Ñim Lo'onatac 'Enauacna ỹachaxanapecot da nqouagaxa so David
1Qaq so David co'ollaq mashe netaigui so lma' lta'araic, qataq Ñim Nataxala' mashe nmane' naqa'en somaye 'enauac so mpa'aguenaxauapi maye lauoreuapi, 2nache so nta'a David 'enapego' so Natán, som la'aqtaxanaxanec Ñim Lo'onatac 'Enauacna, 'eeta':
Ña 'aumeten aỹem, mashe sootaigui na nỹec maye no'onataxat ana qo'oipaq cedro, qaq añi arca maye laỹe' naua lqataxaco Ñim Lo'onatac 'Enauacna qalaq ñaq netaigui ñi npe'lolec. 3Nache so Natán, 'enapeco':
Qomye 'auo'ot qome 'enauac na tatapigui 'arhuel da 'auo'ot, cha'aye Ñim Nataxala' 'am hueta'aguet. 4Qalaxaye se'eso pe, Ñim Nataxala' nachaxana so Natán, nache 'enapega 'eeta': 5«'Anqo'ona qome ñi ỹamaxashec David, nache 'aua'aqtaxanem, qoneta': Ñim Nataxala', 'eeta': ‹¿Peta'a nache 'amo' da 'ano'oxoosheguem ca nỹec da yaqto' sootaigui? 6Cha'aye nache chegoqta'a so na'a'q co'ollaq ca'ai ñaqa'en ye Egipto na Israel le'ecpi, nache ivitta'a nagui da saishet da sootaigui ca nỹec, nacherata da sootaigui naxa na npe'lolec. 7Qataq 'enauaque soua na'axa'te da ñenaictague' namayepi, qalaq saishet da seỹaxanot na lataxala'pi na maiche nalamaxat nhuo' le'ecpi, maye sanem co'ollaxa da ilo'ogue na Israel le'ecpi da ỹo'ot ca ima', maye chegaqaigui na qo'oipaq cedro.› 8Ỹoqo'oye qonapega qome ñi ỹamaxashec David, da Aỹem Nataxala' maye Qaica ca Seqalanapec, da ỹa'aqtac 'eeta': ‹Aỹem, 'am sachegoxottelec co'ollaxa aso nlo qaguetapi maye 'aulotague', da yaqto' 'am sanagui da lataxala' ñaqa'en na ỹalamaxat nhuo' Israel le'ecpi, 9qataq nache 'am ñenaictague' 'enauac na 'ecỹaxacpi, qataq ñematchiguiñi 'enauac so 'ampa'aguenaxauapi, qataq 'am sanem da ỹataqta lta'araic da 'ayo'oxoyec, 'eeta'am ñaqa'en so 'amaqtaqaicpi ana 'alhua. 10Nataqa'en sauo'o qome ca lalamaxat lma' na ỹalamaxat nhuo' Israel le'ecpi, nache sanaña camaye nache qaica ca iraxaatapigui' qome, qataq ca qauemaicpi da huo'otaq saỹalemaxat da 'eeta'am co'ollaxa da sa iyacnapec namayepi, 11co'ollaq cheta'ague da sauo'o so lataxala'pi maye nmit na nasouaxashet da ilo'ogue ne'ena ỹalamaxat nhuo' Israel le'ecpi. Qaq nagui so'ot da 'am 'anmateeguesop na 'ampa'aguenaxauapi, qataq 'am sa'aqtaxanem da sanem qome ca 'aỹa'alaqpi da nta'alpi. 12Qaq qom ivita da 'aleu, nache de'era 'aro'onataxanaxac talec ñaqa'en qome ca 'oonolec na 'aỹa'alaqpi da yaqto' ilo'ogue de'era no'onataxanaxac da nta'a. 13Nache camaye nacheca qome ca no'oxoosheguem que'eca nỹec da yaqto' huaña da Aỹem qanatamnot, qaq camaye sanagui da nache 'eetai' qome da nta'a. 14Qaq camaye nache Aỹem lta'a, qataq camaye ỹataqta ỹalamaxat ỹalec. Ỹoqo'oye camaye da huo'o ca lsomaxac, nache Aỹem seuaxan qataq salashen, sheeta'am ca camachaqca nta'a da ỹauota'a ca lalashenaxanaxat da iuaxan, qataq ỹalashen ca llalec. 15Qalaxaye camaye saishet da ca'ai ñaqa'en da ỹauotaxanaqtaic, da 'eeta'am co'ollaq sheca'ai so Saúl, nache 'am sanagui da lo'onataxanaxac. 16Na 'aỹa'alaqpi, qataq da 'aro'onataxanaxac da 'am nta'a, damaye nache 'eetai' qome. Qataq aca 'anso'onaxaqui da 'am nta'a, qaica ca iraxanapigui'.›» 17Nache so Natán ỹataqta ipacchigui da da'aqtaxanem so David, 'enauac de'era lauanaqchec qataq la'axaỹaqchec. 18Nache so nta'a David, taua'a so lanataqa' Ñim Nataxala', nache 'enapego' Ñimaye, 'eeta':
«'Am Nataxala', ¿negue'to' aỹem, qataq na ỹalaqpi da aỹem 'anviraxatta'a ne'ena? 19¡Qataq 'eeta'amo' da qaica ca la'amaqchec de'era qonapec 'Am Nataxala', cha'aye nataqa'en 'aua'axata'a da lo'onataxanaxac qome na llalaqpi ne'ena 'aramaxashec! ¡'Am Nataxala', ỹataqta qaica ca ishet da 'eetec de'era na shiỹaxauapi! 20Qaq ¿negue'tom ca lỹa da 'am sa'aqtaxanem 'Am Nataxala', ye ỹataqta 'auauattoota ne'ena 'aramaxashec? 21Qaq 'enauac na 'auo'otpi maye qaica ca 'ena'am da llo'oxoyec, namaye maiche 'auachaxanapec co'ollaxa, qataq maiche 'arhuennataxa da 'auachaxana ne'ena 'aramaxashec da yaqto' ỹauatton. 22¡Qaq ỹoqo'oye 'Am Ỹataxala', ỹataqta qaica ca 'eeta'am da 'ara'amaqchec! Cha'aye qaica ca lỹa atamnaxala', da 'Am 'eeta'am da sa'axasoqteguelec naxa da qaỹa'axattac. 23Qataq qaica ca 'eeta'am ne'ena 'aralamaxat nhuo' le'ecpi, cha'aye ne'ena Israel le'ecpi, namaye nachenata ana'ana 'alhua. Qataq nache 'Am co'ollaxa da 'anqatec namayepi da yaqto' 'auauo'o 'aralamaxatpi, qataq ỹataqta ỹo'oxoraq 'anqa'en souaxat da ỹataqta lta'araic na 'auo'otecpi maye qaica ca 'ena'am da llo'oxoyec. Qataq ỹauaachigui 'anqa'en co'ollaxa ne'ena 'aralamaxatpi maye 'anqateeguesop ye Egipto, da 'auamaqauec so ỹotta'a't shiỹaxauapi qataq so natamnaxala'pi. 24Cha'aye 'Am, 'auauotaique da nache 'eetai' da 'aralamaxat ne'ena Israel le'ecpi, qaq 'Am Nataxala', nache 'Am da Natamnaxala' namayepi. 25Qaq ỹoqo'oye 'Am Nataxala' maye Atamnaxala', 'aupacchigui qome da 'auachaxanapeguem ne'ena 'aramaxashec, qataq cam chegoxoguetpi, nache ỹataqta 'aupactelec qome da 'ara'aqtac. 26¡Yaqto' nache 'eetai' qome da la'amaqchec da 'are'enaxat, qataq da yaqto' qoỹeeta': Ñim Nataxala' maye Qaica ca Ỹaqalanapec, nacheñi Ñim Natamnaxala' na Israel le'ecpi! ¡Qaq da lo'onataxanaxac da nta'a ne'ena 'aramaxashec David qataq na llalaqpi, nache 'eetai' qome 'anqa'en! 27Cha'aye 'Am Nataxala' maye Qaica ca 'Auqalanapec, ye mashe aỹem 'auaỹaanaxanaxanec da nache 'eetai' qome 'anqa'en da ỹo'onataxanaxac da aỹem nta'a, qataq na ỹalaqpi, qaq ỹoqo'oye nagui ne'ena 'aramaxashec, 'am ỹanot da nachoxonnaxac. 28'Am Nataxala' maye Atamnaxala', naua 'ara'aqtaqa ỹataqta 'eesora, cha'aye 'auachaxanapecot da 'arqouagaxanaqtaic ne'ena 'aramaxashec. 29Ỹataqta talec 'anqa'en qome da 'arqouagaxanaqtaic na llalaqpi ne'ena 'aramaxashec, qataq nache 'eetai' 'anqa'en da 'artelaqtaxanaqtaic. Cha'aye 'Am Nataxala' maye Atamnaxala', maiche 'ara'aqtac co'ollaxa, da nache 'eetai' da huetalec 'anqa'en da 'arqouagaxanaqtaic na llalaqpi ne'ena 'aramaxashec.»
