So nerec maye qoỹettalec so lque
1So Belsasar maye nta'a ye Babilonia, ỹo'ot so lta'araic lquia'axac, nache icoyeguen so mil som 'amaqtaqaicpi yi'iye 'alhua, qaq co'ollaq mashe deque'etacpi, nache so nta'a qataq som icoyeguenpi co'ollaxa ỹataqta ỹaguec so nỹomigui lataxa. 2Qaq souaxat so lataxa nache so Belsasar damaxasoxoneuga da qandouo aso ỹomaxaquipi oro, qataq plata, maye so lta'a Nabucodonosor ỹachegoxota'a co'ollaxa aso atamnaxaqui maye naña ye Jerusalén, da yaqto' somaye nỹomgui asomayepi, qataq so 'amaqtaqaicpi maye icoyeguen co'ollaxa, qataq aso lhuapi, qataq asom ỹaqauga lhuapi.
3Qaq 'era da 'eetec co'ollaq qandoua'a somaye aso ỹomaxaquipi oro, maye qaỹachegoxota'a co'ollaxa aso atamnaxaqui maye lalamaqte Ñim Lo'onatac 'Enauacna, maye naña ye Jerusalén, nache som nta'a qataq so icoyeguenpi co'ollaxa, qataq aso lhuapi, qataq asom ỹaqauga lhuapi, nache nỹomtapigui asomayepi. 4Qaq 'enauac somayepi da nỹomtapigui so lataxa qataq ỹo'oxoreetac nam natamnaxala'pi, maye chegaqaigui na oro, plata, bronce, lcat, qo'oipaq qataq na coma'. 5Qaq huaña co'ollaxa nache nque'elaxatta da qaila'a so lhuaq ca shiỹaxaua ỹataqta yo'oqta souaxat na le'eraxa aso ncoỹaraxanaxaquipi, nache deraxana aso llaxaata da ỹerelec so lque lapagaxaic se'eso qanayeetaigui nỹec. Qaq so nta'a co'ollaq ila'a so nhuaq maye deraxaatac, 6nache ỹataqta napagaqtec, qaq souaxat da lcolanaxa nache ỹataqta iviloxol imauec na lo'oc.
7Qaq ime nache ỹataqta nlamaxaren da iỹaxaneuga som ilaviigui ca lỹa, ỹaanaxanaxaicpi, qataq som napaxagueetega anam huaqaañipi ye Babilonia, nache 'enapega somayepi, 'eeta': Ca ishet da itaxaỹaxan yi'iye nanettañi qataq aỹem da'aqtaxanem cam naigui yemaye, nache camaye qoỹanaxanaxanguilo qome caua anogo maye tocaleguete da lo'oxoỹaxa'c, qataq nqolaaña qanqa'en ca nqolac oro, qataq sanem da itaua da ỹo'onataxanaxac. 8Nache 'enauac so ỹaanaxanaxaicpi maye do'onataxaatacot so nta'a pa'aigui so nỹec, qalaxaye somayepi qaica ca ishet da ỹaỹaten da itaxaỹaxan som nanettañi, qataq da ỹa'axatem so nta'a cam naigui somaye.
9Qaq huaña nache so nta'a Belsasar ỹataqta huo'o da lcolanaxa, nache ỹataqta napagaqtec. Qaq som ltauapi so nta'a saỹaỹaten ca 'eetec, 10qalaxaye asom nate'e, co'ollaq hua'aqtegueua'a da la'alaxac so nta'a qataq som ltauapi, nache pa'aigui so nỹec maye huaña so nquia'axac nache 'enapeco': ¡'Am nta'a, nache 'eetai' qome da 'anca'altauec! Qaq saishet qome da ỹapacauec da 'arhuogoxo, qataq saishet qome da 'anapagaqtec, 11cha'aye de'era 'aro'onataxanaxac, huo'o ñim ỹale maye hueta'aguet so saqcha'a la'añaxac nam atamnaxala'pi maye qui'itta. Cha'aye som 'arta'a co'ollaq nta'a, nache ñi'iñi ỹale ỹachaxan co'ollaxa da hueto'ot da ỹataqtegue da ntoonaxac, qataq naỹaanataxanaxac, qataq ỹaanaxanaxaic 'eeta'am na atamnaxala'pi. Qaq ỹoqo'oye so nta'a Nabucodonosor maye 'arta'a, ỹanem co'ollaxa ñi'iñi ỹale da lataxala' 'enauac na 'oiquiaxaipi, na ilaviigui ca lỹa, na ỹaanaxanaxaicpi, qataq nam napaxagueetega ana huaqaañipi maye hueta'a ne'ena 'alhua, 12qaq ñimaye nacheñi ñi Daniel, maye so nta'a ỹanagui co'ollaxa da le'enaxat da Beltsasar, ñimaye hueta'aguet so saq cha'a na'añaxac maye qaica ca 'ena'am, qataq ỹaanataxanaxaic, qataq hueto'ot da naỹaanec da ỹaỹaten ca naigui na nchoxonaxacpi, qataq ỹa'axategue cam naigui ca na'aqtac maye saqcha'a, qataq ỹaỹamaxaañi cam ỹataqta huo'o da lqalaic. 'Am nta'a, ñaq 'auỹaxaneuga ctaxa ñi Daniel, yaqto' ñimaye 'am ỹa'axatem qome cam naigui yem nerec maye nanettalec ye lque.
13Qaq huaña nache so Daniel qaỹauegueua'a so nta'a, nache so nta'a inat somaye, 'eeta': ¿Nache 'am Daniel, maye 'aualectaigui nam ncoñeteguishecpi judiopi, maye som ita'a Nabucodonosor nauec co'ollaxa ỹachegoxota'a ye Judá? 14Aỹem qaỹa'aqtaxaateguem da so saqcha'a la'añaxac nam qui'itta atamnaxala'pi 'am hueta'aguet, qataq ỹataqtegue da 'antoonaxac, qataq 'am ỹaanataxanaxaic, qataq 'am ỹaanaxanaxaic. 15Qaq cha'aye aỹem qanauegueua'a so ỹaanaxanaxaicpi ne'ena 'alhua, da yaqto' itaxaỹaxan yi'iye nerec, qataq aỹem da'aqtaxanem cam naigui, qalaxaye somayepi saishet da ỹaỹaten. 16Qalaxaye aỹem ỹa'axaỹaxac da 'am 'aushet da 'auaỹaten cam saishet da qaỹaỹaten, qataq da 'auaỹamaxaañi cam huo'o da lqalaic. Qaq 'am da 'aushet da 'autaxaỹaxan yi'iye na'aqtac, qataq da aỹem 'aua'axatem cam naigui, nache so'ot qome da 'am qoỹanaxanaxanguilo caua anogo maye tocaleguete da lo'oxoỹaxa'c, qataq 'anqolaaña qanqa'en ca nqolac oro, qataq 'am itaua qome de'era ỹo'onataxanaxac.
17Qaq huaña nache so Daniel ỹasateguet so nta'a, 'eeta': 'Am nta'a, nache 'am hueto'ot qome cam huotaique da ñeme 'anqa'en, qataq 'aỹa'anem ca lỹa shiỹaxaua dam ño'oxoyec da do'onataxaneua'a na 'arma' lta'araic. Qaq aỹem qalaq choche 'am sa'aqtaxanem 'am nta'a, dam naigui yi'iyiua na'aqtaqa maye nanettaleguete na lque. 18«Ñim Lo'onatac 'Enauacna maye nataỹaña 'enauacna, ỹanem co'ollaxa da la'amaqchec, llo'oxoyec qataq da 'enec, so nta'a Nabucodonosor, som 'arta'a. 19Qaq souaxat dam la'amaqchec maye qoỹanem, nache 'enauac na nhuo' le'ecpi, na ỹotta'a't shiỹaxauapi, qataq na ỹotta'a't na la'aqtacpi ỹataqta lta'araic naqa'en da 'enec, qataq iviloxol naxa da datato'ot somaye. Qaq somaye ỹalauat cam tachigui da ỹalauat, qataq nca'alaxattauec cam tachigui da nca'alaxattauec, qataq huo'o na ỹanem da la'amaqchec, qataq huo'o na ỹanem da qaica ca 'enec. 20Qalaxaye co'ollaq nlaxagui da na'amqaanaxac, qataq ỹo'ot nam qauem, qataq nlaxagui da ño'oxonnaxac, nache qaiuotaxanec da la'añaxac qataq da llo'oxoyec maye hueto'ot co'ollaxa da nta'a. 21Qaq ime nache ca'ai qanqa'en na shiỹaxauapi, nache ỹe'eguelaxa da 'eeta'am ca shiguiỹac, nache ỹalectaigui na 'ashenapi maye no'onaxa le'ecpi, qataq chectac ana huoue, 'eeta'am na nauegaxanaxala'pi huacapi, nache na 'aỹa ỹapapiaxat na lo'oc, choche ivitta'a da ỹe'eguelaxa da ỹauatton Ñim Lo'onatac 'Enauacna maye Nataỹaña 'Enauacna, da huo'o da la'añaxac da ilo'ogue da lo'onataxanaxac na shiỹaxauapi, qataq Ñimaye ỹanem da no'onataxanaxac da nta'a cam taalec da ỹanem.
22Qaq nagui 'am nta'a Belsasar, maye 'am llalec so Nabucodonosor, qataq 'auaỹaten dam huaigui co'ollaxa somaye, qalaq ñaqaiyeta saishet da 'auauo'o ca 'anmanaxac. 23Nacherata da 'aue'en Ñim Nataxala' maye neto'ot na piguem, cha'aye 'auamaxasoxoneua'a co'ollaxa da qandouga so nquia'axala' aso ỹomaxaquipi, qataq aso nemaxanaqtepi maye lalamaqtepi añi atamnaxaqui, nache 'aualecta'aguet 'enauac som 'anamaxasoxoicpi da qanỹomiitapigui asomayepi, qataq 'avio'oxoreetac na atamnaxala'pi maye chegaqaigui na oro, plata, bronce, qataq na lcat, qataq na 'epaq qataq na coma', nam atamnaxala'pi maye saishet da nauaañi, qataq saishet da hua'aqa, qataq qaica ca ỹaỹaten. Qaq saishet da 'avio'oxoren Ñim Lo'onatac 'Enauacna maye huetaigui na lhuaq lauel da 'anachaalataxac, qataq nacheñi ñim chegoqchigui 'enauac nam 'auo'otpi.
24Qaq ỹoqo'oye Ñimaye namaq se'eso nhuaq da ỹelyiñi yi'iyeua na'aqtaqa, 25MENÉ, MENÉ, TEKEL y PARSÍN, 26qaq yeemaye dam naiguilo, 'eeta': Yem na'aqtac MENÉ naigui da Ñim Lo'onatac 'Enauacna mashe naloqte'n naua na'axa'te da 'aro'onataxanaxac 'am nta'a, qataq mashe ỹachaxan ye loga't damaye, 27qaq ye TEKEL, naigui da 'am nta'a, mashe 'am qanaloqten qaỹauota'a aso naloqnaxanaxaqui, nache qaỹaỹaten da saishet da 'avi' yem ỹoqta 'arsallaxa ctaxa, 28qaq ye PARSÍN: qalaq naigui da mashe colaxagui da 'aro'onataxanaxac 'am nta'a, nache qoỹanem ye medos qataq ye persas.»
29Qaq hauaña nache so nta'a Belsasar, saỹaỹaloxon da damaxasoxoolec da qoỹanaxanaxanguilo so Daniel soua anogo maye tocaleguete da lo'oxoỹaxa'c, qataq ỹaañi qanqa'en so nqolac oro, nache so nta'a ỹa'axatem 'enauac som hueta'a yi'iye qanayeeta'a, da nacheso se'eso na'a'q da so Daniel, qoỹanagui da ltaua so nta'a. 30Qaq nacheso se'eso pe da qaỹalauat so Belsasar maye lta'a so caldeopi, 31nache so Darío maye lma' ye Media, talec da no'onataxanaxac. Qaq so Darío, somaye ivi' co'ollaxa sesenta y dos vi'iye da llaxa.
