So Jehú qaicorelec da yaqto' nta'a ye Israel
1So na'aqtaxanaxanec Eliseo, iỹaxana co'ollaxa so 'oonolec som na'aqtaxanaxanecpi, nache 'enapega 'eeta':
«Ñaq 'anaỹamaxat qome, nache 'anqo'ona ye Ramot maye huaigui ye 'alhua Galaad, nache 'auache aca ncoraxanaxat laỹe'. 2Qaq qom 'avira yemaye, nache 'anmitaique ca Jehú, cam llalec so Josafat, maye llalec so Nimsi. Qataq 'anqo'oneua'a qome ca netaña, nache ca'ai 'anqa'en cam laỹepi, nache 'auauega ca lỹa nanataxaqui. 3Ime, nache 'auacona aca laỹe' ca aceite maye ncoraxanaxat, nache 'aucorelec na lqaic camaye, nache qoneta': ‹Ñim Nataxala', 'eeta': Aỹem, 'am seỹotauga da yaqto' 'am nta'a na Israel.› Qaq da ime, nache 'auauatoigui qome ca lasom nache 'auatauec.» 4Huaña, nache se'eso nsoqolec maye na'aqtaxanaxanec, taỹa co'ollaxa ye Ramot maye huaigui ye 'alhua Galaad. 5Qaq co'ollaq ivireuo somaye, nache so lataxala'pi so alleppi, laỹoota'a't. Nache somaye 'enapeco':
Huo'o da ñerotauo la'axaỹaxac cam nataxala'. Nache so Jehú, 'enapeco':
¿Negue't camaxa de'era shenaqta? Nache se'eso nsoqolec maye na'aqtaxanaxanec, 'enapeco':
Qomye nache 'am, 'am ỹataxala'. 6Nache so Jehú, ñisheguem co'ollaxa, nache pa'aigui so nỹec. Huaña nache so na'aqtaxanaxanec nqatsheguem aso laỹe' so aceite maye ncoraxanaxat, nache icorelec na lqaic somaye, nache 'eeta':
Ñim Nataxala' maye Natamnaxala' na Israel le'ecpi da la'aqtac, 'eeta': «Aỹem, 'am secorelec da yaqto' 'am sanagui, da 'am lta'a na Israel le'ecpi maye ỹalamaxat nhuo' le'ecpi. 7Qaq 'am qome, 'anmatchiguiñi da 'aualauat na llalaqpi so Ajab, maye 'arataxala', huaña nache huo'o da lvi' ñaqa'en som ỹamaxashecpi maye ỹa'aqtaxanaxanecpi co'ollaq qaicoraxatrec naua ltago'q, qataq 'enauac som ỹamaxashecpi maye ỹalauat co'ollaxa aso Jezabel. 8'Enauac na llalaqpi so Ajab, salauat qome, qataq nmichiguiñi ñaqa'en na llalaqpi ỹalleppi so Ajab maye netaña ye Israel, nam nlatacpi, qataq nam saishet da nlatacpi. 9Nache namayepi 'eeta'am ñaqa'en da sheetec co'ollaxa som llalaqpi so Jeroboán, maye llalec so Nabat, qataq som llalaqpi so Basá, som llalec so Ajías. 10Qaq aso Jezabel, chec qome ca pioxoppi, huaña ye no'onaxa ye Jezrel, nache qaica qome ca ilayiñi asomaye.»
Qaq co'ollaq ime da la'aqtac so na'aqtaxanaxanec, nache ỹauatoigui so lasom nache datauec. 11Qaq so Jehú, co'ollaq tauga da qaltaq dataiguet so ltauapi, nache somayepi inato' somaye, 'eeta':
¿Ta'ainco', peta'a huo'o ca machaqca? ¿Negue't ca 'eetapeguec se'eso huo'o da aloic? Nache so Jehú 'enapeco':
Qami', mashe qauauattoñi mque' somaye, qataq da lataxac naua la'aqtaqa. 12Nache somayepi, 'enapeco':
Saishettaxa da qomi' 'auatenache't, ñaq qomi' 'aua'aqtaxaatema ca 'eetec ca la'aqtac somaye. Nache so Jehú, 'enapeco':
Da aỹem ỹanem la'aqtac somaye, 'eeta': «Ñim Nataxala', 'eeta': ‹Aỹem, 'am secorelec da yaqto' 'am nta'a na Israel.›» 13Huaña, nache somayepi sa naỹaloxon da ỹacona so lapo'pi, nache lapaxalec som napiaxala'pi maye taỹasheguema aso nso'onaxaqui so Jehú. Ime, nache ỹashiiyigui aso nasheerepi peenaq lcouepi, qataq ỹa'alaxalec somaye, 'eeta': «Da Jehú, nachera da nta'a.»
So Jehú ỹalauat so Jorán maye nta'a ye Israel
14Qaq 'era da 'eetec so Jehú, maye llalec so Josafat, som llalec so Nimsi, co'ollaq dataỹa'aguet so Jorán. Som Jorán, maye huaxaiguet 'enauac som Israel le'ecpi, da deloctac npaxatteguelec ye Ramot, maye huaigui ye 'alhua Galaad, co'ollaq iloquiaxaatac namayepi so Jazael, maye nta'a ye Siria. 15Qalaxaye so nta'a Jorán, ỹe'eguelaxa co'ollaxa ye Jezrel, da yaqto' qanataren so lque'emaxa, souaxat da deloctague' so siiriopi co'ollaq dataỹa'aguet so Jazael, maye nta'a ye Siria. Nache so Jehú, 'enapeco': «Da 'eesa da qansheetaique da nachaỹem da aỹem qarta'ai, nache saishet qome da qauashiñiitec da huo'o ca ca'ai ne'ena huaqta'a't nỹecpi, da yaqto' ỹo'ot ca la'axaỹaxac nam netaña ye Jezrel.» 16Nache so Jehú, ñiguingui aso laigona nalaataxaqui, nache taỹa ye Jezrel, cha'aye so Jorán netaña yemaye co'ollaq dalola. Qaq nataqa'en so Ocozías maye nta'a ye Judá, hueta'a co'ollaxa yemaye, cha'aye namaqtega so Jorán. 17Qaq som nauanaxanaxanec maye netasheguema aso nalloxolate ye Jezrel, co'ollaq ila'aguet so nalleppi so Jehú, nache ỹa'alaq, 'eeta':
Huo'o na natauo'ona'a alleppi. Nache so Jorán, 'enapeco':
Ña qauamaqai ca 'oonolec na alleppi da nelec ca caaỹo, nache ca'ata'aguet camayepi da yaqto' inat da anactaigui da nlagaxayec. 18Nache som ale maye netalec so lalo caaỹo, ca'ateguet somayepi nache co'ollaq ivireguet nache inat, 'eeta':
Ñi nta'a, 'eeta': ¿Peta'a qananaquiitaigui da nlagaxayec? Nache so Jehú, 'enapeco':
¡De'era saishet da 'aỹapegueua'a! Ñaq 'aigue na ilaq.
Huaña nache som nauanaxanaxanec desoxonataxan, 'eeta':
Som namaxashec mashe ivireguet namayepi, qalaxaye nache sa ñe'eguelaq. 19Huaña, nache so nta'a, qaltaq ỹamaq so lỹa nale da nelec so caaỹo, qaq somaye co'ollaq ivireguet somayepi, nache 'eeta':
Ñi nta'a 'eeta': ¿Peta'a qananaquiitaigui da nlagaxayec? Nache so Jehú, 'enapeco':
¡De'era saishet da 'aỹapegueua'a! Ñaq 'aigue na ilaq. 20Nache som nauanaxanaxanec qaltaq desoxonataxan co'ollaxa, 'eeta':
Som namaxashec mashe ivireguet namayepi, qalaxaye nataqa'en saishet da ñe'eguelaq, qaq ne'ena netangui ana naigona, qalaq 'eeta'am ca Jehú, maye laual som Nimsi, cha'aye da lataxac ỹataqta sa ncherapec, 'eeta'am ca huo'o da aloic. 21Huaña, nache so Jorán, 'eeta':
Ña qaucoñiyiiñi aca ñalaataxaqui ỹaigona. Qaq co'ollaq mashe ime da qaicoñiyiñi aso laigona somaye, nache so Jorán, maye nta'a ye Israel, qataq so Ocozías, maye nta'a ye Judá, je'c nache ñi 'oonolec soomaye ñiguingui asom maiche laigona, da ca'atra'aguet so Jehú. Qaq soomaye, nateera'aguet co'ollaq huaña ye na'alhua so Nabot, maye Jezrel le'ec. 22Qaq so Jorán co'ollaq ila'a so Jehú, nache 'eeta':
¿'Am Jehú, peta'a 'ananactaigui da nlagaxayec? Nache somaye 'enapeco':
¿Ca 'eeteco' da huo'o da nlagaxayec ye aso 'arate'e Jezabel, queto'ot da nquisheshigui da la'amqaanataxanaxac, qataq ỹo'ottac da lli'iyaqnataxanaxac? 23Huaña, nache so Jorán, nconnaxaañi aso nnotaxaqui, nache datauec qataq ỹa'alaqta'a so Ocozías, 'eeta':
¡Ocozías, qomi' qaique'elaxa't! 24Qalaxaye so Jehú, ỹauec so lchecnec, nache ỹaỹen so Jorán, nache tatelec na l-laq aso checna, nache ỹapacaviigui na lasot tachigui añi lquiyaqte, nache somaye nacheesop aso laigona. 25Nache so Jehú, 'enapega so Bidcar, maye ltaua, 'eeta':
«Ña 'auacoosop ye Jorán maye mashe ileu, nache 'auasaxauga ye na'alhua so Nabot, maye Jezrel le'ec. Qaq 'antoueeta'ac qome so na'a'q maye sonaqtanguilo soua alaataxaqui' naigona, nache ñenaigaqtague' so nalleppi so Ajab, maye lta'a ye Jorán, nache Ñim Nataxala', ỹa'axatta'a de'era nhuaxanaguec somaye, co'ollaq 'eeta': 26‹Aỹem, shecait sauaachigui so ltago'q so Nabot, qataq so llalaqpi somaye, qaq nache sheetec qome da huaña ñaqa'en ne'ena 'alhua da 'am talec ñaqa'en ca 'anhuaxanaguec, souaxat de'era 'auo'ot. Qaq 'era da ỹa'aqtac, Aỹem Nataxala'.›
Qaq ỹoqo'oye, 'auacoosop ye Jorán, nache 'auasaxauga ye na'alhua so Nabot, yaqto' ipacchigui da la'aqtac Ñim Nataxala'.»
So Jehú ỹalauat so Ocozías
27Qaq so Ocozías, maye nta'a ye Judá, co'ollaq ila'a de'era nache datauec, taỹa ye Bet Hagán. Qalaxaye so Jehú icanapec co'ollaxa somaye, nache damaxasoxoolec, 'eeta': Qaualauache nataqa'en somaye.
Qaq so Ocozías, mashe taỹasheguema co'ollaxa ye Gur, yem sa qaỹapeque ye Ibleam co'ollaq qaique'emaqchet, huangui aso laigona qalaxaye ivira'a co'ollaxa ye Meguido, qaq nache huaña yemaye da ileu. 28Ime, nache so lamaxashecpi somaye, ỹachangui aso naigona da ira'a ye Jerusalén, qaq nache huaña yemaye da qailareñi, huaqta'ai' qanqa'en so lta'alpi, huaña ye huaqta'a't nỹecpi maye lalamaxat so David. 29Qaq co'ollaq mashe ivi' once vi'iye, da nta'a so Jorán, maye llalec so Ajab, nache so Ocozías, ỹacoolec co'ollaxa da lo'onataxanaxac da nta'a ye Judá.
Da l-leuaxa aso Jezabel
30Qaq co'ollaq ime de'era, nache so Jehú, taỹa ye Jezrel. Qaq aso Jezabel co'ollaq la'axaỹaxac de'era, nache asomaye ỹa'ame'n naua la'ai'tel, qataq ỹo'ot so llo'oxoraxat na laue, ime nache dalletaviigui so nalloxoqui so nỹec. 31Qaq so Jehú, co'ollaq ivireua'a so ñegueuo so huaqta'a't nỹecpi, nache aso Jezabel, 'eeta':
¿Ca 'eetec da qoneta, 'am maye qoneta'am so Zimri, da ỹalauat som lataxala'? 32Nache somaye, ỹallesheguema co'ollaxa som nalloxoqui, nache 'eeta':
¿Negue't ca aỹem ca'ategue? Nache huo'oi soua dos ỹale't da namatraña somaye. 33Nache so Jehú, 'enapegalo soomaye, 'eeta':
Ña qauamaqaiuec ara'ara 'alo. Nache soomaye, ỹamaxarec asomaye, tachiviigui naqa'en so nalloxoqui, nache na ltago'q aso Jezabel, dechecnaxanot so lque so nỹec, qataq soua caaỹo, som piguilo co'ollaxa asomaye. 34Ime, nache pa'auo co'ollaxa so Jehú, qaq co'ollaq ime da deque'etac qataq nỹomtac, nache 'eeta':
Qauesomiỹa, qaulayiiñi aca'aca qauemai 'alo, cha'aye acamaye nta'a llale. 35Qalaxaye co'ollaq qanqo'oneuga asomaye da yaqto' qailareñi, nache ndotec so lqaic lpi'inec, qataq soua lapia'ate, qataq soua lhuaq lavi'illi da qailaleguete co'ollaxa. 36Huaña nache qanqo'oneua'a so Jehú, da qaỹa'aqtaxanem, nache so Jehú 'enapeco':
«'Era da la'aqtac Ñim Nataxala', maye ỹa'axat co'ollaxa som lamaxashec Elías, maye lma' ye Tisbé, da na pioxoppi chec da lo'ocỹaxac aso Jezabel, hualec ye 'alhua Jezrel. 37Nache de'era lo'ocỹaxac aso Jezabel, 'eeta'am na la'atec na shiguiỹac da laguelec yi'iye 'alhua ye Jezrel, huaña qome nache qaica ca 'eeta': ‹Ne'enaua nachenaua naua lpi'ineqa aso Jezabel.›»
