So Saulo icaatac qataq ỹauo'o da nque'eenaxac na ỹa'amaqten So Jesús
1Qaq so Saulo ỹauaachigui da nalaataguec so Esteban, qataq ỹataqta ỹaỹamaxareeta.
Qaq nache huetoigui se'eso na'a'q da qaicanaxangui nam ỹa'amaqten So Jesús ye Jerusalén, nache huo'o na taỹa ye 'alhua Judea qataq ye 'alhua Samaria. Qaq chaqsouate' soua Jesús lamaxa'she no'oirañi. 2Qaq huo'o som ỹalleppi maye ỹo'oxoreetac Ñim Lo'onatac 'Enauacna som ilayiñi co'ollaxa so Esteban. Somayepi ỹataqta nỹeetapeguelec somaye. 3Qaq so Saulo, nache ỹataqta iqopitaxanapec da icaatac na ỹa'amaqten So Jesús, inoxotta'ape naua nma'ate. Cam ilalec ỹale, huo'otaq 'alo, nache ỹauogonnauec, nache ỹauegueuo, da yaqto' icoñi'.
Qaỹa'axattac da no'on na'axaỹaxac ye 'alhua Samaria
4Qalaxaye nam nlagaxattacpi maye chegaqaña ye Jerusalén, namayepi ỹa'axattac da na'aqtac maye chegaqaigui da nca'alaxa, da huo'o da iviregue. 5Qaq huo'o so 'oonolec somayepi, le'enaxat Felipe, somaye co'ollaxa taỹa ye 'alhua Samaria. Huaña, nache ỹa'axattac So Jesús maye Lca'aguishec Ñim Lo'onatac 'Enauacna. 6Nache na shiỹaxauapi laponeua'a somaye. Qaq 'enauac namayepi ỹataqta huo'o da lqochoxo da la'aqtaxanaxac so Felipe, qataq nataqa'en qaỹauaachigui na na'anecpi maye sa qaỹauanapega da ỹo'ottac. 7Cha'aye qalota na shiỹaxauapi maye nqo'oneua'a somaye, huo'o na netaigui saqcha'a na'añaxac leguemaxaic, nache so Felipe ỹo'orauec, nache ne'ena saqcha'a na'añaxac leguemaxaic huenoxonec, ỹa'alaqtagui. Nache nataqa'en qalota na nataren nam ñi'iỹauo na lche lỹa qataq nam sa da'añiigue, nache namayepi ỹe'eguelaxalec da queuoỹapigui'. 8Qaq 'enauac nam netaña se'eso nỹecpi ỹataqta huo'o da ntonaxac.
9Qaq huaña, nache huo'o so ỹale le'enaxat Simón. Somaye co'ollaxa do'onataxaatega da hueta'aguet no'onataxac da ỹatenachettac na shiỹaxauapi maye hueta'a yi'iye 'alhua Samaria. Somaye 'eetego' naxa da ỹataqta huo'o naq 'enec. 10Nache 'enauac na shiỹaxauapi ỹataqta na'axaỹaxaatega somaye, ivira'a na sallaxanecpi qataq nam choxoraqpi. Nache namayepi 'eeta' naxa: «De'era ỹale hueto'ot da na'añaxac lta'araic maye chegoqo'ot Ñim Lo'onatac 'Enauacna.»
11Nache ỹataqta 'enauac da qaiqocha'a somaye, cha'aye huo'o dam la'añaxac da ỹatenachet somayepi da ỹo'ot nam sa qaỹauanapega. 12Qalaxaye nvi' so Felipe, nache ỹa'axattac dam no'on na'axaỹaxac maye lo'onataxanaxac Ñim Lo'onatac 'Enauacna. Qataq ỹa'axattac So Jesús maye Lca'aguishec Ñimaye, nache 'enauac nam hueta'a ye 'alhua Samaria da'amqaanataxan. Nache so Felipe qalota so nachelaxan ỹalleppi qataq 'alpi. 13Nache nataqa'en ỹalecteuo so Simón da da'amqaanataxan, nache qanachelaxan. Huaña, nache ca'attague' so Felipe, cha'aye ỹataqta huo'o da la'aalaxa da imeteetac nam lta'araicpi maye sa qaỹauanapega qataq nam na'anecpi maye ỹo'ottac so Felipe.
14Nache soua Jesús lamaxa'she maye netraña ye Jerusalén co'ollaq ỹaỹate'n da na netaña ye 'alhua Samaria ỹa'amaqten da la'aqtac Ñim Lo'onatac 'Enauacna, nache qaỹamaxalo yemaye soua Pedro qataq so Juan. 15Qaq co'ollaq mashe ivi't, nache nqouagaxaueetapegueleguete so ỹa'amaqten So Jesús maye netaña ye Samaria, da yaqto' ỹaconeguet somayepi So Saqcha'a Na'añaxac Qui'itta. 16Cha'aye somayepi saxanaxa co'ollaxa da huo'o ca 'oonolec da huo'otaq mashe tanguit So Saqcha'a Na'añaxac Qui'itta, ndotec da mashe qanachelaxan, qanachelaxangui da le'enaxat So Qarataxala' Jesús. 17Nache so Pedro qataq so Juan, soomaye ỹashel-leguete somayepi. Huaña, nache somayepi ỹaconeguet So Saqcha'a Na'añaxac Qui'itta.
18Nache se'eso Simón ỹauaachigui da So Saqcha'a Na'añaxac Qui'itta da ỹaconeguet so shiỹaxauapi co'ollaq soua Jesús lamaxa'she ỹashel-leguete somayepi. Nache somaye ỹachaxanapecoto aso alom soua namaxa'she, 19nache 'enapeco':
–Aỹem qaỹa'añim nataqa'en de'era na'añaxac, yaqto' da huo'o ca camachaqca sashel-lec, nache camaye nataqa'en tanguit So Saqcha'a Na'añaxac Qui'itta.
20Nache so Pedro 'enapego' somaye, 'eeta':
–Ana 'om 'arỹaueegue' da 'auqat, cha'aye 'aupi'itaxaatega da qaisheenaxata'a da lqouagaxanaqtaic Ñim Lo'onatac 'Enauacna. 21'Am saishet da 'ategueua'alo qomi' qataq saq 'am qoỹami' de'era no'onataxanaxac, cha'aye da 'arquiyaqteỹaxac saishet da ỹataqtelec da quegue Ñim Lo'onatac 'Enauacna. 22Chaqrata da 'aỹa'axaañi da 'aye'etaxaloxo, qataq 'anachoxonnot Ñim Lo'onatac 'Enauacna, shapegueto' qom ishet da 'am ichoxoren, nache ỹapalaxat da qauem lhuennataxa añi 'arquiyaqte. 23Cha'aye aỹem sela'a da qoquetague' so nqa'aic maye netangui da naquicoxo, qataq da lcoñetaxanaxac da qauem lataxac.
24Nache so Simón 'enapeco':
–Aỹem qanqouagaxauñiilec, qauỹaxañiỹot Ñim Lo'onatac 'Enauacna, da yaqto' saishet da huo'o ca aỹem tagui 'enauac nam qaua'axacheetac.
25Qaq co'ollaxa saxanaxa da quera'ai ye Samaria, so Pedro qataq so Juan, nache da'aqtaxaatrapeguem so shiỹaxauapi 'enauac nam ivireguetpi co'ollaq ña nnaictrague' So Jesús qataq ỹa'axattrac Somaye. Qaq co'ollaq ime, nache ỹe'eguelaxaregue da Jerusalén, qalaxaye co'ollaq quete', nache da'aqtaxaatrapeguem na Samaria le'ecpi de'era no'on na'axaỹaxac maye lo'onataxanaxac Ñim Lo'onatac 'Enauacna.
So Felipe qataq so ỹale maye lma' ye Etiopía
26Qaq co'ollaq ime de'era, nache so lamaxashec piguem le'ec Ñim Qarataxala', somaye 'enapego' so Felipe, 'eeta':
–Qoñisheguem, nache 'aigue da taguiñi, qoquegue so nqa'aic maye taalec ye toolec 'alhua chegaqasheguemec ye nỹecpi ye Jerusalén, taỹa'a ye Gaza. 27Nache so Felipe ñesheguem, da jec, nache natena'aguet co'ollaxa so ỹale maye chegaqa'a ye 'alhua Etiopía, somaye ỹataqta 'amaqtaqaic. Qaq somaye sa deco'o, qataq nacheso so ilotague' ana alom aso nate'e le'enaxat Candace, asom late'e nam netaña ye Etiopía. Qaq somaye taỹa co'ollaxa ye nỹecpi ye Jerusalén da natamnot Ñim Lo'onatac 'Enauacna. 28Qaq somaye co'ollaq ỹe'eguelaxague da lma', netangui aso naigona. Qaq itaxaỹaxaatac co'ollaxa aso lere so la'aqtaxanaxanec Ñim Lo'onatac 'Enauacna, le'enaxat Isaías. 29Nache So Saqcha'a La'añaxac Ñim Lo'onatac 'Enauacna 'enapego' so Felipe, 'eeta':
–Sa 'auỹotapeque asa'aso naigona.
30Nache so Felipe nqalgoq da yaqto' iviralec aso naigona. Qaq co'ollaq mashe saqaỹapeque asomaye, nache hua'aqtega se'eso ỹale maye 'amaqtaqaic da itaxaỹaxaatac aso lere so na'aqtaxanaxanec Isaías. Nache inattaco' se'eso ỹale, 'eeta':
–¿Peta'a 'auaỹaten ca llec ye 'autaxaỹaxaatac?
31Nache se'eso ỹale maye 'amaqtaqaic 'enapeco':
–¿Ca 'eeteco' da saỹaten ca llec yemaye, ye saishet da huo'o ca aỹem ỹapaxaguenec?
Nache somaye 'enapego' so Felipe da huenotsheguem da nqota'ai'.
32-33Qaq som na'aqtac maye itaxaỹaxaatac 'eeta':
«Camaye 'eeta'am ana qagueta da qanpetec na laue,
qataq 'eeta'am ca qagueta llalec da
qaỹauectaua'a ca nalaataqa'.
Camaye saishet da ỹa'alaq.
Ỹataqta qaica ca nyacnataguec qataq qaỹachetaiya'
qalaxaye saishet da dachetattac.
Saishet da no'on ca qaỹo'otec;
qataq saishet da ivita da huo'o ca llalec
cha'aye qanqat da nachaalataxac.»
34Nache se'eso ỹale 'amaqtaqaic inattac so Felipe, 'eeta':
–Ñaq aỹem 'anqouaguec da aỹem 'aua'aqtaxanem, ¿chaq negue't ca la'aqtac de'era, peta'a nacheso som la'aqtaxanaxanec Ñim Lo'onatac 'Enauacna da maiche na'axattapeguela't, qalqo' lỹa shiỹaxaua ca na'aqtaguec de'era?
35Nache so Felipe cot da la'aqtaxanaxac, ỹachegoxotchiguiña som na'aqtac maye qaitaxaỹaxaatac, qataq ỹa'axatem somaye da no'on na'axaỹaxac maye na'aqtaguec So Jesús. 36Qaq co'ollaq ivitra som huaña da huo'o na 'etaxat, nache se'eso ỹale maye 'amaqtaqaic 'enapeco':
–Ne'ena huo'o na 'etaxat, qaq ¿negue'to' ca iqalaatac da saishet da aỹem 'anachelaxan? 37[Nache so Felipe 'enapego' somaye, 'eeta': Da ỹataqta imauec da 'arquiyaqteỹaxac da 'aua'amqaanataxan nache ishet da 'am ñachelaxan. Nache se'eso ỹale 'enapeco' aỹem sa'amaqten da so Jesucristo nacheso so Llalec Ñim Lo'onatac 'Enauacna.]
38Nache somaye damaxasoxoolec da qaỹa'axaneguet aso nnotaxaqui, nache soomaye huenotre'c, nache tayingui so 'etaxat. Nache so Felipe nachelaxan se'eso ỹale. 39Qaq co'ollaq nnoxooyishegue'm so 'etaxat, nache So Saqcha'a La'añaxac Ñi Nataxala' ỹauec so Felipe. Nache se'eso ỹale maye sa deco'o sa lỹa da nauane' so Felipe. Qalaxaye somaye ỹe'eguelaxague ca lma', ỹataqta machiguiñi. 40Nache so Felipe hueta'a co'ollaxa ye nỹecpi Azoto. Huaña, nache quetaguilo naua nma'ate, ỹa'axattac da no'on na'axaỹaxac, choche ivitta'a ye nỹecpi Cesarea.
