Daniel 3

₁So nta'a Nabucodonosor damaxasoxoolec da qaỹo'ot so ne'enaqtac nda'a't oro, qaq somaye ivi' treinta metros ye lshequitcheguemegue qataq tres metros ye lcachiguiñi, nache damaxasoxoolec da qoỹanaña so nalochiguiñi 'alhua ye Dura, maye huaigui ye 'alhua Babilonia. ₂Ime nache damaxasoxoneuga 'enauac so nta'alpi, maye ilotague' na 'alhuapiolec, qataq so lataxala'pi so alleppi, qataq so nta'alpi maye ilotague' na 'alhuapi, qataq so chegoqtecot na nqataxacpi, qataq so ilotague' ana anom, qataq so nmit nam nasouaxashetpi, qataq so 'amaqtaqaicpi qataq so laỹepi nataxala'pi yi'iye 'alhua, da yaqto' ỹalectaua'a da qoỹaneuo se'eso ne'enaqtac maye damaxasoxoolec co'ollaxa somaye da qaỹo'ot. ₃Nache 'enauac se'eso 'amaqtaqaicpi shiỹaxauapi yi'iye 'alhua laỹona't, hueta'a so naña so ne'enaqtac da yaqto' ỹo'oxoren, da qoỹaneuo somaye. ₄Qaq som qaipataxaguet da ỹa'axat da qanayecot da qaỹo'ot se'eso naỹonaxac na'axannec da lavilỹaxac da detaqa 'eeta': Qami' nhuo' le'ecpi, qataq qami' ỹotta'a't shiỹaxauapi, qataq qami' maye ỹotta'a't naua qara'aqtaqalle', ña qana'axaỹaxañiichiguiñi: ₅Qom choche qaua'aqaỹa da qaỹashiiyigui aca nasheere, flauta, cítara, lira, salterio, gaita qataq 'enauac aca ỹotta'a't nviquepi, nache qaua'ayiiyiñi qome naua qarllectelli' da qanatamñiỹot ñi ne'enaqtac oro maye damaxasoxoolec co'ollaxa ñi nta'a Nabucodonosor da qaỹo'ot. ₆Qaq 'enauac qome ca saishet da ỹa'alyiñi naua l-llectel da ỹo'oxoren ñi'iñi ne'enaqtac, nache saqaỹaỹaloxon qome da qaỹasaxaigui aca nqatelaxanaxaqui maye 'ettaigui. ₇Qaq ỹoqo'oye se'eso qalota shiỹaxauapi, co'ollaq choche hua'axaỹa da l-lamaxa 'enauac aso nviquepi, nache ỹa'alyiñi naua l-llecte da ỹo'oxoren se'eso ne'enaqtac oro. ₈Qalaxaye huo'oi co'ollaxa soua Caldea lashe' da iqopitaxanapec da ỹauo'o da lasouaxashet so judiopi, da ỹa'axateua'a so Nabucodonosor, ₉nache soomaye 'eeta': ¡'Am nta'a, nache 'eetai' qome da 'anca'altauec, qataq da 'are'enaxat nache 'eetai' qome da qaiuennatega! ₁₀'Am nta'a, 'auamaxasoxoolec co'ollaxa da 'enauac na netalec na 'alhua da ỹa'alyiñi naua l-llecte da ỹo'oxoren ñi ne'enaqtac oro da choche hua'axaỹa da l-lamaxa ana nviquepi, ₁₁qaq ca saishet da ỹo'ot damaye, nache qaỹasaxaigui aca nqatelaxanaxaqui maye 'ettaigui. ₁₂Qalaxaye 'am nta'a, huo'oi soua judío maye 'anema co'ollaxa da lo'onataxanaxa'c da ilo'ogue na 'alhuapi na Babilonia, maye saishet da huo'o naqa'en ca qonec 'am nta'a, qataq saishet da ỹo'oxoren nam atamnaxala'pi qataq ñi ne'enaqtac oro maye 'auamaxasoxoolec co'ollaxa da qanauaxaỹaxaasheguem. Qaq soomaye nachesoua so Sadrac, Mesac qataq so Abednego. ₁₃Nache so Nabucodonosor ỹataqta dalemata, nache damaxasoxoneugalo da qanauegueua'a somaye, so Sadrac, Mesac, qataq so Abednego. Qaq co'ollaq ivildeuo soomaye ₁₄nache so nta'a ina't soomaye, 'eeta': ¿'Eesa peta'a da saishet da qanatamñiỹot na ñatamnaxala'pi, qataq ñi ne'enaqtac oro maye samaxasoxoolec co'ollaxa da qaỹo'ot? ₁₅Qaq nagui da qaua'aqaiỹa ca l-lamaxa aca nviquepi, qaq ¿peta'a qami' lhuotte' da qanatamñiỹot ñim ne'enaqtac oro maye samaxasoxoolec co'ollaxa da qaỹo'ot? Cha'aye da sa qanatamñiỹot ñimaye, nache nagui qami' qaỹasaxaiguilo aca nqatelaxanaxaqui maye 'ettaigui, nache ¿negue't qome ca atamnaxala' ca ishet da qami' nca'alaxatrec? ₁₆Nache soomaye ỹasategueta so nta'a, 'eeta': Saishet da iuen da ñecotaqtapigui de'era. ₁₇Cha'aye Ñim Qanatamnaxala' maye sho'oxorenaqtac, Ñimaye ishet da qomi' nca'alaxateeguesopa na le'eraxa aca nqatelaxanaxaqui, qataq qomi' nca'alaxateeguesopa 'enauac nam qauem maye huotaique da qomi' 'auo'oteque 'am nta'a. ₁₈Qaq na'aictaxa da saishet da qomi' nca'alaxatrec Ñim Qanatamnaxala', qalaxaye 'am nta'a, 'auaỹateeta da qomi' saishet da ñatamnaqot nam 'anatamnaxala'pi, qataq saishet da sa'araqoto naua qarllectel ñi'iñi ne'enaqtac oro.

₁₉Qaq so Nabucodonosor co'ollaq hua'axaỹa de'era la'aqta'c soomaye, nache ỹataqta ntoguec na lashec souaxat da lauel da ỹalleto'oto soua tres nsoxorolqa. Huaña nache damaxasoxoolec da siete da qaỹe'eguelaxalec da qaỹalonoigui aso nqatelaxanaxaqui, napacalec ye lcata naxa da qaỹalonoigui asomaye, ₂₀ime nache ỹama'q soua ale't maye ỹataqta 'añaxaiqa ỹachegoxotaigui som nalleppi somaye, da icoñerai'salo soua Sadrac, Mesac qataq so Abednego, da yaqto' ỹasaxaroiguilo na le'eraxa aso nqatelaxanaxaqui. ₂₁Qaq 'era da 'eetec se'esoua tres nsoxorolqa da ñaq ỹaatrañi co'ollaxa soua alogo maye lataxau' da huo'o da la'amaqchec lo'onataxanaxa'c, co'ollaq qaicoñerai'salo nache qaỹasaxaiguilo aso nqatelaxanaxaqui maye 'ettaigui. ₂₂Qaq som nta'a, ye damaxasoxoolec co'ollaxa da saqaỹaỹaloxon da qaipacchigui dam la'aqtac, qaq aso nqatelaxanaxaqui ye ỹataqta lta'araic na le'eraxa, nache iviraugalo da ỹavi'c nache ileu' soua ale't maye ỹasaxareua'q soua tres nsoxorolqa, ₂₃qaq se'esoua tres nsoxorolqa nache qaicoñettai'salo co'ollaq qaỹasaxaroigui aso nqatelaxanaxaqui. ₂₄Qaq huaña nache so Nabucodonosor, ỹataqta ỹe'elaq nache sanaỹaloxon da nachaañi, nache 'enapega so ltauapi, 'eeta': ¿Saisheto' da tres soua shiỹaxau' som sasaxasoxoreua'q? Nache somayepi, 'eeta', aja' nache 'eetec. ₂₅Qalaxaye aỹem selota'alo daua cuatro shiỹaxau' maye huesotrauec, coleetrapoigui na le'eraxa na norec qalaq saishet na na'axa't, qaq da lataxac da 'oonolec de'eraua cuatro shiỹaxau', qalaq 'eeta'am da lataxac ca namaxashec piguem le'ec. ₂₆Qaq co'ollaq ime da nasaxauec de'era so Nabucodonosor, nache nquigueua'a so lasom aso nqatelaxanaxaqui, nache na'axannec da lỹaxanaxac, 'eeta': ¡Sadrac, Mesac, Abednego, maye qami' lamaxa'she Ñim Lo'onatac 'Enauacna maye Nataỹaña 'Enauacna, ña qampa'aiuec qome nache qananaiuecna'a! Nache se'esoua tres, nnoxoorec chegoqtroigui so le'eraxa so norec, ₂₇nache 'enauac so nta'alpi yi'iye 'alhua maye ỹalectauo, nquigueua'alo se'esoua shiỹaxau', qaq da lo'ocỹaxa'c soomaye qalaq qaica ca lliguiñi so norec, qataq qaica ca choche 'oonolec laue da huo'otaq ivigaxa't, qataq soua alogo saishet da huo'otaq huo'o ca ỹavic, huo'otaq da huo'o ca laita na lmala'q so norec. ₂₈Qaq huaña nache so Nabucodonosor na'axannec da nqaqaañi, 'eeta': «¡Qaỹo'oxoren qome Ñim Natamnaxala' da Sadrac, Mesac qataq da Abednego, cha'aye namaq so lamaxashec piguem le'ec da yaqto' nca'alaxatrec daua lamaxa'she maye ỹataqta laxaraiqa, cha'aye daamaye saishet da ỹalaxareguet da lamaxasoxonaxac na nta'a, nacherata da lca'aua'alo da ileu', qaq saishet da ỹa'aroto naua l-llectel ca lỹa atamnaxala', da saishet da nacheñi Ñim Natamnaxala'! ₂₉Qaq nagui aỹem san da ỹa'aqtac da camachaqca shiỹaxaua da qauem ca la'aqtac, da ỹasaxalec Ñim Natamnaxala' de'eraua nsoxorolqa, nache camaye qaichecapigui qome, qataq qailaxachigui ca lma' nache lapoosheguem qanqa'en qome na coma', qaq saishet da qoỹectega cam chegoxoguet lauo' le'ecpi, huo'otaq cam na'alhua, huo'otaq da ỹaqa'alo naua la'aqtaqa, cha'aye qaica ca lỹa atamnaxala' da ishet da 'eetec de'era da deca'alaqtaxan.»

₃₀Qaq ime, nache so nta'a ỹanema se'esoua tres nsoxorolqa, so ỹataqta 'amaqtaq lo'onataxanaxac yem 'alhua ye Babilonia.