So Pablo qataq so Bernabé huetra'a ye Iconio
1Co'ollaq so Pablo qataq so Bernabé ivilda ye nỹecpi ye Iconio, nache soomaye nqo'ooreua'a aso napaxaguenaxaqui na judiopi. Huaña, nache ỹa'axattrac So Jesús da'aqtaxaatrapeguem na shiỹaxauapi. Nache ỹataqta qalota na da'amqaanataxan nam judiopi, qataq ivira'a nam saq judiopi. 2Qalaxaye nam judiopi maye sa ỹa'amaqten So Jesús, namayepi inogoqchet nam saq judiopi, da yaqto' namayepi dataỹa'aguet nam ca'attague' So Jesús. 3Qaq so Pablo qataq so Bernabé huera'a ye Iconio ỹataqta huo'oi soua na'axa'te. Ỹataqta ỹauo'o da naquitaxa'c Ñim Lo'onatac 'Enauacna, nache ỹataqta da'aqtaxaatrem na shiỹaxauapi da 'eesa lauotaxanaqtaic Ñimaye. Qaq Ñim Qarataxala' ỹanema da la'añaxa'c da ỹo'o't nam sa qaỹauanapega qataq nam ỹo'ot da na'aalaxa, yaqto' na shiỹaxauapi ỹa'amaqten 'enauac nam la'aqtaxanaxa'c soomaye. 4Qalaxaye nam shiỹaxauapi maye netaña ye Iconio, namayepi sa ỹaỹaten ca 'eetec, qaq ỹoqo'oye huo'o na itauaatac na judiopi, qataq huo'o na itauaatac so Pablo qataq so Bernabé. 5Nache nam judiopi qataq nam saq judiopi naỹamaxate' na lta'alpi ye Iconio da qaitaxaỹapiguilo soomaye, da yaqto' sa qaỹalemaxa't qataq da qaỹalaua't da qaira'a na coma'. 6Qalaxaye so Pablo qataq so Bernabé co'ollaq la'axaỹaxa'c de'era, nache soomaye naneltaxa'n, taregue da Listra qataq Derbe, yeemaye nache huaiguilo ye 'alhua Licaonia. Nache coleetrapeguelec 'enauac yi'iye 'alhua. 7Huaña yemaye, nache qaltaq ỹa'axattrac da no'on na'axaỹaxac.
Qaỹasaq na coma' so Pablo huaña ye Listra
8Qaq ye Listra, nache hueta'a so ỹale saishet da queuoỹapigui'. Qaq somaye nso'ootañi, cha'aye nacte' da saq piguiñi, nache ỹataqta sa nauane' da queuotapigui'. 9Qaq se'eso ỹale co'ollaq na'axaỹaxaatega da la'aqtaxanaxac so Pablo. Nache so Pablo co'ollaq ỹamato'ot somaye, nache ila'a da ỹataqta huo'o da lpi'iỹaxac da qanataren. 10Nache ỹataqta nlamaxaren da 'enapega, 'eeta':
–'Anachaañi, nache 'auqueuoỹapigui'.
Nache se'eso ỹale nparenaxaasheguem da nachaañi, nache queuoỹapigui'. 11Nache co'ollaq ỹauaachigui de'era ỹo'ot so Pablo na shiỹaxauapi, nache ỹa'alqagui, ỹauota'aisalo naua la'aqtaqa nam Licaonia le'ecpi, 'eeta':
–¡Ỹataqta nmerañi daua 'eeta'ama ca chegoqrashegue'm 'añaxaiqa!
12Nache so Bernabé qoỹeetego' da nacheso so chegaqasheguem 'añaxaic le'enaxat Zeus, qaq so Pablo qoỹeetega da nacheso so chegaqasheguem 'añaxaic le'enaxat Hermas, cha'aye somaye nacheso so detaqtac. 13Qaq ỹoqo'oye so ilotague' aca ño'oxonnataxanaxaqui da qaỹo'oxoren cam 'añaxaic le'enaxat Zeus, maye naña cam ñegueuo se'eso nỹecpi, somaye nauectrauo soua huaca lhuaraiqa qataq ndouo ana lauoxo ana nañiguishe. Nache somaye qataq 'enauac na shiỹaxauapi huotaique da natamnoto so Pablo qataq so Bernabé, nache ỹalaua't soua huaca lhuaraiqa da ỹavigaxa't da ỹauo'o lachetaqtaxanaqte. 14Qalaxaye soua Jesús lamaxa'she Bernabé qataq Pablo co'ollaq nomalo de'era, nache soomaye ncolaxata'aisalo naua alogo, da ỹachaxa'n da lqaigaqa' dam ỹo'ot nam shiỹaxauapi. Ime, nache tayingui na laiñi, nache ỹa'alaqtai'salo, 'eetra':
15–¡Qami' ỹalleppi! ¿Ta'ainco' ye nache qoñiitec de'era? Qomi' nache qami' shenaqta'ama, choche qomi' shiỹaxau'. Qalaxaye nachera da huo'omshe ñanaguenaq da qami' shenaqapegalo da qaỹa'axañiiuec na chochena qaica ca naigui, nache qoquiigue Ñim Lo'onatac 'Enauacna maye nca'altauec, qataq lo'onatac na piguem, 'alhua, auaxai qataq 'enauac na huetalecna. 16Soua lỹa't na'axa'te Ñim Lo'onatac 'Enauacna hua'aqta'a na shiỹaxauapi, da yaqto' maiche ỹoiqueetac ca llecỹaxac. 17Qalaxaye ñaqaiyeta Ñimaye ỹataqta qomi' nachaxaatalo, da qomi' ỹo'oteque da ỹaỹamaqchiguiñi, da qomi' namaxalo na auot, qataq 'onaxaic naqa'en na qorañiguishec, qataq sa qoue naqa'en na qonoq, da yaqto' samaqchiguiñi.
18Qaq na'aictaxa da 'enapec de'era so Bernabé qataq so Pablo, qalaxaye ñaqaiyeta saishet da ỹañoxo't da nhuogaxa so shiỹaxauapi da yaqto' saishet da ỹalaua't soua huaca da ỹaareuo da natamnoto soomaye.
19Qalaxaye huo'oi soua nvildeuo judío lashe', chegoqra'ague da Antioquía qataq da Iconio. Nache soomaye ỹañoxo't da ỹayen so shiỹaxauapi, da yaqto' qanpa'aguene' so Pablo. Nache somayepi ỹasaq na coma' somaye, nache co'ollaq qaipettega da mashe ileu, nache qaỹauogonnaueegue da laỹe so nỹecpi. 20Qalaxaye so 'amqaanataxanaxaicpi co'ollaq qalaponeua'a so Pablo, nache somaye ñesheguem, nache qaltaq taua'a so nỹecpi. Qaq so lỹa na'a'q, nache jec, lỹatac so Bernabé da taregue da Derbe.
21So Pablo qataq Bernabé ỹa'axatta'ape da no'on na'axaỹaxac huetra'a ye Derbe, nache ỹataqta qalota na shiỹaxauapi na ỹa'amaqten So Jesús. Ime, nache soomaye ỹe'eguelaxaregue da Listra, qataq Iconio qataq ye Antioquía. 22Nache soomaye ỹataqta huaqattrega na 'amqaanataxanaxaicpi maye netaleguete ne'enaua 'aleu', da yaqto' ỹataqta na'añaxatec da lpi'iỹaxac So Jesús. Qataq nataqa'en 'ena'apo' soomaye: Iuen da hua'auñi da huo'o da qanque'eenaxac da yaqto' senoxonaxaua'a da lo'onataxanaxac Ñim Lo'onatac 'Enauacna. 23Qataq 'enauac nam hueta'a na 'amqaanataxanaxaicpi, so Pablo qataq so Bernabé, ỹauo'o na lataxala'pi, yaqto' itauaatac namayepi. Qaq da ime da nqouagaxaunaxa'c qataq da nqouaqchetaxa'c, nache ỹashel-lec somayepi, nache iỹaxaatracot Ñim Lo'onatac 'Enauacna da itaua'n, cha'aye somayepi ỹa'amaqten So Jesús.
So Pablo qataq so Bernabé ỹe'eguelaxaregue da Antioquía maye huaigui ye 'alhua Siria
24So Pablo qataq so Bernabé quetro'ot da lqueuoxo'c, nache taarelec ye 'alhua Pisidia, choche ivittra'a ye 'alhua Panfilia. 25Huaña, nache ỹa'axattrac da no'on na'axaỹaxac, ỹa'auaxaachiyiñi ye nỹecpiolec le'enaxat Perge. Ime, nache qaltaq taregue da Atalia. 26Huaña yemaye, nache huenotreua'a aso notaxaqui maye quiguingui na 'etaxat da nqo'oora ye Antioquía, yem nỹecpi maye huaigui ye 'alhua Siria, yem huaña co'ollaq so 'amqaanataxanaxaicpi da iỹaxanot Ñim Lo'onatac 'Enauacna da ỹaaleguete ca lauotaxanaqtaic da ntela'alo soomaye, da yaqto' qaica camachaqca da ỹa'axattrac da no'on na'axaỹaxac. 27Nache co'ollaq ivildeua'a ye Antioquía, nache soomaye lapona't na 'amqaanataxanaxaicpi. Nache ỹa'axattrapeguem somayepi 'enauac nam ỹo'oteque soomaye Ñim Lo'onatac 'Enauacna. Qataq ỹa'axattrac da 'eetec da ltaunaxanaxac So Qarataxala' da itauaata'ape da da'aqtaxanem da no'on na'axaỹaxac nam saishet da judiopi da yaqto' nataqa'en ỹa'amaqten So Jesús. 28Nache so Pablo qataq so Bernabé ỹataqta huo'oi soua ca'agoxoiqa da huetra'aguet na 'amqaanataxanaxaicpi.
