1Da huo'otaq huo'o ca 'oonolec da qoñiita da ila'a ca lauo' le'ec da deqat ca lauegaxanaxala' huaca, huo'otaq qagueta, nache saishet da sa itauan camaye da ỹe'eguelaxata ca lalamaxat lalo. 2Qaq da saishet da 'arhuoreua, huo'otaq saishet da 'auauatton ca lalamaxat camaye, nache que'eca shiguiỹac 'auauegueua'a ca 'arma' da 'aulo'ogue. Qaq da anac ca lalamaxat camaye, nache 'avi'eguelaxatot. 3Qaq nache 'eetec 'anqa'en da 'aulalec ca 'ashena, huo'otaq ca npo', huo'otaq ca camachaqca na laỹe nogoxoshetpi maye lalamaxat ca 'arỹa, nache saishet da sa 'autauan camaye.
4Qataq da huo'o ca 'oonolec da qoñiita da ilalec da huetaiya' ca 'ashena, huo'otaq nauegaxanaxala' huaca maye lalamaxat ca lauo' le'ec, nache saishet da sa itauan camaye da ñisheguem naqa'en ca lalo.
5Qaq aca 'alo saishet qome da ỹaañi ca logoxot ca ỹale, qataq ca ỹale saishet da ỹaañi ca logoxot aca 'alo, cha'aye Ñim Nataxala' ỹataqta deqaiga ca ỹo'ot de'era.
6Qaq da huo'o ca quetague' ca nqa'aic, nache da ilalec ca qoỹo lpata'c da netasheguemec aca qo'oipaq, huo'otaq da netaña na pa'aguiñi netanguilo caua llalqa huo'otaq caua lco'oue'ete, qataq nqapaxaataleguete aca late'e, nache saishet da ỹaconalo caua llalqa da lỹaueegueto naqa'en aca late'e, 7nachaqcauate' caua llalqa da ishet da ỹaconalo, qaq aca late'e nache ỹaxan da jec, yaqto' camaye machiguiñi qome qataq logoraic da nachaalataxac.
8Qaq da huo'o ca no'oxoosheguem ca dalaxaic lma', nache ỹauo'o qome ca no'oxoosheguem lpaqtaxat na pa'asheguem ca lma', ten qom huo'o ca nacheesop nache ileu. Nache camaye lasouaxashet que'eca ileu.
9Qataq saishet da 'aỹa'aalec aca ỹotta'a't nañiguishepi ca 'anaxanaqa' uva lma', cha'aye da qonetec de'era nache 'enauac ana 'ala que'eca laỹe nañiguishecpi qataq aca uva da 'aỹa'anem ca ntaxaỹaxanaxanec.
10Qataq da qana'ayiishiguem ca qana'alhuai, nache saishet da huaxaiguet qanqa'eñi ca nauegaxanaxala' huaca ca 'ashena, da yaqto' qauauegaxañiileguete.
11Saishet da qaỹa'añiiñi ca nogoxot maye chegaqaigui na qagueta laue da ỹaleeguet ca chegaqaigui na lino.
12Qaq ca npo' maye 'anapogoña, qalaq 'auo'ot qome aca lauoxo naua cuatro laỹel.
Da lataxac da naronaxac
13Da huo'o ca ỹale da ỹacona aca 'alo da ỹauo'o lhua, qaq camaye da imeuo da lauotaxanaqtaic acamaye, 14nache da ỹasaxalec ca qauem na'aqtaguec acamaye, 'eeta': Aỹem saroneguet ara'ara 'alo, qalaxaye selalec da mashe nache 'eetai' da ỹauana na ỹale, 15huaña nache ca lta'a qataq aca late'e aca'aca qa'añole, tareuga ca ñegueuo ca huaqta'a't nỹecpi da yaqto' ỹachaxana ca nqueroxonecpi maye nataxala'pi ca la'anaxat da ñaq cheta'ague da ỹauana na ỹale aca'aca 'alo. 16Nache ca lta'a aca'aca 'alo 'enapega ca nqueroxonecpi, 'eeta': Aỹem sanem ara ỹale de'era ỹale da yaqto' lhua, qalaxaye damaye mashe sa nqopita aramaye, 17nache ỹasaxalec da qauem na'aqtaguec ara ỹale, 'eetega nache 'eetai' da mashe ỹauana na ỹale. Qalaxaye aỹem ñerouo na la'anaxat da 'eesa da ñaq cheta'ague da ỹauana na ỹale aramaye. 18Nache que'eca nqueroxonecpi ỹaconeua'a camaye da yaqto' ỹo'ot ca nhuaxanaguec, 19qataq desheetenaxana naqa'en aca cien lcatpiole plata souaxat da qauem naqa'en da na'aqtaguec aca qa'añole Israel lashe. Nache camaye isheeten ca lta'a aca qa'añole, qataq nache lhua acamaye, saishet da ỹalat.
20Qalaxaye da 'eesa da mashe nache 'eetai' da ỹauana na ỹale aca'aca qa'añole, 21nache acamaye qaỹauegueua'a ca lasom ca lma' ca lta'a da yaqto' ca ỹalleppi que'eca huaqta'a't nỹecpi, ỹalauat acamaye irolec ca coma' da ỹasaq, cha'aye ỹo'otec da qauem na Israel qataq ca qauem na'aqtaguec ca lma' ca lta'a. Qaq 'era da 'eetec da qanqacheeua'a 'enauac qome ca qauem maye qami' huetanguilo.
22Qaq ca ỹale da qailalec da lauatañi' aca 'alo maye huo'o ca lhua, nache 'enauaque caamaye da qaỹalaua't. Qaq 'era da 'eetec da ỹataqta qanqateua'a qome 'enauac na qauem na Israel.
23Qaq da huo'o aca qa'añole ñaq saxanaxa da ỹauana na ỹale, qataq mashe huo'o ca ỹasateguet ỹale da yaqto' lhua, qaq da nateeteguet ca lỹa ỹale nache lauañi', 24nache caamaye qaỹaueguereuga ca ñegueuo ca huaqta'a't nỹecpi da yaqto' qairota'a ca coma' da qaỹasa'q da qaỹalaua't. Cha'aye aca qa'añole huasoilec da saishet da na'alaxañi co'ollaxa da yaqto' ishet da qaitauan da huetaña ca huaqta'a't nỹecpi, qaq ca ỹale qalaq huasoilec da ỹe'en aca qa'añole maye mashe lalamaqte ca lỹa ỹale. Qaq 'era da 'eetec da ỹataqta qanqachiiua'a qome 'enauac ca qauem maye qami' huetanguilo.
25Qalaxaye da huo'o ca ỹale da huauga ca no'onaxa da natena'aguet aca qa'añole maye mashe huo'o ca ỹasateguet da huaroneguet, nache camaye da ncat aca'aca qa'añole, nache que'eca ỹale nachecata da qaỹalauat. 26Qaq aca qa'añole qalaq qaica ca qoỹena'ac, cha'aye qaica ca lasouaxashet da yaqto' qaỹalauat. Cha'aye de'era, 'eeta'am ca ỹale maye iloquiaxan ca lỹa nache ỹalauat, 27cha'aye camaye ilalec aca qa'añole da ndotec da huetauga ca no'onaxa, nache na'aictaxa da na'alaqtapiguiñi acamaye, qalaxaye qaica ca ishet da itauan.
28Qaq da huo'o ca ỹale da natena'aguet aca qa'añole maye ñaq saxanaxa da huo'o ca ỹasateguet ỹale da lhua, qaq camaye da lauañi' acamaye, nache da qaỹauanaleguete, 29nache que'eca ỹale iuen da ỹanem aca cincuenta lcatpiole plata, cha'aye souaxat da ỹe'en acamaye, qataq iuen da nache lhua, qataq nache saishet da ỹalat.
30Qataq saishet qome da huo'o ca ỹale da lauañi' aca lhua ca lta'a, cha'aye da nache 'eetec de'era nache ỹe'enai' ca lta'a.
