So Absalón mpa'aguene' so David
1Qaq co'ollaq mashe qaỹoqtegue de'era, nache so Absalón ỹauo'o aso laigona qataq so lalo caipi, qataq ỹauo'o so cincuenta nalleppi. 2Nache somaye no'ottasheguem naxa da nte'etom, nache tauga so loigue so nqa'aic maye taỹaua'a so ñegueuo so huaqta'a't nỹecpi. Qaq naxa da huo'o na taua'a so nta'a da yaqto' ỹaỹamaxaañi cam qancotatapigui. Nache so Absalón iỹaxanapegue' naxa, nache inattac chaq negue't ca huaqta'a't nỹecpi cam chegaqa'a. Qaq naxa da ỹa'axat da chegaqa'a na maiche nalamaxat nhuo' le'ecpi ye Israel, 3nache so Absalón, 'eeta':
«Ỹataqta ỹaỹamaqchiguiñi de'era qonetapeguec, qalaxaye qaica ca 'am ilo'oguet nam laỹepi so nta'a.» 4Qaq nataqa'en, 'eeta': «Ten ctaxa da nachaỹem da ñimit na lasouaxashetpi na shiỹaxauapi ne'ena 'alhua, nache aỹem saỹamaxaañi taxa 'enauac na cotaxacpi.» 5Qataq naxa da huo'o na taỹa da iquin qataq ỹa'aroto naua l-llecte so Absalón, nache somaye ỹanaxanaxaasheguem, nache nqapale' qataq napigoxoi'. 6Qaq 'era da 'eeta'ac naxa somaye 'enauac so Israel le'ecpi, maye tatapegueua'a so nta'a da yaqto' ỹaỹamaxaañi da lataxac na cotaxacpi, nache ỹashaxanec da lquiyaqteỹaxac so Israel le'ecpi. 7Qaq co'ollaq inoxoorec soua cuatro vi'iye, nache so Absalón 'enapega so nta'a, 'eeta':
'Am nta'a, 'onaxaictaxa da aỹem 'auasheeta da ñeqo'ona ye Hebrón, da yaqto' sepacchigui da ỹa'aqtac maye sanot co'ollaxa Ñim Nataxala'. 8Cha'aye co'ollaq soota'a ye Gesur ye 'alhua Siria, nache ne'ena 'aramaxashec ỹanot da la'aqtac Ñim Nataxala', da huo'otaq qoỹanem da ñe'eguelaxa na Jerusalén, nache namaye ỹanot ca lachetaqtaxanaxat Ñimaye. 9Nache so nta'a 'enapeco':
Aja', qataq qaica cara qome da 'icỹaxac. Nache so Absalón taỹa co'ollaxa ye Hebrón. 10Qalaxaye somaye, nache sa ỹaỹaloxon co'ollaxa da ỹauo'o so lamaxashecpi da icoyeguen 'enauac so Israel le'ecpi, yaqto' da choche hua'axaỹa da l-lamaxa aso nasheerepi, nache 'eeta': Da Absalón huaña na Hebrón da qoỹanagui da nta'a. 11Nataqa'en somaye nnaictague' co'ollaxa so doscientos alleppi, chegoqchiguiña ye Jerusalén, qaq somayepi qaica co'ollaxa ca huotaique da ca'attague' somaye, cha'aye saỹaỹaten cam 'eetapeguec. 12Qaq co'ollaq ña ỹo'ottac aso lachetaqtaxanaqte so Absalón, nache damaxasoxona so 'oonolec so ltauapi so David le'enaxat Ajitofel, maye netaña ye Gilo yem huaqta'a't nỹecpi maye lalamaxat somaye. Huaña nache nquictauec de'era la'añaxac da mpa'aguenaxac qataq so ca'attague'pi somaye. 13Qaq huo'o co'ollaxa so da'aqtaxaneua'a so David, da mashe qalota so Israel le'ecpi da datalec so Absalón. 14Nache so David 'enapega co'ollaxa so ltauapi, 'eeta':
«¡Sataxauec nagui, ten da qomi' nviraleguete ca Absalón, nache sa seshetaq qome da ñaneltaxanaq! Qaq ỹoqo'oye qauỹalliỹapigui' qome, ten da qomi' qanviraleguete nache qalota qome ca qaỹalauat, da qairota'a ca ỹeelonec da qanmatchiguiñi 'enauac na netaña ne'ena huaqta'a't nỹecpi.» 15Nache so ltauapi so nta'a, 'enapeco': «Qomi' qaica ca shegaqtega da so'otaq ca qomi' 'auamaxaleguete 'am nta'a.» 16Nache so nta'a jec co'ollaxa, lỹatec 'enauac so llalaqpi qataq so ltauapi, nache ndotrec soua diez lamoxou' icota'n da iloregue so nma' lta'araic. 17Qaq co'ollaq mashe ca'ai so lma' lta'araic somaye, qataq so laỹepi, nache vi'iiguet co'ollaq ivita so pa'atec nỹec som huaqta'a't nỹecpi. 18Qaq 'enauac so nta'alpi maye ltauapi somaye, nache netaua'a na laỹe, nache so quereteopi, peleteopi, qataq so seiscientos geteopi maye ca'attague' somaye co'ollaq chegoqchiguiña ye Gat, nache 'enauac somayepi nalochiguiñi da hua'auta'ague so llec so nta'a. 19Nache so nta'a 'enapega co'ollaxa so Ilay maye Gat le'ec, 'eeta': ¿Ta'ainco' ye nataqa'en 'am da qomi' 'anca'attaiguilo? 'Onaxaictaxa da 'avi'eguelaq, nache 'ano'ona'aguet ca dalaxaic nta'a, cha'aye 'am choche 'auachegaqauec, qataq 'am qaỹo'orauec co'ollaxa da qoca'ai qanqa'en ca 'ana'alhua. 20Qataq ye cheta'ague shecait da 'anvi', nache ta'ainectaxa da 'am shenapega da qomi' 'auca'atoiguilo, ye nataqa'en aỹem sasaỹaten cam sataigue. Qaq ỹoqo'oye 'onaxaictaxa da 'avi'eguelaq qataq 'auaue'c naua 'arqaỹa't. ¡Qaq Ñim Nataxala' 'am ỹachaxana qome da choche tatec lauotaxanaqtaic! 21Nache so Ilay 'enapega co'ollaxa so nta'a, 'eeta':
«Aỹem sanot da ỹa'aqtac Ñim Nataxala' qataq 'am nta'a, da que'eca qoueta'a 'am nta'a, da huo'o da nca'alaxa, huo'otaq nleuaxa, qalaxaye ne'ena 'aramaxashec nataqa'en hueta'a qome camaye.» 22Nache so David, 'enapeco': Da nache 'eetec de'era, nache qomi' 'auca'atoiguilo qone'. Nache so Ilay maye Gad le'ec qataq 'enauac so nnaictague'pi somaye, ca'ategue co'ollaxa so David. 23Nache 'enauac so shiỹaxauapi ỹataqta nỹeetagui co'ollaq taitague da le'ego da ỹa'axasoxoolec so la'auaxac ye Cedrón. Qaq so nta'a co'ollaq ime da ỹa'axasoxoolec somaye, nache 'enauac se'eso shiỹaxauapi jec, quetegue so nqa'aic maye tateuga ye toolec 'alhua. 24Qaq nataqa'en ỹalectaigui somayepi so Sadoc, qataq so leviitapi maye ỹachetac aso arca maye laỹe da naỹamaxataxac Ñim Lo'onatac 'Enauacna. Qalaxaye somayepi ỹa'axaneguet asomaye, nache no'onaxata'aguet so Abiatar, nache ivitta'a da inoxonec 'enauac se'eso shiỹaxauapi da ca'ai so huaqta'a't nỹecpi. 25Qalaxaye so nta'a 'enapega so Sadoc, 'eeta':
'avi'eguelaxateua'a qome ye huaqta'a't nỹecpi añi arca maye laỹe' da naỹamaxataxac Ñim Lo'onatac 'Enauacna. Cha'aye da aỹem ichoxoren Ñim Nataxala', nache aỹem ñe'egelaxateuo qome, nache qaltaq ñauane' añimaye qataq ñi npe'l maye netaigui. 26Qalaxaye da mashe saishet da aỹem ỹaỹamaxaren Ñimaye, nache maicheye ca aỹem 'eeta'ac. 27Ime, qataq 'enapega so ntaxaỹaxanaxanec Sadoc, 'eeta':
'Am qataq da Abiatar qavi'iguelaqaiua'a qome ye huaqta'a't nỹecpi, nache 'annaictague' da 'aỹa'alec Ajimaz, qataq da Jonatán maye llalec da Abiatar. 28Qaq aỹem qalaq soua'a qome ye nalochiguiñi ye toolec 'alhua, seuata'a da huo'o ca ỹa'axaỹaxac da qoñiita. 29Nache so Sadoc qataq so Abiatar, ỹe'eguelaxatreua'a co'ollaxa ye Jerusalén aso arca maye laỹe' da naỹamaxataxac Ñim Lo'onatac 'Enauacna, nache neraña yemaye. 30Qaq so David, tasheguema aso qasoxonaxa maye lma' ana Olivo, nache nỹeetague', ỹapotalec na lqaic qataq qaicaua caua lapela'ate, souaxat da nqui'ic. Qataq 'enauac so nnaictague'pi somaye da tasheguema na pa'asheguem nataqa'en nỹeetagui, qataq ỹapotalec na lqaic. 31Qaq co'ollaq qaỹa'aqtaxanem so David, da so Ajitofel ỹalegoigui so laỹepi so Absalón maye mpa'agueetac, nache so David nqouagaxaunot co'ollaxa Ñim Nataxala', 'eeta': «Saishet qome da ipacchigui 'anqa'en, 'enauac na lapaxañipi da ỹo'ot ca Ajitofel.» 32Nache so David co'ollaq mashe ivitsheguema na pa'asheguem aso qasoxonaxa, maye huaña da qaỹo'oxoren Ñim Lo'onatac 'Enauacna, nache natena'aguet so Jusay maye arquiita, ỹataqta colaqta'ape soua alogo, qataq nlaqchigui na lqaic na 'alhua. 33Nache so David 'enapego' somaye, 'eeta': Da aỹem 'auca'ategue, nache ỹataqta 'am ñeqalangui qome. 34Qalaxaye da 'avi'eguelaxa ye Jerusalén, nache qonapega ca Absalón, qoneta': 'Am nta'a, maiche aỹem 'aramaxashec, 'eeta'am co'ollaq aỹem lamaxashec so 'arta'a. Nache aỹem 'autauan qome da ñelaxaañi na lapaxañipi da ỹo'ot ca Ajitofel. 35Qaq huo'oi caua ntaxaỹaxanaxanaqa Sadoc qataq Abiatar da 'am itaua'n qome. Qaq 'enauac qome ca 'aua'aqchigui da qoueta'a ca lma' ca nta'a, nache 'aua'axatema qome caamaye. 36Nataqa'en caua llalqa caamaye, Ajimaz qataq ca Jonatán, nache huetra'a yemaye. Qaq nachecaua caua 'aua'aqtaxaarema 'enauac ca 'aua'aqchiguipi, yaqto' caamaye ỹauo'o ca ỹa'axaỹaxac. 37Nache so Jusay, maye nauochaxaua so David, ivireua'a ye Jerusalén, co'ollaq mashe inoxoneua'a yemaye so Absalón.
