Da lataxac da alaataxac
1Qom mashe qaunoxoñiiuec da qauloqui' ca qampa'aguenaxauaipi, nache da qauloỹa'a da ỹataqta qalota ca nalleppi, napacalec ye lcata da qoñiita, qataq netalec ca lalo caipi qataq aca nalaataxaquipi naigonapi, nache saishet qome da qayi'iỹai. Cha'aye qami' hueta'agueta Ñim Nataxala' maye Qanatamnaxala'ai, Ñim qami' nqateeguesopa co'ollaxa ye Egipto. 2Qaq da mashe nayeeta'a ca laloqo' da qanalaache, nache ca ntaxaỹaxanaxanec detaxaigui qome ca alleppi. 3Nache 'eeta': Qami' Israel le'ecpi, ña qana'axaỹaxañiichiguiñi ne'ena na'a'q, cha'aye mashe yaqta'a da qaunoxoñiiua'a da qanalaache' na qampa'aguenaxauaipi. Qaq saishet qome da leuapigui ye qarville, qataq saishet da qayi'iitac, qataq saishet da qauqalviitac, qataq saishet da qami' iviloxolaqche't da qarcolanaqai. 4Cha'aye Ñim Nataxala' maye Qanatamnaxala'ai, qami' hueta'agueta, qataq Ñimaye maiche delogui' na qami' ipa'agueeta'ape, nache qami' ỹanema da qoroxoñiqui namayepi.
5Ime, qaltaq detaqa qome ca nta'alpi, nache 'eeta': Da huo'o ca 'oonolec da qoñiita da mashe imat da no'oxoosheguem ca dalaxaic lma', qaq da saxanaxa da naigui, nache camaye iuen da naigui que'eca lma', cha'aye saiuena'a da ileu camaye da ileuaigui ca alaataxac, nache cam lma' ỹaqa'a ca naigui. 6Qaq da huo'o ca ỹaañi aca uva nache da ñaq saxanaxa da nqat aca ala acamaye, nache 'onaxaic qome da ỹe'eguelaxa ca lma' da yaqto' iqopitaxanapec da chec aca ala aca'aca lañiguishe, cha'aye sa iuena'a da ileuauga ca alaataqa' nache ishet da ỹaqa'a ca na'atte da nqat aca ala acamaye. 7Qaq da huo'o ca ỹale da mashe detaxaỹapegue' co'ollaxa aca 'alo da huaroneguet, nache da saxanaxa da huaroneguet acamaye, qaq no'on da ỹe'eguelaxa ca lma' da yaqto' huaroneguet acamaye, cha'aye sa iuena'a da ileuauga ca alaataqa' nache ishet da ỹaqa'a ca huaroneguet acamaye.
8Qaq da ime qome, nache ca nta'alpi qaltaq 'enapega ca alleppi, 'eeta': Da huo'o ca 'oonolec da qoñiita da 'iỹaqaic, qataq sa da'añigui, nache 'onaxaic da ỹe'eguelaxa ca lma' yaqto' saishet da ỹasouaxat na laỹepi da ñi'i. 9Qaq da ime da ltaxaỹaxac ca nta'alpi, nache ca lataxala'pi ca alleppi naloguiñi qome da yaqto' qaỹatateueegue camayepi.
10Qaq qom qanayiñiitaua'a ca huaqta'a't nỹecpi maye huotaique qauloquiaxañi ca netaiguipi camaye, nache hua'auñi qome da qaua'aqtaxañim da qaica ca machaqca da qarviraxaqui. 11Nache camayepi da ỹasat da qaica machaqca, qataq qami' ỹauategueta da qaunoxoñiiua'a que'eca huaqta'a't nỹecpi, nache camayepi choche qami' do'onataxaatacoto qome qataq qarlataqui. 12Qalaxaye da saishet da qami' ỹasategueta da qaica ca machaqca ca qarviraxaqui, nachaqrata da nshetaique da qami' deloguito. Nache qauconñiisop qome que'eca huaqta'a't nỹecpi, nache qauloquiaxañi ca shiỹaxauapi maye netaiguipi camaye. 13Qaq Ñim Nataxala' maye Qanatamnaxala'ai, qami' ỹanema da qoroxoñiqui camayepi, nache qaroilec ca ỹeelonec da qaualauache 'enauac ca ỹalleppi. 14Qaq ca 'alpi, ñaqpiolec, 'atetpi qataq 'enauac ca laỹe nogoxoshetpi maye huetaigui que'eca huaqta'a't nỹecpi, camayepi nache qaralamaxache qome, qataq qollequi 'enauac ca aloq cam qampa'aguenaxauaipi maye Ñim Nataxala' maye Qanatamnaxala'ai qami' ỹanema da qoroxoñiqui. 15Qaq 'era da qoñiitec qome 'enauac cam shiỹaxauapi maye netaña ca huaqta'a't nỹecpi maye qaỹoqta cam qoñiitaña 'alhua, maye saishet da ỹalectaigui ca ỹotta'a't shiỹaxauapi maye qareuoreuaipi. 16Qalaxaye que'eca huaqta'a't nỹecpi maye lma'pi ca ỹotta'a't shiỹaxauapi, maye qami' ỹanema qome Ñim Nataxala' maye Qanatamnaxala'ai da yaqto' qaralamaxache, saishet qome da huo'o ca nca'altauec qanqa'eñi cam netaigui camayepi. 17Nachaqrata da qanmachichiguiñi qome 'enauac ye hitiitapi, amorreopi, cananeopi, ferezeopi, heveopi, qataq ye jebuseopi, nache ipacchigui qome da qami' ỹamaxaleguete Ñim Nataxala' maye Qanatamnaxala'ai, 18yaqto' yemayepi saishet da qami' ỹapaxagueneque nam qaiqaiga no'onataxacpi maye ỹo'ottac naxa da ỹo'oxoren na natamnaxala'pi, qataq yaqto' saishet da qami' ỹasouaxa't da huo'o ca qarasouaxashichi da hueto'ot Ñim Nataxala' maye Qanatamnaxala'ai.
19Qaq da huo'otaq qaỹoqtrec caua na'axa'te da qauloquiaxañiitac ca netaigui ca huaqta'a't nỹecpi, nache saishet qome da qauquesoqoi aca qo'oipaqpi da qauauoita'a aca qachepe, cha'aye qami' qaviñi qome da qolliqui aca ala. Qataq acamaye ye choche qo'oipaq no'onaxa lashe, qaq saishet da 'ena'am ca shiỹaxauapi maye ishet da qami' dataỹa'agueta da qami' deloguito. 20Qalaxaye nachaqacata aca qo'oipaq maye qaca aca ala da ishet da qauquesoqoi, da yaqto' qauapoxoñiỹa da ñaq qauloquiaxañiitac ca netaigui que'eca huaqta'a't nỹecpi, choche ivitta'a da qoroxoñiqui camayepi.
