Qanauaxaỹaxaasheguem aso coma' da qoỹerelec so nqataxacpi
1So Moisés qataq so nqueroxonecpi nataxala'pi, 'enapega co'ollaxa so Israel le'ecpi, 'eeta': «Ỹataqta qaualaqaiguet qome ne'ena namaxasoxonaxacpi maye qami' sanema nagui. 2Qaq qom mashe ime da qaua'axasoxoñiilec ye tala Jordán, qataq da qaunoxoñiiua'a ye 'alhua maye qami' ỹanema Ñim Nataxala' maye Qanatamnaxala'ai da qaralamaxache, nache qanauaxaỹaxañiisheguem aca coma' late'erai qataq lapagaxaic qanqa'eñi ca la'amnaxat acamaye, 3da yaqto' qoỹerelec acamaye 'enauac ne'ena na'aqtacpi maye iqataxacpi maye qami' sanema. Qaq namayepi nache qauo'oche qom mashe ime da qaua'axasoxoñiilec ye tala Jordán, da mashe qaunoxoñiiua'a ye 'alhua maye qami' ỹanema Ñim Nataxala' maye Qanatamnaxala'ai da yaqto' qaralamaxache, yem 'alhua maye huaña da sa qoue na huaca lche' qataq na te'esaq lli'i, qaq ipacchigui qome da la'aqtac Ñim Nataxala' maye Qanatamnaxala'ai co'ollaq ỹachaxanapecot so hua'au qarta'ailpi. 4Qaq ỹoqo'oye qom mashe qaua'axasoxoñiilec ye tala Jordán, nache qanauaxaỹaxañiisheguem aca coma', maye qami' samaxaleguete da qauo'oche, nache qaỹa'añiỹalec añi qasoxonaxa Ebal, nache lapagaxaic qanqa'eñi ca la'amnaxat acamaye. 5Nataqa'en qano'oxoñiisheguem aca nca'atoxonaxalate coma', maye lalamaqte Ñim Nataxala' maye Qanatamnaxala'ai, qalaxaye saishet da qauo'onataxañiỹa aca maiche no'onata coma' da qaỹauota'a ca lcat da qaỹo'ot, nachecata ca no'oitai' coma', 6cha'aye da qauo'oche aca nca'atoxonaxalate maye lalamaqte Ñim Nataxala', nache qauachegoxochiỹaigui ca no'oitai' coma', yaqto' qauachiỹalec acamaye aca qarachetaqtaxanaqche maye qaỹavigaxatta da qaỹa'añiỹot Ñim Nataxala' maye Qanatamnaxala'ai, 7qataq aca qarachetaqtaxanaqche maye qanhuaachigui, yaqto' qauamaichiguiñi qome da qollequi acamaye da huaña ca lanataqa' Ñim Nataxala' maye Qanatamnaxala'ai. 8Qaq aca'aca coma' ỹataqta ỹataqtegue qome qanqa'eñi da qoỹerelec 'enauac ne'ena na'aqtacpi maye nqataxacpi.»
9Ime, nache so Moisés qataq so ntaxaỹaxanaxanecpi leviitapi, 'enapega so Israel le'ecpi, 'eeta':
«Qami' Israel le'ecpi, ña qaue'enaxañiitai', nache qomi' qana'axaỹaxañiỹalo. Nagui, Ñim Nataxala' maye Qanatamnaxala'ai qami' lalamaqa'ate. 10Qaq ỹoqo'oye ỹoqta qaualaqaiguet qome Ñimaye, qataq qauo'oche na lamaxasoxonaxacpi, qataq na lqataxacpi maye qami' samaxaleguete nagui.»
Da nhuaxanaguec ca sa ỹalaq
11Qaq nacheso se'eso na'a'q, da so Moisés ỹanem se'eso nhuo' le'ecpi de'era namaxasoxonaxac, 'eeta':
12Qom mashe ime da qaua'axasoxoñiilec ye tala Jordán, nache na maiche nhuo' le'ecpi maye chegoxoguet so Simeón, Leví, Judá, Isacar, José, qataq so Benjamín namayepi tasheguema qome añi qasoxonaxa Guerizín, da yaqto' ỹasaxalec ca 'onaxaic la'aqtac ne'ena nhuo' le'ecpi, 13qaq na maiche nhuo' le'ecpi maye chegoxoguet so Rubén, Gad, Aser, Zabulón, Dan qataq so Neftalí, nache hueto'ot qome añi qasoxonaxa Ebal da yaqto' ỹan ca qauem la'aqtac. 14Qaq na leviitapi qalaq na'axannec qome ca la'aqtac da 'enapega 'enauac na Israel le'ecpi, 'eeta':
15Ỹataqta qauem qome ca talec nhuaxanaguec ca shiỹaxaua da ỹo'ot ca le'enaqtac atamnaxala' da ỹachegoxotaigui ca nqatelliguishec lcat, da ỹoxotchiguiñi ca ỹanaña, cha'aye damaye ỹataqta deqaiga Ñim Nataxala'. Nache 'enauac qome na nhuo' le'ecpi, 'eeta': Aja', nache 'eetec.
16Ỹataqta qauem qome ca talec nhuaxanaguec ca shiỹaxaua da qaica ca 'enec naqa'en ca lta'a, qataq aca late'e. Nache 'enauac qome na nhuo' le'ecpi, 'eeta': Aja', nache 'eetec.
17Ỹataqta qauem qome ca talec nhuaxanaguec ca shiỹaxaua da ỹaconauga da decachiỹa ca na'alhua laỹe ca lỹa. Nache 'enauac qome na nhuo' le'ecpi, 'eeta': Aja', nache 'eetec.
18Ỹataqta qauem qome ca talec nhuaxanaguec ca shiỹaxaua da npe'eelec naqa'en ca llec ca sa nauaañi. Nache 'enauac qome na nhuo' le'ecpi, 'eeta': Aja', nache 'eetec.
19Ỹataqta qauem qome ca talec nhuaxanaguec ca shiỹaxaua da sa ỹaỹamaxatapec ca chegaqauec, huo'otaq ca saploq, huo'otaq aca pa'ai. Nache 'enauac qome na nhuo' le'ecpi, 'eeta': Aja', nache 'eetec.
20Ỹataqta qauem qome ca talec nhuaxanaguec ca ỹale da lauañi' aca lhua ca lta'a, cha'aye da nache 'eetec de'era, nache ỹe'en ca lta'a. Nache 'enauac qome na nhuo' le'ecpi, 'eeta': Aja', nache 'eetec.
21Ỹataqta qauem qome ca talec nhuaxanaguec ca shiỹaxaua da hue'eguet ca shiguiỹac. Nache 'enauac qome na nhuo' le'ecpi, 'eeta': Aja', nache 'eetec.
22Ỹataqta qauem qome ca talec nhuaxanaguec ca ỹale da hue'eguet aca lqaỹa, maye ỹaqauga llale ca lta'a, huo'otaq aca late'e. Nache 'enauac qome na nhuo' le'ecpi, 'eeta': Aja', nache 'eetec.
23Ỹataqta qauem qome ca talec nhuaxanaguec ca ỹale da lauañi' aca lachoro. Nache 'enauac qome na nhuo' le'ecpi, 'eeta': Aja', nache 'eetec.
24Ỹataqta qauem qome ca talec nhuaxanaguec ca shiỹaxaua da ique'elaxat ca lỹa da ỹalauat. Nache 'enauac qome na nhuo' le'ecpi, 'eeta': Aja', nache 'eetec.
25Ỹataqta qauem qome ca talec nhuaxanaguec ca shiỹaxaua da ỹaconeguet aca nsheetenaqte da yaqto' ỹalauat ca qaica ca ỹasouaxat. Nache 'enauac qome na nhuo' le'ecpi, 'eeta': Aja', nache 'eetec.
26Ỹataqta qauem qome ca talec nhuaxanaguec ca shiỹaxaua da qaica ca 'enec naqa'en ne'ena nqataxacpi, qataq saishet da ỹo'ot. Nache 'enauac qome na nhuo' le'ecpi, 'eeta': Aja', nache 'eetec.
