So Jehú nmatchiguiñi da ỹalauat so llalaqpi so Ajab
1So Ajab, ivi' setenta so llalaqpi netaña ye Samaria, qaq ỹoqo'oye so Jehú ỹo'ot co'ollaxa aso lerepi da ỹamaxa ye Samaria, taỹa'a som ỹoqta nataxala'pi ye Jezrel, qataq so nqueroxonecpi, qataq som ilotague'pi som llalaqpi so Ajab, nache 'eeta': 2«Aỹem saỹaten da qami' netaiguilo na llalaqpi so Ajab, qataq qami' hueto'oto na lalo caipi, qataq ana nalaataxaquipi laigonapi, qataq na no'ogoxonaxatpi, qataq qoñiitaigui nam huaqta'a't nỹecpi maye ỹataqta qanpaxatteua'a, qaq qom qauacoñiiguet ana ỹere, 3nache qalca'aiua'a qome ca ỹataqta no'on, qataq nalochiguiñi da lataxac nam llalaqpi so qarataxala'ai Ajab, nache talec qanqa'eñi da lo'onataxanaxac da nta'a. Qaq qom ime, nache qanaỹamaxache da qauloquiilec da lo'onataxanaxac na llalaqpi so qarataxala'ai.» 4Qalaxaye somayepi ỹataqta huo'o da lcolanaxa, nache 'eeta': «¿Chaq shenaqteco' da seloquiaxai' camaye? Ye soua dos nta'al sanaloreguet co'ollaxa da delogui'.» 5Huaña nache so ilotague' so nma' lta'araic maye lo'onataxanaqa' so nta'a, qataq so nta'a maye ilotague' so huaqta'a't nỹecpi, qataq so nqueroxonecpi, qataq som ilotague' so llalaqpi so Ajab, ỹamaxa da la'aqtac so Jehú, 'eeta': «Qomi' so'otaq cam qomi' 'auamaxaleguete, cha'aye maiche qomi' 'aramaxashecpi. Qalaxaye saishet da sauoqo'o ca nta'a, nacherata da 'auo'ot cam ỹaỹamaqchiguiñi 'anqa'en.» 6Qalaxaye so Jehú, qaltaq ỹe'eguelaxalec da ỹamaxa aso lere somayepi, 'eeta': «Da 'eesa da aỹem qauca'acheegue, qataq da ỹataqta 'eesa da aỹem qaualaqaiguet, nache qaualauache cam llalaqpi ỹalleppi so Ajab, nache qanache ca lqaicpi camayepi, qom qananaiỹa na Jezrel qonte', qom 'eeta'am nagui.» 7Qaq co'ollaq ivira somayepi aso nere, nache ỹaconeua'a so setenta llalaqpi ỹalleppi so Ajab, nache icheguec so lqaicpi somayepi, ime nache ỹasaxangui aso npaqtapi se'eso nqaicpi, nache ỹamaxa ye Jezrel. 8Qaq co'ollaq ivi', nache huo'o so namaxashec iroua'a da la'axaỹaxac so Jehú, nache 'eeta':
Mashe qandoi' ye lqaicpi som llalaqpi so nta'a Ajab. Nache so Jehú, 'enapeco':
Qauauoita'a dos caua laponqa'ate camayepi da qauachiỹaña ye ñegueuo ne'ena huaqta'a't nỹecpi, qaq nache huetaña qanqa'eñi, ivitta'a qonte'. 9Qaq so lỹa na'a'q nache pa'auec so Jehú, nache nachattañi co'ollaq 'enapega 'enauac so nhuo' le'ecpi, 'eeta':
«Qami', qaica ca qauasouaxache. Nda'a't aỹem, cha'aye sataỹa'aguet co'ollaxa som ỹataxala', qataq salauat somaye. Qalaxaye, ¿negue't ca ỹalauat co'ollaxa 'enauac ne'enapi? 10Qaq qauaỹaañita nagui, da saishet da saipaigui so la'aqtac Ñim Nataxala' maye talec naqa'en co'ollaxa na llalaqpi so Ajab. Cha'aye Ñim Nataxala', ipacchigui da ỹo'ot dam ỹa'axat co'ollaxa so lamaxashec Elías.» 11Qaq co'ollaq ime de'era la'aqtac so Jehú, nache ỹalauat som no'onañi llalaqpi so Ajab, qataq 'enauac so ltauapi, nauochaxauapi, qataq so ltaxaỹaxanaxanecpi maye netaña ye Jezrel. Nache qaica ca no'onañi naqa'en da nca'altauec. 12Huaña nache so Jehú, taỹa ye Samaria, qaq co'ollaq quetague' so nqa'aic nache huaỹoxoua'a ye Bet Équed, maye lpetegaxanaqa' so qagueta lo'opi da npetec aso qaguetapi, 13qaq huaña yemaye, nache nauane' so lqaỹañecpi so Ocozías, maye nta'a ye Judá nache inat, 'eeta':
¿Negue't qami'? Nache somayepi, 'enapeco':
Qomye qomi' lqaỹañecpi so Ocozías, qaq qomi' ñanagaq da ñiquinaxai' ca llalaqpi ca nta'a qataq ca llalaqpi aca nate'e. 14Nache so Jehú, 'enapeco':
«Qauacoñiiua'a de'erapi, nache nca'altauec qanqa'eñi.» Qaq co'ollaq ime da nca'altauec qanqa'en da qaỹaconeua'a, nache qaicheguec na lqaic somayepi, huaña qanqa'en so sa qaỹapeque aso nshere maye naña ye lpetegaxanaqa' so qagueta lo'opi. Qaq somayepi ivi' cuarenta ỹalleppi, nache ỹataqta qaica ca no'onañi qanqa'en. 15Qaq co'ollaq ca'ai yemaye so Jehú, nache natena'aguet so Jonadab, som llalec so Recab maye taỹa da yaqto' nauane' somaye. Nache so Jehú, nquine' somaye, nache, 'eeta':
¿Peta'a no'on ca 'arhuennataxa da sheeta, da 'eeta'am da iuennataxa da qoneta? Nache so Jonadab, 'enapeco':
Aja', nache 'eetec. Nache so Jehú, 'eeta':
Chot na 'arhuaq. Nache so Jonadab ỹanec na lhuaq, nache Jehú inotaxanaxasheguemec aso laigona, 16nache 'eeta':
Ñaq aỹem 'auca'ategue, yaqto' 'auauaachigui da ỹataqta seca'alaxaalec Ñim Nataxala'.
Huaña nache inotaxanaxangui aso laigona nache ỹauec. 17Qaq co'ollaq choche ivireua'a ye Samaria so Jehú, nache ỹalauat 'enauac som chegoxoguetpi so Ajab, maye ñaq no'onañi co'ollaxa, nache ỹataqta nmatchiguiñi da ỹalauat somayepi. Qaq nache ipacchigui da la'aqtac Ñim Nataxala', maye ỹa'axat co'ollaxa so Elías.
So Jehú ỹalauat som ỹo'oxoreetacpi so Baal
18Qaq co'ollaq ime de'era, nache so Jehú laỹona't 'enauac so nhuo' le'ecpi, nache 'eeta':
«So Ajab, saqallegueme co'ollaxa da ỹo'oxoren ñi Baal, qalaxaye na Jehú, ỹactec qome da llo'oxonnataxanaxa. 19Qaq ñaq qauỹaxañiuga qome 'enauac na la'aqtaxanaxanecpi, lamaxashecpi qataq na ltaxaỹaxanaxanecpi ñi Baal, nache qaica ca saqanac qome, cha'aye huo'o na seqataxaatai' lta'araic ỹachetaqtaxanaxat da yaqto' sanot ñi Baal. Qaq ca saqanac nache ileu qome.»
Qaq so Jehú, ỹo'ot co'ollaxa de'era, cha'aye ỹauotaique da nmichiguiñi naqa'en som ỹo'oxoreetacpi so Baal, 20ỹoqo'oye somaye damaxasoxoolec da qaỹo'ot so naponaxac da qaỹo'oxoren so Baal, qaq nache qaỹo'ot somaye. 21Huaña nache so Jehú, ỹamaq so lamaxashecpi da yaqto' ira'a de'era la'aqtac 'enauac so Israel le'ecpi, qaq nache 'enauac som ỹa'amaqteetacpi co'ollaxa som Baal, taỹa aso atamnaxaqui. Nache ỹataqta qaica ca saq taua'a aso atamnaxaqui maye lalamaqte so Baal, nache asa'aso atamnaxaqui ỹataqta nlaqchigui co'ollaxa. 22Nache so Jehú, 'enapega co'ollaxa som ilotague' aso naỹamaqtaxaqui som nogoxot, da nqatec som nogoxotpi da yaqto' ỹaañi 'enauac som shiỹaxauapi maye ỹo'oxoreetac so Baal, nache somaye ỹo'ot de'era. 23Qaq co'ollaq ime, nache so Jehú, qataq so Jonadab, maye llalec so Recab, taroigui co'ollaxa aso atamnaxaqui maye lalamaqte so Baal, nache 'enapega som shiỹaxauapi maye ỹo'oxoreetac so Baal, 'eeta': «Ña qauloỹa da qaica ca qami' ỹalectaiguilo nam ỹo'oxoreetac Ñim Nataxala', maye nacherata da ndotec nam ỹo'oxoreetacpi ñim Baal.» 24Nache co'ollaq pa'auo som ỹo'oxoreetacpi som Baal, da yaqto' ỹaneuo aso lachetaqtaxanaqtepi, qataq aso lachetaqtaxanaqtepi qaỹavigaxatta. Nache so Jehú, ỹauo'o so ochenta ỹalleppi da nauan naqa'en so pa'auec so ñegueuo, qataq huaqata somayepi, 'eeta':
«Ca ỹetauec ca 'oonolec de'era shiỹaxauapi maye qami' sepataxagueta da qauloỹeegue, nache camaye ileu qome.» 25Qaq co'ollaq ime da ỹaneuo aso lachetaqtaxanaqtepi somayepi, nache so Jehú, ỹamaq som lauanaxanaxanecpi qataq som nataxala'pi, 'eeta':
«Ña qaunoxoñiiuo, nache qaualauache de'erapi, nache qaica qome ca qa'echaauec.»
Nache so nalleppi so Jehú, ỹalauat somayepi irolec so ỹeelonec, ime nache ỹasaxauec somayepi. Qaq co'ollaq ime, nache taua'a so pa'auo aso atamnaxaqui maye lalamaqte so Baal, 26nache nqatec aso coma'pi maye atamnaxalatepi, nache ỹavigaxat. 27Qataq ilaxachigui so lqui'i so Baal, qataq nlaxaañi aso atamnaxaqui maye lalamaqte somaye, qaq so naña co'ollaxa asomaye, nache ỹaachiguiña da no'oxoosheguem aso na'ataxanaxaquipi, choche ivitta'a nagui. 28Nache so Jehú, nqateeguesop ye Israel so Baal. 29Qalaxaye somaye saishet da ca'ai nam nasouaxashetpi maye ỹo'ot co'ollaxa so Jeroboán, som llalec so Nabat, nam ỹo'ot co'ollaxa na lasouaxashetpi so Israel le'ecpi, cha'aye nache queto'ot da natameetacoto soua ne'enaqtaqa huaca llalqa oro, maye neraña ye Betel qataq ye Dan. 30Nache Ñim Nataxala', 'enapega so Jehú, 'eeta': «Qaq cha'aye ỹataqta ỹaỹamaqchiguiñi da 'auo'ot, qataq 'auo'ot da saỹamaxareeta, qataq 'auo'otec dam sheetapeguec som llalaqpi so Ajab. Ỹoqo'oye sanem qome da no'onataxanaxac da ilo'ogue na Israel le'ecpi ca 'aỹa'alaqpi, 'arhualpi, cam llalaqpi ca 'arhualpi, qataq cam llalaqpi camayepi.» 31Qalaxaye so Jehú, saishet da imauec da lquiyaqteỹaxac da ỹataqta ỹalaxaguet nam lqataxacpi Ñim Nataxala', maye Natamnaxala' so Israel le'ecpi, cha'aye saishet da ca'ai nam qauem ỹo'otpi so Jeroboán, maye ỹo'ot co'ollaxa nam lasouaxashetpi so Israel le'ecpi. 32Qaq se'esoua na'axa'te, Ñim Nataxala' nquiga't naqa'en so na'alhua so Israel le'ecpi. Cha'aye so Jazael loxonec co'ollaxa so huañalo naua loga'te so na'alhuapi somayepi, 33chegoqchiguiña ye pa'aigue da nala' lliguisheguem so tala Jordán, qataq 'enauac ye 'alhua ye Galaad, qataq ye na'alhua so Gad, Rubén qataq Manasés, qataq chegoqchiguiña ye Aroer, maye sa qaỹapeque so la'auaxac ye Arnón, nache ivitta'a ye Galaad, qataq ye Basán.
34Qaq nam laỹepi na'aqtaguecpi so Jehú, qataq nam ỹo'otpi, qataq dam la'añaxac, nache nanettalec aso nere maye huetalec da na'aqtaguec so nta'alpi ye Israel. 35Qaq co'ollaq ileu so Jehú, nache qailareña ye Samaria, qaq da lo'onataxanaxac da nta'a somaye, nache talec so llalec Joacaz. 36Nache so Jehú, ivi' veintiocho vi'iye da ilotague' so Israel le'ecpi, co'ollaq huaña ye Samaria.
