1Qaq co'ollaq ime 'enauac so no'onataxanaxatpi maye damaxasoxoolec so Salomón, da yaqto' lalamaxat aso atamnaxaqui maye lalamaqte Ñim Nataxala', nache somaye irouo som nhuenecpi maye 'enauac oro, qataq plata, maye so lta'a David, ỹanot co'ollaxa Ñim Nataxala', nache ỹanaigui aso naỹamaqtaxaqui nam no'on nogoxoshetpi maye naigui aso atamnaxaqui maye lalamaqte Ñim Lo'onatac 'Enauacna.
So Salomón nquigaxata aso atamnaxaqui aso laỹe' soua nqataxaco
2Qaq huaña nache so Salomón, huaña naqa'en ye Jerusalén da laỹona't so nqueroxonecpi ye Israel, qataq so lataxala'pi so maiche nhuo' le'ecpi, qataq som lataxala'pi so maiche llalaqpi so Israel le'ecpi, da yaqto' ỹachegotchiguiña ye Sión, yem huaqta'a't nỹecpi maye lalamaxat so David, da nquigaxat aso arca maye laỹe' soua lqataxaco Ñim Nataxala'. 3Qaq nache huetoigui so naponaxac lta'araic maye huaigui so ca'agoxoic siete, se'eso vi'i da 'enauac so Israel le'ecpi da laỹona't da dataỹot so nta'a Salomón. 4Qaq co'ollaq ivi' so nqueroxonecpi ye Israel, nache so leviitapi ỹacoosop aso arca maye laỹe' soua nqataxaco, 5nache so ntaxaỹaxanaxanecpi, qataq so leviitapi ỹache asomaye, lỹatec naqa'en so npe'l maye huaña naxa da qanauane' Ñim Lo'onatac 'Enauacna, qataq 'enauac som nhuenecpi maye lalamaxat so npe'l. 6Qaq so nta'a Salomón, qataq 'enauac so lapoota'a't Israel le'ecpi maye datato'ot so nta'a, nache datataua'a aso arca maye laỹe' soua nqataxaco, nache ỹaategueuo aso lachetaqtaxanaqtepi qaguetapi, qataq so huacapi, qaq somayepi ye ỹataqta qolota, nache saishet da qaỹañoxot da qanaloqten. 7Ime nache so ntaxaỹaxanaxanecpi ỹacoosop aso laỹe' soua naỹamaxataxaco Ñim Nataxala', nache iroua'a so ỹataqta pa'auo aso atamnaxaqui, som nanataqa' maye sa qaishetapec, nache ỹanaña ye nalochiyiña naua laua't soua ne'enaqtaqa querubines, 8qaq naua laua't se'esoua ne'enaqtaqa, ỹauattaguilo nache ipelteetaleguete ye netaña aso laỹe' soua nqataxaco, nache ipelteetalec asomaye, qataq soua qo'oipaxaye maye lachoxola'ate da qanqochenaxat. 9Qalaxaye se'esoua qo'oipaxaye ye ỹataqta logoraiqa, nache soua lsheeneqa yo'oqte' da qanayeeta'a so nanataqa' qui'itta, maye dataỹauga so sa qaishetapec nanataqa'. Qalaxaye na ỹoqta pa'auec, nache saishet da qaila'alo soomaye, qaq soomaye nache 'eetai'salo ye huetra'a choche ivitta'a nagui. 10Qaq asa'aso laỹe' soua nqataxaco, qaica ca lỹa huetaiguilo nachaqsouate' soua dapaqaiqa coma'ye maye so Moisés ỹacheraigui co'ollaq huaña ye Horeb, yem huaña co'ollaq Ñim Nataxala' naỹamaxate' so Israel le'ecpi, co'ollaq mashe ime da somayepi ca'ai ye Egipto.
11Qaq so ntaxaỹaxanaxanecpi ca'ai co'ollaxa so nanataqa' qui'itta. Cha'aye 'enauac se'eso ỹalectauo ntaxaỹaxanaxanecpi imauec co'ollaxa da mashe nqui'itaxat, nache saishet da ipactague' cam laloxoqui da do'onataxan. 12Qaq so leviitapi maye 'onaxanaxaicpi, som Asaf, Hemán, qataq so Jedutún, lỹateuo so llalaqpi qataq so laỹepi lauo' le'ecpi, somayepi nachattañi ỹaatañi so logoxot lino, nache hueta'a ye pa'aỹa'ague da nala' lliguisheguem aso nca'atoxonaxalate. Qaq somayepi nache ỹauota'a so latoviaxanatacpi, lasaquiaxanatapi, arpapi, qataq aso liirapi, qaq somayepi nache ỹalecta'aguet so ciento veinte ntaxaỹaxanaxanecpi maye ỹashettapigui aso lasheerepi. 13Nache somayepi 'enauac da nmasheguem da do'onaxaata'ai' aso lviquepi, ỹo'oxoreetac qataq ỹaatacot da na'achecỹaxac Ñim Nataxala'. Qaq somayepi co'ollaq nlamaxaren da do'onaxaata'ai' aso lasheerepi, simbalopi, qataq aso laỹepi nviquepi, nache do'onaxaato'ot Ñim Nataxala', 'eeta':
«Qavio'oxoyiñi Ñim Nataxala', cha'aye Ñimaye soxoraic, qataq chochaq tatec da lauotaxanaqtaic.» Huaña co'ollaxa nache aso atamnaxaqui maye lalamaqte Ñim Nataxala', ỹataqta nlaqchigui so napalñi lo'oc. 14Qaq souaxat se'eso napalñi lo'oc nache so ntaxaỹaxanaxanecpi saishet da queto'ot da ỹo'ot da llo'oxonnataxanaxac, cha'aye da llo'oxoyec Ñim Nataxala' ỹataqta nlaxagui asa'aso atamnaxaqui.
