So hua'auchiguiñi llecỹaxa'c so Bernabé qataq so Saulo da ỹa'axa't da no'on na'axaỹaxac
1Qaq nam ỹa'amaqten So Jesús maye netaña ye nỹecpi ye Antioquía huo'oi soua la'aqtaxanaxanaqa Ñim Lo'onatac 'Enauacna, qataq huo'oi soua dapaxaguenataxaata'ape. Qaq naua le'enaqa'ate soomaye Bernabé, qataq so Simón (da lỹa le'enaxat Hueraic), qataq so Lucio, maye lma' ye nỹecpi ye Cirene, qataq so Menahem (som nacta'ai' co'ollaxa so nta'a Herodes maye ilotague' ye 'alhua Galilea), qataq so Saulo. 2Qaq huo'o so na'a'q co'ollaq somayepi ỹo'ottac so llo'oxonnataxanaxac Ñim Nataxala', qataq nqouaqchettac, nache So Saqcha'a Na'añaxac Qui'itta 'enapego' somayepi, 'eeta':
–Qauỹochiỹauga qome ñi Bernabé qataq ñi Saulo, ime, nache qoñiỹapegalo da je'c do'onataxaaleguete dam sanaguilo lo'onataxanaxa'c maye huo'omshe seỹaxanalo.
3Qaq co'ollaq ime da qouagaxaunaxac qataq da qouaqchetaxac, nache qanatameetapegueleguete soomaye, qaỹasheltaleguete. Ime, nache qaỹama'q.
Da hua'auchiguiñi lo'onataxanaxa'c so Bernabé qataq so Saulo
4Qaq co'ollaq ime de'era, nache So Saqcha'a Na'añaxac Qui'itta ỹama'q so Bernabé qataq so Saulo, nache soomaye taregue da Seleucia. Qaq huaña yemaye, nache huenotreuo da nqo'ootra añi ỹaqa'ata 'alhuole, le'enaxat Chipre. 5Qaq co'ollaq ivitra yemaye, nache huetra'a so ñegaxasom le'enaxat Salamina. Huaña, nache ỹa'axattrac da la'aqtac Ñim Lo'onatac 'Enauacna, huetraigui ana napaxaguenaxaquipi na judiopi. Qaq so Juan Marcos, nache nnaictagueto soomaye da itauaata'ape. 6Nache soomaye co'ollaq ime da ỹa'axasoxoorelec aso ỹaqa'ata 'alhua, nache ivittaxaamalo ye ñegaxasom le'enaxat Pafos. Qaq huaña yemaye, nache nateeralec so judío le'ec, le'enaxat Barjesús, pio'oxonaq, somaye ỹataqta tenataxanaxaic, 'eetega da la'aqtaxanaxanec Ñim Lo'onatac 'Enauacna. 7Qaq se'eso pio'oxonaq, somaye nache neto'ot so nta'a, le'enaxat Sergio Paulo, som ỹale maye ỹaanaxanaxaic. Qaq se'eso nta'a, somaye damaxasoxona co'ollaxa so Bernabé qataq so Saulo, cha'aye somaye huotaique da na'axaỹaxana da la'aqtac Ñim Lo'onatac 'Enauacna. 8Qalaxaye som pio'oxonaq maye da lỹa le'enaxat Elimas, somaye ỹataqta ncotategueto soomaye, qataq nqanaxattac so nta'a, da yaqto' saishet da ỹa'amaqten So Qarataxala'. 9Huaña, nache so Saulo maye nataqa'en le'enaxat Pablo, maye ỹataqta nlaqchigui So Saqcha'a Na'añaxac Qui'itta, ỹataqta ilochigui somaye, 10nache 'enapego', 'eeta':
–¡'Am tenataxanaxaic, qataq 'am 'etaxaloxoic, 'am llalec so pa'aguenataxanaxaic, qataq ỹataqta 'ampa'aguenaxaua 'enauac na ỹaỹamaqchiguiñisat, 'am saq 'aloxogui da 'auo'ottac da 'aratenataxanaxac! ¿Ta'ainco' 'am ye 'auashaxaare'c naua ỹaỹamaqchiyiñi 'eetapegueco Ñim Lo'onatac 'Enauacna? 11Nagui Ñim Lo'onatac 'Enauacna 'am iuaxanec qome da yaqto' sa 'anauaañi, nache ỹataqta huo'oi caua na'axa'te da sa 'anauane' añi nala'.
Huaña, nache so Elimas 'o'm naua la'ai'te. Nache nmittaique da huo'o ca ỹaueca'aguet somaye, cha'aye saishet da nauaañi. 12Nache so nta'a co'ollaq ỹauaachigui de'era, nache da'amqaanataxan, cha'aye ỹataqta huo'o da la'aalaxa da napaxaguenataxanaxac da qaỹa'axattac So Qarataxala' Jesús.
So Pablo qataq so Bernabé huetra'a ye Antioquía yem huaigui ye 'alhua Pisidia
13So Pablo qataq soua lỹa't huenotreuo, chegoqchiyiña ye Pafos da nqo'oora ye Perge maye huaigui yem 'alhua Panfilia, nache huaña co'ollaxa so Juan Marcos da ỹaxaare'c soomaye, nache ỹe'eguelaxague da Jerusalén. 14Qaq co'ollaq ime, nache soomaye quera'ai ye Perge, nache petrañi da nqo'oora ye Antioquía maye huaigui ye 'alhua Pisidia. Qaq co'ollaq huaña yemaye, nache nqo'ooreua'a aso napaxaguenaxaqui na judiopi so na'a'q mataxaqui, nache nso'ooyiñi. 15Qaq co'ollaq ime da qaitaxaỹaxaatac aso lere so Moisés maye huetalec na nqataxacpi qataq asom lere som la'aqtaxanaxanecpi Ñim Lo'onatac 'Enauacna, nache soua nataxala'ate asom napaxaguenaxaqui na judiopi, soomaye 'enapegalo soua Pablo qataq soua lỹa't, 'eeta':
–Qami' qarqaỹa't, da huo'o ca qauauoitaique da qara'añaqtaxanaxaqui, nache no'on da qaua'axachem nagui na shiỹaxauapi.
16Nache so Pablo nachaañi, nache ỹauota'a na lhuaq da 'enapega na shiỹaxauapi da na'axaỹaxaachiguiñi. Nache 'enapeco':
–Aỹem qana'axaỹaxañiỹa, qami' Israel le'ecpi nataqa'en qami' maye qaualaqaiguet Ñim Lo'onatac 'Enauacna. 17Ñim Lo'onatac 'Enauacna maye ỹo'oxoreetac nam Israel le'ecpi, Ñimaye lca'aguishec co'ollaxa som hua'au qarta'alpi, nache ỹanem somayepi da ỹataqta qalota, co'ollaq netaña yem 'alhua le'enaxat Egipto. Qaq co'ollaq ime, nache Ñimaye nqateeguesop yi'iye 'alhua somayepi, irolec dam lta'araic la'añaxac. 18Ñim Lo'onatac 'Enauacna ỹataqta ntela'a somayepi co'ollaq quetalec so toolec 'alhua se'esoua cuarenta vi'iye. 19Qataq Ñimaye ỹo'otec da qaỹalauat co'ollaxa soua siete nta'al maye netalec yi'iye 'alhua Canaán, cha'aye nshetaique da ỹanem yi'iye 'alhua som hua'au qarta'alpi. 20Qaq 'enauac de'era huetoiguilo soua cuatrocientos cincuenta vi'iye.
–Ime, nache Ñim Lo'onatac 'Enauacna namaq so ỹalleppi da lataxala' naqa'en somayepi. Qaq Ñimaye queto'ot da namaqtac nam lataxala'pi somayepi, choche ivitta'a co'ollaxa da nvi' so na'aqtaxanaxanec le'enaxat Samuel. 21Qalaxaye 'enauac somayepi iỹaxanot Ñim Lo'onatac 'Enauacna da hua'aqta'a da ỹauo'o ca lta'a da yaqto' ilo'ogue somayepi. Ỹoqo'oye Ñim Lo'onatac 'Enauacna lca'aguishec so Saúl da lta'a naqa'en somayepi.
–So Saúl nache lta'a so ỹale maye le'enaxat Quis, somaye nache chegaqaigui na llalaqpi so Benjamín, nache so Saúl ilotague' somayepi soua cuarenta vi'iye. 22Qaq co'ollaq qaỹata'ague, nache Ñim Lo'onatac 'Enauacna nqat somaye da nta'a, nache ỹanem namayepi da lta'a naqa'en so David. Cha'aye Ñimaye 'enapeco': «Nagui sanata ñi David ñim Isaí llalec, ñimaye ỹataqta saỹamaxareeta, cha'aye ỹataqta ỹo'ot 'enauac nam sheetapeguecpi.» 23Qaq huo'o so 'oonolec nam llalaqpi se'eso David, somaye nacheso So Jesús som ỹanagui Ñim Lo'onatac 'Enauacna da Lca'alaxaqui naqa'en na Israel le'ecpi, cha'aye Ñimaye ỹachaxanapec co'ollaxa da ỹan. 24Qaq co'ollaq saxanaxa da nvi' So Jesús, nache so Juan maye nachelaxanataxanaq 'eetega 'enauac nam Israel le'ecpi da naralaxat da lataxac qataq ỹaxaare'c naua lasouaxashe'ete qataq qanachelaxan. 25Qaq so Juan co'ollaq mashe nayeeta'a ye laloqo' da nachaalataxac, nache somaye 'eetega na Israel le'ecpi 'eeta': «Aỹem saishet da nachaỹem cam qanpi'itaxañiitaique Lca'aguishec Ñim Lo'onatac 'Enauacna. Qalaxaye camaye aỹem nca'attaueegue, camaye ỹataqta saishet da yaloua'a, na'aictaxa da chochaq aỹem l-latac.»
26Qaq aỹem qana'axaỹañiỹa qami' ỹaqaỹa't maye qami' qauachegoqoiguet so Abraham qataq 'enauac da qoñiita maye ỹataqta qaualaqaiguet Ñim Lo'onatac 'Enauacna, de'era na'aqtaxanaxac maye chegaqaigui da nca'alaxa, damaye ỹataqta qaralamaxat. 27Saỹatenaq da nam netaña ye nỹecpi ye Jerusalén qataq nam nataxala'pi saishet da ỹauatton se'eso Jesús. Na'aictaxa da 'enauaque naua mataxaqui' da itaxaỹaxaatrac ana lereguishe so na'aqtaxanaxanecpi, qalaxaye ñaqaiyeta saishet da tagui ye lauel da ana'ana nere ỹa'axattac So Jesús. Qaq ỹoqo'oye damaxasoxoolec da qaỹalauat Somaye, qaq sa ỹaỹaten de'era ỹo'ot, damaye ipacchigui da ỹa'axattac co'ollaxa so na'aqtaxanaxanecpi. 28Qaq na'aictaxa da saishet da ỹanata co'ollaxa ca lasouaxashet Somaye da yaqto' ỹalauat, qalaxaye, nache 'ena'am iỹaxanot so Pilato, da yaqto' damaxasoxoolec da qaỹalauat. 29Qaq co'ollaq ime da qaỹo'otec Somaye 'enauac nam ỹa'axatta'a co'ollaxa naua na'aqtaqa maye nanettrañi, nache qanqateeguesop so npe'enaxaqui, nache qailareñi. 30Qalaxaye Ñim Lo'onatac 'Enauacna qaltaq nca'alec naqa'en Somaye. 31Nache ỹataqta huo'oi soua na'axa'te da nachaxaategalo soua lapaxaguenataqa maye ỹataqta nnaigaxau' co'ollaq chegoqchiguiña ye 'alhua Galilea, choche ivitta'a ye nỹecpi ye Jerusalén. Qaq nagui nachesoua soomaye som da'aqtaxaatapeguema na shiỹaxauapi de'era.
32Ñim Lo'onatac 'Enauacna ỹachaxanapeguem co'ollaxa som hua'au qarta'alpi da namaq ca Qarca'alaxaqui. Qaq qomi', nache sa'axataqtac nagui de'era no'on na'axaỹaxac. 33Cha'aye qomi' maiche qomi' llalaqpi somayepi, qaq ỹoqo'oye Ñim Lo'onatac 'Enauacna ỹataqta ipacchigui dam 'enapec co'ollaxa da qaltaq nca'alaxatec So Jesús da Qarca'alaxaqui. Cha'aye nache nanettalec aso nere le'enaxat Salmos da la'aqtac, 'eeta':
«'Am maye nache 'am Ỹalec;
qaq nache chegoqchiguiña ne'ena na'a'q da Aỹem 'Arta'a.»
34Ñim Lo'onatac 'Enauacna ỹa'axata'a co'ollaxa da qaltaq nca'aleeguesop naqa'en Somaye da nleuaxa, yaqto' da lo'ocỹaxac saishet da nlaguiñi. Cha'aye nache 'enapec naua nanettrañi la'aqtaqa, 'eeta': «Aỹem qami' sanema qome da iqouagaxanaqtaic maye sachaxanapecot co'ollaxa so David.» 35Nataqa'en so lỹa la'aqtac maye nanettalec ana Salmos 'eeta': «Saishet da 'auashenem da yaqto' nlaguiñi da ỹo'ocỹaxac, cha'aye Aỹem 'aralamaxat qataq 'arauotaxat.» 36Qaq 'eesa da so David ỹataqta ỹalaxaguet da ỹo'o't naua ỹamaxaleguete Ñim Lo'onatac 'Enauacna. Qalaxaye co'ollaq ime, nache somaye ileu, nache qailaroigui som hua'au lta'alpi, nache da lo'ocỹaxac nlaguiñi. 37Qalaxaye Ñim Lo'onatac 'Enauacna nca'alaxatec So Jesús, ỹoqo'oye da lo'ocỹaxac Somaye, saishet da nlaguiñi. 38Qaq ỹoqo'oye, qami' ỹaqaỹa't, 'era da na'aqtaxanaxac maye qami' sa'aqtaxanaqteguema, da So Jesús ishet da ỹapalaxat 'enauac na nasouaxashet. Na namaxasoxonaxacpi maye chegoqo'ot so Moisés qalaq saishet da huesoueeguesop naqa'en qami' na qarasouaxashechi. 39Qalaxaye Ñim Lo'onatac 'Enauacna ỹapalaxat na lasouaxashetpi 'enauac nam ỹa'amaqten So Jesús. 40Qaq ỹoqo'oye maxatchaxa qome da qoñiita, ten qom qami' taleguete de'era nhuaxanaxanaxac maye ỹa'axatta'aguet som na'aqtaxanaxanecpi, maye 'eeta':
41Qami' ỹataqta qavi'iñiitac Ñim Lo'onatac 'Enauacna,
qalaxaye nagui qavi'ilqai, nache qauataiuec.
Cha'aye ỹaguec da lchec qome ca nhuaxanaguec
maye sanem nam sa ỹalaq,
nache sa qaua'amaqchiñi da huo'o ca qami' da'aqtaxaatapeguema.
42Qaq so Pablo qataq soua lỹa't co'ollaq yaqta'a da quera'ai aso napaxaguenaxaqui na judiopi, nache qaiỹaxanoto soomaye da yaqto' que'eca lỹa na'a'q mataxaqui, nache qaltaq ipaqueelec da ỹa'axat de'era. 43Qaq co'ollaq mashe ime so naponaxac, nache ỹataqta qalota na judiopi qataq nam ỹaqa'a ca chegaqa'ague nam quetague' da la'amqaanataxanaxac na judiopi, ca'ateguelo soomaye. Nache so Pablo qataq so Bernabé ỹataqta huaqattega namayepi, da yaqto' saishet da ỹaxanec da lqouagaxanaqtaic Ñim Lo'onatac 'Enauacna.
44Qaq co'ollaq iviteuga so lỹa na'a'q mataxaqui, nache lapona't 'enauac nam netaña so nỹecpi, huaña aso napaxaguenaxaqui na judiopi da yaqto' na'axaỹaxana da la'aqtac Ñim Lo'onatac 'Enauacna maye ỹa'axa't so Pablo qataq so Bernabé. 45Qalaxaye nam judiopi co'ollaq ila'a da ỹataqta qalota na shiỹaxauapi, nache huo'o da lquiỹaqa' soomaye. Nache quetot da 'eetega so Pablo da choche isomtac 'enauac nam ỹa'axattac, qataq nataqa'en ỹataqta isheueetac. 46Qalaxaye so Pablo qataq so Bernabé saishet da ñe'erelec da la'aqtaxanaxa'c. Nache co'ollaq ime, nache 'ena'apo':
–Da la'aqtac Ñim Lo'onatac 'Enauacna, damaye iuen da hua'auñi da qami' sa'aqtaxanaxama maye qami' judiopi. Qalaxaye nagui ye qami' saishet da qauacoñiiguet, qataq qoñiỹapec ye sa iuen da qauacoñiiguet da nca'alaxa maye chochaq tatec, qaq qomi' nagui, saxaigui nam saishet da judiopi da sa'aqtaxanaxam. 47Cha'aye nachera da qomi' ỹamaxaleguete Ñim Lo'onatac 'Enauacna, 'eeta':
'Am sanagui da 'am lcoỹaraqte na ỹotta'a't shiỹaxauapi,
yaqto' 'am 'aua'axat da nca'alaxa,
choche ivitta'a ca ỹataqta pa'atec ana 'alhua.
48Nache co'ollaq hua'axaỹa de'era nam saishet da judiopi, nache ỹataqta huo'o da ntonaxac. Nache namayepi ỹataqta 'onaxaic naqa'en da la'aqtac Ñim Lo'onatac 'Enauacna. Huaña, nache da'amqaanataxan nam nale'ena co'ollaxa da lca'aguishec Ñim Lo'onatac 'Enauacna da yaqto' taỹot da nca'alaxa maye chochaq tatec. 49Qaq 'era da 'eetec co'ollaq qaỹa'axattac da la'aqtac Ñim Lo'onatac 'Enauacna 'enauac se'eso 'alhua. 50Qalaxaye nam judiopi detaxaỹot nam 'alpi maye 'amaqtaqaipi qataq quetague' da la'amqaanataxanaxac maye hueta'a yi'iye nỹecpi, qataq nataqa'en ỹañoxot da ỹayen nam ỹalleppi maye nataqa'en 'amaqtaqaicpi da yaqto' icanapec so Pablo qataq so Bernabé, da yaqto' quera'ai qanqa'en se'eso 'alhua. 51Huaña, nache so Pablo qataq so Bernabé ichegoxore'c na namoxoỹaxa naua lapia'ate, qaq damaye, nache la'anaxat da maiche nasouaxaala't somayepi. Nache soomaye nqo'oora ye Iconio. 52Qalaxaye nam da'amqaanataxanpi maye no'onaña ye nỹecpi ye Antioquía ỹataqta huo'o da ntonaxac qataq nlaqchigui So Saqcha'a Na'añaxac Qui'itta.
