1Qaq so mashe ivi' soua diecisiete vi'iye da lo'onataxanaxac so Pecaj som llalec so Remalías, nache ỹacoolec da lo'onataxanaxac so Ajaz, som llalec so Yotán, da nta'a ye Judá. 2Qaq somaye mashe ivi' soua veinte vi'iye da nachaalataxac, co'ollaq ỹacoolec da lo'onataxanaxac, qaq ivi' soua dieciséis vi'iye da lo'onataxanaxac, huaña ye Jerusalén, qalaxaye somaye ỹo'ot nam ỹataqta saỹaỹamaxaren Ñim Nataxala' maye Natamnaxala', nache saishet da 'ena'am so David maye chegoxoguet somaye, 3nacherata da quegue da qauem lataxac som nta'alpi ye Israel, cha'aye ivira'a da ỹavigaxat so llalec da yaqto' lachetaqtaxanaxat, nache ỹe'enaxatchigui da qauem lataxac so ỹotta'a't shiỹaxauapi, maye Ñim Nataxala', ỹo'orauec co'ollaxa ỹauaachigui naqa'en so Israel le'ecpi. 4Nataqa'en ỹo'ot so lachetaqtaxanaxat, qataq ỹavigaxat so lchenaxanaxat, da huaña naxa so qaỹoqotshema atamnaqa'pi, qataq aso lcomaraxalatepi, qataq da huo'ot aso qo'oipaq maye qalochiguiñi ana lcouepi. 5Qaq huo'o so na'a'q nache so Resín, maye nta'a ye Siria, qataq so Pecaj, som llalec so Remalías, maye nta'a ye Israel, taỹalo co'ollaxa ye Jerusalén da yaqto' iloquiaxan. Nache coleesop co'ollaxa so Ajaz, qalaxaye saishet da loxonec se'eso huaqta'a't nỹecpi. 6Nache se'eso na'a'q, so nta'a ye Edom, loxonec ye Elat, nache qaltaq ỹe'eguelaxa da lalamaxat naqa'en so Edom le'ecpi, nache ỹo'orauec so Judá le'ecpi, maye netaña co'ollaxa ye Elat, huaña nache so edomiitapi naña yemaye, choche ivitta'a nagui. 7Nache so Ajaz, ỹamaq co'ollaxa so lamaxashecpi da taỹa so Tiglat Piléser, maye nta'a ye Asiria, da yaqto' 'enapega, 'eeta': «Aỹem, maiche aỹem 'aramaxashec, qataq maiche aỹem 'aỹa'alec. Ỹoqo'oye no'on taxa da 'auanac, nache aỹem 'anqateeguesop da la'añaxac ñi nta'a na Siria, qataq ñi nta'a na Israel, maye aỹem iloquiaxaata'ape.» 8Qaq so Ajaz nataqa'en ỹacona co'ollaxa so lcat plata, qataq so oro maye huetaigui aso atamnaxaqui maye lalamaqte Ñim Nataxala', qataq aso netaigui so nma' lta'araic, nache ỹamaq da yaqto' nme naqa'en so nta'a ye Asiria. 9Nache so nta'a ye Asiria, ỹasateguet de'era lỹaxanaxac somaye, nache taỹa da iloquiaxan ye Damasco, nache loxonec som netañapi yemaye, nache ỹauega ye Quir, qataq ỹalauat so Resín. 10Qaq co'ollaq ime de'era, nache so nta'a Ajaz, taỹa ye Damasco da yaqto' nauane' so Tiglat Piléser, maye nta'a ye Asiria. Qaq so nta'a Ajaz, co'ollaq ila'a aso nca'atoxonaxalate maye netaña ye Damasco, nache somaye ỹamaxa so ntaxaỹaxanaxanec Urías, aso lmalate maye huetalec 'enauac da lataxac aso nca'atoxonaxalate. 11Nache so ntaxaỹaxanaxanec Urías, no'oxoosheguem aso nca'atoxonaxalate, nache ỹe'enaxatchigui da lataxac aso huetalec aso lmalate asomaye, maye ỹamaxa so nta'a Ajaz, maye netaña ye Damasco, nache somaye imat co'ollaxa asa'aso nca'atoxonaxalate, co'ollaq saxanaxa da ñe'eguelaq so nta'a Ajaz da chegaqa'a ye Damasco. 12Qaq co'ollaq nvi' so nta'a, chegaqa'a ye Damasco, nache ila'a asa'aso nca'atoxonaxalate, nache nqo'ona nache ỹachalec asomaye aso lachetaqtaxanaqte qaỹavigaxatta, 13nache ỹavigaxat asomaye qataq aso lỹa lachetaqtaxanaqte, qataq icorelec asa'aso nca'atoxonaxalate so lataxa maye lachetaqtaxanaxat, qataq iquetegaxaalec asomaye so ltago'q som ỹaneuo lachetaqtaxanaxat qanhuaachigui. 14Qaq aso nca'atoxonaxalate bronce, maye netaña ye datatauga aso atamnaxaqui maye lalamaqte Ñim Nataxala', nquigaxat nache ỹanaña yem pa'aigue da la'añaxa, cha'aye aso dalaxai nca'atoxonaxalate nache ñichiguiña naqa'en yem netaña co'ollaxa aso nquigaxat somaye. 15Qaq co'ollaq ime, nache so nta'a Ajaz, ỹamaxalec so ntaxaỹaxanaxanec Urías, da ỹachalec asa'aso nca'atoxonaxalate late'erai aca nachetaqtaxanaqte qaỹavigaxatta, maye qoỹaneuo naxa ye nte'eta, qataq asom qoỹaneuo da avit, qataq nataqa'en aso nachetaqtaxanaqte qaỹavigaxatta, qataq aso chegaqaigui ana ala na nañiguishec maye lachetaqtaxanaqte so nta'a, qataq aso lachetaqtaxanaqte qaỹavigaxatta 'enauac se'eso nhuo' le'ecpi yi'iye 'alhua, qataq so lachetaqtaxanaxat lataxa qaicorelec aso nca'atoxonaxalate. Qaq nache 'eetec nataqa'en som ltago'q som nachetaqtaxanaxatpi qaỹavigaxatta, qataq so laỹepi shiguiỹacpi maye nachetaqtaxanaxat da qaicorelec asomaye. Qaq aso nca'atoxonaxalate bronce, qalaq nachesota so nta'a naxa da iuen da nshetaique da ichemaxata cam 'eetapeguec Ñim Nataxala'. 16Nache so ntaxaỹaxanaxanec Urías, ỹo'ot co'ollaxa 'enauac na ỹamaxalec so nta'a Ajaz. 17Qaq co'ollaq ime, nache so nta'a Ajaz, nlaxaayiñi soua la'axasoxola'ate aso no'oxonaxalate maye netaleguete aso late'erai laỹe' na 'etaxat, maye netaleguete soua ne'enaqtaqa huaca bronce, nache nqaañi asomaye, da ỹanalec so coma'. 18Qaq souaxat da huotaique da ỹaỹamaxareeta so nta'a ye Asiria, nache nlaxaañi so ỹaqauga ndaqa' aso atamnaxaqui maye lalamaqte Ñim Nataxala', som nda'a't ye na'a'q mataxaqui da qaiuen, qataq so lasom maye llegueuo so nta'a.
