2 Crónicas 10

₁Qaq so Roboán, taỹa ye Siquén, cha'aye so Israel le'ecpi taỹa co'ollaxa yemaye da ỹaasheguem somaye da nta'a. ₂Qalaxaye so Jeroboán, maye llalec so Nabat, co'ollaq ỹaỹaten damaye nache ñe'eguelaq, chegoqchiguiña ye Egipto, yem ỹe'eguena co'ollaq dataueeguesop so nta'a Salomón. ₃Qaq co'ollaq qaỹamaxasoxona so Jeroboán, nache somaye anac, nnaictague' 'enauac so Israel le'ecpi, nache 'enauac somayepi da na'aqtaxane' so Roboán, nache 'eeta':

₄So 'arta'a qomi' ỹacheleguete co'ollaxa so ỹataqta qapa'atta no'onatacpi, qaq nagui iuen da huaỹoxootac 'anqa'en nam qaro'onatacpi, nache qomi' 'anqateeguesopa nam qapa'atta maye qomi' ỹacheleguete co'ollaxa so 'arta'a, nache qomi' 'am so'onataxanaqot qome.

₅Nache so Roboán, 'enapego' somayepi 'eeta': Qom ivildec naua tres na'axa'te nache qañe'eguelaqai qome, nache so shiỹaxauapi ỹe'eguelaq, ₆qaq huaña nache so nta'a Roboán, nnate' so ỹa'axaiquipi maye lamaxashecpi co'ollaxa so lta'a Salomón, co'ollaq ña nca'altauec. Nache inat somayepi 'eeta': ¿Ca 'eetec ca qarqataxaqui da yaqto' sasateguet se'eso shiỹaxauapi?

₇Nache somayepi 'enapeco': Da 'auchoxoren somayepi, qataq da 'auaỹamaxatta da lataxac, qataq da 'ano'onaxa't naua 'ara'aqtaqa da 'auasateguet se'eso shiỹaxauapi, nache somayepi chochaq tatec qome da 'am do'onataxaatacot.

₈Qalaxaye so Roboán, saishet da ỹalaxaguet da lqataxac se'eso ỹa'axaiquipi, nacherata da nnate' so nsoxoppi, maye naloxouapi, qataq maiche lamaxashecpi, ₉nache inat, 'eeta': ¿Ca 'eetec ca qarqataxaqui da yaqto' sasateguet se'eso shiỹaxauapi, maye aỹem 'enapega da ñequigaxaañi da lsallaxa na qapa'atta no'onatacpi maye ỹachelec co'ollaxa so ita'a?

₁₀Nache so nsoxoppi maye naloxouapi somaye, 'enapeco': Se'eso shiỹaxauapi maye 'am 'enapega da 'anquigaxaañi da lsallaxa nam qapa'atta no'onatacpi maye ỹachelec co'ollaxa so 'arta'a, qonapega qome qoneta': Da so ita'a, qami' ỹacheleguete co'ollaxa nam qapa'atta no'onatacpi, qaq aỹem ñequigaxattec qome da lsallaxa ca qami' sacheleguete no'onatac. ₁₁Qaq da so ita'a da qami' ỹacheleguete co'ollaxa na no'onatacpi maye qapa'atta, nache aỹem ñequigaxattec qome da lsallaxa ca qami' sanema, qaq da huo'otaq qami' iroleguete co'ollaxa ca lalashenaxanaxat, qaq aỹem qalaq qami' seroleguete qome ca nalashenaxanaxat maye lca'ache naua lsheeneqa.

₁₂Qaq co'ollaq inoxoore'c soua tres na'axa'te, nache ñe'eguelaq so Jeroboán, nnaictague' 'enauac so shiỹaxauapi da nachaateua'a so nta'a Roboán, cha'aye se'eso nta'a maiche la'aqtac co'ollaxa. ₁₃Qalaxaye so nta'a Roboán, ỹataqta sa nsatte' naua la'aqtaqa co'ollaq ỹasateguet somayepi, nache saishet da ỹalaxaguet da lqataxac som nqueroxonecpi, ₁₄nacherata da quetelec nam lqataxacpi so nsoxoppi, nache somaye, 'eeta': Da so ita'a qami' ỹacheleguete co'ollaxa na qapa'atta no'onatac, qaq aỹem ñequigaxattec qome da lsallaxa ca qami' sacheleguete, qaq da so ita'a qami' iroleguete co'ollaxa ca nalashenaxanaxat, qaq aỹem qalaxaye qami' seroleguete ca nalashenaxanaxat maye lca'ache naua lsheeneqa. ₁₅Nache so nta'a, saishet da ỹalaxaguet se'eso shiỹaxauapi, cha'aye Ñim Nataxala' nache 'ena'ac co'ollaxa da 'eetec de'era, yaqto' ipacchigui dam ỹa'axata'a co'ollaxa Ñimaye, chegoqchigui so Ajías, maye lma' ye Silo, da da'aqtaxanem so Jeroboán, som llalec so Nabat. ₁₆Qaq se'eso nhuo' Israel le'ecpi, co'ollaq ila'a da so nta'a saishet da ỹalaxaguet somayepi, nache somayepi, 'enapeco':

Qaq huaña nache 'enauac so Israel le'ecpi ỹe'eguelaxalo naua lma'ate. ₁₇Qaq so Roboán, nache queto'ot da ilotague' so Israel le'ecpi maye netaña so huaqta'a't nỹecpi maye ỹotta'a't naua nañalo ye Judá. ₁₈Ime, nache so Roboán, ỹamaq co'ollaxa so Adoram, da pa'aỹa'aguet da ilo'ogue nam qaỹamaxasoxoolec no'onatacpi, nache so Israel le'ecpi ỹalauat somaye, irota'a so coma'. Huaña nache so Roboán, sa naỹaloxon da huenooñigui aso nnaigona, nache datauec, taỹa ye Jerusalén. ₁₉Qaq 'era da 'eetec da so Israel le'ecpi, ca'ai co'ollaxa so llalaqpi so David, nache ivitta'a nagui.