So Pedro qataq so Juan qaỹataxanoto so nta'alpi maye nmit na nasouaxashet
1Qaq so Pedro qataq so Juan co'ollaq ña da'aqtaxaatrapeguem so shiỹaxauapi, nache huo'oi soua nvildeuo nam ltaxaỹaxanaxanecpi na shiỹaxauapi da qaitaxaỹapegue' Ñim Lo'onatac 'Enauacna, nnaictague' som lta'a nam ilotague'pi aso no'onaxanaxaqui late'erai qataq nam saduceopi. 2Qaq soomaye ỹataqta dalematai', souaxat so Pedro qataq so Juan da ỹapaxagueetrac na shiỹaxauapi, qataq ỹa'axattrac da na leuaxaicpi ishet da qaltaq qanca'alaxatec qome, 'eeta'am So Jesús da qaltaq nca'alec. 3Nache qaỹaue'c soomaye da qaicoñe't, nache qoỹanaiguilo aso ncoñetaxanaxaqui. Nache qaiuata'aguet so lỹa na'a'q, cha'aye mashe avit. 4Qalaxaye ỹataqta qalota na shiỹaxauapi nam na'axaỹaxaatega se'eso na'aqtaxanaxac na da'amqaanataxan. Qaq yem lcata so dalaxaic da'amqaanataxan ivi' ye cinco mil shiỹaxauapi.
5Qaq so lỹa na'a'q, nache na lta'alpi na judiopi qataq na nqueroxonecpi maye nataxala'pi qataq na dapaxaguenataxaatapeguec na namaxasoxonaxacpi dataỹa't, huaña ye Jerusalén. 6Nataqa'en ỹalectauo so Anás som lta'a nam ntaxaỹaxanaxanecpi, qataq so Caifás, qataq so Juan, qataq so Alejandro, qataq 'enauac nam laỹepi maye maiche lalamaxat lauo' le'ecpi som lataxala'pi na ntaxaỹaxanaxanecpi. 7Nache qaỹamaxasoxonalo da qanaueguereuo so Pedro qataq so Juan. Nache qanachaalataxanguilo na laiñi, nache qainatta'ape, qoỹeeta':
–¿Negue't cam la'añaxac, qataq cam le'enaxat cam qauo'onataxañiitega da qauo'oche de'era?
8Nache so Pedro maye ỹataqta nlaqchigui da la'añaxac So Saqcha'a Na'añaxac Qui'itta, 'enapeco':
–Qami' maye qami' lta'alpi na judiopi, qataq qami' nqueroxonecpi maye nataxala'pi. 9Qomi' qaunacheeta'ape da qaunataxañiitapeguec ca lataxac dam no'on maye qaỹo'otec de'era ỹale maye sa no'on co'ollaxa, da yaqto' qauaỹaañi chaq 'eetec ca lataxac co'ollaq no'oita. 10Qaq nagui qami' sa'aqtaxanaqtema, yaqto' de'era ỹaỹateeta 'enauac na Israel le'ecpi da 'eetec de'era ỹale maye hueta'a ne'ena da nagui ỹataqta no'oita. Damaye chegoqchigui da la'añaxac So Jesucristo maye Nazaret le'ec, Som qami' qauaxañiiuo co'ollaxa, qalaxaye Ñim Lo'onatac 'Enauacna qaltaq nca'alec naqa'en. 11Qami' de'era qauo'oche qoñiita'am ca nỹec lo'opi da ỹalat ca coma', qalaxaye nagui se'eso coma' ỹe'eguelaxa da ỹataqta nhuenec da nlletañi 'enauac ca nỹec. 12Qaica ca lỹa ishet da chegoqchigui da nca'alaxa. Cha'aye Ñim Lo'onatac 'Enauacna qaica ca lỹa ne'enaxat da qomi' ỹanema ana 'alhua, da yaqto' ishet da qomi' nca'alaxatre'c, nachaqsota So Jesús.
13Nache so nta'alpi co'ollaq ila'a da so Pedro qataq so Juan ỹataqta sa ñe'erelec da ltaxaỹaxa'c, qataq ila'a da soomaye saishet da paxaguenaxaiqa, qataq nachena nam shiỹaxauapi maye choche huesoxoic, nache huo'o da la'aalaxa. Qataq qananomalo da soomaye ca'attrague' co'ollaxa So Jesús. 14Qataq nataqa'en souaxat da ilota'a som ỹale maye no'oita qanqoỹen da nachattauo, nache saishet da huo'o ca ỹasaxaleguete lasouaxashe't soomaye. 15Huaña, nache nqateeguesopa soomaye so ntaxaỹaxac, nache somayepi maiche taỹa't da ncotatega't. 16Nache somayepi 'enapeco':
–¿Ca 'eetec ca shenaqteque de'eraua ỹale't? Cha'aye daamaye sa seshetaq da sauoqo'o ca lasouaxashe't da shenaqtega da tenataxanaxaiqa, cha'aye de'era ỹo'ote'c se'eso ỹale ỹataqta sa qaỹauanapega, qataq 'enauac na hueta'a na Jerusalén ỹaỹaten de'era. 17Qalaxaye da yaqto' saishet da queta da ỹaỹaten 'enauac na shiỹaxauapi de'era, qaq no'on da qomi' sarenaqaleguete daamaye, da yaqto' nagui nache tachiguiña da saishet da huo'o ca ỹa'axatrem de'era na'aqtaguec So Jesús.
18Nache qaltaq qaiỹaxaneugalo soomaye, nache qoỹenapegalo da nache tachiguiña da saishet da da'aqtaxa'n qataq saishet da dapaxaguenataxaarec da na'aqtaguec So Jesús. 19Nache so Pedro qataq so Juan 'ena'apo':
–Maicheye qami' qauennataxañi da huo'otaq Ñim Lo'onatac 'Enauacna ishet da ỹaỹamaxareeta da qami' salaxasoxoleguete, qalqo' salaxasoxoguet Ñimaye. 20Cha'aye qomi' saishet da saxanaxañi da sa'axataqtac 'enauac nam sauanaqchigui qataq nam sa'axasoqchigui.
21Nache so nta'alpi maye nmit da huo'o ye nasouaxashet ỹataqta ỹareetegalo soomaye, qalaxaye ỹachaxaare'c. Cha'aye saishet da ỹanata cam qaỹachegoxotchigui da yaqto' qaiuaxa'n, cha'aye 'enauac na shiỹaxauapi ỹataqta ỹo'oxoreetac Ñim Lo'onatac 'Enauacna, souaxat de'era qanayeuaigui. 22Qaq se'eso ỹale maye chegoqchigui de'era sa qaỹauanapega da no'oita qanqoỹen, somaye mashe napacaleguete naua cuarenta vi'iye da llaxa.
So ỹa'amaqtenpi So Jesús iỹaxanaique ca lpi'iỹaxac qataq la'añaxac
23Qaq so Pedro qataq so Juan co'ollaq qaisorec, nache soomaye nqo'oora cam hueta'a som maiche laỹepi, nache da'aqtaxaatrapeguem somayepi 'enauac na la'aqtacpi so nta'alpi maye nmit na nasouaxashetpi. 24Nache somayepi co'ollaq hua'axaỹa de'era, nache 'enauac da nqouagaxaunot Ñim Lo'onatac 'Enauacna, 'eeta':
–'Am Qarataxala', 'am maye nache 'am 'aro'onatac na piguem, qataq ana 'alhua, qataq aso auaxai, qataq 'enauac nam huetalecna. 25'Am 'auachegoxotchigui co'ollaxa So Saqcha'a Na'añaxac Qui'itta da 'aua'aqtaxanaxan so 'aramaxashec David da qoneta':
«¿Ta'ainco' na ỹotta'a't shiỹaxauapi ye ỹataqta dalemata,
qataq namayepi na lhuennataxaco qaica ca naiguilo?
26Na nta'alpi ana 'alhua qalaq dataỹa't,
qataq na lataxala'pi na shiỹaxauapi qalaq naỹaana't,
da dataỹa'aguet Ñim Lo'onatac 'Enauacna
qataq qaỹo'otan Som Lca'aguishec da yaqto' Nta'a.»
27Ỹataqta 'eesa da huaña ne'ena nỹecpi co'ollaq dataỹa't so Herodes Antipas qataq Poncio Pilato qataq na shiỹaxauapi maye chegaqa'ague da Roma qataq na Israel le'ecpi da yaqto' ỹalauat So Jesús, Som 'Arca'aguishec da yaqto' Nta'a. 28Qaq de'era ỹo'ot namayepi, damaye ỹataqta ipacchiguilo 'enauaque naua 'alapaxayiñi 'arhuennataxaco da 'auo'o't. 29Qaq nagui, 'am Qarataxala', ña 'aumeten da qanarenaguec. Qaq no'on da qomi' 'anema ca qara'añaxac, qomi' maye qomi' 'aramaxa'she, yaqto' saishet da huo'o ca qarcolanaxa da 'am sa'axataqtac. 30Qataq qomi' 'aỹa'anema cam 'ara'añaxac, da yaqto' qomi' ñatarenaq na sa no'onpi, qataq da so'otaq na na'anecpi qataq na sa qaỹauanapigui qataq ỹo'oxoraq, da so'onataxanaxa da le'enaxat som qui'itta 'aỹa'alec Jesús.
31Nache co'ollaq ime da nqouagaxaunaxac somayepi, nache que'eca qanayeeta'a ỹataqta cholaxan. Nache 'enauac somayepi ỹataqta nlaqchigui So Saqcha'a Na'añaxac Qui'itta. Nache chegoqchiguiña da 'enauac somayepi da ỹa'axattac So Jesús ỹataqta qaica ca ñe'etaique.
Da lataxac nam ỹa'amaqten So Jesús
32'Enauac so shiỹaxauapi maye ỹa'amaqten So Jesús, somayepi ỹataqta 'enauac da 'oonolec da qananomteguet nhuennataxac. Qaica da huo'otaq huo'o ca 'eetega da maiche lalamaxat cam hueto'ot. 33Qaq soua namaxa'she ỹataqta nlaqchiguilo da lta'araic na'añaxac, qataq dapaxaguenataxaategue'c da So Jesús mashe qaltaq nca'alec. Qaq Ñim Lo'onatac 'Enauacna ỹataqta ỹauo'o da nqouagaxa 'enauac so qalota shiỹaxauapi. 34Huaña, nache saishet da huo'o ca 'oonolec somayepi da deuenaxaatapigui'. Cha'aye 'enauac nam huo'o na na'alhua, qataq na lma' qalaq imen, 35nache ana lasheue qoỹanema soua Jesús lamaxa'she. Nache soomaye naloqteere'c da ỹanem nam ỹoqta 'eesa da huo'o da lhuenaxanaxa. 36Qaq huo'o so ỹalectauo le'enaxat José, somaye lañoqo' aca ỹaqa'ata 'alhuole le'enaxat da Chipre. Somaye chegaqaigui nam ltauapi na ntaxaỹaxanaxanecpi maye chegoxoguet so Leví. Qaq soua namaxa'she ỹauo'oi da dalaxaic le'enaxat Bernabé. Qaq de'era ne'enaxat naigui da 'añaqtaxanaxaic. 37Qaq somaye, nataqa'en imen so na'alhua, nache ndouo aso lasheue da ỹanema soua lamaxa'she So Jesús.
