So Amnón qataq aso Tamar
1So Absalón, maye llalec so David huo'o co'ollaxa aso lqaỹa ỹataqta 'onaxai, le'enaxat Tamar. Qaq som Amnón maye nataqa'en llalec so David, somaye ỹataqta nqopita co'ollaxa asomaye, 2nache so Amnón ivitta'a da ỹataqta ỹalolaqchet de'era lqopitaxanaqtaic, qaq cha'aye aso Tamar ñaq saxanaxa co'ollaxa da hue'eguet ca ỹale, nache somaye ỹataqta iqalana'a da huo'o ca ỹo'otec asomaye. 3Qalaxaye so Amnón huo'o co'ollaxa so nauochaxaua, le'enaxat Jonadab som llalec so Simea, maye lqaỹa so David, qaq somaye ỹataqta sanqalaate' da huo'o ca ỹoicnapec. 4Qaq huo'o so na'a'q, nache so Jonadab, inat somaye, 'eeta': 'Am, maye 'am nta'a llalec, ¿ta'ainco' ye ỹataqta 'anquicta'a't da 'auapo'ota? ¿Peta'a ishet da aỹem 'aua'aqtaxanem? Nache so Amnón 'enapeco':
Qomye aỹem ỹataqta ỹapacauec da iqopiche aso Tamar, asom lqaỹa so ỹaqaỹa Absalón. 5Nache so Jonadab 'enapego' somaye, 'eeta':
Qomye 'annatalec qome ye 'armala', nache 'aue'enaxat da ỹataqta 'am sano'on, qaq da 'am nvireua'a ca 'arta'a, nache qoneta': Aỹem 'anqouaguec da aỹem 'anamaxaua'a aca ỹaqaỹa Tamar, yaqto' acamaye ỹo'ot ca anoq, qalaxaye nache huaña naqa'en ne'ena yaqto' sauaachigui, qataq nache aỹem iquia'axan qome. 6Nache so Amnón, nnalec co'ollaxa so lmala' ỹe'enaxat da sano'on. Qaq co'ollaq nvireuo so nta'a da namaqtega somaye, nache so Amnón 'enapega, 'eeta':
«¡Aỹem 'anqouaguec qome da 'auasheeta da aỹem naua'a aca ỹaqaỹa Tamar, da yaqto' huaña ne'ena da ỹo'o't caua dos nauole, nache aỹem iquia'axan.» 7Nache so David ỹamaxa so la'aqtac aso Tamar, 'eeta':
«'Anqo'ona qome ye lma' ca 'arqaỹa Amnón, nache 'auo'ot ca aloq.» 8Nache aso Tamar jec, taỹa so lma' so lqaỹa Amnón, nache ilalec da nnaatai' somaye. Nache asomaye ỹacona so 'ayiiña da yaqto' iraqten, nache ỹo'o't soua nauole, ime nache ỹauo't ỹauaachigui naqa'en somaye. 9Qaq co'ollaq ime, nache aso Tamar ỹachalec so nquia'axala' soua nauole, qalaxaye so Amnón sa nashen da deque'e, nache 'eeta': «Qoquiỹa'ai qome ne'ena.» Nache co'ollaq inoxonec 'enauac na netaña so lma'. 10Nache so Amnón 'enapega aso Tamar, 'eeta':
'Andoua'a na ỹo'ochaqa' ca anoq, nache aỹem 'auquia'axan.
Nache aso Tamar ỹaconalo co'ollaxa soua nauole, nache iroua'alo so lo'ochaqa' so lqaỹa Amnón. 11Qaq co'ollaq nquigueua'a somaye da iquia'axan, nache nllañi asomaye, nache 'eeta':
'Am ỹaqaỹole, 'aỹala, aỹem 'arauañi'. 12Qalaxaye asomaye, 'enapeco':
«'Am ỹaqaỹa, saishet da aỹem 'auo'otec de'era saỹaỹamaxañi, cha'aye de'era sa qaỹaỹamaxaren da qaỹo'ot ne'ena Israel. Saishet qome da 'auo'ot de'era qauem. 13Cha'aye da aỹem 'ancat, qalaq ¿hua'ago' ca sataigue qome, souaxat da ỹa'agaxa? Qataq 'am, qaỹamata'ac qome da qauem da 'arataxac ne'ena Israel. Ỹoqo'oye 'am ñachoxonnot, 'onaxaictaxa da 'ana'aqtaxane' so nta'a, cha'aye somaye yo'oqta da qaica ca la'aqtac da aỹem 'arhua.» 14Qaq so Amnón saishet da ỹalaxaguet co'ollaxa asomaye, nache iloquiaxan aso Tamar, qaq somaye ye huo'o da la'añaxac nache ivira'a da ncat. 15Qaq co'ollaq ime de'era ỹo'ot so Amnón, nache ỹataqta nquiỹa asomaye, qaq de'era lquiỹaxanaqtaic ỹataqta napacalec da lauoche co'ollaxa asomaye. Ỹoqo'oye 'enapega, 'eeta':
«¡Ñaq qoñisheguem, nache qojec!» 16Nache aso Tamar, 'enapeco':
«¡'Am ỹaqaỹa, saishet da qonetec de'era, da aỹem 'auo'orauec, cha'aye da aỹem 'auo'orauec nagui, nache ỹataqta nquictec da qauem da aỹem 'auo'otec!» Qalaxaye so Amnón, saishet co'ollaxa da ỹalaxaguet asomaye, 17nacherata da iỹaxaneuga so lamaxashec nache 'enapega, 'eeta': ¡'Auo'orauec ara'ara 'alo! Qaq da mashe inoxonec, nache 'auapochigui qome ñi lasom. 18Nache so namaxashec ỹo'orauec co'ollaxa aso Tamar, ime nache ỹapochigui so lasom. Qaq aso Tamar ỹaatañi co'ollaxa aso ỹataqta 'onaxai lapoto, logorai naua lapique, cha'aye nache no'otaxac co'ollaxa ana llalpi na nta'a da ñaq saxanaxa da huaron. 19Nache aso Tamar, ỹacona co'ollaxa so alo, nache imeelec na lqaic, qataq ncolaxata'alo soua alogo maye ỹaatrañi, qataq npataqta'a na lqaic co'ollaq jec, nache nỹeetague' co'ollaq quetague' so nqa'aic. 20Nache so lqaỹa Absalón, inattac asomaye, 'eeta':
¿Nacheca peta'a ca 'arqaỹa Amnón ca 'am ỹo'otec de'era? Qalaxaye 'am ỹaqaỹa 'onaxaic qome da choche 'añe'emaxat, cha'aye camaye maiche 'arqaỹa. Qaq saishet qome da 'am ỹaquicoqchet de'era. Nache aso Tamar hua'a ye lma' so lqaỹa Absalón, qalaxaye ỹataqta qaica ca lama'. 21Qaq so nta'a David, co'ollaq la'axaỹaxac de'era, nache ỹataqta dalemata, qalaxaye saishet da ỹauo'o ca nhuaxanaguec so Amnón, cha'aye la'auaxanec llalec qataq ỹataqta lauotaxat. 22Qaq so Absalón saishet co'ollaxa da huo'o ca la'aqtac da 'enapega so Amnón, qalaxaye ỹataqta nquiỹa souaxat da ncat aso lqaỹa Tamar.
So Absalón ipalaique lvi' aso lqaỹa
23Qaq co'ollaq mashe inoxoorec soua dos vi'iye, nache so lamaxashecpi so Absalón npetectac na laue aso qaguetapi hueta'a ye Baal Jasor, yem sa qaỹapeque ye Efraín. Nache so Absalón ỹo'ot co'ollaxa so lquia'axac huaña yemaye, nache iỹaxana 'enauac so llalaqpi so nta'a David, da yaqto' lquia'axauapi. 24Nataqa'en taua'a co'ollaxa so nta'a da icoyeguen, 'eeta':
«Da lamaxashecpi ne'ena 'aramaxashec, mashe npetectac na laue ana qagueta, qaq 'am nta'a, 'onaxaic taxa da 'annaictague' qome na 'artauapi da yaqto' qaualliquiitaua'a de'era so'ot.» 25Qalaxaye so nta'a, 'eeta':
'Am ỹalcolec, qomi' saishet da 'enauac da qolaq, yaqto' saishet da ỹapacauec aca lasheue de'era 'auo'ot. Qalaxaye so Absalón, ñaqaiyeta ỹauecta so nata'a, qalaxaye somaye saishet da jec, nacherata da ỹanem da no'on la'aqtac somaye. 26Nache so Absalón, 'eeta': Qaq cha'aye saishet da qojec, nache no'on da 'auasheeta da ỹaqaỹa Amnón da qomi' ca'ateguelo. Nache so nta'a 'enapeco', ¿ta'ainco' da 'anshetaique da 'am ca'ategue da 'arqaỹa Amnón? 27Qalaxaye so Absalón souaxat da ỹe'eguelaqto'ot co'ollaxa so nta'a, nache somaye ỹasheeta da jec so Amnón, qataq 'enauac so laỹe llalaqpi somaye. 28Nache so Absalón 'enapega co'ollaxa so lamaxashecpi, 'eeta': «Qanauañiitac qome ñi Amnón da nỹomtac lataxa, nache qom ỹoqta taxaic, nache qom qami' shenapegalo da qaualauache, nache qaualauache qome ñimaye. Qaq saishet da qayi'iitac da qauo'oche damaye, cha'aye aỹem ỹamaxasoxonaxac. Qaq ỹoqo'oye qana'añaxache qataq qaua'añaxachiigui ye qarvilli.» 29Nache se'eso lamaxashecpi so Absalón ipacchigui co'ollaxa da namaxasoxonaxac, nache ỹalauat so Amnón. Nache so laỹepi llalaqpi so nta'a 'enauac ñisheguem, nache nelec aso lalo molapi nache datauec. 30Qaq co'ollaq ñaq quetague' so nqa'aic somayepi, nache so David la'axaỹaxac da so Absalón nmatchiguiñi da ỹalauat so llalaqpi so nta'a, nache qaica ca no'onañi da nca'altauec. 31Nache so nta'a, ñisheguem co'ollaxa, nache ncolaxata'aisalo soua alogo souaxat da nqui'ic, qataq nqapaxaneguet na 'alhua, nache 'enauac so ltauapi maye datataua'a somaye, nataqa'en ncolaxata'aisalo naua alogo. 32Qalaxaye so Jonadab, som llalec so Simea, maye lqaỹa so David detaqa, 'eeta':
'Am nta'a saishet da 'arhuennataxa de'era, cha'aye saishet da 'enauac da qaỹalauat so 'aỹa'alaqpi, nacheyeta ye Amnón da qaỹalauat, cha'aye nache 'enapec caillaye so Absalón se'eso na'a'q co'ollaq ye Amnón, ncat aso lqaỹa Tamar. 33Qaq ỹoqo'oye saishet qome da 'aua'amaqten da qaỹalauat 'enauac so 'aỹa'alaqpi, 'am nta'a. Cha'aye nacheyeta ye Amnón da ileu. 34Qaq co'ollaq mashe datauec so Absalón, nache so nauanaxanaxanec namatasheguem nache ila'aguet co'ollaxa so qalota shiỹaxauapi, nactague' so nqa'aic maye nlectot na pa'aguiñi añi qasoxonaxa. Nache somaye taua'a so nta'a da da'aqtaxanem. 35Nache so Jonadab, 'eeta':
Mashe nvi' na 'aỹa'alaqpi 'am nta'a, qaq ipacchigui da la'aqtaxanaxac ne'ena 'aramaxashec. 36Nache co'ollaq choche ime da la'aqtaxanaxac somaye, nache nvireuo so llalaqpi so nta'a, nache somayepi ỹataqta nỹeetac, nataqa'en so nta'a, qataq so ltauapi somaye ỹataqta lta'araic da nnoinaxac. 37Qaq so Absalón ỹe'eguena co'ollaxa so lma' so Talmay, som llalec so Amiud maye nta'a ye Gesur, qaq nache netaña somaye soua tres vi'iye. 38Nache 'enauaque soua na'axa'te da so David nỹeetapeguelec so llalec Amnón. 39Qaq co'ollaq mashe imeuec da laquicoxo souaxat da l-leuaxa so llalec, nache huo'o da lyaxa da nauane' so llalec Absalón.
