So Josué talec da lo'onataxanaxac so Moisés
1Qaq so Moisés qaltaq 'enapega 'enauac so Israel le'ecpi, 'eeta':
2«Aỹem mashe sevi' naua ciento veinte vi'iye, qataq mashe qaica ca ỹa'añaxac da sequeuotapigui' qataq da shecto'ot da aỹem qarataxala'ai. Qataq Ñim Nataxala', mashe aỹem icoyegueetac da saishet qome da sevira'a da sa'axasoxoolec ye tala Jordán. 3Qalaxaye Ñim Nataxala' maye Qanatamnaxala'ai, hua'auta'ague qome na qoyiqui, da yaqto' nlaxaañi ye ỹotta'a't shiỹaxauapi, da yaqto' qoñiỹalec ye na'alhua yemayepi. Qaq da Josué nachera da qauca'achiitalec qome da qarataxala'ai, cha'aye nache la'aqtac Ñim Nataxala'. 4Qataq yi'iye shiỹaxauapi, Ñim Nataxala' 'eeta'am qome naqa'en da 'eeteque soua Sijón, qataq so Og, maye lta'al na amorreopi, qataq da 'eetec ye na'alhua maye ỹataqta nlachiguiñi naqa'en co'ollaxa Ñimaye. 5Qaq Ñim Nataxala', qom qami' ỹanema da qoroxoñiqui yi'iye ỹotta'a't shiỹaxauapi, nache qauo'ochec yemayepi 'enauac ne'ena qami' samaxaleguete. 6Qaq ỹoqo'oye qana'añaxache, qataq qami' qaramchiguilo qome, saishet da huo'o da qarcolanaqai, qataq saishet da qayi'iitac qom qauataiỹa'aguet yemayepi, cha'aye Ñim Nataxala' maye Qanatamnaxala'ai, qami' hueta'agueta qome qataq saishet da qami' ỹaxaare'c huo'otaq da qami' ỹala't.»
7Ime, nache so Moisés iỹaxana so Josué, ỹauaachigui naqa'en 'enauac so Israel le'ecpi da 'enapega, 'eeta':
«'Ana'añaxat qome, qataq 'aua'añaxachigui ye 'arhuel, cha'aye nache 'am qome 'auauega ne'ena shiỹaxauapi ye 'alhua maye ỹachaxanapec co'ollaxa Ñim Nataxala', da ỹanem so hua'au qarta'ailpi. Qataq nache 'am qome da 'anec yi'iye 'alhua da yaqto' ỹauo'o lalamaxat namayepi. 8Qaq Ñim Nataxala', nacheñi Ñim hua'auta'ague qome da 'ata'ague, qataq 'am hueta'aguet, saishet da 'am ỹaxanec qataq da 'am ỹalat, qaq ỹoqo'oye saishet qome da 'añe'etac qataq da 'anlautapiguiñi.»
Da qaitaxaỹaxan aso lmalate na nqataxacpi
9So Moisés ỹiyiñi co'ollaxa na nqataxacpi, nache ỹanem so ntaxaỹaxanaxanecpi leviitapi maye nacheso so ỹachetac naxa aso laỹe' da naỹamaxataxac Ñim Nataxala', qataq 'enauac so nqueroxonecpi ye Israel, 10nataqa'en ỹanem dam lamaxasoxonaxac, 'eeta':
«Da ivita ca vi'i siete, maye huaigui naxa da qaỹapalaxat ana navigaxaistepi, qataq huetoigui da qanayenaiguilo naua npe'lolqa qo'oipaq lcouepi, 11nache qom ivita da laỹona't na Israel le'ecpi da nqo'oneua'a ca lca'ateua'a da lanataqa' Ñim Nataxala' maye Qanatamnaxala'ai, qaq nache huaña qome camaye da qaitaxaỹaxan na nqataxacpi, hua'aqchigui qanqa'en 'enauac na Israel le'ecpi. 12Qataq 'alaỹona't qome 'enauac na ỹalleppi, 'alpi, ñaqpiolec, qataq na chegaqauecpi maye qami' netaiguilo, da yaqto' na'axaỹaxana ne'ena napaxaguenataxanaxac, yaqto' ỹaỹaten da huo'o naq 'enec Ñim Nataxala' maye Qanatamnaxala'ai, qataq da ỹalaxaguet 'enauac nam 'enapecpi nam nqataxacpi. 13Yaqto' ca qaỹa'alquipi maye sa ỹauatton ne'ena nqataxacpi, hua'aqchigui qome, nache ishet da huo'o naq 'enec naqa'en Ñim Nataxala' maye Qanatamnaxala'ai, qom ñaq nca'altauec da netalec yi'iye 'alhua maye qoñiỹalec qom ime da qaua'axasoxoñiilec ye tala Jordán.»
Ñim Nataxala' ỹapaxaguen so Moisés qataq so Josué
14Qaq ime, nache Ñim Nataxala' 'enapega so Moisés, 'eeta':
«'Am, mashe saqaỹapeque ye laloqo' da 'aleu, qaq ỹoqo'oye 'aỹaxana qome so Josué, nache qanqo'oñiiua'a qome ñi npe'l maye huaña naxa da aỹem qanauane', yaqto' qami' sanema ca iqataxac.» Nache so Moisés qataq so Josué tareua'a co'ollaxa so npe'l maye huaña naxa da qanauane' Ñim Nataxala', 15nache Ñim Nataxala' nachaxanalo soomaye, huetaigui so lo'oc, maye nalotcheguema ye ñegueuo so npe'l. 16Nache Ñim Nataxala', 'enapega co'ollaxa so Moisés, 'eeta':
«'Am, mashe sa saqaỹaloq da 'aleu, nache 'aualegoigui qome so hua'au 'arta'alpi. Qaq ne'ena nhuo' le'ecpi saqaỹaloq qome da Aỹem ca'ai da nquisheshigui da la'amqaanataxanaxac, cha'aye ca'ata qome na natamnaxala'pi na lma' yi'iye 'alhua maye nalec qome. Huaña nache aỹem ca'ai qataq ỹalat da ñaỹamaxataxac maye so'otec co'ollaxa namayepi. 17Qaq que'eca na'a'q qom yo'oq de'era, nache 'eroigui qome da ỹayeloxo da salemataỹa namayepi, qataq sheca'ai, nache saishet da seqocha'a, qataq soxochiisop da ỹashiguiỹaxac. Qaq huaña qome nache namayepi sa qalaq da noxonec, qataq da nvita na qalota qauemsat, qaq huaña nache choche, 'eetac: ‹¿Chaq ta'ainco' da qomi' nvitalo 'enauac ne'ena qauemsat, peta'a souaxat da mashe saishet da qomi' hueta'agueta Ñim Qanatamnaxala'?› 18Qalaxaye que'eca na'a'q, Aỹem, ỹataqta soxochiisop qome namayepi da ỹashiguiỹaxac, souaxat na qauem maye ỹo'otpi, cha'aye ca'ata ca ỹaqa'a atamnaxala'pi da natamnot.
19Qaq ỹoqo'oye nagui iuen da 'iyiñi de'era no'onec, nache 'auapaxaguenec na Israel le'ecpi yaqto' ỹo'on, qaq damaye nachera qome da maiche dataỹa'aguet namayepi. 20Cha'aye qom senoxonaqcheteua'a ye 'alhua maye sachaxanapecot co'ollaxa so hua'au lta'alpi namayepi, yem 'alhua maye huaña da sa qoue na huaca lche' qataq na te'esaq lli'i, qataq ivitta'a qome da ỹataqta saishet da iqouattac qataq chaxaraicpi, qaq huaña qome nache ca'ata na ỹaqa'a atamnaxala'pi da natamnot, nache Aỹem ỹo'otan qataq ỹalat da ñaỹamaxataxac, maye so'otec co'ollaxa namayepi. 21Qalaxaye qom ivireguet nam qauemsat qataq ca lta'araic nque'eenaxac, nache ne'ena no'onec maiche iuennataxanaxan qome namayepi, cha'aye ca dalaxaicpi maye chegoxoguet namayepi qom do'onaxan, nache maiche ntoonaxanaxan namayepi. Cha'aye Aỹem, mashe saỹaten da lhuennataxa namayepi, nagui da ñaq saxanaxa da senoxonaqcheteua'a yi'iye 'alhua, maye sachaxanapecot co'ollaxa namayepi.»
22Qaq nacheso se'eso na'a'q da so Moisés ỹiyiñi de'era no'onec, qataq nache ỹapaxaguenec so Israel le'ecpi.
23Qaq co'ollaq ime, nache Ñim Nataxala' ỹanem da la'aqtac so Josué, maye llalec so Nun, 'eeta':
«'Ana'añaxat qome qataq 'aua'añaxachigui ye 'arhuel, cha'aye nache 'am qome da 'aunoxonacheteua'a ne'ena shiỹaxauapi ye 'alhua maye sachaxanapecot co'ollaxa ne'ena Israel le'ecpi, qaq Aỹem qome 'am soota'aguet.»
24Nache so Moisés co'ollaq ime da ỹerelec aso nere ne'ena nqataxacpi, 25nache 'enapega so leviitapi maye qaipataxalec co'ollaxa da ỹachetac aso arca maye laỹe' da naỹamaxataxac Ñim Nataxala' nache, 'eeta':
26«Qauacoñiỹa ana'ana nere maye nanettalec na nqataxacpi, nache qauachiiteua'a na laỹe añi arca maye laỹe' da naỹamaxataxac Ñim Nataxala' maye Qanatamnaxala'ai. Qaq nache huetaña qome, yaqto' aỹem da'aqtaxanem qome da 'eetec na Israel le'ecpi. 27Cha'aye aỹem saỹaten da ỹataqta sa qana'axaỹaxañi, qataq qami' qaramchiguilo, ten nagui da ñaq qami' salectaiguilo qalaq huo'o naxa da qauataiỹa'aguet Ñim Nataxala', ¿qaq chaq 'eetec ca qarataxaqui qom seleu? 28Qaq ỹoqo'oye qanaviquiiuo 'enauac na nqueroxonecpi, qataq na lataxala'pi na maiche nalamaxat nhuo' le'ecpi, yaqto' sa'aqtaxanem namayepi ne'ena na'aqtacpi, qaq na piguem qataq ana 'alhua ỹauaachigui ñaqa'en de'era, yaqto' maiche qami' dataỹa'agueta qome. 29Cha'aye aỹem saỹaten da qom seleu, nache qami' qauo'oche qome na qauempi, qataq qoquiỹa'ai da ñecỹaxac maye qami' samaxaleguete da qoquiigue, qataq da qami' taleguete qome ca qauem qanhuaxanaguiiqui, souaxat da qauo'oche ca qauem da qami' ỹauaachiguilo Ñim Nataxala', qataq da qauayeloqchichi Ñimaye.» 30Nache so Moisés ỹo'ootauegue co'ollaxa se'eso no'onec ỹachegoxotchiguiña so hua'auchiguiñi lerec nache choche ivitta'a so pa'atec, hua'aqchigui naqa'en 'enauac so lapoota'a't Israel le'ecpi.
