Deuteronómio 15

₁Qaq da ivita ca vi'i siete, nache 'auapalaxat 'enauac aca navigaxaistepi maye 'am hueto'ot. ₂Qataq 'era da qonetec qome: Ñim 'oonolec nam shiỹaxauapi maye ỹa'aalaxanaxan ca lỹa, qalaq iuen da ỹapalaxat aca lavigaxaiste ca lỹa. Nache saishet da qaltaq iỹaxanot ca lỹa da isheeten naqa'en aca'aca lavigaxaiste, cha'aye Ñim Nataxala' laloxoqui naqa'en da qaỹapalaxat 'enauac aca navigaxaistepi. ₃Qaq nachecata ca chegaqauec maye 'auamaxalec da isheeten aca'aca la'aale maye 'aỹa'anem co'ollaxa, qalaxaye ca maiche 'arhuo' le'ec qalaq 'auapalaxat aca la'aale. ₄Qaq huaña nache qaica qome ca choxoraq da qoñiita, cha'aye Ñim Nataxala' qami' ỹanema da lchoxonnataxanaxa ca qoviita'a 'alhua maye qami' ỹanema da qaralamaxache. ₅Qaq 'era da 'eetec qom ỹataqta 'aualaxagueta naua lqataxaco Ñim Nataxala' maye 'Anatamnaxala' maye 'am sanema nagui. ₆Nache da ivita da 'am ỹanem da lchoxonnataxanaxa maye 'am ỹachaxanapecot co'ollaxa Ñim Nataxala' maye 'Anatamnaxala', nache ishet qome da 'aua'aalaxanaxan ca qalota ỹotta'a't shiỹaxauapi, qaq 'am, qalaxaye saishet da 'aua'aalaxatac, qataq saishet da huo'o ca 'am ilotague', nacherata da 'aulotague' qome ca ỹotta'a't shiỹaxauapi. ₇Qaq da huo'otaq huo'o ca choxoraq da netaña ca qonetaigui huaqta'a't nỹecpi ca 'alhua maye 'am ỹami' Ñim Nataxala', maye 'Anatamnaxala', nache saishet da 'aua'añaxattagui añi 'arquiyaqte da sa 'auchoxoren, qataq sa 'autauan que'eca choxoraq, ₈nacherata da 'anqouaguec camaye da 'aỹa'anem ca da'alaxaataique maye iuen. ₉Qataq saishet qome da 'anasheeteuo ca qauem 'arhuennataxa, da nayeetauo ca vi'i siete, maye laloxoqui da qaỹapalaxat aca navigaxaistepi. Nache da 'aulo'ot ca 'arqaỹa maye huo'o da lhuenaxanaxa nache saishet da qauem da 'arashiguiỹaxac, da saishet da 'aỹa'anem ca da'aalaxataique, cha'aye camaye ishet da iỹaxanot Ñim Nataxala', nache huo'o naqa'en ca 'arasouaxashet. ₁₀Qaq saishet da 'auashemattapeguem camaye nacherata da 'auchoxoren, cha'aye damaye ỹo'ot da 'am talec da lchoxonnataxanaxa Ñim Nataxala' maye 'Anatamnaxala', nache 'onaxaic naqa'en 'enauac na 'aro'onatacpi, qataq ca laỹepi maye 'auacoolecpi da 'auo'ot. ₁₁Cha'aye nache 'eetai' qome da huo'o na choxoraqpi ana 'alhua, ỹoqo'oye 'am samaxalec da 'auchoxoren qome que'eca 'arhuo' le'ec maye choxoraq, qataq huo'o da lhuenaxanaxa maye netaña que'eca 'ana'alhua.

₁₂Qaq da huo'o ca nmeela't da 'ausheenaxana da yaqto' 'arlatac na maiche 'arhuo' le'ecpi, ỹale huo'otaq 'alo, nache camaye seis vi'iye da 'alattac, qaq da ivita ca vi'i siete nache 'ausoueeguesop da nlataguec. ₁₃Qaq da 'ausouec camaye nache saishet da qui'itchiguilo 'anqa'en naua lhuaxaye da jec, ₁₄nacherata da 'auo'ot ca na'agaxatpi chegaqaigui ca 'ana'atetpi, qataq ana ala ca trigo, lataxa qataq ca laỹe 'anqouagaxatpi maye 'am ỹanem qome Ñim Nataxala' maye 'Anatamnaxala'. ₁₅Qaq saishet da 'aucoua'ai da 'am nlatac co'ollaq qonetaña ye Egipto, yem huaña co'ollaxa da Ñim Nataxala' maye 'Anatamnaxala' 'am isoueeguesop da 'anlataguec. Qaq ỹoqo'oye 'am sanem nagui de'era namaxasoxonaxac. ₁₆Qaq da huo'otaq sa nashen da jec que'eca 'arlatac, cha'aye 'am ỹa'amaqteguet qataq ca 'aỹa'alaqpi souaxat da 'auaỹamaxatchiguiñi da 'am neto'ot, ₁₇nache 'auacona aca 'ara'araxanaqte, nache aca ltela da'am camaye 'auauaxaỹaxaalec ca lasom ca 'arma' da 'aua'arec, yaqto' camaye ỹataqta 'aralamaxat 'arlatac. ₁₈Qaq da 'axanec que'eca 'arlatac, nache saishet da 'aualemataỹa, cha'aye co'ollaq 'am do'onataxaatacot soua seis vi'iye, nache da nsheetenaguec sa ivi' aca lasheue ca 'onataxanaxaic, yaqto' Ñim Nataxala' maye 'Anatamnaxala' ỹauo'o qome ca 'anchoxonnataguec.

₁₉Qaq ca la'auaxanec llalec ỹale aca huaca, huo'otaq aca qagueta, nache 'auỹotauga da lalamaxat 'anqa'en Ñim Nataxala' maye 'Anatamnaxala'. Qataq saishet da 'auo'onataxanaxan da 'auauegaxaalec ca la'auaxanec llalec aca huaca, huo'otaq da 'anpetec na laue ca la'auaxanec llalec aca qagueta. ₂₀Qaq ye 'oonolec vi'i, nache 'am qataq ca 'aỹa'alaqpi qollequi camaye huaña ca lca'ateua'a da lanataqa' Ñim Nataxala'. ₂₁Qaq da huo'otaq huo'o ca lque'emaxa que'eca shiguiỹac, da huo'otaq vi'iỹauo na lapia' huo'otaq sa nauaañi, huo'otaq da huo'o ca lỹa lque'emaxa, nache saishet da 'aỹa'anot Ñim Nataxala' da yaqto' 'arachetaqtaxanaxat. ₂₂Nache camaye ishet da qollec da qonetaña ca huaqta'a't nỹecpi maye qonetaña, qataq 'enauac ishet da qanallec, na'aictaxa da qui'itta, huo'otaq da saishet da qui'itta, 'eeta'am da qollectac ca lapat ca nauenec, huo'otaq aca ñi'imshe. ₂₃Qalaxaye ca ltago'q saishet da qollec, nacherata da 'aucorelec na 'alhua 'eeta'am da 'aucorec ca 'etaxat.