1Qom qaltaq ñe'eguelaq So Qarataxala' Jesucristo, nache qomi' sataxaguet Somaye. Qaq ỹoqo'oye nagui qami' ñachoxorenaqtoiguilo, 2da saishet qome da qalhuotta'a da qaỹashaxanec da qarhuennataxaqui, qataq saishet da qami' icolanaqche't da huo'o ca 'eetega da mashe ivita ca laloqo' da ñe'eguelaq So Qarataxala'. Cha'aye saiuena'a da huo'o ca datenataxan da 'eetega ỹa'aqtaxanaxan So Saqcha'a Na'añaxac, huo'otaq da 'eetega da qarapaxaguenataxanaxac, huo'otaq da seraqtalec ana qorere de'era. 3Saishet da qanashiñiiuo da huo'o ca qami' ỹatenache't. Cha'aye que'eca na'a'q saishet da ivita da saxanaxa da nachaxan na ipa'agueetacpi Ñim Lo'onatac 'Enauacna qataq da nchoxot da dataỹa'aguet Ñimaye qataq da huetoigui da nachaañi que'eca ỹale qauemaic cam taỹa'a da qailaxachigui. 4Que'eca ỹale ỹataqta npa'aguene' Ñim Lo'onatac 'Enauacna qataq ivira'a 'enauac nam qoỹanot Ñimaye. Ivira'a da naña naqa'en ca nso'onqa' añi no'onaxanaxaqui late'erai da qaỹo'oxoren Ñim Lo'onatac 'Enauacna, qataq camaye huotaique da qanatameetacot da 'ena'am Ñim Lo'onatac 'Enauacna.
5Qantooñita'ac de'era da mashe qami' sa'aqtaxaateguema caillaye qami' soota'agueta. 6Qami' qauaỹaañita dam nqanaxattac que'eca ỹale qauemaic da huo'omshe sa nachaxan nagui, da saxanaxa da ivita ca laloqo'. 7Cha'aye de'era 'eetapeguec maye saqcha'a, damaye mashe huo'o nagui; nachaqrata da saxanaxa da qanqateeguesop nam nqanaxattac que'eca ỹale. 8Huaña qome, nache nachaxan que'eca ỹale qauemaic, nache So Qarataxala' Jesús ilaxachigui camaye, irolec na la'at qom ncosaueegue da iquetetot camaye qom nvi' da nactaigui da llo'oxoyec. 9Da lviraxac que'eca 'etaxaloxoic nactaigui da ltaunaxanaxac so pa'aguenataxanaxaic, nache da lviraxac ỹataqta lta'araic da la'añaxac, ỹo'ot na na'anec qataq ỹo'ot na sa qaỹauanapega. 10Do'onataxana 'enauac na ỹotta'a't sa ỹaỹamaxañisat da choche ỹatenachet na shiỹaxauapi maye taỹa'a da nhuaxanaguec choche tatec, cha'aye mashe saishet da ỹaconeguet da 'eesa lataxac maye chegaqaigui da nca'alaxa. 11Ỹoqo'oye Ñim Lo'onatac 'Enauacna hua'axaỹa'a namayepi da quegue da nsomaxac, yaqto' ỹa'amaqten da choche natenataxanaxac. 12Yaqto' ỹataqta lta'araic da nhuaxanaguec 'enauac nam saishet da ỹa'amaqten da 'eesa lataxac. Chaqrata da nqopita na sa ỹaỹamaxañisat.
Da lataxac na ỹa'amaqten So Jesús
13Qalaxaye qomi' nache 'eetai' da sanaqtacot da qana'achecỹaxac Ñim Lo'onatac 'Enauacna souaxat da qoñiita, Ñimaye qami' ỹauoteque qataq qami' lca'agui'she, nache 'eetai' da chegoqta'ague co'ollaq saxanaqca 'enauacna yaqto' qanca'alliueeguesop de'era lhuaxanaxanaxac. Qami' lca'agui'she, ỹachegoxotchigui So Saqcha'a Na'añaxac da qami' iỹotaugalo da ỹauo'oi qami' lalamaqa'ate, cha'aye souaxat da qauacoñiiguet da no'on na'axaỹaxac. 14Ñim Lo'onatac 'Enauacna qami' iỹaxanalo, ỹachegoxotchigui da no'on na'axaỹaxac maye qami' sa'aqtaxanaqteguema, yaqto' qanhuañiỹaua'a da la'añaxac qataq da llo'oxoyec So Qarataxala' Jesucristo.
15Qaq ỹoqo'oye qami' qarqaỹa't, saqco' qome ca qauqochiỹa, qoquiito'ot qome da qanaquitaxaqui Ñim Lo'onatac 'Enauacna qataq saishet da qaucoviỹa'ai da qarapaxaguenataxanaxac naxa da qami' souaqta'agueta huo'otaq na huetalec ana qorere maye qami' samaxasoqtegalo. 16Ñim Lo'onatac 'Enauacna maye Qarta'a, Ñimaye soxoraic; ỹoqo'oye qomi' ỹauoteque, nache qomi' ỹanema da chochaq tatec qaramaicỹaxac qataq da ỹataqta 'eesa da ñeca'alaxauec. Ñimaye qataq So Qarataxala' Jesucristo seỹaxanoto, 17da ỹa'añaqchet da qarquiyaqteỹaxaqui, qaq damaye yo'oq chegoqchiguilo naua no'o'n qara'aqtaqalli' qataq nam qauo'oche'.
