Qalca'aua'alo soua siete ntau'
1Qaq se'esoua na'axa'te ỹataqta nquictauec na ỹa'amaqten So Jesús. Nache nam 'amqaanataxanaxaicpi judiopi maye ỹaỹate'n naua la'aqtaqa na griegopi, namayepi nachetega nam laỹepi judiopi, cha'aye namayepi 'eetega da saishet da ỹoqta qailo'oguet anam pa'aipi maye lauo' lashepi da ivita da qoỹanec da ntaunaxanaxac ye na'a'q. 2Nache soua doce Jesús lamaxa'she, soomaye ỹauo'o so laponaxac 'enauac nam 'amqaanataxanaxaicpi. Nache 'enapega, 'eeta':
–Sa ỹaỹamaxañi da qomi' saxanaxañi da qara'aqtaxanaxac da la'aqtac Ñim Lo'onatac 'Enauacna, nache qarmelec da yo'oqchigui nquia'axac. 3Qaq ỹoqo'oye qami' qarqaỹa't, qanmichiỹapigui caua siete ỹale't da qoñiita, cam nache 'eetai'salo da npe'e'te, qataq huo'o na ỹaỹate'n, qataq nlaqchiguilo da la'añaxac So Saqcha'a Na'añaxac Qui'itta, qaq nachecaua ca qaupataqaileguete de'era no'onataxanaxac. 4Qaq qomi' qalaq ñalemaxasoqteguet da so'onataxanaqtacot Ñim Lo'onatac 'Enauacna qataq da qanqouagaxaunaxac qataq da sa'axataqtac da la'aqtac Ñimaye.
5Qaq 'enauac somayepi ỹaỹamaxareeta de'era. Nache qalca'aua'a so Esteban. Somaye ỹataqta nlaqchigui da lpi'iỹaxac Ñim Lo'onatac 'Enauacna qataq hueto'ot da la'añaxac So Saqcha'a Na'añaxac Qui'itta. Nataqa'en qalca'aua'alo soua lỹa't seis ỹale't: Felipe, Prócoro, Nicanor, Timón, Parmenas, qataq so Nicolás. Se'eso Nicolás somaye lma' ye Antioquía, qalaxaye quegue da la'amqaanataxanaxac na judiopi. 6Qaq co'ollaq ime, nache soomaye qaỹauegueua'alo soua Jesús lamaxa'she, nache soomaye ỹashel-lec na lqaic ñi 'oonolec da nqouagaxaueeleguete.
7Nache da la'aqtac Ñim Lo'onatac 'Enauacna ỹataqta nquictasheguem. Qataq ye lcata na da'amqaanataxan ye Jerusalén ỹataqta nquictauec, ivira'a da qalota na ỹa'amaqten So Jesús nam ntaxaỹaxanaxanecpi da qaitaxaỹapegue' Ñim Lo'onatac 'Enauacna maye judiopi.
Qaỹaconeua'a so Esteban da qaicoñe'
8Qaq se'eso Esteban, somaye ỹataqta nlaqchigui da la'añaxac Ñim Lo'onatac 'Enauacna qataq da lqouagaxanaqtaic Ñimaye, nache somaye ỹo'ot na sa qaỹauanapega qataq na na'anecpi huaigui naqa'en na shiỹaxauapi. 9Nache huo'oi soua chegaqa'alo aca napaxaguenaxaqui na judiopi maye qaỹamata'ac Napaxaguenaxaqui na Ỹalleppi Huesochiguiñi, huaxaiguet so chegaqa'a ye nỹecpi ye Cirene, qataq ye nỹecpi ye Alejandría, qataq ye 'alhua Cilicia, qataq ye 'alhua Asia. Nache soomaye ncotatague' so Esteban. 10Qalaxaye saishet da nalo'ogueta da dataỹa'aguet somaye, cha'aye da detaqa, qalaq naua laỹaanataxanaxaco chegoqo'oto So Saqcha'a Na'añaxac Qui'itta. 11Nache soomaye ỹauo'oi soua isheete'n, da yaqto' 'eetrega da huo'o ca hua'aqchiyigui la'aqtac so Esteban da isheueetac so Moisés qataq Ñim Lo'onatac 'Enauacna. 12Qaq 'era da 'eeteque soomaye da inogoqche't na shiỹaxauapi, qataq na nqueroxonecpi, qataq nam dapaxaguenataxaatapeguec na namaxasoxonaxacpi. Nache ỹataqta sa ỹauo'o ca ldaqa' so Esteban da ỹacooreua'a, nache ỹaueguereua'a so nta'alpi maye nmit na nasouaxashet. 13Nache iỹaxanalo soua lỹa't na'aqtaxanaxanaqa da yaqto' ỹa'axa't ca saq 'en. Nache soomaye 'ena'apo':
–De'era ỹale, damaye ỹataqta saq ỹaxaañi da qauema naua la'aqtaqa da detaqtega añi qui'itta qaro'onaxanaxaqui qataq npa'agueneto naua namaxasoxonaxaco maye chegoqo'oto so Moisés. 14Qomi' sa'axasoqchigui de'era ỹale da ỹa'axattac da So Jesús maye Nazaret le'ec, da nlaxaañi qome añi qui'itta qaro'onaxanaxaqui qataq naralaxat nam namaxasoxonaxacpi maye qomi' no'onaxata'agueta so Moisés.
15Nache se'eso nta'alpi maye 'amaqtaqaicpi qataq 'enauac som laỹepi, co'ollaq ỹamato'ot so Esteban, nache ila'a na le'eraxa na lashec da ỹataqta 'eeta'am da lasheguiỹaxac nam namaxashec piguem le'ec.
