So David qataq so Sibá
1Qaq co'ollaq mashe napacalec so ỹataqta pa'asheguem añi qasoxonaxa so David, nache natena'aguet so Sibá, maye lamaxashec so Mefiboset. Qaq somaye ỹauecta'agueta soua 'ashena pa'atrañi so lla'ac, nache ỹachetac aso doscientos nauole, qataq cien aso nauole nqaxaỹaqta uva, qataq aso cien nauole nqaxaỹaqta hiigo, qataq aso 'oonole lo'oc maye laỹe' na lataxa. 2Nache so nta'a inato' so Sibá, 'eeta':
¿Ta'ainco' da 'andouec ne'ena? Nache somaye 'enapeco': Ñaue'c ne'enaua 'ashena yaqto' neleguete 'anqa'en na 'aỹa'alaqpi, qaq ana nauolepi, qataq ana nqaxaỹaqta nañiguishe ala, nache lqo na alleppi, qaq na lataxa qalaq nỹomigui ca ilem na laquip qom hualec ye toolec 'alhua. 3Nache so nta'a qaltaq inat co'ollaxa somaye, 'eeta':
¿Hua'ague ca neta'ague ca laual so 'ana'aco'? Nache so Sibá 'enapeco':
Qomye no'onaña ye Jerusalén, cha'aye somaye ipettega da na Israel le'ecpi, ỹe'eguelaxatem nagui da lo'onataxanaxac so lapi' da yaqto' nta'a. 4Nache so nta'a David, 'enapeco':
Hua', nalotañi, qaq nagui 'am taỹot ñaqa'en 'enauac na lalamaxatpi so Mefiboset. Nache so Sibá, ỹa'aldoto naua l-llecte so nta'a nache 'eeta': ¡'Onaxaictaxa da nache 'eetai' qome de'era 'arqouagaxanaqtaic da sheeta 'am nta'a! 5Qaq co'ollaq ivita ye Bajurín so nta'a David, nache natena'aguet so ỹale maye chegaqaigui so lalamaxat lauo' so Saúl, le'enaxat Simea maye llalec so Gera, somaye ỹataqta qauem na ỹasaxalec la'aqtacpi co'ollaxa so David, 6qataq huota'a na coma' da ỹasaqtac so nta'a David qataq so ltauapi somaye, qalaxaye so shiỹaxauapi qataq so maiche nalleppi maye ỹataqta 'añaxaicpi, coleesop co'ollaxa somaye da mpaxattalec, 7nache so Simea queto'ot co'ollaxa da nqaqaatapiguiñi ỹasaqtapeguelec nam qauem la'aqtac so nta'a, 'eeta':
¡Qoca'ai ne'ena 'am qauemaic, qataq laataxanaxaic! 8Ñim Nataxala' ỹauo'o nagui da 'anhuaxanaguec, souaxat da 'auo'otec da l-leuaxa so llalaqpi so Saúl, da yaqto' 'auacona da lo'onataxanaxac somaye da nta'a. Ỹoqo'oye nagui Ñim Nataxala', ỹanem so 'aỹa'alec Absalón, da 'aro'onataxanaxac da 'am nta'a. Qaq nagui, qoueta'a ne'ena, nache maiche 'anque'etaxangui dam qauem, souaxat da 'am laataxanaxaic. 9Nache so Abisay, maye llalec aso Seruyá, 'enapega so nta'a, 'eeta':
¿Ta'ainco' da qaỹa'aqta'a da ỹasaqtapeguelec nam qauem la'aqtacpi na nta'a de'era pioq leuaxaic? ¡Qaq 'am nta'a, 'onaxaic taxa da aỹem 'auasheetem nagui da secheguec na lqaic damaye! 10Qalaxaye so nta'a 'enapeco':
Qami' maye qami' llalqa aso Seruyá, saishet qome da qa'aitapegueua'a de'era, cha'aye da aỹem isheueetac damaye, qaq souaxai' nacheñi Ñim Nataxala' da ỹamaxalec. Qaq ỹoqo'oye da nache 'eetec de'era, nache ¿negue'tom ca ishet da inat Ñimaye da ta'ainco' da ỹo'ot de'era? 11Ime, nache somaye 'enapega so Abisay qataq 'enauac so ltauapi somaye, 'eeta':
Ña qauloỹa som ỹataqta ỹalamaxat ỹalec, qalaq huotaique da aỹem ỹalauat. Qaq ta'ainectoxo' da saishet da nache 'eetec de'era, dam llalec so Benjamín. Ỹoqo'oye qaua'aqaita'a qome damaye da aỹem isheueetac, cha'aye souaxai' maiche ỹamaxalec Ñim Nataxala'. 12Qaq sa iuena'a da ila'a da ñeque'eenaxac Ñim Nataxala', nache maiche aỹem ỹanem ca ñechoxonnataguec, nmeneguet naqa'en na qauem na'aqtacpi maye aỹem qaỹasaxalec nagui. 13Nache so David qataq so nalleppi nache queta co'ollaxa, qaq so Simea nache queto'ot na loigue aso qasoxonaxa da desheunaxaatac qataq dasaxasoxootega na coma' da ỹasaqtague' so David qataq imettague' na namoxoỹaxa. 14Qaq so nta'a qataq so shiỹaxauapi maye nnaictague', ỹataqta nasamñi, nache co'ollaq ivita ye tala Jordán nache hua'a da nmatec.
So Absalón huenoxoneua'a ye Jerusalén
15Qaq so Absalón mashe inoxoneua'a co'ollaxa ye Jerusalén, nache nnaictague' 'enauac so Israel le'ecpi qataq so Ajitofel. 16Qaq so Jusay, som arquiita maye nauochaxaua so David, somaye huaqata'aguet co'ollaxa so Absalón, nache ỹa'alaqtai', 'eeta': ¡Nache 'eetai' da 'am nta'a, nache 'eetai' qome da 'am nta'a! 17Nache so Absalón 'enapeco':
¿Peta'a nachera da lataxac de'era qonetec so 'anauochaxaua David? ¿Ta'ainco' ye saishet da 'auca'ategue somaye? 18Nache so Jusay 'enapeco':
Saishet, cha'aye aỹem ño'ona'aguet ca lca'aguishec Ñim Nataxala', qataq ca lca'aguishec ne'ena nhuo' Israel le'ecpi. 19Cha'aye ¿Negue't taxa ca setauan? Aỹem setauan na llalec so ñauochaxaua, 'eeta'am co'ollaq setauaatac so 'arta'a. 20Ime, nache so Absalón inattac so Ajitofel, 'eeta':
¿Ca 'eetec ca 'arqataxac nagui, negue't ca ishet da so'otaq? 21Nache so Ajitofel 'enapega so Absalón, 'eeta':
Qomye 'arauañi' ana no'onaxatañi lamoxouapi so 'arta'a, da ilo'ogue na nma' lta'araic. Yaqto' 'enauac na Israel le'ecpi ỹaỹaten da ỹataqta 'anquiỹa so 'arta'a, nache namayepi ỹataqta na'añaxat qome da 'am ca'ategue. 22Huaña, nache qaỹo'ot so npe'l, nalec qanqa'en na l-laq so nỹec da yaqto' so Absalón lauañi' aso lamoxouapi so lta'a, ỹauaachigui naqa'en 'enauac so Israel le'ecpi. 23Cha'aye se'eso na'a'q da qainat naxa so Ajitofel, nache 'eeta'am da nacheñi Ñim Lo'onatac 'Enauacna da qainattac. Qaq nache 'eeta'ac naxa da inat somaye so David, qataq so Absalón.
