Da ltaxaỹaxac so Pablo co'ollaq datato'ot so nta'a Agripa
1Nache so nta'a Agripa 'enapega so Pablo, 'eeta':
–'Am peta'a ishet da 'auo'ot ca 'artaxaỹaxac da 'anhueela't.
Nache so Pablo ỹachaxaasheguem na lhuaq, nache detaqa, 'eeta':
2–Aỹem ỹataqta samachiguiñi da aỹem 'ana'axaỹaxana da setaqa, 'am ita'a Agripa, da yaqto' aỹem so'ot ca itaxaỹaxac da sataỹa'aguet 'enauac nam 'eetega ỹasouaxashetpi na judiopi. 3Cha'aye aỹem saỹateeta da 'am ỹataqta 'auaỹateete' naua qarataxaco qomi' judiopi, qataq dam ñecotaqtapigui. Qaq ỹoqo'oye aỹem 'am ñachoxonnot da aỹem 'anhualaxaune' da aỹem 'ana'axaỹaxana.
So Pablo ỹa'axat da 'eetec co'ollaq da'amqaanataxan
4'Enauac na judiopi ỹataqta aỹem ỹauatton chegoqchiguiña co'ollaq ñaq aỹem nogotolec. Ỹaỹateeta da soota'a ne'ena 'alhua qataq ye Jerusalén. 5Namayepi nataqa'en ỹaỹateeta, da nache 'eetai' da aỹem fariseo, qataq ỹaỹateeta da ỹataqta shectegue dam ỹoqta llec dam la'amqaanataxanaxac nam fariseopi. 6Qaq nagui aỹem qanauegueuo da yaqto' aỹem qanmit souaxat de'era ñaquitaxac dam ỹachaxanapecot Ñim Lo'onatac 'Enauacna so hua'au qarta'alpi. 7Nataqa'en nam llalaqpi soua sachegoxosoxogueta doce llalqa so Israel, namayepi nataqa'en iuattaique qom ivita da ipacchigui de'era qaỹachaxanapec co'ollaxa. Qaq ỹoqo'oye namayepi ỹo'oxoreetac Ñim Lo'onatac 'Enauacna 'enauaque naua na'axa'te qataq naua pe'. Qaq nachera de'era ñaquitaxac, 'am ita'a Agripa, da huo'omshe na judiopi aỹem npa'agueetega. 8Qaq ¿ta'ainco' da qoñiita ye saishet da qaua'amaqchiñi Ñim Lo'onatac 'Enauacna da ishet da qaltaq nca'alec naqa'en na leuaxaicpi?
Da 'eetec so Pablo co'ollaq icaatac da icoñi' nam quetague' So Cristo
9Aỹem co'ollaxa ỹataqta saỹateeta da iuennataxac, da ỹataqta sataỹa'aguet de'era le'enaxat So Jesús maye Nazaret le'ec. 10Qaq 'ena nam so'ot co'ollaq huaña ye Jerusalén, cha'aye maiche la'aqtac na ntaxaỹaxanaxanecpi da qaitaxaỹapegue' Ñim Lo'onatac 'Enauacna, qataq na laỹepi nataxala'pi da secoñe' sanaigui añi ncoñetaxanaxaqui 'enauac na ỹa'amaqteetac So Jesús. 11Qataq ỹataqta qalota da seuaxaatac namayepi da sauotaique da ỹaxaañi da lpi'iỹaxac. Qaq 'era da so'otec 'enauac anam napaxaguenaxaquipi nam judiopi. Cha'aye aỹem ỹataqta qalota da iquiỹaxa namayepi, ỹoqo'oye ivira'a da secanaxangui nam hueta'alo naua ỹaqa'alo 'aleu'.
So Pablo qaltaq ỹa'axat da 'eetec co'ollaq cheta'ague da da'amqaanataxan
12Qaq nachera de'era iuennataxac co'ollaq aỹem saỹa'a ye nỹecpi ye Damasco, aỹem ỹanem da la'aqtac nam lataxala'pi nam ntaxaỹaxanaxanecpi da aỹem ỹamaq. 13Qalaxaye co'ollaq huangui so nqa'aic, 'am ita'a Agripa, mashe na'a'q laiñi, nache aỹem sela'aguet so ne'eraxa, ỹataqta napacalec na le'eraxa añi nala', chegoqo'ot na piguem. Nache somaye souaigui, nataqa'en soua ñenaictegueto. 14Nache qomi' 'enauac da sanataxañi, nache aỹem sa'axaỹa so na'aqtac aỹem 'eetega, huota'aisalo naua la'aqtaqa na judiopi, 'eeta': «Saulo, Saulo, ¿ta'ainco' ye Aỹem 'aucaatac? Ye nachaqcata cam qaica ca laỹaanataxanaxac maye huotaique da aỹem delogui'.» 15Nache aỹem shenapec: «¿Negue't 'am?» Nache somaye aỹem 'enapega, 'eeta': «Qomye Nachaỹem Jesús maye Aỹem 'aucaatac. 16Qalaxaye qoñisheguem qome, 'anachaañi, cha'aye Aỹem 'am ñachaxana, cha'aye sauotaique da Aỹem 'auo'onataxanot, qataq da yaqto' 'aua'axat dam 'arauanaqchec nagui qataq cam taỹa'a da 'am sachaxana. 17'Am samaxa na judiopi qataq na saishet da judiopi da 'aua'aqtaxanem, qataq saishet da 'am sasheneguet da huo'o ca 'am ỹo'otec namayepi. 18Aỹem 'am samaxa namayepi, da yaqto' ishet da nauaañi 'anqa'en, yaqto' saishet da quetaigui na napalaxa, nachaqrata da quetaigui na yo'oqchiguiñi; qataq yaqto' namayepi saishet da hueto'ot da la'añaxac so pa'aguenataxanaxaic, nachaqrata da quegue Ñim Lo'onatac 'Enauacna; qataq ỹa'amaqten, nache ishet da qaỹapalaxat na lasouaxashetpi, qataq yaqto' qaỹalecneua'a da qoỹanem qome cam ỹachaxanapec Ñim Lo'onatac 'Enauacna da ỹami' nam lalamaxatpi Ñimaye.»
So Pablo ỹataqta ỹalaxaguet da lauanaqchec
19Qaq ỹoqo'oye, 'am ita'a Agripa, aỹem saishet co'ollaxa da sa salaxaguet de'era ỹauanaqchec maye chegoqo'ot na piguem. 20Ỹoqo'oye aỹem sa'auaxaachiguiñi da sa'axatem da na'aqtac nam netaña ye Damasco. Ime, qataq jec nam netaña ye Jerusalén qataq 'enauac nam netaña ye 'alhua Judea qataq nataqa'en nam saishet da judiopi. Shenapega da iỹaxanot Ñim Lo'onatac 'Enauacna da yaqto' ichoxoren qataq ỹalaxaguet, nache ỹo'ot cam no'on maye ỹachaxan da 'eesa da naralaxat da lhuennataxac. 21Qaq nachera da huo'omshe na judiopi aỹem ỹaconeua'a da aỹem icoñi' co'ollaq huaigui añi no'onaxanaxaqui late'erai, nache huotaique da aỹem ỹalauat. 22Qalaxaye souaxat da ltaunaxanaxac Ñim Lo'onatac 'Enauacna da sheeta, ỹoqo'oye nagui ñaq shecta da sa'axattapeguem Ñimaye 'enauac na shiỹaxauapi, sa'aqtaxanem na choxoraq qataq na sallaxanecpi. Qaq saishet da huo'otaq ỹaqa'a ca ỹa'aqtaxanaxac da sa'aqtaxan. Nachaqrata da sa'axattac da la'aqtaxanaxac som hua'au la'aqtaxanaxanecpi Ñim Lo'onatac 'Enauacna qataq so Moisés da qaỹa'axatta'aguet cam naỹa'acna. 23Qaq dam na'aqtaxanaxac qoỹenac ye cam Lca'aguishec Ñim Lo'onatac 'Enauacna, camaye qome ỹataqta huo'o da nque'eenaxac. Qaq da ime, nache qaỹalauat, qaq nacheca qome ca la'auaxanec da qanca'alaxateeguesop na leuaxaicpi. Ime, nache camaye ỹa'axatem da nca'alaxa nam qarhuo' le'ecpi qataq nam saishet da judiopi, qaq damaye 'eeta'am na yo'oqchiguiñi.
So Pablo quetapegueua'a so Agripa da da'amqaanataxan
24Qaq co'ollaq 'enapec de'era so Pablo, nache so Festo 'enapeco':
–¡Ỹoqta huo'o da 'oic, 'am Pablo! Souaxat da ỹapacauec da 'anapaxaguenaxac, nache 'am ỹauega da huo'o da 'oic.
25Qalaxaye so Pablo 'enapeco':
–Saishet da huo'o da aỹoic, 'am ita'a Festo; cha'aye aỹem dam sa'axattac ỹataqta lataxac, qataq ỹataqta 'eesa saishet da choche natenataxanaxac. 26Qaq 'iñi ñi nta'a Agripa qomi' ỹalectaiguilo, ñimaye ỹataqta ỹaỹateeta de'era. Qaq ỹoqo'oye aỹem saishet da ñeteltapiguiñi da aỹem hua'aqtega ñimaye da sa'aqtaxaatac, cha'aye saỹaten da ñimaye nataqa'en ỹaỹateeta 'enauac de'era. Cha'aye damaye saishet da huo'otaq ỹapogoñi ca lataxac; damaye ỹataqta ỹaatec. 27Qaq 'am ita'a Agripa, ¿'aua'amaqten peta'a da la'aqtaxanaxac som la'aqtaxanaxanecpi Ñim Lo'onatac 'Enauacna? Aỹem saỹaten da 'am 'aua'amaqten.
28Nache so Agripa 'enapeco':
–Mashe hua'c da aỹem 'auañoxot da yaqto' sa'amaqten So Cristo.
29Nache so Pablo 'enapeco':
–Na'aictoxo' da hua'c da 'aua'amqaanataxan, huo'otaq saxanaxa, qalaxaye ñeshetaique da Ñim Lo'onatac 'Enauacna saq 'amta naqa'en, nataqa'en 'enauac nam aỹem na'axaỹaxaatega nagui, ishet da ivira'a da 'eeta'am aỹem, qalaxaye saishet qome da aỹem qoñiita'am da aỹem qaicoñettai'.
30Qaq co'ollaq ime da 'enapec de'era so Pablo, nache ñesheguem so nta'a Agripa, nataqa'en so nta'a Festo, qataq aso Berenice, qataq 'enauac som nso'ootañipi. 31Nache pa'auec somayepi, nache qaitaqtapigui de'era. Nache somayepi maiche 'enapeco':
–Ñi'iñi ỹale, ñimaye qaica ca lasouaxashet maye naigui da yaqto' qaỹauo'o ca nalaataguec, huo'otaq da choche qaicoñettai'.
32Nache so Agripa 'enapega so Festo, 'eeta':
–Ñi'iñi ỹale ishettaxa da qaisouec da huo'otaq sa iỹaxaneua'a da nmit ñim nta'a maye neta'ague da Roma.
