2 Reyes 13

₁Qaq co'ollaq mashe ivi' soua veintitrés vi'iye da nta'a so Joás, som llalec so Ocozías, maye nta'a co'ollaxa ye Judá, nache so Joacaz, maye llalec so Jehú, ỹacoolec da lo'onataxanaxac da ilo'ogue so Israel le'ecpi, qataq ivi' diecisiete vi'iye da lo'onataxanaxac da nta'a, huaña ye Samaria. ₂Qalaxaye somaye ỹo'ot nam ỹataqta saỹaỹamaxaren Ñim Nataxala', cha'aye icaachigui nam ỹo'otpi co'ollaxa so Jeroboán, maye llalec so Nabat, qataq saishet da ca'ai nam qauem maye ỹo'ot co'ollaxa na lasouaxashetpi so Israel le'ecpi. ₃Qaq ỹoqo'oye ỹataqta 'eroigui da lalemataic Ñim Nataxala' da dalemataỹa so Israel le'ecpi, nache ỹataqta qaỹoqtec naqa'en da ỹaneguet da lhuaqỹaxac so Jazael, maye nta'a ye Siria, qataq so Ben Adad, maye llalec so Jazael. ₄Huaña, nache so Joacaz natamnot Ñim Nataxala', nache Ñimaye hua'axaỹa co'ollaxa da natamnaxac somaye, cha'aye ỹataqta imeteetac da lachoxoyec so Israel le'ecpi, souaxat so nta'a ye Siria da ỹataqta saiyacnapec somayepi. ₅Nache Ñim Nataxala', ỹanem so lca'alaxaqui, huaña nache so Israel le'ecpi, huesoueeguesop da la'añaxac so siiriopi, nache ỹe'eguelaxa da qaltaq ỹe'emaqtac. ₆Qalaxaye ñaqaiyeta saishet da ca'ai nam qauemsat, maye ỹo'ottac co'ollaxa som llalaqpi som Jeroboán, maye ỹo'ot co'ollaxa nam lasouaxashetpi so Israel le'ecpi, nacherata da queto'ot da ỹo'ottac na qauem, qataq so lqui'i aso Aserá, nache sa iraxanai' da netaña naqa'en ye Samaria. ₇Qaq so Joacaz, nachesota so cincuenta nalleppi maye netalec naxa na caaỹo da no'onañi, qataq aso diez naigonapi maye nalaataxaquipi, qataq so diez mil nalleppi maye petañepi, cha'aye so nta'a ye Siria, nmatchiguiñi so laỹepi nalleppi somaye, qataq ỹataqta dolachigui naqa'en.

₈Qaq nam laỹepi na'aqtaguecpi so Joacaz, qataq 'enauac nam ỹo'otpi, qataq da la'añaxac, nache nanettalec aso nere maye huetalec da na'aqtaguec so nta'alpi ye Israel. ₉Qaq co'ollaq ileu so Joacaz, nache qailareña ye Samaria. Qaq da lo'onataxanaxac da nta'a, nache talec so llalec Joás.

₁₀Qaq co'ollaq mashe ivi' soua treinta y siete vi'iye da so Joás, nta'a ye Judá, nache so Joás, som llalec so Joacaz, ỹacoolec da lo'onataxanaxac da ilo'ogue ye Israel, nache ivi' soua dieciséis vi'iye da lo'onataxanaxac da nta'a huaña ye Samaria. ₁₁Qalaxaye somaye ỹo'ot nam ỹataqta saỹaỹamaxaren Ñim Nataxala', cha'aye saishet da ca'ai nam qauemsat maye ỹo'ot co'ollaxa so Jeroboán, som llalec so Nabat, maye ỹo'ot co'ollaxa na lasouaxashetpi so Israel le'ecpi, nacherata da quetalec da ỹo'ottac namayepi.

₁₂Qaq nam laỹepi na'aqtaguecpi so Joás, qataq 'enauac nam ỹo'otpi, qataq da la'añaxac, qataq da 'eetec co'ollaq nalattague' so Amasías maye nta'a ye Judá, nache nanettalec aso nere maye huetalec da na'aqtaguec so nta'alpi ye Israel. ₁₃Qaq co'ollaq ileu so Joás, nache qailareña ye Samaria, qaỹalecnoigui so nta'alpi ye Israel. Qaq da lo'onataxanaxac da nta'a, nache talec so llalec Jeroboán.

₁₄Qaq co'ollaq ỹataqta dalola so Eliseo, qataq mashe nayeeta'a da ileu, nache so Joás, maye nta'a ye Israel, nqo'ona co'ollaxa somaye, nache nỹeetac qataq qapalot, nache 'eeta':

¡'Am ita'a, 'am ita'a, 'am maye qoneta'am aca naigona, qataq ca lta'araic na'añaxac maye ỹauecta'aguet na Israel le'ecpi! ₁₅Nache so Eliseo, 'enapeco':

Ña 'auacona ca 'oonolec nchecnec qataq caua checnal.

Nache so nta'a, ỹacona so nchecnec qataq soua checnal. ₁₆Huaña nache so Eliseo 'enapega so nta'a ye Israel, 'eeta':

Ñaq 'anaỹamaxaañi da 'auaỹenec ana checna. Qaq co'ollaq mashe naỹamaxatchiguiñi so nta'a, nache so Eliseo ỹashel-leguete naua lhua'q so nta'a, ₁₇qataq 'enapega, 'eeta':

Ña 'auauatoigui ñi nalloxoqui maye pa'aigue da nala' lliguisheguem. Nache so nta'a ỹauatoigui somaye, nache so Eliseo 'enapega so nta'a, 'eeta':

Ña 'auaỹenec nagui anamaye.

Nache so nta'a ỹaỹenec aso nchecna, nache so Eliseo na'axannec so la'aqtac 'eeta':

¡'Am nchecna maye lca'alaqtaxanaqte Ñim Nataxala'! ¡Nchecna maye nca'alaxaqui da qanalaate' ye Siria! ¡Qaq nache 'am qome da 'auque'emaqchet ye siiriopi, huaña ye Afec, nache ivitta'a da ỹataqta nmichiguiñi 'anqa'en! ₁₈Ime, qaltaq 'enapega so nta'a, 'eeta':

Ña 'auaconalo naua nchecnal. Nache co'ollaq ỹaconalo soua nchecnal so nta'a, nache so Eliseo 'enapego' somaye 'eeta':

Ña 'auaxaalec na 'alhua. Nache so nta'a, tres da iuaxaalec na 'alhua, ime nache vi'iiguet. ₁₉Qaq huaña nache so na'aqtaxanaxanec dalemataỹa somaye, nache 'eeta':

Taxa da cinco huo'otaq seis da 'auaxaalec na 'alhua, nache 'anauec taxa ye Siria, ivitta'a da nmichiguiñi 'anqa'en, qalaxaye nagui, nache tres qome da 'anauec yemaye. ₂₀Qaq co'ollaq ime de'era, nache ileu so Eliseo, nache qailareñi. Qaq naxa da ivita ye dalaxaic vi'i, nache ivira naxa yi'iye 'alhua, som qalota moabiitapi, maye na'attagui so lo'ogoxonaxat. ₂₁Qaq huo'o co'ollaxa so huaña da so Israel le'ecpi, ilattapiguiñi so shiỹaxaua maye ileu, nache nque'elaxatta co'ollaxa da nvi' se'eso shiỹaxauapi maye na'attagui so lo'ogoxonaxat, nache se'eso leuaxaic qaỹasaxaigui co'ollaxa aso nhuachiqui so Eliseo. Qaq somaye co'ollaq choche nhuoqtegueta soua lpi'ineqa so Eliseo, nache se'eso leuaxai nca'alec.

₂₂Nache se'eso Jazael, maye nta'a ye Siria, ỹataqta huo'o naqa'en co'ollaxa da nque'eenaxac so Israel le'ecpi, 'enauaque soua vi'iye da nta'a so Joacaz. ₂₃Qalaxaye Ñim Nataxala', huo'o da lauotaxanaqtaic somayepi, nache ichoxoren souaxat da naỹamaxataxac Ñimaye, co'ollaq naỹamaxate' so Abraham, Isaac qataq so Jacob, nache Ñimaye saishet da ilaxachigui somayepi, qataq saishet da ca'ai, nache ivitta'a nagui. ₂₄Qaq co'ollaq ileu so Jazael, maye nta'a ye Siria, nache da lo'onataxanaxac da nta'a, talec so llalec Ben Adad. ₂₅Huaña, nache so Joás, som llalec so Joacaz, ñe'eguelaxaala't so huaqta'a't nỹecpi maye deuotaxanec co'ollaxa so Ben Adad co'ollaq nalattague' so Joacaz, som lta'a somaye. Nache so Joás, tres co'ollaxa da nauec so Ben Adad, huaña nache loxonec se'eso huaqta'a't nỹecpi maye maiche lalamaxat co'ollaxa so Israel le'ecpi.