Da nỹaxanaxac da qaỹe'eguelaqot Ñim Lo'onatac 'Enauacna
1Qami' Israel le'ecpi, ña
qana'axaỹaxañiỹa da ỹa'aqtac,
qataq qana'axaỹaxañiỹa de'era ñachoxonnaxac,
maye qami' taleguete ñaqa'en.
2Mashe huañi nam ỹataqta huo'o da lyac Israel,
qaq nache saishet da qaltaq ỹe'eguelaxa da ñesheguem,
mashe huañi da huetalec ye maiche na'alhua,
nache qaica ca anac da nauaxaỹaxaasheguem.
3Qaq 'era da la'aqtac Ñim Lo'onatac
'Enauacna Ñim Nataxala',
co'ollaq 'enapega 'enauac
na Israel le'ecpi, 'eeta':
«Da huo'o ca 'oonolec nam huaqta'a't nỹecpi
da ỹamaxa ca alaataxac ca mil alleppi,
qaq camayepi, nachecata ca cien cam ñe'eguelaq,
qaq da huo'o ca 'oonolec nam
huaqta'a't nỹecpi da ỹamaxa
ca alaataxac ca cien,
qaq camayepi, nachecata ca diez
cam ñe'eguelaq qome.»
4Qalaxaye da la'aqtac Ñim Nataxala'
da 'enapega na Israel le'ecpi, 'eeta':
«Ñaq aỹem qanmichiỹaique qome,
yaqto' qanca'alleeuec.
5Qaq saishet da qanqo'oñiỹa ye Betel,
qataq saishet da qa'aiteua'a ye Gilgal,
qataq saishet da qa'aitelec ye Berseba,
cha'aye ye Gilgal, qaỹauega qome ca ỹaqa'a 'alhua,
qataq ye Betel nlachiguiñi qome.»
6Qaq ỹoqo'oye qanmichiỹaique qome
Ñim Nataxala' yaqto' qanca'alleeuec,
ten qom anacot ca norec
nache talec naqa'en 'enauac na Israel le'ecpi,
nache qaica ca anac nam Betel le'ecpi
da ỹalamat camaye.
7Qaq choxoraxaso' nam shiỹaxauapi
maye nmeneguet naqa'en da
ỹaỹamaqchiguiñi lataxac nam qauemsat,
nache ỹasaxaiya' da nalochiguiñi lataxac.
8Qanmichiỹaique qome ñim lo'onata
'enauac ana huaqaañipi,
ñim nañigui naqa'en na yo'oxoñi nam pe,
qataq nañigui naqa'en na pe nam yo'oxoñi,
qataq iỹaxana na 'etaxat maye
huetangui aso auaxai nache icorelec ana 'alhua.
¡Qaq Ñimaye le'enaxat, Nataxala'!
9Ñimaye ilaxachigui cam ỹataqta qaramta,
qataq nlachiguiñi naqa'en cam
ỹataqta qanpaxatteua'a ñe'eguenaxaqui.
10Qaq qami' ye ỹataqta qanquiỹai
nam iuettapeguelec da ỹaỹamaqchiguiñi lataxac,
qataq qanquiỹai nam ỹa'axattac da 'eesa lataxac.
11Qaq souaxat da ỹataqta huetaiya'
qanqa'eñi nam choxoraqpi,
nache desheetenaxana qanqa'eñi na ala
na trigo da qami' isheete'n,
qaq ỹoqo'oye qami' saishet qome
da qoñiỹaigui na nỹecpi,
nam chegaqaigui na no'onatac coma'
maye qano'oxoñiisheguem,
qataq saishet qome da qauañoxoche
da qanỹomiigui na lataxa maye
chegaqaigui anam qaỹa'añiiñi co'ollaxa uva.
12Aỹem saỹaten da ỹataqta qalota
na qauem qauo'ocheetac,
qataq na ỹataqta qalota qarasouaxashichi,
qataq da ỹataqta huetaiya'
qanqa'eñi na no'on da lataxac,
qataq yem huaña naxa da qanmit nam nasouaxashetpi,
nache huaña da qauacoñeetapeeguet
ana nsheetenaxanaqte,
da yaqto' qanauec qanqa'eñi na choxoraqpi.
13Qaq ỹoqo'oye cam ỹaanaxanaxaic
qalaq choche ñe'emaxat,
cha'aye ỹaỹaten da qauema naua na'axa'te.
14Qaq ỹoqo'oye qanmichiỹaique qome da no'on,
qaq saishet da qanmichiita'a
na qauem yaqto' qarca'alliiuec,
yaqto' 'eesa da qoñiỹapec naxa
da qami' hueta'agueta,
Ñim Nataxala', maye Lo'onatac 'Enauacna,
maye Qaica ca Ỹaqalanapec.
15¡Sa qauoñiiguet qome da qauem,
nacherata da qauauochec da no'on!
Qataq nam huañapi naxa da qanmit na nasouaxashetpi,
nache qauo'oche qome da
ỹaỹamaqchiguiñi lataxac,
cha'aye Ñim Nataxala' maye Qaica ca Ỹaqalanapec,
sa iuena'a da choche ichoxoren
na lca'alaxaicpi Israel le'ecpi.
16Qaq ỹoqo'oye da la'aqtac Ñim Nataxala',
maye Lo'onatac 'Enauacna,
maye Qaica ca Ỹaqalanapec, 'eeta':
«Ỹataqta 'enauac qome na naponqa'pi da huo'o da noinaxac,
qataq 'enauac na nqa'aicpi da
qaỹa'aqtega da na'alaxac souaxat da qui'ic,
qataq nam danaxaateguelec
na 'alhuapi qaiỹaxanegue da yaqto' nỹen,
qataq nam noinaxaicpi da yaqto' nỹen.
17Qataq 'enauac qome na uva
lma'pi da huo'o da noinaxac,
qom ñanac da sauo'o ca qauaxanaguiiqui.»
Qaq 'era da la'aqtac Ñim Nataxala'.
18¡Choxoraicpiolec qome nam
ỹayeeta'aguet ca na'a'q maye lviraxac Ñim Nataxala'!
¿Qaq peta'a qauaỹachiñi ca
'eetec qome que'eca na'a'q?
Cha'aye que'eca na'a'q, nda'a't qome na napalaxa,
nache qaica ca yo'oqchiguiñi.
19Cha'aye 'eeta'am qome ca dataueeguesop ca llon,
qalaxaye qaltaq natena'aguet ca oso,
huo'otaq ca pa'aigui ca lma' da
ỹasheleua'a na lque camaye,
nache inac ca 'araxanaq.
20Qaq que'eca na'a'q maye lviraxaqui Ñim Nataxala',
camaye napalaxa qaq saishet da yo'oqchiguiñi,
qataq ỹataqta sa nsatchiguiñi napalaxa,
nache ỹataqta qaica ca yo'oq.
21Aỹem, ỹataqta saỹemec nam
qauo'ocheetac nquia'axacpi,
qataq seqaiga nam ño'oxonnataxanaxacpi
maye qauo'ocheetac.
22Qaq na'aictaxa da aỹem qaỹa'añiỹot
ana qarachetaqtaxanaqche qaỹavigaxatta,
huo'otaq ana qarachetaqtaxanaqche ala na nañiguishec
da yaqto' aỹem qavio'oxoreñi
qalaq saishet da saconeguet qome,
qataq saishet da seqocha'a ca
qaỹa'añeeuo qarachetaqtaxanaxache qanhuaachigui,
maye chegaqaigui nam chaxaraicpi
qareloi huaca llalaqpi.
23Qaq ña qauỹocheuga
qome da l-lamaxa nam qaro'oñiqui,
cha'aye saishet da ña'axaỹaxana
da l-lamaxa anam arpapi.
24Qalaxaye da ỹaỹamaqchiguiñi lataxac
'eeta'am qanqa'eñi qome ca llec
na 'etaxat da ipaxanec,
qataq da no'on lataxac 'eeta'am qanqa'eñi
ca chochaq tatec npaxaatasheguem 'etaxat.
25Qami' Israel le'ecpi,
¿peta'a aỹem qaỹa'añeetacot
co'ollaxa aca qarachetaqtaxanaqche
soua cuarenta vi'iye co'ollaq
qoquiitalec ye toolec 'alhua?
26Qaq nagui qalaq qauacheetac qome
so lqui'i so qarta'ai Sicut,
qataq aso ne'enaqta huaqaañi Quiún, som
qanatamnaxala'chilli' maye maiche
qauo'oche' co'ollaxa.
27Qaq ỹoqo'oye aỹem so'ot qome da
qami' qaỹauegalo yem ỹataqta pa'aicra'a ye Damasco.
Qaq 'era da la'aqtac Ñim Nataxala',
Ñim Lo'onatac 'Enauacna,
maye le'enaxat Qaica ca Ỹaqalanapec.
