Aso nate'e ye Sabá namaqtega so Salomón
1Qaq aso nate'e ye Sabá, co'ollaq hua'aqteguelec da no'on na'aqtaguec so Salomón, nache asomaye taỹa ye Jerusalén da ỹe'eguen somaye, irolec nam ỹataqta qalaqaicpi nnataxanaxacpi. Qaq asomaye nnaictague' so qalota ltauapi, qataq aso cameellopi maye ỹachetac so qalota coraxatpi, qataq so qalota oro, qataq so ỹataqta no'on coma'pi. Qaq co'ollaq ivireua'a so Salomón, nache asomaye denataxanec 'enauac nam iuennatega da denataxanec, 2qaq nache so Salomón, ỹasateguet 'enauac se'eso nnataxanaxacpi asomaye. Nache qaica da huo'otaq 'oonolec ca sa ỹasateguet se'eso nnataxanaxacpi. 3Qaq aso nate'e ye Sabá, co'ollaq ila'a da ỹataqta huo'o da laỹaanec so Salomón, qataq da imeteetac so lma' lta'araic maye no'oxoosheguem somaye, 4qataq so nallec maye huetalec so lquia'axala', qataq da lyac so lma'pi so 'amaqtaqaic ltauapi, qataq da lataxac qataq da no'otaxac som lamaxashecpi, qataq so nỹomaxaqui lo'opi, qataq da no'otaxac somayepi, qataq so ñiguisheguem da qotasheguema aso atamnaxaqui, nache asomaye ỹataqta huo'o da la'aalaxa. 5Nache asomaye, 'enapego' so nta'a, 'eeta': «Qache ỹataqta 'eeso' dam sa'aqtapeguelec naxa da soota'a yem ima', da qaỹa'axattac na 'auo'otpi, qataq na 'araỹaanecpi, 6qalaxaye saishet da ỹataqta sa'amaqten, nache ivitta'a da ñanac, qaq nagui nache ỹataqta semeteetac. Qalaxaye saishet da ivi' da imauec da aỹem qaỹa'aqtaxaatapeguem naxa de'era lta'araic 'araỹaanec, cha'aye da llo'oxoyec na 'auo'otpi, ỹataqta napacalec nam sa'aqtapeguelecpi. 7¡Qaq ỹataqta machiguiñi qome na 'analleppi, qataq na 'aramaxashecpi maye nache 'eetai' naxa da huetaua'a na 'araỹe da na'axaỹaxaatega nam 'araỹaanecpi! 8¡Qaq ỹataqta ỹo'oxoraq qome Ñim Nataxala' maye 'Anatamnaxala', maye 'am ỹaỹamaxareeta co'ollaq 'am ỹanem da 'anso'oongui añi so'onaxaqui da yaqto' 'am nta'a! ¡Souaxat da lta'araic lauotaxanaqtaic Ñimaye na Israel le'ecpi, qataq da chochaq tatec da qaica ca iraxanai' namayepi, ỹoqo'oye 'am ỹanagui da 'am nta'a, da yaqto' 'aulo'ogue namayepi, qataq 'auo'ot na nalochiguiñi qataq na ỹaỹamaqchiguiñi lataxacpi!»
9Ime, nache asomaye ỹami' so nta'a aso tres mil novecientos kilos na oro, qataq so qalota coraxatpi, qataq so ỹataqta no'on coma'pi. Qaq ye Israel ỹataqta sa ỹauanapega da qaira'a ca 'eeta'am ye lcata se'eso coraxatpi maye aso nate'e ye Sabá, ỹanem so Salomón.
10Qaq som lamaxashecpi so Jirán, qataq so lamaxashecpi so Salomón, som ndoi' co'ollaxa so oro, maye ỹachegoxota'a ye Ofir, nataqa'en ndoi' co'ollaxa so qo'oipaqpi sándalo, qataq so ỹataqta no'on coma'. 11Qaq nacheso se'eso qo'oipaqpi sándalo, da so nta'a ỹachegoxotaigui da ỹo'ot so ñeguisheguempi, aso atamnaxaqui maye lalamaqte Ñim Nataxala', qataq so lma' lta'araic so nta'a, nataqa'en ỹo'ot aso nviquepi arpapi, qataq aso liirapi, da yaqto' lviquepi so 'onaxanaxaicpi. Qaq ỹataqta sa ỹauanapega da qaỹauaachigui ca 'eeta'am ye lcata se'eso qo'oipaqpi yi'iye 'alhua Judá. 12Qaq so nta'a Salomón, nache ỹami' aso nate'e ye Sabá 'enauac nam iỹaxanaique asomaye, nache napacalec ye lcata so nda'a asomaye so nta'a. Ime, nache aso nate'e ỹe'eguelaxa ye na'alhua, nnaictague' so 'amaqtaqaic ltauapi.
Da llo'oxoyec qataq da lsallaxa so Salomón
13Qaq so oro maye ỹacootapeguet so Salomón ye 'oonolec vi'i, qalaq ivi' veintidós mil kilos, 14qalaxaye saishet da qanaloqten aso ỹaatapegueuo lsheetenaxanaqte so nmenaxaicpi, qataq so chegaqauecpi queuoxoicpi. Qaq nataqa'en 'enauac so nta'alpi ye Arabia, qataq so nataxala'pi yi'iye 'alhua, nache ndotega na oro, qataq na lcat plata so Salomón. 15Qaq so nta'a Salomón damaxasoxoolec da qaỹo'ot aso doscientos npaqtaxanaqtepi maye chegaqaigui na nda'a't oro, nache añi 'oonole asomayepi ivi' seis kilos na oro. 16Qataq damaxasoxoolec nataqa'en da qaỹo'ot aso trescientos nquicta't npaqtaxanaqtepi, qaq añi 'oonole asomayepi ivi' tres kilos na oro, nache ỹachaigui so nma' lta'araic maye le'enaxat «Naviaq ye Líbano.» 17Qaq somaye nataqa'en damaxasoxoolec aso late'erai so'onaxaqui maye chegaqaigui na marfil, nache damaxasoxoolec da qalapaxalec na nda'a't oro. 18Qaq asa'aso so'onaxaqui, seis soua taỹasheguemalo napiaxala'ate, qataq netalec so qaỹatasheguema napiaxala' maye nda'a't na oro, qataq naua laỹel huo'oi naua la'axasoxola'ate naua nhuaxaye, nache ñi 'oonolec soomaye, huetaua'a na laỹe soua nachattrañi ne'enaqtaqa llon. 19Qaq nataqa'en huo'o so doce nachattañi ne'enaqtac llonpi, nache ñi 'oonolec nachattañi, netaua'alo naua laỹel se'esoua seis napiaxala'ate. ¡Qaq ỹataqta saỹauanapego' da huo'o ca ỹo'ot aca 'eeta'am asa'aso so'onaxaqui som laỹepi nta'alpi! 20Qataq nataqa'en aso ỹomaxaquipi maye lalamaqte so nta'a, 'enauac da oro, nataqa'en so nquia'axaquipi maye huetaigui so nma' lta'araic maye le'enaxat «Naviaq ye Líbano», nda'a't na oro, qaica ca chegaqaigui na lcat plata, cha'aye se'eso na'a'q maye huetaigui so Salomón, qaica ca naigui qanqa'en na plata. 21Cha'aye aso notaxaquipi da qanayiguingui 'etaxat maye lalamaqtepi so nta'a Salomón, maye taỹa naxa ye Tarsis, nache netangui so lamaxashecpi so Jirán, nache 'oonolec naxa da nvi' da inoxoorec yeua tres vi'iye, nache nachetac na oro, plata, marfil, huoỹempi, qataq na polalopi.
22Qaq da lsallaxa, qataq da laỹaanec so nta'a Salomón, ỹataqta napacalec na laỹepi nta'alpi ana 'alhua. 23Qaq 'enauac so nta'alpi ana 'alhua, huotaique da ỹauatton so Salomón, qataq da na'axaỹaxana da laỹaanec maye Ñim Lo'onatac 'Enauacna, ỹanem co'ollaxa somaye. 24Qaq ỹoqo'oye somayepi, 'enauaque naua vi'iye da irotega na nmepi, oro, plata, coraxatpi, caipi qataq molapi.
25Qaq so Salomón, nataqa'en cuatro mil so lma'pi so lalo caipi, qataq aso naigonapi maye alaataxaquipi, qataq doce mil so nalleppi maye netalec naxa na caaỹo, maye ipa'axaneguet da ilo'ogue so lma'pi aso naigonapi maye alaataxaquipi, qataq nauaatalec so nma' lta'araic maye naña ye Jerusalén. 26Qaq so Salomón, ivira'a da ilotague' 'enauac so laỹepi nta'alpi, nache chegoqchiguiña so netaña ye tala Éufrates, nache ivitta'a ye na'alhua so filisteopi, qataq so loga't ye 'alhua Egipto. 27Nache so nta'a ỹo'ot da ye Jerusalén ỹataqta qalota na plata, qataq na no'on coma', qataq ỹataqta qalota aso cedropi, 'eeta'am ana huauec hiigo, maye hualec ye nalochiguiñi 'alhua. 28Qaq so lalo caipi so Salomón qalaq qaỹachegoxota'a ye Musri, qataq 'enauac so laỹepi 'alhuapi.
Da l-leuaxa so Salomón
29Qaq na laỹepi na'aqtaguecpi so Salomón, chegoqchiguiña som hua'auchiguiñi qataq so pa'atec de'era lo'onataxanaxac, nache nanettalec aso nere maye huetalec da na'aqtaguec so na'aqtaxanaxanec Natán, qataq aso nanettalec na l-loxocpi so Ajías, maye lma' ye Silo, qataq aso nanettalec na lauanaqchecpi so na'aqtaxanaxanec Iddo, co'ollaq ỹa'axata'a da 'eetec so Jeroboán, maye llalec so Nabat. 30Qaq so Salomón, ivi' cuarenta vi'iye da nta'a, netaña ye Jerusalén da ilotague' 'enauac so Israel le'ecpi. 31Qaq co'ollaq ileu somaye, nache qailareña ye huaqta'a't nỹecpi maye lalamaxat so David, maye lta'a somaye. Ime, nache da lo'onataxanaxac da nta'a, talec so llalec Roboán.
