Da 'eetec co'ollaq qantoonaxanaxan so Saulo
1Qaq so Saulo ñaq queto'ot da ỹareetega da ỹalauat na ỹa'amaqteetac So Qarataxala'. Qaq ỹoqo'oye somaye nqo'oneua'a so lta'a na ntaxaỹaxanaxanecpi da qaitaxaỹapegue' Ñim Lo'onatac 'Enauacna. 2Nache iỹaxanot somaye, da yaqto' ỹanem aca lmalate ca la'aqtac, da yaqto' so Saulo nqo'ona aca napaxaguenaxaqui na judiopi maye naña ye nỹecpi ye Damasco, da ỹe'eguena'a nam quetague' da lapaxaguenataxanaxac So Jesús da yaqto' nauega ye Jerusalén da icoñi', na'aictaxa da huo'otaq ỹalleppi, huo'otaq 'alpi. 3Qaq so Saulo co'ollaq mashe nayeetaua'a ye nỹecpi ye Damasco, nache nque'elaxatta da huo'o so ne'eraxa chegoqo'ot na piguem 'eeta'am na lqashelgaxa na auot, nache talec somaye. 4Nache so Saulo naañi. Huaña, nache hua'axaỹa so na'aqtac, 'eeta':
–Saulo, Saulo, ¿ta'ainco' ye Aỹem 'aucaatac?
5Nache so Saulo denataxan, 'eeta':
–'Am Ỹataxala', ¿negue't 'am?
Nache se'eso nvilỹaxac qataq 'enapeco':
–Qomye Nachaỹem Jesús, Nachaỹem maye Aỹem 'aucaatac. ['Am 'eeta'am da maiche 'anque'emaqchettapeguela't, qoneta'am da 'eetec ca nauegaxanaxala' huaca da maiche ỹasottapeeguet aca na'araxanaqte.
6Nache so Saulo ỹataqta iviloxolaqchet da lcolanaxa, nache 'enapeco':
–'Am Ỹataxala', ¿chaq negue't ca 'auauotaique da so'ot?
Nache So Qarataxala' 'enapego' somaye, 'eeta':]
–Qoñisheguem, nache 'anqo'oneua'a ye nỹecpi. Nache huaña qome da 'auaỹaten cam 'auo'ot.
7Qaq soua ỹale't maye nnaictagueto so Saulo, soomaye ỹataqta ñi'i', cha'aye soomaye hua'aqchiguilo co'ollaxa so na'aqtac, qalaxaye saishet da huo'o ca ilora'a. 8Qaq co'ollaq ime, nache so Saulo ñesheguem. Qaq na'aictaxa da no'oite' naua la'ai'te, qalaxaye saishet da nauaañi. Ỹoqo'oye qaỹacona na lhuaq, nache qaỹauectaua'a ye nỹecpi ye Damasco. 9Huaña yemaye, nache hueta'a tres na'axa'te saishet da nauaañi, qaq ỹoqo'oye saishet da deque'e, qataq saishet da nỹom.
10Qaq yem nỹecpi ye Damasco netaña so ỹale maye quetague' So Jesús le'enaxat Ananías. Qaq somaye huo'o co'ollaxa so lauanaqchec da So Qarataxala' nachaxana somaye. Nache 'enapego', 'eeta':
–¡Ananías! ¡Ananías!
Nache somaye 'enapeco':
–Aja', nachaỹem, 'am Ỹataxala'.
11Nache So Qarataxala' 'enapego' somaye, 'eeta':
–Qoñisheguem, nache qoquegue so nqa'aic le'enaxat Ỹashectec. Qaq qom 'avita ñi lma' ñi Judas, nache 'aunataxanaique ca ỹale maye chegaqa'ague da Tarso, le'enaxat Saulo. Qaq ñimaye nqouagaxaueetac, 12nache sauo'o so lauanaqchec da ila'a ca ỹale le'enaxat Ananías, da ỹashel-lec na lqaic yaqto' qaltaq ỹe'eguelaxalec da nauaañi.
13Nache co'ollaq hua'aqchigui de'era so Ananías, nache 'enapeco':
–'Am Ỹataxala', ỹataqta qalota na aỹem da'aqtaxanem que'eca ỹale nam qalota ỹo'otec sa ỹaỹamaxañi nam netaña ye nỹecpi ye Jerusalén maye 'am ỹa'amaqteetac. 14Qaq camaye nagui nache naỹa ne'ena souaqta'a, nachetac da la'aqtac na lataxala'pi na ntaxaỹaxanaxanecpi, da yaqto' ỹauec da icoñi' 'enauac nam ỹo'oxoreetac da 'are'enaxat.
15Qalaxaye So Qarataxala' 'enapego' somaye, 'eeta':
–'Aue, 'anqo'ona, cha'aye Aỹem ica'aguishec ñi'iñi ỹale da yaqto' Aỹem ỹa'axat da ỹa'axatem na ỹotta'a't shiỹaxauapi, qataq na lta'alpi namayepi, nataqa'en nam Israel le'ecpi. 16Qaq ñimaye Aỹem sachaxana qome na ỹataqta qalota nque'eenaxac souaxat Aỹem.
17Nache so Ananías jec da taỹa ca nỹec maye netaña so Saulo. Qaq co'ollaq inoxoneua'a ca hueta'a, nache ỹashel-lec somaye, nache 'enapego', 'eeta':
–'Am ỹaqaỹa Saulo, So Qarataxala' 'am nachaxana co'ollaq 'ananactague' na nqa'aic, Somaye aỹem namaxa 'am, da yaqto' qaltaq 'anauaañi, qataq da yaqto' 'am nlaqchigui so Saqcha'a Na'añaxac Qui'itta.
18Huaña, nache so Saulo huo'o aso chegoqtoiguilo naua la'ai'te, 'eeta'am ana lso na nỹaq, nache ishet da qaltaq nauaañi. Nache somaye ñesheguem, ime, nache qanachelaxan. 19Qaq co'ollaq ime, nache somaye deque'e, nache qaltaq huo'o da la'añaxac. Nache huo'oi soua na'axa'te da ỹalectaigui so ỹa'amaqten So Jesús maye netaña ye nỹecpi ye Damasco.
So Saulo ỹa'axattac da na'aqtac hueta'a ye nỹecpi ye Damasco
20Qaq co'ollaq ime de'era, nache so Saulo da'aqtaxaatapoigui ana napaxaguenaxaquipi na judiopi, ỹa'axattac So Jesús da nacheso So Llalec Ñim Lo'onatac 'Enauacna. 21Nache 'enauac nam na'axaỹaxaatega somaye ỹataqta huo'o da la'aalaxa, nache 'eeta':
–¿Saisheto' peta'a da saq nachera dam ỹale maye icaatac nam quetague' So Jesús maye netaña ye Jerusalén? Qataq ¿saisheto' peta'a da saq nachera dam naỹa'a ne'ena souaqta'a da ỹaconeua'a da icoñi' na ỹa'amaqten So Jesús, nache ỹaneua'a nam lataxala'pi na ntaxaỹaxanaxanecpi?
22Qalaxaye so Saulo lamaaxa nquigaxattec da la'añaxac da ỹachaxaatac So Jesús da nacheso Som Lca'aguishec Ñim Lo'onatac 'Enauacna, choche ivitta'a da ỹataqta sa ỹaỹaten ca 'eetec naqa'en na judiopi maye netaña ye nỹecpi ye Damasco.
So Saulo naneltaxaneguet na judiopi
23Qaq co'ollaq mashe qaỹoqteguelo soua na'axa'te, nache na judiopi detaxaỹapigui da ỹauotaique da ỹalauat so Saulo. 24Qalaxaye somaye la'axaỹaxac de'era. Qaq ye pe qataq ye na'a'q na judiopi nauaataique somaye, hueta'alo naua laso'omi so lpaqtaxat ye nỹecpi da ỹauotaique da ỹalauat. 25Qalaxaye som ỹa'amaqtenpi somaye, se'eso pe ỹachangui somaye aso no'oxona late'erai, nache ỹasaqteueegue da laỹe so lcopaqtaxat so nỹecpi. Huaña, nache somaye qoỹet.
So Saulo hueta'a ye Jerusalén
26Qaq so Saulo co'ollaq ivireua'a ye Jerusalén, nache ỹauotaique da ỹalegoigui na ỹa'amaqten So Jesús. Qalaxaye 'enauac namayepi ñe'eta'aguet somaye, cha'aye saishet da ỹa'amaqten da somaye mashe ỹa'amaqten So Jesús. 27Qalaxaye so Bernabé ỹauec somaye, nache ỹauegueua'alo soua Jesús lamaxa'she. Nache ỹataqta da'aqtaxaatema da 'eetec so Saulo co'ollaq nauane' So Qarataxala' Jesús co'ollaq huangui so nqa'aic, qataq da 'eetec co'ollaq detaqtague' somaye, nataqa'en da 'eetec da ỹataqta saishet da ñe'etapeguelec da ỹa'axattac da le'enaxat So Jesús co'ollaq hueta'a ye nỹecpi ye Damasco. 28Nache so Saulo hua'a ye nỹecpi ye Jerusalén, nache ỹalectaiguilo soua Jesús lamaxa'she. 29Nache somaye ỹataqta saishet da ñe'etapeguelec da ỹa'axattac So Qarataxala', nache na'aqtaxaatague' qataq ncotatague' nam judiopi maye ỹaỹate'n naua la'aqtaqa na griegopi. Qalaxaye namayepi co'ollaxa, ỹauotaique da ỹalauat somaye. 30Nache som ỹa'amaqtenpi So Jesús co'ollaq la'axaỹaxac de'era, nache ỹauec so Saulo ỹauega ye nỹecpi ye Cesarea. Huaña, nache ỹamaxa ye nỹecpi ye Tarso.
31Nache 'enauac nam ỹa'amaqten So Jesús maye netaña ye 'alhua Judea, qataq ye 'alhua Galilea, qataq ye 'alhua Samaria, namayepi ỹataqta saishet da ñe'etega da sa qaiyacnapec. Nache queto'ot da ỹo'oxoreetac So Qarataxala', nache ima'ape naua na'axa'te da nquictauec da lpi'iỹaxac So Jesús. Qaq So Saqcha'a Na'añaxac Qui'itta ỹataqta ỹa'añaqchettac namayepi da nquictauec naqa'en ye lcata na da'amqaanataxan.
So Pedro nataren so Eneas
32Qaq so Pedro co'ollaq coleetapigui 'enauac na nqaỹañecpi, maye ỹa'amaqteetac So Jesús, nache nataqa'en ivira'a so 'amqaanataxanaxaicpi maye netaña ye nỹecpi ye Lida. 33Qaq huaña yemaye, nache ilalec so ỹale le'enaxat Eneas. Somaye ivi' naua ocho vi'iye da sa no'on, sa da'añiigue. Qaq ỹoqo'oye huetalec ca lacanec. 34Nache so Pedro 'enapego' somaye, 'eeta':
–Eneas, 'am nataren So Jesucristo, qoñisheguem, nache 'anana't na 'aracanec.
Nache so Eneas ñesheguem. 35Qaq 'enauac ỹauaachigui de'era nam netaña ye nỹecpi ye Lida qataq nam netaña ye 'alhua Sarón. Huaña, nache ỹa'amaqten So Qarataxala' Jesús.
Aso Dorcas qaltaq nca'alec qanqoỹen
36Qaq se'eso ñegaxasom ye nỹecpi ye Jope, huo'o aso ỹa'amaqten So Jesús, asomaye naua judío la'aqtaqa le'enaxat Tabitá, qaq naua griego la'aqtaqa Dorcas. (De'era ne'enaxat naigui da ñi'imshe.) Asa'aso 'alo ỹataqta no'on da lo'onataxanaxac, qataq itauaatac na choxoraqpi. 37Qaq se'esoua na'axa'te, nache aso Dorcas sa no'on, nache ileu. Qaq co'ollaq qaimat da qanachelaxaatac, nache qairosheguemec so lỹa nỹec maye pa'aỹasheguem. 38Qaq yi'iye Jope, nache saqaỹapeque ye Lida yem hueta'a so Pedro. Nache som 'amqaanataxanaxaicpi co'ollaq la'axaỹaxac somaye da hueta'a yemaye, nache qaỹamaxalo soua dos ỹale't da 'enapega, 'eeta':
–Qomi' 'anqouagueque da sa 'anaỹaloxon da 'ananaỹa na nỹecpi na Jope.
39Nache so Pedro ca'ateguelo soomaye. Qaq co'ollaq ivilye', nache somaye qaỹaviguisheguemec se'eso nỹec maye huetaigui aso Dorcas. Qaq qalota aso pa'aipi datataua'a so Pedro nỹeetagui. Nache ỹachaxaatac ana npotopi qataq na npo'pi maye lo'onatacpi asomaye co'ollaq ña qanachattague'. 40Qaq co'ollaq ime, nache so Pedro ipa'axanec 'enauac somayepi, nache ỹa'alyiñi naua l-llectel da nqouagaxaunot Ñim Qarataxala'. Qaq co'ollaq ime, nache ỹamatalec asom leuaxai, nache 'enapega, 'eeta':
–Tabitá, qoñisheguem.
Nache asomaye nlouec. Qaq co'ollaq ila'a so Pedro, nache ñesheguem, nache nso'ooñi. 41Nache so Pedro ỹacona na lhuaq asomaye, nache ỹanaxanaxaasheguem. Ime, nache iỹaxaneuga so nqaỹañecpi maye ỹa'amaqteetac So Jesús, qataq asom pa'aipi, nache ỹachaxan asomaye da qaltaq nca'alec. 42Qaq de'era 'enauac nam netaña ye nỹecpi ye Jope ỹaỹaten, nache ỹataqta qalota na ỹa'amaqten So Qarataxala'. 43Nache so Pedro ỹataqta huo'oi soua na'axa'te da hueta'a ye Jope, netaña ca lma' so le'enaxat Simón, lo'oc lo'o.
