Aso npaqta maye huetagui ana ỹeta ala ana nañiguishe
1Qaq Ñim Lo'onatac 'Enauacna, nataqa'en aỹem ỹachaxana aso npaqta maye huetagui ana ỹeta ala ana nañiguishe, 2nache Ñimaye aỹem inat, 'eeta':
Amós, ¿negue't na 'aulota'a? Nache aỹem sheeta':
Qomye selota'a añi npaqta maye huetagui ana mashe ỹeta ala ana nañiguishe. Nache Ñimaye 'eeta':
Na Israel le'ecpi, mashe ỹoqta ỹe, ỹoqo'oye aỹem saishet da qaltaq she'eguelaxa da sechoxoreetac qome. 3Nache que'eca na'a'q, ne'ena no'onecpi maye qaỹo'ootac da huaña ñi nma' lta'araic, nmeneguet qome da achoxonnaxac. Qataq ỹataqta qalota qome na ileu, nache choche qancheraxaatec da qaỹasaxauec. Qaq 'era da la'aqtac Ñim Nataxala'.
Mashe sa qaỹapeque da qanmit na Israel le'ecpi
4Ña qana'axaỹaxañiỹa de'era, qami' maye sa qauchoxoreñi nam shiỹaxauapi maye huo'o da lhuenaxanaxa, qataq huetaiya' qanqa'eñi na choxoraqpi ana 'alhua, 5qataq qoñiỹapec naxa: «¿Chaq laguio' da inoxonec na nquia'axac maye qaỹo'ot naxa da dalaxaic ñi ca'agoxoic, yaqto' ishet da semenaq na ala na trigo? Qataq ¿chaq laguio' da inoxonec nam na'a'q mataxaqui, da yaqto' qaỹoqteua'a ñaqa'enaq aca lasheue da semenaq na ala na nañiguishec, sauoqta'a ana saq 'en naloqnaxanaxaqui? 6Nache huetaiya' ñaqa'enaq qome na choxoraqpi, nache ivitta'a da maiche nmeela't da nlatac da yaqto' isheeten ana lavigaxaiste, qaq nam huo'o da lhuenaxanaxa qalaq 'eeta'am ñaqa'enaq aca lasheue ca pela', qataq semenaq nam lvi na trigo». 7Qaq Ñim Nataxala', ỹan da la'aqtac souaxat da la'amaqchec so Jacob, 'eeta': «Aỹem saishet qome da secoua'ai nam qauo'oche».
8Qaq ¿peta'a saishet qome da cholaxan ana 'alhua souaxat de'era?
Qataq ¿peta'a saishet da nỹen qome na shiỹaxauapi maye netalec anamaye?
Qom nquiguisheguem qataq nquiguiñi ana 'alhua, 'eeta'am na 'etaxat so tala Nilo.
9Qaq que'eca na'a'q, 'enapec Ñim Nataxala',
aỹem, so'ot qome da pal na le'eraxa añi nala' da na'a'q laiñi,
nache que'eca na'a'q laiñi qalaq ỹataqta napalñi ñaqa'en ana 'alhua.
10Nache que'eca laloxoquipi na nquia'axacpi,
qalaq nmeneguet ñaqa'en da qanỹeetapeguelec na leuaxaicpi,
qaq da no'onaxanaxac qalaq nmeneguet ñaqa'en da achoxonnaxac,
qataq so'ot da qaỹa'añiiñi na nogoxot nasouaxaqui,
qataq da qanamarec naua qarqaigolli' souaxat da qanqui'iqui.
Qataq qanoỹeñiitac qoñiita'am ca shiỹaxaua da ileu ca ỹataqta 'oonolec llalec,
qaq da ime nache ỹataqta lta'araic que'eca qanqui'iqui.
11Qataq da la'aqtac Ñim Nataxala', 'eeta':
Anacte' caua na'axa'te da ñamaxa ana 'alhua ca nqouaxa,
qalaxaye que'eca nqouaxa saishet da nachera da qaica ca qanallec,
huo'otaq nam naquip souaxat da qaica ca 'etaxat,
maye nacherata da nhuenaxanaxa da qana'axaỹaxana da la'aqtac Ñim Nataxala'.
12Nache na shiỹaxauapi nsomaxaatapigui' qome,
souaxat da nmittaique da la'aqtac Ñim Nataxala',
nache queta'ague ana auaxaipi, chegoqchiguiña da sheu' nache ivitta'a na pa'aỹa'ague da yo'oxoñi,
qalaxaye saishet qome da ỹanata da la'aqtac Ñim Nataxala'.
13Qaq que'eca na'a'q, nache anam ỹataqta 'onaxai qa'ampi,
qataq nam ỹataqta 'añaxaicpi nsoxoppi
qalaq decopchetac qome souaxat na laquip.
14Qataq nam ỹanot da la'aqtac nam atamnaxala'pi ye Samaria, maye 'eeta':
«Aỹem san da ỹa'aqtac souaxat da lca'alaxa ñim atamnaxala' ye Dan»,
qataq «souaxat da lca'alaxa ñim atamnaxala' ye Berseba»,
qaq namayepi huañi qome nache saishet da qaltaq ỹe'eguelaxa da ñesheguem.
