Amós 7

₁Qaq 'era da ỹauanaqchec maye aỹem ỹanem Ñim Nataxala', co'ollaq ñaq cheta'ague da ñaxat nam dalaxaic nañiguishec maye qoỹaañi naxa da ime da qanqat na ala nam hua'auñi lañiguishec so nta'a, nache sela'a Ñim Nataxala' da iqataxaatai' aso qalota shiiquioxoipi. ₂Qaq aso shiiquioxoipi co'ollaq mashe ỹauta ana huoue maye huetalec ana 'alhua, nache shenapec:

¡'Am Nataxala' maye Ñatamnaxala', qomi' 'auchoxore'n nagui! Cha'aye ¿ca 'eeteco' da nala'aguet de'era ne'ena 'aralamaxat nhuo' le'ecpi maye chegoxoguetpi so Jacob, ye namayepi ỹataqta saq 'amaqtaq? ₃Huaña, nache Ñim Nataxala' huo'o da lchoxonnataxanaxa, nache 'eeta':

¡Aỹem saishet qome da sepaca'a da so'ot de'era!

₄Ime, nache Ñim Nataxala' qaltaq Aỹem ỹachaxana so ỹataqta lta'araic norec, nache somaye ỹataqta deqaxaỹañi naqa'en aso qaỹoqchiguingui auaxai late'erai, qataq nmichiguiñi naqa'en so no'onaxapi. ₅Nache aỹem shenapec:

¡'Am Nataxala', ña 'avi'iiguet qome! Cha'aye ¿ca 'eeteco' da nala'aguet de'era ne'ena 'aralamaxat nhuo' le'ecpi maye chegoxoguetpi so Jacob, ye namayepi ỹataqta saq 'amaqtaq? ₆Huaña nache Ñim Nataxala' huo'o da lchoxonnataxanaxa, nache 'eeta':

¡Nataqa'en de'era, saishet qome da sepaca'a da so'ot!

₇Qaq Ñim Nataxala', nataqa'en aỹem ỹachaxana da Ñimaye nachattaua'a na laỹe so npaqtaxanaxat, nache nasoqta'a aso laloqnaxanaqte nam nỹec lo'o. ₈Nache Ñim Nataxala' aỹem inat, 'eeta':

¡Amós! ¿Negue't na 'aulota'a? Nache aỹem sheeta':

Qomye selota'a ana laloqnaxanaqte na nỹec lo'o.

Nache Ñim Nataxala' 'eeta': Aỹem so'ogoxona qome ana'ana laloqnaxanaqte na nỹec lo'o, da ñaloqten da lataxac na ỹalamaxat nhuo' Israel le'ecpi, da huo'otaq ỹaỹamaqchiguiñi da lataxac, cha'aye aỹem saishet qome da she'eguelaxa da sechoxoreetac namayepi. ₉Qaq na qaỹoqotcheguemec natamnaqa'pi so Isaac nlachiguiñi qome, qataq anam natamnaxaquipi so Israel ỹataqta nlachiguiñi qome. Nache ñachaañi qome sauota'a ca ỹainec da sataỹa'aguet na llalaqpi so Jeroboán.

₁₀Qaq so Amasías, maye ntaxaỹaxanaxanec ye Betel, ỹamaxa da la'aqtac so Jeroboán, maye nta'a ye Israel, 'eeta': «So Amós, quetagui na Israel le'ecpi da 'am quetapeguelec, qaq ne'ena shiỹaxauapi sa iuen da nache queta da na'axaỹaxaatega somaye. ₁₁Cha'aye da la'aqtac somaye, 'eeta':

‹So Jeroboán, qairolec qome ca ỹeelonec da qaỹalauat, nache na Israel le'ecpi noxonecpi qome, nache qaỹauega ca ỹaqa'a 'alhua.›» ₁₂Huaña, nache so Amasías, 'enapega so Amós, 'eeta':

¡'Am na'aqtaxanaxanec, qoca'ai qome ne'ena! ¡Da 'anshetaique da 'auque'etapigui da 'ara'aqtaxanaxac, nache 'anqo'ona ye 'alhua Judá! ₁₃Qalaxaye nache 'avia'axaneguet da 'ara'aqtaxanaxac da qoueta'a na Betel, cha'aye namaye nache natamnaqa' na nta'a, qataq na shiỹaxauapi. ₁₄Qalaxaye so Amós, ỹasateguet so Amasías, 'eeta':

«Aỹem, saishet da aỹem na'aqtaxanaxanec, huo'otaq da sauotaique da sevira'a da aỹem na'aqtaxanaxanec, cha'aye nacherata da seque'etapigui da selotague' ana qaguetapi, qataq da llapootac ana ala ana no'onaxa lashe higo. ₁₅Qalaxaye Ñim Nataxala', aỹem nqateeguesop da selotague' ana qaguetapi, nache aỹem 'enapega 'eeta': ‹Qojec qome, 'anqo'ona ye ỹalamaxat nhuo' Israel le'ecpi, nache 'aua'aqtaxanem da ỹa'aqtac.› ₁₆Qaq ỹoqo'oye nagui 'ana'axaỹaxana da la'aqtac Ñim Nataxala', cha'aye 'am qonapec: ‹Saishet da 'aua'axata'a ca qauem da talec na Israel le'ecpi, qataq da 'auataỹa'aguet na chegoxoguetpi so Isaac.› ₁₇Qalaxaye da la'aqtac Ñim Nataxala', 'eeta': ‹Aso 'arhua taỹa qome da nquisheguetaxac da huaña ne'ena huaqta'a't nỹecpi, qaq na 'aỹa'alaqpi qataq ana 'aỹa'alepi qalaq qairolec qome ca ỹeelonec da qaỹalauat, qaq na 'ana'alhua qalaq qanallichigui qom qoỹanec, 'am qalaq 'aleuaña qome ca ỹaqa'a 'alhua, qaq na Israel le'ecpi qalaq noxonecpi qome nache qaỹauega ca qaỹoqta 'alhua.›»