1Qaq so Isboset som llalec so Saúl, co'ollaq ỹaỹaten da ileu so Abner huaña ye Hebrón. Nache qaica ca la'añaxac qataq 'enauac so netaña ye Israel ỹataqta ñi'i. 2Qaq so Isboset huo'oi co'ollaxa soua dos lamaxa'she, maye lataxala'ate se'eso na'atchiguiñi cachaxaicpi. Qaq so 'oonolec le'enaxat Baná, qaq so lỹa Recab, qaq soomaye llalqa so Rimón, maye lma' ye Berot, qataq chegoxogueta so maiche lalamaxat lauo' le'ecpi so Benjamín, cha'aye se'eso 'alhua Berot somaye lalamaxat so Benjamín, 3qaq so lma' ye Berot co'ollaq datauec, nache taỹa ye Guitayin, qaq somayepi ye choche chegaqauec, nache chochaq ivitta'a nagui da netaña yemaye. 4Qaq so Jonatán, huo'o co'ollaxa so llalec le'enaxat Mefiboset, somaye sara'añiiguelo naua lchel, cha'aye somaye co'ollaq mashe ivi' soua cinco vi'iye da nachaalataxac, nache nvi' co'ollaxa da na'axaỹaxac da ileu' so Saúl qataq so Jonatán hueraña ye Jezrel, nache aso 'alo maye ilotague' somaye, huo'o da lcolanaxa nache datauec ỹache so Mefiboset, qaq souaxat da lỹalaxa asomaye, nache ỹetauec co'ollaxa, nache chegoqta'a da sara'añiiguelo naua lchel somaye. 5Nache soua Recab qataq so Baná, som llalqa so Rimón maye lma' ye Berot, taỹalo co'ollaxa so lma' so Isboset, nache ivildeuo so laiñi so na'a'q maye ỹataqta quia'aq so ntap, ỹoqo'oye somaye do'ocheta. 6Qaq aso lasom lo'o, asomaye ichegoqtac co'ollaxa so trigo qalaxaye do'ochaañi, ỹoqo'oye so Recab qataq so lqaỹa Baná saishet da qananomalo co'ollaxa da pa'areuo. 7Qaq co'ollaq pa'areuo, nache so Isboset do'ocheta huetalec so lmala', nache soomaye ỹalaua't qataq ipeleguec so lqaic nache ỹache', nache palom da quete' petrañi quetreueegue so nqa'aic maye taỹa'a ye Arabá, 8ỹacheta'ape so lqaic so Isboset. Qaq co'ollaq ivitra ye Hebrón, nache ỹanem so David, so lqaic so Isboset, nache 'eeta':
«Nagui, hua'aqchigui da ỹa'aqtac Ñim Nataxala' maye ỹataqta aỹem nqateeguesop 'enauac na qauemsat. 10Qaq de'era sheetec se'eso shiỹaxaua maye aỹem ndoua'a co'ollaxa da ỹa'axaỹaxac da ileu so Saúl, somaye ipi'itaxana da aỹem ndoua'a da 'onaxaic ỹa'axaỹaxac, qalaxaye aỹem saconeua'a somaye co'ollaxa nache salauat, huaña ye Siclag. 11¡Qaq ỹoqo'oye nagui qami' qauemaiqa, nache qami' sheeteque de'era nataqa'en, cha'aye qaualauache so shiỹaxaua maye qaica ca lasouaxashet, qataq do'ocheta co'ollaxa huetaigui so maiche lma'! Qaq ỹoqo'oye sepalaique lvi' da l-leuaxa somaye, nache ỹataqta qami' pa'l ñaqa'en ana'ana 'alhua.» 12Nache so David sa ỹaỹaloxon da ỹamaq so nalleppi, da yaqto' ỹalaua't soomaye, nache qaicheguerec naua lhua'q qataq naua lapia'ate. Nache qaicoñeldasheguemeque aso laỹe' na 'etaxat ye Hebrón. Ime, nache qaỹacona so lqaic so Isboset, nache qailaroigui aso nhuachiqui so Abner maye naña ye Hebrón.
