1So nta'a Darío, lhuennataxac co'ollaxa da ỹanem da lo'onataxanaxac da ilo'ogue na laỹe 'alhuapi, so ciento veinte shiỹaxauapi. 2Qaq ỹauo'oi soua tres da yaqto' ilo'ogue somayepi, da yaqto' nauaatalec da lo'onataxanaxac so nta'alpi, da yaqto' saishet da talec ca qauem so nta'a. Qaq so 'oonolec soomaye, nacheso so Daniel, 3qaq somaye ỹataqta saqaỹaloq da yo'oq, da saq 'ena'ama soua lỹa't maye qoỹanema da nauaatalec so nta'alpi, souaxat da ỹataqta ỹaanaxanaxaic, qaq ỹoqo'oye so nta'a, lhuennataxac co'ollaxa da ỹanem da lo'onataxanaxac somaye da ilo'ogue ye 'alhua. 4Qaq ỹoqo'oye som nauaatalec so nta'alpi, qataq som nta'alpi, nmittaique co'ollaxa da lataxac da ỹauo'o da lasouaxashet da 'eetega qauem da lo'onataxanaxac da ilotague' yi'iye 'alhua, qalaxaye so Daniel ye ỹataqta ỹaỹamaqchiguiñi da lo'onataxanaxac, nache saishet da qaỹanata ca lasouaxashet, qaq ỹoqo'oye saishet da qaỹañoxot da qoỹaneuo ca lasouaxashet da qaỹataỹa'aguet somaye. 5Qalaxaye somayepi nache queto'ot da deuennataxaateguelec damaye, nache 'eeta': «Saishet da sanataxa cam 'eetec da sauoqo'o ca lasouaxashet ñi Daniel, maye nacherata da chegoqchigui ñaqa'enaq dam la'amqaanataxanaxac.» 6Qaq huaña nache soua ilotegueto so nta'alpi, qataq som nta'alpi, naỹamaxara't co'ollaxa da yaqto' nqo'oneua'a da detaxaỹapegue' so nta'a Darío, qaq somayepi co'ollaq mashe datata'aguet somaye, nache 'enapega, 'eeta': ¡'Am nta'a nache 'eetai' qome da 'anca'altauec! 7'Enauac na nta'alpi maye ilotague' na 'alhua, huo'o so laỹonaxac, som huaigui da qanasachigui da 'am qaiỹaxanot da 'aỹa'an cam 'erec maye huetalec ca 'aramaxasoxonaxac, da ivittre'c caua treinta na'axa'te, da qaica ca ishet da iỹaxaatacot ca lỹa atamnaxala', huo'otaq ca shiỹaxaua, nache 'amta, 'am nta'a da 'am qaiỹaxaatacot. Qaq cam saỹalaq, nache iuen da qaỹasaxangui añi nshere maye laỹe' na llonpi. 8Qaq ỹoqo'oye nagui 'am nta'a, 'auo'ot qome da la'añaxac yi'iye qalapaxañi, qataq 'ananerelec, yaqto' saishet da qanaralaxat, yaqto' nateeteguet ye nanettañi nqataxac maye lalamaxat ye medos qataq ye persas, da saishet da qanlaxaañi. 9Qaq huaña nache so nta'a Darío, nanerelec se'eso qalapaxañi nqataxac. 10Qaq so Daniel co'ollaq la'axaỹaxac da qananerelec se'eso qalapaxañi nqataxac, nache taỹa so lma', nache ỹauatoiguilo naua nalloxoqui' so lo'ochaxaqui maye datategue dam pa'aigue ye Jerusalén, nache ỹa'alyiñi naua l-llectel da natamen, qataq ỹo'oxoren Ñim Lo'onatac 'Enauacna. Qaq damaye tres naxa da ỹo'ot ye 'oonolec na'a'q, ipacchigui dam 'eeta'ac naxa da ỹo'ottac. 11Qaq huaña nache se'eso shiỹaxauapi, 'enauac da pa'aigui so lma' so Daniel, nache natenalec somaye da natameetac, qataq ỹo'oxoreetac Ñim Natamnaxala'. 12Nache somayepi sanaỹaloxon da nqo'oneua'a so nta'a da da'aqtaxanem dam 'eetec som qalapaxañi nqataxac, nache 'eeta': 'Am nta'a 'aua'axatec co'ollaxa so qalapaxañi nqataxac, maye huetalec da ne'enaua treinta na'axa'te da huo'o ca natameetacot cam camachaqca atamnaxala', huo'otaq ca lỹa shiỹaxaua qaq saishet da nache 'am, nache camaye qaỹasaxangui aca nshere maye laỹe' na llonpi, ¿Saishet peta'a da nache 'eetec? nache so nta'a ỹasat, 'eeta': Aja' nache 'eetec, qaq se'eso qalapaxañi nqataxac somaye iuen da ipacchigui qanqa'en, yaqto' nateeteguet ye nanettañi nqataxac maye lalamaxat ye medos qataq ye persas, da saishet da qanlaxaañi. 13Qaq somayepi nache queto'ot da detaqtac, nache 'eeta': Qalaxaye ñi Daniel, ñim 'oonolec nam judiopi maye ncoñeteguishecpi, saishet da huo'o ca 'enec naqa'en 'am, qataq som qalapaxañi nqataxac maye qaỹa'axatec, cha'aye ñimaye sauanaqchigui da tres naxa da ỹo'ot da natamnaxac ye na'a'q. 14Qaq so nta'a co'ollaq hua'aqchigui de'era, nache ỹataqta daquico, nache nmitaique ca lataxac da nca'alaxatec so Daniel. Nache ivitta'a co'ollaxa da inoxooñi aso nala' da ỹataqta nmittaique ca lataxac da nca'alaxatec somaye, 15qalaxaye se'eso shiỹaxauapi, qaltaq ỹe'eguelaxaua'a so nta'a, nache 'enapega, 'eeta': 'Am nta'a 'auaỹateeta ye lapaqtañi nqataxac maye lalamaxat ye medos qataq ye persas, da ca qalapaxañi nqataxac da mashe nanerelec ca nta'a, nache saishet da qanlaxaañi. 16Qaq huaña, nache so nta'a damaxasoxoneuga da qanauegueuo so Daniel, da yaqto' qaỹasaxangui aso nshere maye laỹe' so llonpi. Qalaxaye co'ollaq saxanaxa da qaỹacoolec dam nhuaxanaguec somaye, nache so nta'a 'enapega so Daniel, 'eeta': ¡Ñim 'Anatamnaxala', ñim 'auo'onataxaatacot maye ỹataqta 'aualaxaguet naxa, 'am nca'alaxatec qome! 17Qaq so Daniel co'ollaq mashe huetangui aso nshere, nache qandouo so coma', nache qaỹapogongui so alap aso nshere, nache so nta'a itoqoolec somaye aso la'anaxanaqte, qataq aso la'anaxanaqte som 'amaqtaqaicpi ltauapi dam lo'onataxanaxac, yaqto' nataqa'en dam huaigui so Daniel, ipacchigui qanqa'en so mashe lapaqtañi nqataxac. 18Qaq co'ollaq ime, nache so nta'a taua'a so lma' lta'araic, nache nnaañi, qataq saishet da deque'e, qataq sa nasheneguet da na'axaỹaxaatega qanqa'en aca nvique, nache imauec so pe da qaica ca lo'ochaxa. 19Qaq co'ollaq choche yo'oxolec na 'alhua, nache ñesheguem, nache ỹataqta iỹalapigui' da tauga aso nshere maye laỹe' so llonpi. 20Qaq so nta'a co'ollaq mashe saqaỹapeque aso nshere, nache iỹaxanaique so Daniel, qalaxaye da lỹaxanaxac ỹataqta daquico, nache 'eeta': 'Am Daniel, maye 'am lamaxashec Ñim Lo'onatac 'Enauacna maye nca'altauec, Ñim ỹataqta 'aualaxaguet naxa ¿ishet peta'a da 'am nca'alaxateeguesop na llonpi Ñim 'Anatamnaxala'? 21Nache so Daniel ỹasat, 'eeta': ¡Nache 'eetai' qome da 'anca'altauec, 'am nta'a! 22Ñim Ñatamnaxala' namaq so lamaxashec piguem le'ec, qaq somaye ỹapogui na alap na llonpi, da yaqto' saishet da aỹem ique'emaqchet, cha'aye Ñim Lo'onatac 'Enauacna ỹaỹaten da aỹem qaica ca ỹasouaxashet, qataq qaica ca so'ot qauem da 'am hueto'ot 'am nta'a. 23Qaq huaña nache so nta'a ỹataqta machiguiñi, nache damaxasoxoolec da qanqatsheguem so Daniel. Qaq co'ollaq mashe qanqatsheguem, nache saishet da huo'o ca qailalec lque'emaxa, cha'aye ỹataqta huo'o da lpi'iỹaxac Ñim Natamnaxala'. 24Qaq huaña, nache so nta'a damaxasoxoneuga da qanauegueuo so shiỹaxauapi maye ỹauo'o so lasouaxashet so Daniel, nache somayepi l-llañe' qanqa'en aso lhuapi, qataq so llalaqpi da qaỹasaxangui aso laỹe' so llonpi, qaq somayepi naxa da saxanaxa da iviyiña na pa'aguiñi aso nshere, nache so llonpi parenaxaneguet nache icolaxattac. 25Qaq huaña nache so nta'a Darío, ỹauo'o so lerec da taỹa'a naqa'en na ỹotta'a't shiỹaxauapi, qataq nam ỹotta'a't naua la'aqtaqa maye netalec se'eso 'alhua, nache 'eeta': «Huo'o qome da qarlagaxayiqui, qataq qaica ca qaviñiitaique, 26qataq samaxasoxoolec da 'enauac ne'ena selotague' 'alhua, da huo'o naq 'enec qanqa'en, qataq qaỹalaxaguet Ñim Natamnaxala' ñi Daniel.
