'Enauac anam nachetaqtaxanaqte anom maye qanañaatapegueua'a naxa ana atamnaxaqui maye lalamaqte Ñim Nataxala', qataq anam ỹaqauga lsheetenaxanaqte ñi 'oonolec nam shiỹaxauapi, qataq ana maiche chegoqchigui da lhuennataxac ñi 'oonolec da ỹaneua'a añi atamnaxaqui maye lalamaqte Ñim Nataxala', 5na ntaxaỹaxanaxanecpi ỹaconeguet qome acam nañaneuo nam maiche lauo' le'ecpi, nache qauo'ogoxoñiỹa acamaye da qanapareñi na huaña na lpoxoỹaxapi añi atamnaxaqui. 6Qalaxaye co'ollaq ivi' soua veintitrés vi'iye da nta'a so Joás, qalaq ñaqaiyeta som ntaxaỹaxanaxanecpi saxanaxa co'ollaxa da naparen som lpoxoỹaxapi aso atamnaxaqui. 7Qaq huaña co'ollaxa, nache so nta'a Joás, iỹaxaneuga so ntaxaỹaxanaxanec Joyadá, qataq so laỹepi ntaxaỹaxanaxanecpi, nache 'enapega 'eeta':
«¿Ta'ainco' da saishet da qanapareñi nam lpoxoỹaxapi añi atamnaxaqui? Nagui nache tachiguiña da qauacoñiitapeeguet ana ndotapegueuo anompi na maiche qarhuo'oi le'ecpi, nacherata da qaỹa'añim namayepi da yaqto' naparen añi atamnaxaqui.» 8Nache se'eso ntaxaỹaxanaxanecpi ỹaỹamaxareeta da saishet da queta da ỹacootapeguet aso anom, maye ỹaatapegueuo naxa se'eso nhuo' le'ecpi, qataq saishet da queto'ot da pa'aỹa'aguet da naparen so lpoxoỹaxapi aso atamnaxaqui. 9Qaq huaña, nache so ntaxaỹaxanaxanec Joyadá, ỹacona aso 'oonole laỹe' aso anom, nache ỹo'ot so lauac so lapoxot asomaye, nache ỹanaña na pa'aỹa'ague da aloic aso nca'atoxonaxalate, maye pa'aỹa'aguet yem ñegueuo aso atamnaxaqui maye lalamaqte Ñim Nataxala'. Qaq soua ntaxaỹaxanaxanaqa maye iuattrague' so ñegueuo aso atamnaxaqui, nache ỹasaqtrangui asomaye 'enauac aso anom maye qairotegueua'a aso atamnaxaqui maye lalamaqte Ñim Nataxala'. 10Qaq soomaye naxa da ilora'a da mashe qalota aso anom maye huetangui asa'aso laỹe', nache anac som leraxanaxanec so nta'a, qataq so lataxala' so ntaxaỹaxanaxanecpi, nache naloqten aso anompi maye huetangui aso laỹe', maye netaña aso atamnaxaqui maye lalamaqte Ñim Nataxala', huaña nache soomaye ỹoxochiguilo so laỹe'. 11Qaq da ime naxa da naloqteetrac asomaye, nache ỹanem so ilotague' som ỹo'ottacpi aso atamnaxaqui, da yaqto' isheeten som ỹo'ottac so nchiiguishecpi 'epaq, qataq som dapaxaguenataxaatacpi maye ỹaỹamaxattapiguiñi aso atamnaxaqui maye lalamaqte Ñim Nataxala', 12qataq da isheeten som nỹec lo'opi maye napareetac asomaye, qataq som ichectac na coma', qataq da deshenaxana nam 'epaq, qataq na coma'pi da yaqto' naparen so lpoxoỹaxapi aso atamnaxaqui, qataq 'enauac som laỹepi maye iuen da qaisheenaxana da yaqto' qaỹaỹamaxaañi asomaye. 13Qalaxaye asa'aso anom, maye qoỹaneua'a naxa aso atamnaxaqui maye lalamaqte Ñim Nataxala', saishet da qaỹo'ogoxona da qaỹo'ot aso ỹomaxaquipi plata, nchegaxanaqtepi, nasheerepi, qataq so laỹepi nhuenecpi oro, huo'otaq plata, 14maye nacherata da qoỹanem som ilotague'pi da no'onataxanaxac, da do'onataxana asomaye da ỹaỹamaxaañi aso atamnaxaqui maye lalamaqte Ñim Nataxala'. 15Qaq se'eso shiỹaxauapi maye qoỹanem naxa asa'aso anom da yaqto' isheeten so 'onataxanaxaicpi, saishet da qaichemaxattac, cha'aye somayepi ỹataqta no'on da lataxac. 16Qaq aso anom maye nachetaqtaxanaqte naxa da lasheue da qaỹapalaxat ca npe'enaxanaxac, qataq ca nasouaxashet, asomaye saishet da qairoua'a aso atamnaxaqui, cha'aye lalamaqte som ntaxaỹaxanaxanecpi. 17Qaq se'eso na'a'q, so Jazael maye nta'a ye Siria, taỹa co'ollaxa ye Gat da iloquiaxan nache loxonec. Qaq co'ollaq ime, nache qaltaq naỹamaxat da taỹa ye Jerusalén da iloquiaxan. 18Qalaxaye so Joás, maye nta'a ye Judá, laỹona't co'ollaxa 'enauac so nogoxoshetpi maye saqaishetapecpi maye ỹaneuo co'ollaxa so Josafat, Jorán qataq so Ocozías, maye hua'auyiñi nta'al ye Judá, nataqa'en ỹacona so maiche ỹaneuopi co'ollaxa somaye, qataq 'enauac so lcatpi oro maye ilalec, huetaigui aso atamnaxaqui, qataq so nma' lta'araic maye lo'onataxanaqa' so nta'a, nache ỹamaxa so Jazael, maye nta'a ye Siria, huaña nache so Jazael saishet da ipaca'a da iloquiaxan ye Jerusalén.
19Qaq nam laỹepi na'aqtaguecpi so Joás, qataq 'enauac nam ỹo'otpi somaye, nache nanettalec aso nere maye huetalec da na'aqtaguec so nta'alpi ye Judá. 20Qaq soua maiche nale't so Joás, dataira'aguet co'ollaxa somaye, nache ỹalaua't co'ollaq huangui so qano'oxoosheguem nqa'aic maye taỹaña ye Silá. 21Qaq 'era da 'eetec co'ollaxa soua maiche nale't so Joás, som Josacar, som llalec so Simeat, qataq so Jozabad, som llalec so Somer, da ỹalaua't somaye. Qaq co'ollaq qailareñi so Joás, nache qaỹauaxaỹaxana'ai' som hua'au lta'alpi maye huaigui so huaqta'a't nỹecpi maye lalamaxat so David. Qaq da lo'onataxanaxac da nta'a, nache talec so llalec Amasías.
