2 Samuel 23

₁Qaq 'ena na pa'atec la'aqtacpi so David, maye llalec so Yesé. Qaq 'era dam la'aqtac so ỹo'oxoraic maye 'onaxanaxaic ne'ena Israel, ỹale 'amaqtaqaic maye lca'aguishec Ñim Natamnaxala' so Jacob, 'eeta':

₈Qaq 'enaua naua le'enaqa'ate soua ỹataqta 'añaxaiqa, som nalleppi so David: Isboset, maye hacmoniita, nacheso so hua'auchiguiñi se'esoua tres maye ỹataqta 'añaxaiqa. Qaq huo'o so na'a'q, nache somaye ỹalauat so ochocientos ỹalleppi, irota'a aso lataquiaxai. ₉Qaq so ca'atalec somaye, le'enaxat da Eleazar, som llalec so Dodo som ahohiita, qaq somaye ỹalectaiguilo se'esoua tres maye ỹataqta 'añaxaiqa. Qaq somaye nnaictague' co'ollaxa so David, co'ollaq dataỹa'aguet so filisteopi, maye lapoota'at huaña ye Pasdamín da yaqto' nalat, qataq huaña co'ollaxa da so Israel le'ecpi datauec. ₁₀Qalaxaye somaye saishet da jec, nache ỹataqta qalota so ỹalauat so filisteopi, nache ivitta'a da donaỹa'aguet na lhuaq so lainec. Nache se'eso na'a'q, Ñim Nataxala' ỹanem da ỹataqta dauegaxan somaye, nache so alleppi ñe'eguelaxa co'ollaxa so Eleazar, nache itauan da deuotaxanec so logoxoshetpi so filisteopi. ₁₁Qaq so lỹa se'esoua tres 'añaxaiqa, le'enaxat Sama, som llalec so Agué, maye arariita. Qaq huo'o so na'a'q co'ollaq lapona't so filisteopi, huaña ye Lehí, maye huaña so nañiguishec lenteja, qaq so alleppi Israel le'ecpi datauec co'ollaxa. ₁₂Qalaxaye so Sama, nache hueta'a co'ollaxa se'eso nañiguishec lma', nache delogui' so filisteopi ivitta'a da nmatchiguiñi. Qaq Ñim Nataxala' nache ỹanem da ỹataqta dauegaxan co'ollaxa somaye. ₁₃Qataq huo'o so na'a'q, maye huetoigui da qanqattac ana ala na nañiguishec, nache se'esoua tres se'eso treinta 'añaxaicpi, taỹa co'ollaxa so auac ye Adulán, maye hueta'a co'ollaxa so David. Qaq so alleppi filisteopi hueta'a co'ollaxa ye ca'amapega't ye Refayin. ₁₄Qaq so David, nache netaigui co'ollaxa so ñe'eguenaxaqui, qaq ye Belén nache naña so lauanaxanaqa' so alleppi filisteopi. ₁₅Qaq so David ye ỹataqta huo'o co'ollaxa na laquip, nache 'eeta':

«¡Daiyaxa da huo'o ca aỹem ỹanem ca ỹaquip 'etaxat maye chegaqangui añi ñi'illoxoqui maye naña ye ñegueuo ye Belén!» ₁₆Nache se'esoua tres 'añaxaiqa, inoxotraua'a co'ollaxa se'eso lanataqa' so filisteopi, nache nqatshegue'm so 'etaxat maye le'ec asa'aso ñi'illoxoqui maye naña ye ñegueuo ye Belén, nache qairouga so David. Qalaxaye somaye saishet da nỹomgui, nacherata da icorec, ỹanot Ñim Nataxala' da lachetaqtaxanaxat se'eso 'etaxat, ₁₇nache 'eeta': «¡Ñim Nataxala', aỹem ntelaqna'aguet qome da ñeỹomgui ne'ena 'etaxat! ¡Ten qom 'eco' ñeỹomgui na ltago'q ne'enaua ỹale't maye saire'n da nachaalataxac, souaxat da ỹe'eguenaua'alo ne'ena 'etaxat!» Nache somaye saishet da nỹomgui. Qaq 'era da ỹo'o't co'ollaxa se'esoua tres 'añaxaiqa. ₁₈Qaq so Abisay, maye lqaỹa so Joab, qataq llalec aso Seruyá, somaye lataxala' so treinta 'añaxaicpi. Qaq somaye ỹalauat co'ollaxa so trescientos ỹalleppi, irota'a aso lataquiaxai, qaq 'era da 'eetec da ỹo'oxoraq somaye da ỹalectaiguilo se'esoua treinta. ₁₉Qaq somaye nacheso so ỹataqta qaỹo'oxoreetac, da ỹalectaiguilo se'esoua treinta, ỹoqo'oye qoỹanagui da lataxala' somayepi. Qalaxaye saishet da 'eeta'ama se'esoua tres maye hua'auchiyiñi. ₂₀Qaq so Benaías, som llalec so Joyadá, maye lma' ye Cabsel, somaye nataqa'en 'añaxaic, qataq qalota na ỹo'otpi co'ollaxa. Qataq ỹalaua't soua dos llalqa so Ariel, som 'añaxaiqa maye lma't ye Moab, qataq huo'o so na'a'q co'ollaq nactañi aso aloñi, nache somaye tañigui so auac, nache ỹalauat so llon. ₂₁Somaye nataqa'en ỹalauat so 'oonolec Egipto le'ec maye ỹataqta logoraic. Qaq se'eso Egipto le'ec, nasoqta'a co'ollaxa aso lataquiaxai, qaq so Benaías qalaq nasoqta'a so qo'oipaq, qaq nacheso so irolec somaye da iuaxan. Nache deuotaxanec aso lataquiaxai se'eso Egipto le'ec, ime nache irolec asomaye da ỹalauat. ₂₂Qaq 'era da ỹo'ot so Benaías, som llalec so Joyadá, ỹoqo'oye huo'o da llo'oxoyec da ỹalectaigui se'eso treinta 'añaxaicpi, ₂₃qataq napacalec da llo'oxoyec somayepi, qalaxaye saishet da 'eeta'ama se'esoua tres maye hua'auchiyiñi. Nache so David, ỹanagui da lataxala' so nalleppi maye nhuataxaua somaye da nta'a. ₂₄Qaq so ỹalectaigui co'ollaxa se'eso treinta 'añaxaicpi: Asael, maye lqaỹa so Joab, qataq so Eljanán, som llalec so Dodo maye Belén le'ec. ₂₅Qataq so Sama, som Jarod le'ec, qataq so Elica maye nataqa'en Jarod le'ec. ₂₆Qataq so Heles, som paltiita, qataq so Ira, som llalec so Iques, maye Tecoa le'ec. ₂₇Qataq so Abiezer, maye Anatot le'ec, Sibecay, maye Husah le'ec, ₂₈qataq so Salmón, som ahohiita, qataq so Maray, maye Netofa le'ec, ₂₉qataq so Jéled, som llalec so Baná, maye nataqa'en Netofa le'ec, qataq so Ilay, som llalec so Ribay, maye lma' ye Gabaa, maye huaigui ye na'alhua so Benjamín, ₃₀qataq so Benaía, maye Piratón le'ec, qataq so Juray, maye lma' ye la'auaxac ye Gaas, ₃₁qataq so Abí Albón, som arbatiita, qataq so Azmavet maye lma' ye Bajurín, ₃₂qataq so Elijaba, som salboniita, qataq so Jasén som llalec so Jonatán, ₃₃qataq so Sama, som arariita, qataq so Ahíam, som llalec so Sarar, maye nataqa'en arariita, ₃₄qataq so Elifelet, som llalec so Ajasbay maye llalec so Macá, qataq so Elián, som llalec so Ajitofel, maye lma' ye Gilo, ₃₅qataq so Jesray, maye lma' ye Carmel, qataq so Paray, som arbiita, ₃₆qataq so Igal, som llalec so Natán, maye lma' ye Soba, qataq so Bani, maye Gad le'ec, ₃₇qataq so Selec, som Amón le'ec, qataq so Najaray, som Berot le'ec, som ltaua so Joab, maye llalec aso Seruyá, ₃₈qataq so Irá, som Jatir le'ec, qataq so Gareb, maye nataqa'en Jatir le'ec, ₃₉qataq so Urías, som hitiita. Qaq da ima'a't somayepi, nache ivi' treinta y siete.