2 Reyes 15

₁Qaq co'ollaq mashe ivi' soua veintisiete vi'iye da lo'onataxanaxac so Jeroboán, maye nta'a ye Israel, nache so Azarías, maye llalec so Amasías, ỹacoolec da lo'onataxanaxac da nta'a ye Judá. ₂Qaq somaye mashe ivi' dieciséis vi'iye da nachaalataxac co'ollaq ỹacoolec da lo'onataxanaxac, qataq ivi' cincuenta y dos vi'iye da lo'onataxanaxac da nta'a, huaña ye Jerusalén. Qaq aso late'e le'enaxat Jecolías, asomaye lma' ye Jerusalén. ₃Qaq so Azarías, ỹo'ot co'ollaxa nam ỹataqta ỹaỹamaxareeta Ñim Nataxala', cha'aye icaachigui da ỹo'ot nam ỹo'otpi co'ollaxa so lta'a Amasías. ₄Qalaxaye saishet co'ollaxa da nlaxaañi so qaỹoqotcheguema atamnaqa'pi, maye som nhuo' le'ecpi tasheguema naxa da ỹo'ot aso lachetaqtaxanaqtepi, qataq da ỹavigaxat so lchenaxanaxat. ₅Qalaxaye Ñim Nataxala', ỹo'ot co'ollaxa da nhuaxanaguec so nta'a Azarías, huec naqa'en so lepra, nache ivitta'a da ileu. Ỹoqo'oye so nta'a, ỹaqauga co'ollaxa naqa'en so lma', nache so llalec Yotán, ilo'ogue co'ollaxa se'eso nma' lta'araic, qataq ilo'ogue 'enauac so nhuo' le'ecpi.

₆Qaq nam laỹepi na'aqtaguecpi so Azarías, qataq nam ỹo'otpi co'ollaxa, nache nanettalec aso nere maye huetalec da na'aqtaguec so nta'alpi ye Judá. ₇Qaq co'ollaq ileu so Azarías, nache qailareñi, huaqta'ai' qanqa'en so hua'au lta'alpi, huaña so huaqta'a't nỹecpi maye lalamaxat so David. Qaq da lo'onataxanaxac da nta'a, nache talec so llalec Yotán.

₈Qaq so mashe ivi' soua treinta y ocho vi'iye da nta'a so Azarías, maye nta'a ye Judá, nache so Zacarías, maye llalec so Jeroboán, ỹacoolec da lo'onataxanaxac da ilo'ogue so Israel le'ecpi, qaq ivi' seis ca'agoxoiqa da lo'onataxanaxac, huaña ye Samaria. ₉Qalaxaye nam ỹo'otpi co'ollaxa so Zacarías, ỹataqta saỹaỹamaxaren Ñim Nataxala', cha'aye 'eeta'am so hua'au lta'alpi da saishet da ca'ai nam qauem ỹo'otpi so Jeroboán som llalec so Nabat, maye ỹo'ot da huo'o na lasouaxashetpi so Israel le'ecpi. ₁₀Qaq so Salún, som llalec so Jabés, dataỹa'aguet co'ollaxa so Zacarías, nache iloquiaxan co'ollaq huaña ye Ibleam nache ỹalauat, huaña nache so Salún ỹacona da lo'onataxanaxac somaye.

₁₁Qaq nam laỹepi na'aqtaguecpi so Zacarías, nache nanettalec aso nere, maye huetalec da na'aqtaguec so nta'alpi ye Israel. ₁₂Qaq 'era da 'eetec da ipacchigui da la'aqtac Ñim Nataxala', co'ollaq 'enapega so Jehú, 'eeta': «De'era 'aro'onataxanaxac, talec qome ca 'aỹa'alec, 'arhual, qataq cam llalec ca 'arhual, qataq cam laual camaye, da ilo'ogue na Israel le'ecpi.»

₁₃Qaq so Salún som llalec so Jabés, ỹacoolec da lo'onataxanaxac da ilo'ogue so Israel le'ecpi, co'ollaq mashe ivi' soua treinta y nueve vi'iye da lo'onataxanaxac so Uzías, maye nta'a ye Judá. Qalaxaye so Salún, ivi' 'oonolec ca'agoxoic da lo'onataxanaxac, huaña ye Samaria, ₁₄cha'aye so Menajén, som llalec so Gadi, chegoqchiguiña co'ollaxa ye Tirsa da taỹa ye Samaria, qaq co'ollaq ivita yemaye, nache iloquiaxan so Salún nache ỹalauat, qaq co'ollaq ime da ỹalauat, nache talec da lo'onataxanaxac somaye.

₁₅Qaq nam laỹepi na'aqtaguecpi so Salún, qataq co'ollaq dataỹa'aguet so Zacarías, nache nanettalec aso nere maye huetalec da na'aqtaguec so nta'alpi ye Israel.

₁₆Qaq nache huetoiguilo se'esoua na'axa'te da so Menajén, iloquiaxan co'ollaxa so huaqta'a't nỹecpi ye Tifesaj, nache ỹacona 'enauac som nogoxoshetpi maye huetaigui somaye, qataq som logoxoshetpi so saqaỹapequepi somaye. Qaq souaxat da saishet da qaỹauateguet co'ollaxa somaye, nache chegoqchiguiña ye Tirsa da iloquiaxan co'ollaxa, nache nataqa'en ipeleca'ague ana da'am aso hualaxaipi.

₁₇Qaq co'ollaq mashe ivi' treinta y nueve vi'iye da lo'onataxanaxac so Azarías, maye nta'a ye Judá, nache so Menajén, som llalec so Gadi, ỹacoolec da lo'onataxanaxac da ilo'ogue so Israel le'ecpi, qaq ivi' diez vi'iye da lo'onataxanaxac, huaña ye Samaria. ₁₈Qalaxaye somaye ỹo'ot nam ỹataqta sa ỹaỹamaxaren Ñim Nataxala', cha'aye saishet da ca'ai nam nasouaxashetpi maye ỹo'ot co'ollaxa so Jeroboán, som llalec so Nabat, maye ỹo'ot da huo'o na lasouaxashetpi so Israel le'ecpi. ₁₉Qaq se'esoua vi'iye da nta'a somaye, nache so Pul, maye nta'a ye Asiria, taỹa da iloquiaxan co'ollaxa yi'iye 'alhua. Nache so Menajén, ỹanem co'ollaxa so Pul, so treinta y tres mil kilos na lcat plata da yaqto' saishet sa qairaxanai' da lo'onataxanaxac da nta'a. ₂₀Nache so Menajén, 'enapega 'enauac som sallaxanecpi so Israel, da ỹaneuo aso lsheetenaxanaqte, da yaqto' isheeten so nta'a ye Asiria, nache ỹamaxalec somayepi da ỹaneuo ca napactelec ca medio kilos ca plata. Huaña nache se'eso nta'a ye Siria, ỹe'eguelaxa so lma', nache ca'ai se'eso 'alhua.

₂₁Qaq nam laỹepi na'aqtaguecpi so Menajén, qataq nam ỹo'otpi, nache nanettalec aso nere maye huetalec da na'aqtaguec so nta'alpi ye Israel. ₂₂Qaq co'ollaq ileu so Menajén, nache qailareñi, huaqta'ai' qanqa'en so lta'alpi, qaq da lo'onataxanaxac da nta'a, nache talec so llalec Pecajías.

₂₃Qaq co'ollaq mashe ivi' soua cincuenta vi'iye da lo'onataxanaxac so Azarías, maye nta'a ye Judá, nache so Pecajías som llalec so Menajén, ỹacoolec da lo'onataxanaxac da ilo'ogue ye Israel, qaq da lo'onataxanaxac ivi' dos vi'iye, huaña ye Samaria. ₂₄Qalaxaye somaye ỹo'ot nam ỹataqta saỹaỹamaxaren Ñim Nataxala', cha'aye saishet da ca'ai nam nasouaxashetpi maye ỹo'ot co'ollaxa so Jeroboán, som llalec so Nabat, maye ỹo'ot da huo'o da lasouaxashet so Israel le'ecpi. ₂₅Qalaxaye huo'o so lataxala' so nalleppi somaye, le'enaxat Pecaj som llalec so Remalías, somaye ntaune' co'ollaxa so cincuenta ỹalleppi, maye lma' ye Galaad, nache dataỹa'aguet so Pecajías, nache ique'emaqchet qataq ỹalauat co'ollaxa, huaña so nma' lta'araic maye naña ye Samaria, qaq co'ollaq ime, nache de'era lo'onataxanaxac da nta'a, talec so Pecaj.

₂₆Qaq nam laỹepi na'aqtaguecpi so Pecajías, qataq nam ỹo'otpi somaye, nache nanettalec aso nere maye huetalec da na'aqtaguec so nta'alpi ye Israel.

₂₇Qaq co'ollaq mashe ivi' soua cincuenta y dos vi'iye da lo'onataxanaxac so Azarías, maye nta'a ye Judá, nache so Pecaj som llalec so Remalías, ỹacoolec da lo'onataxanaxac da ilo'ogue so Israel le'ecpi, qaq ivi' soua veinte vi'iye da lo'onataxanaxac, huaña ye Samaria. ₂₈Qalaxaye somaye ỹo'ot co'ollaxa nam ỹataqta saỹaỹamaxaren Ñim Nataxala', cha'aye saishet da ca'ai nam nasouaxashetpi maye ỹo'ot co'ollaxa so Jeroboán som llalec so Nabat, maye ỹo'ot da huo'o na lasouaxashet so Israel le'ecpi. ₂₉Qaq huetoiguilo se'esoua na'axa'te da so Pecaj nta'a ye Israel, nache nvita yi'iye 'alhua so Tiglat Piléser, maye nta'a ye Asiria, nache loxonec ye Iyón, Abel Betmacá, Yanoja, Cedes, Jazor, Galaad, Galilea, qataq 'enauac ye na'alhua so Neftalí, qataq 'enauac som netalecpi yemaye da loxonec, nache ỹauega ye Asiria. ₃₀Huaña nache so Oseas som llalec so Elá, dataỹa'aguet co'ollaxa so Pecaj som llalec so Remalías, qaq somaye iloquiaxan co'ollaxa so Pecaj, nache ỹalauat. Qaq 'era da 'eetec da so Oseas, talec da lo'onataxanaxac se'eso nta'a, co'ollaq mashe ivi' soua veinte vi'iye da lo'onataxanaxac so Yotán som llalec so Uzías.

₃₁Qaq nam laỹepi na'aqtaguecpi so Pecaj, qataq 'enauac nam ỹo'otpi, nache nanettalec aso nere maye huetalec da na'aqtaguec so nta'alpi ye Israel.

₃₂Qaq co'ollaq mashe ivi' soua dos vi'iye da lo'onataxanaxac so Pecaj, som llalec so Remalías, maye nta'a ye Israel, nache so Yotán, som llalec so Uzías, ỹacoolec da lo'onataxanaxac da ilo'ogue ye Judá. ₃₃Qaq somaye mashe ivi' soua veinticinco vi'iye da nachaalataxac, co'ollaq ỹacoolec da lo'onataxanaxac huaña ye Jerusalén, qaq ivi' dieciséis vi'iye da lo'onataxanaxac. Qaq aso late'e le'enaxat Jerusá, maye llale so Sadoc. ₃₄Qaq so Yotán, ỹo'ot co'ollaxa nam ỹataqta ỹaỹamaxareeta Ñim Nataxala', qaq nache 'eeta'am so Uzías, maye lta'a somaye, ₃₅qataq somaye ỹo'ot co'ollaxa so ñegueuo lta'araic aso atamnaxaqui maye lalamaqte Ñim Nataxala'. Qalaxaye saishet co'ollaxa da nlaxaañi so qaỹoqotcheguema atamnaqa'pi, maye som nhuo' le'ecpi tasheguema naxa da ỹo'ot aso lachetaqtaxanaqtepi, qataq da ỹavigaxat so lchenaxanaxat.

₃₆Qaq nam laỹepi na'aqtaguecpi so Yotán, qataq 'enauac nam ỹo'otpi, nache nanettalec aso nere maye huetalec da na'aqtaguec so nta'alpi ye Judá. ₃₇Qaq nache huetoiguilo se'esoua na'axa'te da Ñim Nataxala' ỹamaq so Resín, maye nta'a ye Siria, qataq so Pecaj som llalec so Remalías, da dataỹa'aguet naqa'en ye Judá. ₃₈Qaq co'ollaq ileu so Yotán, nache qailareñi, huaqta'ai' qanqa'en so hua'au nta'alpi, huaña so huaqta'a't nỹecpi maye lalamaxat so David som chegoxoguet somaye. Qaq da lo'onataxanaxac somaye, nache talec so llalec Ajaz.