Da lta'araic lhuenaxanaxa aso pa'ai
1Huo'o aso 'alo, maye lhua co'ollaxa so 'oonolec so na'aqtaxanaxanecpi, asomaye 'enapega so Eliseo, 'eeta':
Som ihua maye 'aramaxashec co'ollaxa, somaye ileu, qaq 'am 'auaỹaten da somaye ỹataqta huo'o naq 'enec naqa'en Ñim Nataxala'. Qalaxaye anac so lavigaqtaxanaxala', nache huotaique da ỹaue'c soua dos ỹalqa da yaqto' ỹauo'oi l-lataqa. 2Nache so Eliseo 'enapeco':
¿Qaq negue't ca 'anshetaique da 'am so'otec? Ñaq aỹem 'aua'aqtaxanem chaq negue't cam huo'o ye 'arma'.
Nache asomaye 'enapeco':
Qomye qaica, nachecata cam aceite maye huetangui añi 'oonole laỹe' da ñaq huo'o. 3Nache so Eliseo 'enapeco':
Ña 'anqo'ona na 'areuoreuapi da 'aua'aalaxanaique aca qui'itchigui naco'oñapi, nache maicheye cam lcata acam ivi' aca 'ara'aalepi. 4Ime, nache qapa'aiuo qome, 'am qataq caua 'aỹa'alqa, nache qanapoila't qome. Ime, nache qauỹoqoigui ca aceite 'enauac acam naco'oñapi maye qui'itchigui, qaq 'enauac aca nlaxaguipi, qauỹochiỹauga qome. 5Huaña, nache asa'aso 'alo jec, ca'ai so Eliseo da taỹa so lma', nache napola't qataq soua llalqa. Huaña, nache asomaye iỹoxogui so aceite aso naco'oñapi, maye soua llalqa irotrapegueua'a asomaye. 6Qaq co'ollaq mashe nlaxagui 'enauac asomayepi, nache asomaye 'enapega so 'oonolec soua llalqa, 'eeta':
Ña 'andouo aca lỹa laỹe'.
Qalaxaye somaye 'enapeco': Mashe qaca aca no'onañi. Huaña, nache vi'iiguet co'ollaxa se'eso aceite. 7Qaq huaña, nache asomaye qaltaq nqo'ona da da'aqtaxanem som la'aqtaxanaxanec Ñim Lo'onatac 'Enauacna, nache somaye 'enapeco':
«Nagui, nache 'aumen 'enauac que'eca aceite, ime nache 'ausheeten 'enauac aca 'aravigaxaiste, qaq aca no'onañi lasheue camaye, nache maiche 'armena qome 'am, qataq caua 'aỹa'alqa.»
So Eliseo qataq aso 'alo maye Sunén lashe
8Qaq huo'o so na'a'q co'ollaq so Eliseo taalec ye Sunén, nache huo'o aso 'alo ỹo'oxorai maye lma' yemaye, qaq asomaye ỹe'eguelaqto'ot co'ollaxa somaye da lquia'aqa' so lma'. Qaq huaña, nache so Eliseo da tateuga yemaye, nache saq ỹet da lquia'aqa' so lma' asomaye. 9Nache asa'aso 'alo 'enapego' so lhua, 'eeta':
«Se'eso ỹale maye saq ỹet naxa da qomi' nateua'alo da ivita da nateuga ne'ena, aỹem saỹaten da somaye ỹataqta qui'itta la'aqtaxanaxanec Ñim Lo'onatac 'Enauacna. 10Qaq 'onaxaictaxa da so'otaq ca lỹa nỹec na pa'asheguem na qarma', da yaqto' lma' ñaqa'enaq somaye, nache sachaqaigui ca 'oonolec mala', 'oonolec nquia'axala', 'oonole so'onaxaqui qataq aca 'oonole ncoỹaraxanaxaqui, yaqto' da ivita da qomi' namaqtegalo, nache netaigui camaye.» 11Qaq huo'o so na'a'q, nache so Eliseo qaltaq ivita yemaye, nache hua'a da lo'ochaqa' se'eso nỹec. 12Nache so Eliseo 'enapego' so lamaxashec Guejazí, 'eeta':
Ña 'auỹaxaneuga aca'aca 'alo maye Sunén lashe.
Nache som lamaxashec somaye iỹaxaneuga co'ollaxa, qaq asomaye co'ollaq taua'a so Eliseo, 13nache so Eliseo 'enapego' so lamaxashec Guejazí, 'eeta': Ñaq 'aunat ara'ara 'alo maye ỹataqta qomi' huetegueto, qoneta': ¿Peta'a huo'o ca 'auauotaique da 'am setaunaxac? ¿Huo'otaq da 'anshetaique da 'am setaxasoxolec da yaqto' 'am itauan ca nta'a, huo'otaq da 'am nqouaguec som lataxala' na alleppi?
Nache asomaye 'enapeco':
«Aỹem ỹataqta qaica camachaqca da salectaigui na maiche ihuo' le'ecpi.» 14Nache so Eliseo 'enapeco':
¿Qaq chaq negue'to' ca so'otaxac aramaye?
Nache so Guejazí, 'enapeco':
Aramaye qaica ca llalec, qaq da lhua, mashe ỹa'axaiquiolec. 15Nache so Eliseo 'enapego' so lamaxashec, 'eeta':
Ña 'auỹaxaneuga aramaye.
Nache so Guejazí iỹaxaneuga asomaye, qalaxaye co'ollaq nvireuo asomaye, nache hua'a so lasom nachattañi. 16Nache so Eliseo 'enapego' asomaye, 'eeta':
Ne'ena vi'i maye ñaq natauo, nache huetoiguilo caua na'axa'te maye 'eeta'ama nagui, nache huo'o qome ca 'ansoqtauo 'aỹa'alec.
Qalaxaye asomaye 'enapeco':
'A'i, 'am ỹataxala', maye 'am nale Ñim Lo'onatac 'Enauacna, saishet qome da 'auatenachet ana'ana 'aramaxashe. 17Qaq asomaye hualaxai co'ollaxa, qaq nache huetoigui se'eso lỹa vi'i da ñiguiñi so llalec, qaq nache ipacchigui da la'aqtac so Eliseo. 18Nache so nogotolec nquictasheguem da ỹe, nache huo'o so na'a'q demeenaxaneuga so lta'a maye ỹalectaigui som deqataxaatacpi, 19nache so nogotolec ỹa'alaqtac co'ollaxa, 'eeta':
¡'Agai ỹaqaic! ¡Seuet na ỹaqaic!
Nache so lta'a 'enapego' so lamaxashec, 'eeta':
Ña 'auauegueua'a aca late'e. 20Nache so lamaxashec ỹacoosop somaye, nache iroua'a so netaña aso late'e. Nache asomaye nsoxouo, nso'onaxanaxaaleguete naua l-llectel, choche ivitta'a so na'a'q laiñi, huaña nache ileu se'eso nogotolec. 21Qalaxaye asomaye irosheguema co'ollaxa som lanataxaqui so la'aqtaxanaxanec Ñim Lo'onatac 'Enauacna, nache ỹachalec so lmala' somaye, nache pa'auec qataq ỹapogui so lasom se'eso nanataxaqui. 22Ime, nache iỹaxaneuga so lhua, nache 'enapega, 'eeta':
Ñaq aỹem 'anamaxaua'a ca 'oonolec nam 'aramaxashecpi da nauegueuo aca 'oonole 'ashena, yaqto' seỹalapigui' da ñeqo'ona cam la'aqtaxanaxanec Ñim Lo'onatac 'Enauacna. Qaq da ime, nache ñe'eguelaq. 23Nache so lhua asomaye inattaco', 'eeta':
¿Ta'ainco' da 'anqo'ona nagui? Ye nagui, saxanaxa da dalaxaic so ca'agoxoic, qataq nagui saishet da na'a'q mataxaqui.
Qalaxaye asomaye 'enapeco':
Saishet qome da huo'o ca tatapigui 'arhuel. 24Huaña, nache asomaye damaxasoxoolec da qaỹo'oolec aso 'ashena. Ime, nache 'enapega so lamaxashec, 'eeta':
Qolaq, 'aua'auta, qaq saishet qome da huo'o ca huaña na nqa'aic da aỹem 'avia'axaneguet, maicheye da 'am shenapega. 25Nache asomaye jec, nache ivitta'a añi qasoxonaxa Carmelo, maye netaña som la'aqtaxanaxanec Ñim Lo'onatac 'Enauacna. Nache so Eliseo ila'aguet co'ollaq ña qaỹoqteguet asomaye, nache 'enapego' so lamaxashec Guejazí, 'eeta':
Ñaq 'aulo'oguet ana'ana 'alo, anamaye nachana anam Sunén lashe. 26Ña 'anqalgaqa'aguet, nache 'aunat da qaica cara anamaye, qataq ca lhua qataq ca llalec.
Nache so lamaxashec somaye nqalgoqta'aguet asomaye, nache inattac, qaq asomaye 'enapec, da qaica cara. 27Qaq asomaye co'ollaq ivitsheguema aso qasoxonaxa maye netaña so Eliseo, nache qapaloiguilo naua lchel somaye, qalaxaye so Guejazí, huotaique co'ollaxa da nqateeguesopa naua lchel so Eliseo. Qalaxaye so Eliseo 'enapego' somaye, 'eeta':
Ñaq 'aua'aqta'a anamaye, cha'aye ỹataqta lta'araic da lhuogoxo, qataq Ñim Nataxala' ñaq saxanaxa da aỹem da'aqtaxanem de'era huaigui anamaye. 28Nache asomaye 'enapeco':
Aỹem, saishet co'ollaxa da 'am seỹaxanot da huo'o ca ỹalec, qataq 'am sheetega co'ollaxa da saishet da aỹem 'auatenachet. 29Nache so Eliseo 'enapega so Guejazí, 'eeta':
Ña 'anaỹamaxat, qataq 'auacona ana ỹashelte, nache qojec. Qaq da huo'o ca 'anatena'aguet, nache saishet da 'auquin. Qataq da huo'o ca 'am iquin, nache saishet da 'auasateguet. Qaq qom 'avita que'eca nogotolec, nache 'auachalec na lashec camaye ana ỹashelte. 30Qalaxaye aso late'e so nogotolec 'enapego' so Eliseo, 'eeta':
Aỹem, sanot da ỹa'aqtac Ñim Nataxala' qataq 'am, da saishet da she'eguelaq da saishet da aỹem 'annaicapegue'.
Nache so Eliseo, nnaicapegue' co'ollaxa asomaye. 31Qaq som Guejazí, ye mashe hua'auta co'ollaxa, nache co'ollaq ivita so nogotolec, nache ỹachalec na lashec aso nashelte, qalaxaye somaye ỹataqta qaica da choche deraỹapec. Nache so Guejazí qaltaq ỹe'eguelaq da huaqata'aguet so Eliseo, nache da'aqtaxanem, 'eeta':
Yem nogotolec saishet da nlouec. 32Qaq so Eliseo co'ollaq ivireua'a so nỹec, nache so nogotolec mashe ileu, huetalec so lmala'. 33Nache somaye pa'auo co'ollaxa, qataq ỹapogui so lasom, nache ndote' so nogotolec da nqouagaxaunot Ñim Nataxala'. 34Ime, nache somaye huenoolec so mala', nache nalotegue da nqapaxanegue so nogotolec. Nache na alap somaye naloqchiichiguingui na alap se'eso nogotolec, qataq naua la'ai'tel nalotegueta naqa'en naua la'ai'te somaye, qataq naua lhua'q, nalotegueta naqa'en naua lhua'q. Huaña nache nquictauec da dapaqa na lo'oc se'eso nogotolec. 35Qaq ime, nache so Eliseo ñisheguem co'ollaxa, nache queuotapigui na lauel se'eso nanataxaqui. Ime, nache qaltaq huenoolec so mala', da ỹe'eguelaxalec da nqapaxanegue so nogotolec. Huaña, nache se'eso nogotolec siete da nqashen, ime, nache nlorec naua la'ai'te. 36Nache so Eliseo iỹaxana co'ollaxa so Guejazí, nache 'enapego' 'eeta':
Ña 'auỹaxaneuga aca'aca 'alo maye Sunén lashe.
Nache so Guejazí, iỹaxaneuga asomaye, qaq co'ollaq ivireua'a ye hueta'a so Eliseo asomaye, nache so Eliseo, 'eeta':
'Ena na 'aỹa'alec. 37Qaq asa'aso 'alo co'ollaq choche pa'auo, nache nqapaxanoto naua lchel so Eliseo. Ime, nache ỹacoosop so llalec, nache pa'auec.
So Eliseo iquia'axan so na'aqtaxanaxanecpi
38Qaq co'ollaq ime de'era, nache so Eliseo ỹe'eguelaxa ye Gilgal, qaq se'esoua na'axa'te ỹataqta lta'araic so nqouaxa se'eso 'alhua. Nache co'ollaq datata'aguet so laỹepi na'aqtaxanaxanecpi so Eliseo, nache somaye 'enapego' so lamaxashec, 'eeta': «Ña 'auamaxauaq aca taxaqui late'erai, nache 'auo'ot ca 'arhuoshec, deqaqchigui 'anqa'en da yaqto' aloq nam na'aqtaxanaxanecpi.» 39Qaq huo'o so 'oonolec somayepi da tauga so no'onaxa, nache ilalec aso 'eeta'am ana ltañi aso ala, nache qalota aso napoc, ỹachalec so lapo' nache irouo. Qaq co'ollaq ivireuo nache npeleguiñi asomaye, nache ỹasaxangui aso taxaqui da lalegue naqa'en som nhuoshec, na'aictaxa da sa ỹauatton asomaye. 40Qaq co'ollaq dato, nache nỹoxosheguem da ỹanoigui som na'aqtaxanaxanecpi. Qaq somayepi co'ollaq chec se'eso nhuoshec, nache ỹa'alaqagui, 'eeta': 'Am la'aqtaxanaxanec Ñim Lo'onatac 'Enauacna, ne'ena nallec ishet da dalaataxan.
Nache somayepi, saishet da chec. 41Nache so Eliseo 'enapeco':
«Ña qandoiuo qome catai' 'ayiiñolec.» Nache co'ollaq ime da ỹasaxangui somaye aso taxaqui, nache 'enapeco': Nagui nache 'aỹa'anoigui na shiỹaxauapi da chec namaye. Nache se'eso shiỹaxauapi chec se'eso nhuoshec, nache saishet da na'axat. 42Qaq co'ollaq ime, nache nvi' so ỹale maye lma' ye Baal Salisá, ndotaua'a so Eliseo aso veinte nauolepi maye cheta'ague da dato, qataq so trigo maye cheta'ague da qanqat. Nache so Eliseo ỹamaq so lamaxashec, 'eeta': Ñaq 'aỹa'anoigui na shiỹaxauapi da yaqto' chec. 43Qaq so lamaxashec somaye 'enapeco': ¿Ca 'eeteco' da sanoigui anamaye ne'ena cien shiỹaxauapi? Nache so Eliseo, 'enapeco': Qomye 'aỹa'anoigui ne'ena shiỹaxauapi da yaqto' chec anamaye, cha'aye Ñim Nataxala' 'eetega da qanallec anamaye, nache huo'o qome ca ñi'iỹoxot. 44Huaña, nache so lamaxashec so Eliseo, ỹanec se'eso nallec, nache somayepi deque'e co'ollaxa, qataq huo'o so lli'iỹoxot, nache ipacchigui da la'aqtac Ñim Nataxala'.
