1Qaq co'ollaq mashe qaỹoqteguelo soua na'axa'te, nache so David loxonec co'ollaxa so filisteopi nache ỹacona da lo'onataxanaxac, qataq deuotaxanec ye 'alhua Méteg Amá. 2Nataqa'en loxonec co'ollaxa so moabiitapi, nache nqapaxaata'aguet naqa'en na 'alhua somayepi, da yaqto' ỹauo'o so laloqnaxanaxat, nache nam nalochiguilo soua dos se'eso naloqnaxanaxat nache qaỹalaua't. Qaq nam naloteguet so 'oonolec somaye nache nca'altauec qanqa'en. Huaña nache so David, ỹauo'o l-latacpi co'ollaxa se'eso moabiitapi, qataq desheetenaxaatac naqa'en somayepi. 3Qaq David nataqa'en loxonec co'ollaxa so Hadad Ezer, som llalec so Rejob, maye nta'a ye Soba, co'ollaq somaye taỹa'a da yaqto' ñe'eguelaxaala't ye 'alhua maye sa qaỹapeque ye tala Éufrates. 4Nache so David, loxonec co'ollaxa so mil setecientos alleppi maye netalec so caipi, qataq veinte mil so petañepi, qataq ỹacagaxat co'ollaxa na lapia'pi so caipi maye ỹauecta'aguet aso alaataxaquipi laigonapi, qalaxaye qalota so no'onaxatañipi da yaqto' ỹaueca'aguet aso cien laigonapi. 5Nataqa'en anac co'ollaxa so siiriopi maye lma' ye Damasco da yaqto' itauan so Hadad Ezer maye nta'a ye Soba, qalaxaye so David nataqa'en loxonec co'ollaxa se'eso siiriopi, nache ỹalauat so veintidós mil alleppi. 6Nache so David ỹanaña ye Siria yem huaña ye 'alhua Damasco so laỹe nalleppi maye lauanaxanaxanecpi, qaq so David ilo'ogue co'ollaxa so netaña ye Siria, nache desheetenaxaatac naqa'en somayepi. Nache Ñim Nataxala' ỹanem so David da loxonec naqa'en 'enauac so mpa'aguenaxauapi. 7Ime, nache so David ỹacona aso npaqtaxanaqtepi oro, maye ỹachetac so lamaxashecpi so Hadad Ezer, nache ira'a ye Jerusalén. 8Nataqa'en ỹacona so qalota lcat bronce maye huetaña so huaqta'a't nỹecpi ye Betaj qataq ye Berotay, maye huaigui ye na'alhua so Hadad Ezer. 9Qaq so Toy, maye nta'a ye Jamat co'ollaq la'axaỹaxac da so David loxonec so nalleppi so Hadad Ezer, 10nache ỹamaq so llalec Jorán, da ỹache so la'agaxanaxat lcat plata, oro qataq bronce, qataq da lquinaxanaxac maye ỹamaxa so nta'a David, souaxat da deloctague', qataq loxonec co'ollaxa so Hadad Ezer, cha'aye so Toy, nataqa'en mashe deloctague' co'ollaxa somaye. 11Qaq so David, ỹanot co'ollaxa Ñim Nataxala' se'eso nogoxoshetpi, 'eeta'am co'ollaq ỹaneuo so oro, plata maye chegaqa'a so laỹepi ỹotta'a't shiỹaxauapi maye loxonecpi co'ollaxa, 'eeta'am ye: 12Edom, Moab, Amón, filisteopi, qataq so amaleciitapi. Nataqa'en ỹaneuo so lhuotaxanaxat co'ollaq nhuo' so Hadad Ezer, maye llalec so Rejob maye nta'a ye Soba. 13Huaña nache nquiguec da llo'oxoyec so David, lamaaxa co'ollaq loxonec so dieciocho mil edomiitapi, huaña ye ca'amapega't 'alhua maye huaña na toue. 14Ime, nache ỹanaña co'ollaxa so nalleppi ye Edom, qaq so edomiitapi qalaq datalec co'ollaxa so David. Nache Ñim Nataxala' ỹanem co'ollaxa da qalota so loxonecpi somaye da huo'o na taỹa 'alhua.
15Nache so David ilo'ogue co'ollaxa 'enauac ye Israel, qataq ỹo'otec da ỹaỹamaqchiguiñi 'enauac se'eso nhuo' le'ecpi. 16Qaq so Joab, maye llalec aso Seruyá, nache lataxala' so nalleppi somaye, qaq so Josafat maye llalec so Ajilud, nache leraxanaxanec co'ollaxa so nta'a. 17Qaq so Sadoc, som llalec so Ajitob qataq so Ajimélec, som llalec so Abiatar, soomaye ntaxaỹaxanaxanqa co'ollaxa, qaq so Seraías, nache neraxanaxanec. 18Qaq so Benaías, som llalec so Joyadá, ilotague' co'ollaxa so huataxanaqpi quereteopi qataq peleteopi. Qaq so llalaqpi so David nacheso so ntaxaỹaxanaxanecpi.
