnaxaqui, cinco soua ỹaara'ague da aloic asomaye, qataq cinco soua ỹaara'ague da ne'emaq. Nataqa'en ỹo'ot aso cien nemaxanaqtepi chegaqaigui na oro.
9Qaq nataqa'en ỹo'ot so nqasoxoc so ntaxaỹaxanaxanecpi, qataq so qasoxoc lta'araic, qataq so lasompi somaye, nache lapaxalec na bronce. 10Qataq aso late'erai 'etaxat laỹe', ỹanaña da pa'aỹa'ague da aloic aso atamnaxaqui, maye pa'aỹangui na laiñi da taguiñi qataq da nala' lliguisheguem.
11Qaq so Jirán nataqa'en ỹo'ot aso taxaquipi, qataq so nsheraxanaxatpi, qataq aso nemaxanaqtepi, qaq 'era da 'eetec co'ollaq imat da ỹo'ottac 'enauac so nhuenecpi maye ỹamaxaalec so Salomón da yaqto' lalamaxat aso atamnaxaqui maye lalamaqte Ñim Lo'onatac 'Enauacna. 12Qataq soua dos nhuoqtel, qataq soua colliichiguilo llo'oxoraqtel maye netralec na pa'asheguem se'esoua nhuoqtel, qataq soua npaqtaqa lca'ache maye coleesopa se'esoua colliichiguilo llo'oxoraqtel pa'airasheguem soua nhuoqtel, 13qataq aso cuatrocientos ne'enaqtapi granadapi maye llo'oxoraqtepi soomaye, maye qoỹanaua'a naua laỹel soua npaqtaqa lca'ache, nache inoicchiyiñi qanqa'en dos soua lleco da netaua'alo naua laỹel se'esoua npaqtaqa maye netralec na pa'asheguem se'esoua nhuoqtel. 14Nataqa'en ỹo'o't aso diez lo'oxonaxalatepi aso 'etaxat laỹe'pi. 15Qaq aso late'erai 'etaxat laỹe' nache qoỹaatalec so doce huacapi, 16qaq nataqa'en aso taxaquipi, nsheraxanaxatpi, qataq so nquerenaxanaxatpi.
Nache 'enauac se'eso no'onataxanaxatpi da ỹo'ot so Jirán, da yaqto' qoỹanem so Salomón da lalamaxat naqa'en aso atamnaxaqui maye lalamaqte Ñim Lo'onatac 'Enauacna, qaq somayepi chegaqaigui na ỹataqta no'on lcat bronce. 17Qaq huaña co'ollaxa ye nalochiguiñi 'alhua ye Jordán, yem vichiguinguilo ye Sucot qataq ye Saretán, co'ollaq qanqatel somayepi qaỹauota'a aso nqatelaxaquipi. 18Qaq cha'aye ỹataqta qalota se'eso nogoxoshetpi maye damaxasoxoolec so Salomón, ỹoqo'oye somaye saishet da damaxasoxoolec da qanaloqten se'eso bronce.
19Qaq 'era da 'eetec so Salomón da damaxasoxoolec nataqa'en da qaỹo'ot so laỹepi nhuenecpi da yaqto' lalamaxat aso atamnaxaqui maye lalamaqte Ñim Lo'onatac 'Enauacna, aso nca'atoxonaxalate maye ndota't oro, qataq so nquia'axala'pi maye qaỹachalec naxa aso nauolepi maye qaiỹotauga da lalamaqtepi Ñim Lo'onatac 'Enauacna, 20qataq aso lashepi aso ncoỹaraxanaxaquipi, qataq asom ncoỹaraxanaxaquipi maye nataqa'en oro, da yaqto' icoỹattalec ye datatauga ye sa qaishetapec nanataqa', da yaqto' qaipacchigui da namaxasoxonaxac, 21qataq aso ne'enaqtapi lauoxopi, ncoỹaraxanaxaquipi qataq aso nquerenaxanaqtepi, somayepi 'enauac chegaqaigui na ndota't oro, 22qataq so nchegaxanaxatpi, qataq aso ỹomaxaquipi, qataq so nemaxanaxatpi, qataq aso nchenaxanaxat laỹe'pi, 'enauac da chegaqaigui na ndota't oro. Qataq so ñegueuo aso atamnaxaqui, qataq som pa'aỹauo lasompi so sa qaishetapec nanataqa', nataqa'en 'enauac oro.
