So Sebá dataỹa'aguet so David
1Qaq huo'o so qauemaic shiỹaxaua netaña ye Gilgal, somaye chegoxoguet so Benjamín, le'enaxat Sebá, som llalec so Bicri. Somaye ỹashiiyigui co'ollaxa aso nasheere peenaq lcoue, nache 'eeta': ¡Qami' Israel le'ecpi, 'onaxaic da 'enauac she'eguelaxasaxalo naua qarma'ate, cha'aye qaica da huo'o ca ñeuanaqaua'a, qataq da huo'o ca qomi' taleguete nataqa'en da seca'ataqtague' so David, som llalec so Yesé!
2Nache 'enauac so Israel le'ecpi ca'ai co'ollaxa so David, nache ca'ategue so Sebá, som llalec so Bicri. Qalaxaye so Judá le'ecpi, nache ca'attague' co'ollaxa so nta'a David, chegoqchiguiña so tala Jordán, ivitta'a ye Jerusalén.
3Qaq so David co'ollaq ivireua'a so lma' lta'araic ye Jerusalén, nache nqatrec soua diez lamoxou' maye no'onaxatra'agueta da ilotrague' co'ollaxa so lma' lta'araic, nache iỹotraugalo da ỹapoua'alo, qataq ỹauo'o so nhuataxaua se'eso nỹec maye netaigui soomaye. Qalaxaye qaica ca iueetraique naqa'en, qataq nache saishet da lauañito. Qaq soomaye, nache 'eco' pa'aipi, choche ivitta'a da ileu. 4Ime, nache so nta'a 'enapega so Amasa, 'eeta':
'Alaỹona't qome 'enauac na Judá le'ecpi, nache da ivireuga ca na'a'q tres, nache 'auanac, nataqa'en namayepi 'anauegueua'a ne'ena.
5Nache so Amasa, ỹe'eguenauga co'ollaxa somayepi, qalaxaye qaỹaloqteguet, nache sa ipaigui so na'a'q maye naloqnec da anac. 6Nache so David, 'enapega co'ollaxa so Abisay, 'eeta':
Se'eso Sebá maye llalec so Bicri, somaye de'era ỹo'ot ỹataqta napacalec da ỹo'ot co'ollaxa so Absalón, da ỹataqta qomi' na'axa't qome. Qaq ỹoqo'oye 'auaconeua'a qome na ñalleppi maye ỹataqta ỹaỹaten da nalaataxac, nache 'aucanapec qome somaye, ten qom ivireua'a ca huaqta'a't nỹecpi maye huo'o na lpaqtaxat, nache shetaqauec qome. 7Nache so nalleppi so Joab, quereteopi, qataq so peleteopi maye nhuataxauapi so nta'a, ca'ategue co'ollaxa so Abisay, chegoqchiguiña ye Jerusalén da icanapec so Sebá, maye llalec so Bicri. 8Qaq co'ollaq mashe sa qaỹapeque añi coma' late'erai maye naña ye Gabaón, nache so Amasa natena'aguet so Joab, ỹaatrañi co'ollaxa soua nalaataxaqui' alogo, qataq na'attagui so lainec, qalaxaye co'ollaxa jec, nache 'eco' da naañi naqa'en se'eso lainec. 9Nache so Joab ỹauota'a na aloiguishec lhuaq, da ỹacootec aso lqa' laue so Amasa, 'eeta'am naqa'en da huotaique napigoxoi', nache 'eeta': ¿Peta'a qaica ca machaqca 'am ỹaqaỹa? 10Qaq so Amasa saishet co'ollaxa da npi'itaxana so Joab, da nasoqta'a so lainec, nache so Joab ỹa'atchigui na da'am laỹe co'ollaxa somaye, nache naañi naqa'en na lauel le'ec. Nache somaye ileu, saiuen da qaltaq qaỹa'arapec, huaña nache so Joab qataq so lqaỹa Abisay, je'c da icanapec so Sebá, maye llalec so Bicri. 11Qaq huo'o so 'oonolec so nalleppi so Joab, da no'ona'aguet so Amasa, nache 'eeta':
¡'Enauac na ỹaỹamaxareeta da Joab, qataq ñi David, nache ca'ategue qome da Joab! 12Qaq so Amasa ñaq ncocatapiguiñi, ncogagui na ltago'q huetangui so nqa'aic, nache 'enauac na nlectot somaye vi'iiguet da imeteetac. Qaq se'eso no'onañi co'ollaq ila'a da 'enauac na nlectot da imeteetac se'eso leuaxaic, nache ỹacoosop da irouga so no'onaxa, nache ỹauo'o so lapo' da ỹapolec. 13Nache co'ollaq ime, da qanqateeteguesop so nqa'aic somaye, nache jec 'enauac so ca'ategue so Joab da icanapec so Sebá maye llalec so Bicri. 14Qaq so Sebá nmatta co'ollaxa da quetagui 'enauac so Israel le'ecpi, ivitta'a ye Abel Betmacá, nache 'enauac so maiche lalamaxat lauo' le'ecpi so Bicri lapona't, nache nataqa'en ca'ategue somaye. 15Qaq so laỹepi so Joab co'ollaq ivita ye Abel Betmacá, nache coleesop qataq ỹapoua'a, nache nauaxaỹaxaasheguem so ñeguisheguempi ye npaqtaxanaxat, da yaqto' iloquiaxan so lma' se'eso huaqta'a't nỹecpi, nache 'enauac so nalleppi so Joab ntauna't da huotaique da nlaxaañi se'eso npaqtaxanaxat. 16Qalaxaye se'eso huaqta'a't nỹecpi, huo'o aso 'alo ỹaanaxanaxai, qaq asomaye na'alaqtaña co'ollaxa somaye, 'eeta':
¡Ñaq aỹem qana'axaỹaxañiỹa! ¡Ñaq aỹem qana'axaỹaxañiỹa! ¡'Onaxaictaxa da qoñiỹapega ca Joab da naua'a ne'ena, yaqto' setaxaỹapegue' camaye! 17Nache so Joab, taua'a co'ollaxa asomaye, nache asomaye inattac, 'eeta':
¿Nache 'am Joab?
Nache so Joab ỹasat, 'eeta':
¡Aja', nachaỹem.
Nache aso 'alo, 'eeta':
Ñaq 'ana'axaỹaxana taxa da la'aqtac ana'ana 'aramaxashe.
Nache so Joab, 'enapeco':
Aja', 'am ña'axaỹaxana.
18Nache asomaye, 'enapeco': «Se'esoua hua'au' vi'iye, qoỹenapec naxa: ‹Da huo'o ca denataxaatac, nache inat na lma' na Abel.› Huaña nache ime que'eca qanqalaata'a'i. 19Cha'aye qomi', maye sonaqtaigui ne'ena huaqta'a't nỹecpi na Israel, ỹataqta so'otaq da nlagaxayec, qataq qomi' laxaraiqa. Qaq 'am 'anshetaique da 'aulaxachigui ne'ena huaqta'a't nỹecpi maye ỹataqta huo'o da la'amaqchec ne'ena 'alhua Israel. Qataq ¿ta'ainco' ye 'anshetaique da 'anlaxaañi na lalamaxat Ñim Nataxala'?» 20Nache so Joab, 'enapeco':
¡'A'i, saishet, aỹem saishet da iuennataxa da selaxachigui qataq da ñelaxaañi ne'ena huaqta'a't nỹecpi! 21Aỹem, saishet da ñanaỹa da so'ot de'era, nachaqrata da ñimittaique ca ỹale maye Efraín le'ec, le'enaxat Sebá, maye llalec so Bicri, cha'aye camaye nshetaique da dataỹa'aguet ñi nta'a David. Qaq nachecata camaye da aỹem qaỹa'añim, nache aỹem she'eguelaq qome. Nache aso 'alo, 'eeta':
Aja', sasaxasoxoueegue qome da laỹe na npaqtaxanaxat ca lqaic camaye. 22Nache asomaye sa naỹaloxon co'ollaxa da da'aqtaxaatem 'enauac se'eso shiỹaxauapi se'eso huaqta'a't nỹecpi, huaña nache qaicheguec so lqaic so Sebá, som llalec so Bicri. Ime, nache qaỹasaxauga so Joab, nache somaye 'enapega da qaỹashiiyigui aso nasheere da yaqto' qanayeca'ai se'eso huaqta'a't nỹecpi, nache 'enauac somayepi ỹe'eguelaxalo naua lma'ate. Qaq so Joab qalaq ỹe'eguelaxa ye Jerusalén, da taỹa so nta'a. 23Nache 'enauac so alleppi yi'iye Israel, datalec so Joab, qaq so Benaías maye llalec so Joyadá, ilotague' co'ollaxa so quereteopi qataq so peleteopi. 24Qaq so Adoram qalaq ilotague' co'ollaxa so do'onataxaatacpi, qaq so Josafat, som llalec so Ajilud qalaq leraxanaxanec so nta'a. 25Qaq so Sevá, nache neraxanaxanec, qaq so Sadoc qataq Abiatar qalaq ntaxaỹaxanaxanaqa. 26Qaq so Irá som Yaír le'ec, somaye nataqa'en ltaxaỹaxanaxanec co'ollaxa so David.
