Amós 4

₁Ña qana'axaỹaxañiỹa de'era na'aqtac,

qami' maye qoñeeta'am ana huacapi ye Basán,

qami' 'alpi maye Samaria lashepi, maye huetaiya' naxa qanqa'eñi na choxoraqpi,

qataq qaica ca nyacnataguec qanqa'eñi nam huo'o da lhuenaxanaxa,

qataq qauamaqaitac naxa nam qarhuaipi, qoñiita':

«Ña qandoiuo cam qaraquip lataxa».

₂Ñim Lo'onatac 'Enauacna ỹan da la'aqtac

souaxat da qui'itta lataxac Ñimaye, nache 'eeta':

«Qami' nata'alo ca na'a'q maye qaỹauota'a qome na nquerenaxanaxat lcat da qami' qaỹauecta'agueta,

qaq nam qaỹa'alquipi qalaq qoỹemaxaua'a qome aca qoinapi da qaỹauecta'aguet.

₃Qataq ñi 'oonolec da qoñeeta ca'attaueegue qome ca lỹa da qa'aichiviigui ca lauac ca npaqtaxanaxat,

nache qami' qaỹasaxareega añi qasoxonaxa Hermón».

Qaq 'era da la'aqtac Ñim Nataxala'.

₄¡Qanqo'oñiỹa qome ye Betel,

nache qauo'oche da qaye'etaxaloqoi,

qataq qanqo'oñiỹa ye Gilgal nache qoquiito'ot da qaye'etaxaloqoi!

Qataq qaỹa'añeeuo aca qarachetaqtaxanaqche ye nte'eta,

qataq aca qandiezmoi da inoxoorec caua tres na'axa'te.

₅Qataq qauavigaxache aca nauole 'ayiiña maye qaica ca lalegue,

da qarachetaqtaxanaqche da qaỹa'añi da qana'achecỹaxaqui,

qataq qaua'axacheeuec anam qarachetaqtaxanaqche

maye maiche qami' chegoqchiguilo da qaỹa'añeeuo,

cha'aye nachera da ỹataqta qanqopichiỹa

da qauo'oche qami' Israel le'ecpi.

Qaq 'era da la'aqtac Ñim Nataxala'.

₆Aỹem, so'ot co'ollaxa da huo'o na nqouaxa

'enauac nam qaralamaxache huaqta'a't nỹecpi,

qataq qaica ca aloq ñaqa'en nam qarhuo'oi le'ecpi,

qalaxaye ñaqaiyeta qami' saishet da aỹem qañe'eguelaqỹa.

Qaq 'era da la'aqtac Ñim Nataxala'.

₇Qataq co'ollaq saxanaqcaua soua tres ca'agoxoiqa

da qanqat na ala na nañiguishec,

nache vi'iiguet ñaqa'en so auot.

Nache na huaqta'a't nỹecpi huo'o na talec ñaqa'en so auot,

qataq huo'o na saishet da talec ñaqa'en,

qataq na no'onaxapi huo'o na talec ñaqa'en so auot,

qataq huo'o na saishet da talec ñaqa'en

nache deqaqa souaxat da qaica ca auot.

₈Nache na shiỹaxauapi quetagui nam

huaña na huaqta'a't nỹecpi da ilotaique 'etaxat,

qalaxaye saishet da ỹataqta nmeta da

laquipegaxanaxac namayepi.

Qalaq ñaqaiyeta qami' saishet da aỹem qañe'eguelaqaỹa.

Qaq 'era da la'aqtac Ñim Nataxala'.

₉Qataq qami' seroleguete so lta'araic la'at

maye ỹataqta dapaqa qataq na qoche'l,

qataq aso shiiquioxoipi da yaqto' ỹauta

'enauac aso qa'añiguishe,

uvapi, higopi, qataq aso olivopi.

Qalaq ñaqaiyeta saishet da aỹem qañe'eguelaqaỹa.

Qaq 'era da la'aqtac Ñim Nataxala'.

₁₀Qataq qami' ñamaxalo da qanhuaxanaguiiqui

maye 'eeta'am so ñamaxa co'ollaxa ye Egipto,

qataq serolec na ỹeelonec da qaỹalauat so nsoxoppi

nache qaiuotaxanec so lalo caipi,

qataq qauaviquiitañi ñaqa'en na laita so leuaxaicpi.

Qalaq ñaqaiyeta saishet da aỹem qañe'eguelaqaỹa.

Qaq 'era da la'aqtac Ñim Nataxala'.

₁₁Qataq qami' seroleguete so ỹataqta lta'araic lchec da qami' ñelaxaayiñi,

'eeta'am co'ollaq ñelaxaañi ye Sodoma qataq ye Gomorra,

nache qoñeeta'am aca poqo maye qanqateeguesop ca norec,

qalaxaye ñaqaiyeta saishet da aỹem qañe'eguelaqaỹa.

Qaq 'era da la'aqtac Ñim Nataxala'.

₁₂Qaq ỹoqo'oye qami' Israel le'ecpi nataqa'en qami' so'oteque qome de'era,

qaq cha'aye so'ot qome damaye

nache qanaỹamaxache da qauanaiua'a nam Qanatamnaxala'ai.

₁₃Cha'aye nachaỹem da ỹo'onata

ana qasoxonaxapi, qataq so'ot na la'at,

qataq saỹaanaxanaxanec nam shiỹaxauapi nam iuen da ỹo'ot,

qataq so'ot da yo'oqchiguiñi na napalaxa,

qataq sequeuoteguelec nam ỹataqta

qaỹoqotcheguemec 'alhua.

Aỹem Nataxala', Aỹem Atamnaxala',

'era da ỹe'enaxat: Qaica ca Saqalanapec.