1Nache qaicoyeguen co'ollaxa so Joab, qoỹeeta': Ñi nta'a na'alaqtapiguiñi souaxat da ileu ye llalec Absalón. 2Nache se'eso alleppi co'ollaq la'axaỹaxac da daquico so nta'a souaxat da ileu so llalec, nache se'eso na'a'q maye huaigui da doxonaxan somayepi, nache huaigui da laquicoxo 'enauac se'eso shiỹaxauapi souaxat de'era nasouaxac. 3Ỹoqo'oye se'eso na'a'q co'ollaq inoxoneua'a so huaqta'a't nỹecpi se'eso alleppi, nache ỹataqta nqañoxotchiguiñi, 'eeta'am ca alleppi da dataueeguesop ca alaataxac. 4Qaq so nta'a ñaq queta co'ollaxa da ỹapotalec na lqaic, qataq da na'alaqtapiguiñi, 'eeta':
«¡Ỹalcolec Absalón, ỹalcolec! ¡Ỹalcolec Absalón!»
5Nache so Joab nqo'oneua'a so nta'a, nache 'enapego', 'eeta':
'Am nta'a, nagui ỹataqta 'auauota'a da la'aloxo na 'aramaxashecpi maye 'am nca'alaxatec, qataq na 'aỹa'alaqpi ỹalleppi, 'alpi, 'arhuapi qataq ana ỹaqauga 'arhuapi. 6Cha'aye 'am, ỹataqta 'auauotec na 'am nquiỹategapi, qaq na 'am ỹauotec qalaq ỹataqta 'anquiỹa. Qaq nagui, ỹataqta sauaachigui da saishet da 'autena'a na 'artauapi, qataq na 'analleppi, nda'a't da 'artenaxanaxa so Absalón, qaq yo'oqta da 'auamachiguiñi taxa da nca'altauec so Absalón, qaq na'aictaxa da qomi' qanmatchiyiñi da qomi' qaỹalaua't. 7Qaq ỹoqo'oye nagui, no'on da 'anachaatec, nache 'aua'añaqchet na 'analleppi. Cha'aye qom saishet da 'auo'ot de'era, nache aỹem sanot da ỹa'aqtac Ñim Nataxala', da ne'ena pe, qaica ca choche 'oonolec ca 'am no'ona'aguet ne'ena 'analleppi. Qaq de'era nachera da ỹataqta napactelec 'enauac na qauempi maye qouaigui co'ollaq ñaq 'am nsoqolec, ivitta'a nagui.
8Nache so nta'a ñisheguem co'ollaxa, nache taña so ñegueuo se'eso huaqta'a't nỹecpi, nache nso'ooñi. Qaq so shiỹaxauapi co'ollaq la'axaỹaxac da so nta'a netaña so ñegueuo se'eso huaqta'a't nỹecpi, nache 'enauac somayepi nqo'ona da nachaateua'a somaye. Qaq so Israel le'ecpi, qalaq 'enauac co'ollaxa da mashe ỹe'eguenalo naua lma'ate. 9Qaq 'enauac so maiche nalamaxat nhuo' Israel le'ecpi, qana'aqtaxaatapigui co'ollaxa de'era, 'eeta': «Ñim nta'a David, qomi' isoueeguesopa co'ollaxa da la'añaxac so qampa'aguenaxauapi, qataq da lamaxasoxonaxac so filisteopi, qalaxaye souaxato' so Absalón, nache naneltaxan da ca'ai ne'ena qana'alhua. 10Qalaxaye so Absalón, maye sanaqagui co'ollaxa da nacheso so nta'a da qomi' ilo'oguelo, nagui somaye mashe ileu, huaigui so alaataxac. Qaq ¿Negue'to' ca seuataqta'a da sa ñe'eguelaxataxauo ñi nta'a David?»
11Nache so nta'a David, ỹamaxa da la'aqtac soua ntaxaỹaxanaxanaqa Sadoc qataq so Abiatar, 'eeta':
Qami' qautaqỹapegue' qome ca lqueroxonecpi na netaña ye Judá, nache qoñiita': «Ñi nta'a David, mashe ỹaỹaten da 'enauac na Israel le'ecpi, detaqtega't da huotaique ñe'eguelaxateuo ñimaye. Qaq qami', ¿Negue'to' ca qauacheeta'a da sa qañe'eguelaxachiiuo na nta'a? 12Qamaq, ỹataqta qami' ỹaqaỹa't, cha'aye 'oonolec so sachegoxosoxoguet, nache taloxochiyo' da qanca'ataxañiitauo da qavi'iguelaxachiiuo na nta'a.»
13Nataqa'en qoñiỹapega qome ca Amasa, qoñiita':
¿Saisheto' peta'a da saq maiche 'am ihuo' le'ec? Ỹoqo'oye ne'enaua na'axa'te, 'am sanagui qome da lo'onataxanaxac so Joab, nache 'am lataxala' na ñalleppi. Qaq da sa sepaguelec de'era ỹa'aqtac, nache Ñim Nataxala' ỹataqta lta'araic qome naqa'en ca ñeuaxanaguec.
14Huaña, nache so nta'a ỹañoxot da lquiyaqteỹaxac so chegoxoguetpi so Judá, nache somayepi 'oonolec da lasataxac da 'enapega so nata'a da ñe'eguelaq qataq 'enauac so nalleppi. 15Nache so nta'a jec da ỹe'eguelaq, nache ivitta'a so tala Jordán. Qaq so Judá le'ecpi taỹa co'ollaxa ye Gilgal, huaqata'aguet so nta'a, da yaqto' itauan da ỹa'axasoxoolec so tala Jordán. 16Nataqa'en so Simea, som llalec so Gera maye chegoxoguet so Benjamín, maye lma' ye Bajurín somaye nataqa'en iỹalapigui' co'ollaxa da nnaicapegue' so Judá le'ecpi, da yaqto' huaqata'aguet so nta'a David. 17Nache nnaicapegue' so mil ỹalleppi maye chegoxoguetpi so Benjamín, nataqa'en so Sibá maye l-latac co'ollaxa so Saúl, nnaictague' so quince llalaqpi, qataq so veinte l-latacpi, qaq somaye na'auaxaama co'ollaxa so tala Jordán, co'ollaq so nta'a ñaq saxanaxa da nvita. 18Nache ỹa'axasoxongui so saqaỹangui se'eso tala, da yaqto' itauan so nta'a qataq so llalaqpi da ỹa'axasoxoolec naqa'en so tala Jordán. Qaq co'ollaq mashe inoxootague da le'ego so tala Jordán so nta'a, nache so Simea ỹa'aldoto naua l-llecte somaye. 19Nache 'eeta':
«'Am nta'a, 'am ñachoxonnot, da saishet qome da 'aulogui da ne'enaxac, qataq da qauem maye 'am ỹo'otec ne'ena 'arlatac, se'eso na'a'q co'ollaq 'am qoca'ai ye Jerusalén. Qataq saishet qome da tatapigui 'arhuel de'era. 20Cha'aye aỹem, ñauattootela't da huo'o da ỹasouaxashet, qaq ỹoqo'oye nagui aỹem, maye sachegoxoigui na maiche nhuo' le'ecpi maye chegoxoguet so José, aỹem ña'autec da 'am seqata'aguet, 'am nta'a maye 'am ỹataxala'.»
21Qalaxaye so Abisay maye llalec aso Seruyá, 'enapeco':
«¡Da Simea, ỹasaxalec caillaye na qauem la'aqtacpi da nta'a, ỹoqo'oye damaye iuen da qaỹalauat!» 22Nache so David, 'enapeco':
Qami' llalqa aso Seruyá, saishet da qa'aitapegueua'a de'era, cha'aye damaye maiche ỹalamaxat. Qataq ¿ta'ainco' da qansheetaique da 'eco' qami' ñepa'aguenaxau'? Qataq ¿ta'ainec taxa da huo'o ñaqa'en ca ileu nagui, ye mashe saỹaten da qaltaq aỹem lta'a na Israel le'ecpi? 23Ime, nache 'enapega so Simea, 'eeta': Nagui san da ỹa'aqtac da saishet da 'aleu. 24Qaq nataqa'en so Mefiboset, som laual so Saúl, huaqata'aguet co'ollaxa so nta'a. Qaq somaye, nache chegoqta'a so na'a'q co'ollaq jec so nta'a, da saishet da iỹoi' naua lchel, saishet da npetec ana lqa' laue, qataq saishet da iỹoi' soua alogo, choche ivitta'a da ñe'eguelaq qataq qaica ca camachaqca da nachaalataxac so nta'a. 25Nache co'ollaq naua'a ye Jerusalén somaye, da yaqto' nauane' so nta'a, nache so nta'a inattaco', 'eeta':
Mefiboset, ¿ta'ainco' da saishet da aỹem 'auca'ategue co'ollaxa?
26Nache somaye 'enapeco':
'Am nta'a maye 'am ỹataxala', ne'ena 'aramaxashec namaye sa da'añiiguelo naua lchel, qaq ỹoqo'oye samaq so ỹamaxashec Sibá da ỹo'oolec so ilo 'ashena da yaqto' 'am seca'ategue, qalaxaye somaye aỹem ỹatenachet, 27qataq somaye aỹem ỹasaxalec na qauem la'aqtacpi da 'am da'aqtaxanem 'am nta'a. Qalaxaye 'am ỹataxala' maye 'am nta'a, qoneta'am ca nale piguem le'ec Ñim Nataxala', qaq ỹoqo'oye maiche cam aỹem qoneta'ac. 28Qataq aỹem saỹaten da 'enauac so sachegoxoguet ita'alpi, da ỹataqta 'itchiguiñi da qaỹalauat, qataq 'auauaachigui 'am nta'a. Qaq aỹem maye aỹem 'aramaxashec, qalaq aỹem 'aỹaxana co'ollaxa da yaqto' aỹem 'arquia'axaua da 'auque'e. Qaq aỹem ye qaica ca shenec, nache ¿negue'to' taxa ca lỹa seỹaxanaique?
29Nache so nta'a 'enapeco':
Nache tachiguiña na 'aua'axatpi. Aỹem mashe ime, da san da ỹa'aqtac da 'am qataq so Sibá, qancolaxachiigui qome ye na'alhua so Saúl.
30Qalaxaye so Mefiboset 'enapeco':
'Onaxaic taxa da 'aỹa'anem 'enauac ye 'alhua somaye. Cha'aye aỹem nacherata da saỹaten da qaica ca machaqca da qoneta, 'am qarta'a, qataq da 'onaxaic da 'arviraxac da 'anvireua'a na 'arma' lta'araic.
31Nataqa'en co'ollaxa so Barzilay maye Galaad le'ec, chegoqchiguiña co'ollaxa ye Rogelim da nnaictague' so nta'a, ivitta'a da ỹa'axasoxoolec naqa'en so tala Jordán. 32Qaq se'eso Barzilay somaye mashe ỹa'axaiquiolec, qataq ivi' soua ochenta vi'iye da nachaalaxataxac, qaq 'enauaque soua na'axa'te co'ollaq hueta'a ye Majanayin so nta'a, nache somaye ỹaata'am 'enauac na lhuenecpi so nta'a, cha'aye somaye ỹataqta sallaxanec. 33Nache so nta'a 'eetego' so Barzilay, 'eeta':
'Onaxaictoxo' da aỹem 'auca'ategue, da saxague da Jerusalén. Qaq aỹem maiche souapegue' qome 'enauac cam 'aueetaiquepi.
34Qalaxaye so Barzilay 'enapeco':
Aỹem mashe saqaỹarauec naua vi'iye da ñachaalataxac, ỹoqo'oye shaco' da 'am seca'ategue da saigue da Jerusalén. 35Cha'aye aỹem, mashe ivi' naua ochenta vi'iye da ñachaalataxac. Ỹoqo'oye mashe qallegueme da saỹateeta ca ỹaỹamaqchiguiñi, qataq ca sa ỹaỹamaxañi, qataq mashe sañanomeguet da lamaic ca sachec qataq ca ñeỹomgui, qataq mashe qallegueme da sa'axaỹa na lo'onecpi na 'onaxanaxaicpi, ỹalleppi qataq 'alpi. Qaq ỹoqo'oye, ¿Ta'ainec taxa da qaltaq aỹem 'aumelec da aỹem 'auqochetague', 'am nta'a? 36Qataq ¿ta'ainco' da 'auauotaique da 'auo'ot ca ñesheetenaguec 'am nta'a? Ye choche sauotaique da 'am ñenaictague' da 'aitague da le'ego so tala Jordán. 37Qaq nacherata da 'am ñachoxonnot da aỹem 'auasheeta qome da she'eguelaxa ye ima', yaqto' da seleu, nache huaña yemaye da aỹem qailaroigui añi nhuachiqui yeua ita'al. Qalaxaye 'am nta'a, 'am ño'onaxato'ot qome da ỹalec Quimán da yaqto' 'am ca'ategue, qaq damaye maicheye cam 'aỹa'anem da lo'onataxanaxac 'anqa'en.
38Nache so nta'a 'enapeco':
Aja', aỹem ca'ategue qome da Quimán, nache damaye sanem 'enauac cam ỹataqta 'auaỹamaxareeta da so'otec damaye. Qaq 'am sanem qome 'enauac ca 'auỹaxanaiquepi.
39Qaq nache 'enauac co'ollaxa so shiỹaxauapi qataq so nta'a ỹa'axasoxoolec so tala Jordán. Qaq co'ollaq ime, nache so nta'a ỹanem da no'on la'aqtac, ime nache ncoyeguene' so Barzilay qataq napigoxoi'. Huaña, nache so Barzilay ỹe'eguelaxa so lma'. 40Qaq so nta'a, nache jec da taỹa ye Gilgal, nnaictague' so Quimán, qataq 'enauac so alleppi Judá le'ecpi, qataq so laỹepi alleppi Israel le'ecpi. 41Qaq ỹoqo'oye 'enauac so Israel le'ecpi, taua'a co'ollaxa so nta'a, nache 'eeta':
¿Ta'ainco' na qarqaỹañicpi Judá le'ecpi da ỹataqta 'am namataxaalec, nache 'aua'axasoxoolec naqa'en so tala Jordán 'am nta'a, qataq na 'aỹa'alaqpi qataq 'enauac na 'analleppi? 42Nache so Judá le'ecpi, 'enapego' 'enauac so Israel le'ecpi, 'eeta':
¿Ta'ainco' ye qaualematai? Ye de'era nta'a, damaye maiche qaralamaxat qarhuo' le'ec, qataq saishet da choche qomi' iquia'axaata'ape, huo'otaq da huo'o ca choche qomi' ỹaatema da qanme. 43Nache so Israel le'ecpi, 'enapeco':
¿Ta'ainco' da ỹataqta qaica ca qomi' naiguilo qanqa'eñi? Ye qami' ñapagaqaleguete da ỹataqta qaralamaxat da nta'a David, cha'aye qomi' diez maye maiche qomi' nhuo' le'ecpi. Qataq qomi' qauca'achiỹaueeguelo da qoyaxa. Qataq qomi' hua'auchiyiñi caillaye da shenaqapega da ñe'eguelaxauo da nta'a.
Huaña nache so Judá le'ecpi, ỹataqta saicherapec so Israel le'ecpi.
